Sareak

☉ Galdakao

Gaizka Chamizo: «Mundua ikusteko modu propioa dute umeek; horrek zirrara eta inbidia sortzen dizkit»

‘‘Begiak’ ipuina kaleratu du Gaizka Chamizo galdakoztarrak Miguel Gren ilustratzailearekin. Enpatia, maitasuna edota orainaren boterea dira lanaren oinarri. Liburuaz gain, bere artista ibilbideaz mintzatu gara Chamizorekin

|

Artista multidiziplinarra da Chamizo / Geuria

Artista multidiziplinarra da Gaizka Chamizo galdakoztarra (Galdakao, 1987). Klown eta aktore lanetan ikusi ahal izan dugu, esaterako, ‘Irati’ edo ‘Maixabel’ filmetan, partaidetza txikia izan arren. Musikan ere trebatu da galdakoztarra, baita literaturan ere. Duela hilabete batzuk ‘Begiak’ liburua argitaratu du Miguel Gren ilustratzailearen batera, iparraldeko ZTK argitaletxearen bitartez. Haur batek —kasu honetan Jael da protagonista— oheratu aurretik bere amonarekin dituen elkarrizketen bidez hainbat istorio kontatzen ditu ipuinak: “Amonak, bere bilobari egoera zailak adorez kudeatzeko bizipoza eskaintzen dio”, azaldu digu Chamizok. ‘Begiak’ ipuinaz eta orokorrean bere artista bizitzaz hitz egin dugu Gaizkarekin.

‘Begiak’ liburua aurkeztu zenuen abenduan Miguel Grenekin batera Durangoko Azokan. Zein da liburu honen abiapuntua?
Istorio zehatz bat kontatzeko gogoa da abiapuntua. Ipuin kontalaritza asko maite dut eta, normalean, saio hauetan dagoeneko existitzen diren kontuak kontatu izan ditut beti. Banuen gogoa nik neuk ere nire barne istorioak paperean itsasteko eta plazaratzeko. Nik testuak idatzi ditut eta Miguelek ilustrazioak egin ditu.

Nola sortu zen Miguelekin elkarlana?
Miguel eta biok aspaldiko lagunak gara eta gure lanaren berri izan dugu betidanik, nola ez, batak bestearena goraipatuz eta norberarena gutxietsiz. Hala, elkarrekin proiektu bat sortzea erabaki genuen 2020an, batak bestearen lana elikatuz beti. Horrela sortu zen ‘Begiak’.

Jael eta bere amona dira protagonistak, eta lo hartu aurretik izaten dituzten elkarrizketen bidez hainbat istorio kontatuko dizkigute.
Haur txikien egunerokoan badago oso momentu berezi bat: oheratzea. Ume askorentzat oso momentu zaila da horixe; izan ere, bakarrik, ilunpetan eta heldu baten babesik gabe dauden egunaren une bakarra da. Sarritan ume hauek lotara eramaten dituen helduaren konpainia denboran ahalik eta gehien luzatzen saiatzen dira, ostean datorkien momentu zailari aurre egiteko beldurrez. Momentu hau da, hain zuzen ere, ipuinean kontatzen dena eta nola amonak, bere bilobari egoera zailak adorez kudeatzeko bizipoza eskaintzen dion.

Haurren munduaz ari zarete. Zerk erakartzen zaituztete haurren mundu horretatik?
Beti errepikatu izan dut haurrek badaukatela berezko magia bat, zoritxarrez hazten doazen heinean galtzen dutena eta guk, helduok, heldu izateagatik dagoeneko ez daukaguna. Mundua antzemateko modu propioa daukate txikiek, “bihotz ibiltariak” dira, kutsatu gabeak, eta horrek zirrara sortzen dit, baita inbidia ere.

“Leku askotan izaten uzten ez didaten hori izateko askatasuna ematen dit antzerkiak, baita esan ezin daitezkeen gauzak ozen oihukatzeko askatasuna ere”

Enpatia, maitasuna edota orainaren boterea aipatzen dituzue liburuan. Horren behar nabarmena ikusten duzue egungo gizartean?
Elkarbizitza eta osasun mental sano baten oinarriak dira hitz horiek. Ez da gauza berria azkeneko hamarkadetan kontzeptu horiek hartu duten pisua, gure gizarteko hainbat gaitzen ondorioz. Haurtzaroko lehen etapetatik bultzatu beharreko baloreak bihurtu dira, elkarbizitzaren etorkizun osasuntsu baten bidean behintzat.

// Geuria

Literatura jorratu duzu, baita antzerkia, zinema eta telebista ere. Artista multidiziplinartzat duzu zure burua?
Ez nuke galdera hau erantzuten jakingo, azken finean esparru horiek nire ogibideak direlako, edo behintzat noizbait izan direlako. Baina aipatu nahiko nuke, bizitzan zehar momentu eta barne prozesu ezberdinetan nabigatu ahala, gure emozioak kanalizatzeko behar eta modu ezberdinak sentitzen ditugula. Arteen eremua izaten da askorentzat euskarri hori eta desira edo beharraren arabera tekla bat edo bestea jotzen dugu.

Non ikasi duzu interpretazioa?
Klowna izan zen nire abiapuntua unibertsitateko ikasketak hasi nituenean. Arte horrekin maiteminduta, Granadako pailazo eskola batera joan nintzen ikastera. Eta geroztik, etengabeko formakuntzan jarraitu dut, hainbat leku, irakasle, zuzendari eta bidelagunen eskutik.

Musikan ere txistua, alboka, wishle-a eta ukelelea jotzen dituzu.
Txikitan hasi nintzen txistua jotzen Galdakaoko musika eskolan Arantza Zatonekin. Folk musikaren maitalea naiz eta bide horretatik jarraitu nuen. Wishtle-a nire kabuz ikasi nuen, ez da zaila, eta albokan Fede de Diosekin trebatu nintzen. Orain dela urte pare bat ukelelearekin ere tematu nintzen nire kabuz, eta aurten musika eskolara bueltatu naiz trikitiarekin saiatzera! Musika nire egunerokotasuneko basiko bat da eta sekula ez da berandu maite duzun instrumentu berri batekin hasteko!

Era berean, pole dance-a ere praktikatzen duzu, eta 2019an Espainiako txapeldunorde izan zinen PoleArnoldSpain txapelketan!
Pertsona mugitua naizela esango nuke, eta kirola egitea oso ondo datorkit, energia hori kanalizatzeko. Klownean hasi nintzenean, zirku akrobazietan ere trebatu nintzen diziplina ezberdinetan hainbat urtez. Saltoka saltoka, pole dance-a ezagutu nuen… Kalistenia erako ariketak, antzerki eta dantza koreografia batekin konbinatzeko aukera hau aurkikuntza ederra izan zen niretzat, eta horretan dihardut gaur egun ere.

// Geuria

Zeinu hizkuntza ere ikasi duzu. Hitzezko komunikazioaz berba egiten digute ia beti, baina zeinu hizkuntza ahaztu egiten zaigu.
Gaztaroan ikasi nuen hizkuntza da, nire ikasketekin eta garaiko errealitatearekin lotura zuzena izan zuena. Badaude ikusezinak diren hainbat kolektibo, esaterako, ezgaitasunen bat duten pertsonak. Eta kolektibo horren barnean ere, pertsona gorrak kolektibo ikusezin bezala sumatzen ditugu askotan. Hizkuntza bat ikasteak herrialde jakin bateko kulturara hurbiltzea dakar, nahi gabe ere. Zeinu hizkuntzarekin berdina gertatzen da: kasu honetan gor-komunitatearen kultura eta errealitatera hurbiltzea da. Kultura ezberdinekin norbera aberasteko hautua, ordea, norberarena da.

Literatura, antzerkia, telebista, zinema, musika… Zer ematen dizu bakoitzak?
Bada, barne beharrizanen arabera bakoitzak gauza bat edo beste ematen dit, lehen aipatu bezala.

Diziplina horietatik guztietatik non zaude erosoen eta zergatik?
Jorratu ditudan arte diziplinen artean, zalantzarik gabe, antzerkia da gaur egun gehien ematen didana. Zuzenekoa, taula gainekoa. Eta, zorionez, ordu gehien eskaini dizkiodan arloa da. Lehen aipaturiko emozio kudeatzaile fabrika izateaz gain, niri gaur egun askatasuna eskaintzen dit. Jendarte honetako leku askotan izaten uzten ez didaten hori izateko askatasuna ematen dit antzerkiak, baita esan ezin daitezkeen gauza horiek guztiak ozen oihukatzeko askatasuna ere. 

Egin dituzun lan guztietatik, zein da maitasun handienarekin gogoratzen duzuna?
Oso galdera zaila! Baina erantzun behar badut ‘I’m a real artist’ esango nuke. Orain dela zortzi urte lagun artean sortu eta estreinatu genuen antzezlan bat da. Antzerki fisikoa eta klowna uztartuz, tragikomedia bat sortu genuen, non lau aktore gaztek beren beldur, kezka, gogo eta ametsak oihukatzen dituzten. Zoragarria izan zen, publikoarekin hartu emana bete-betekoa, oso ganberroa eta punkia. Ez genituen emanaldi asko egin, hala ere. Baina, zorionez, Galdakaon antzezteko aukera izan genuen!

Lankide askorekin lan egin duzu. Lanean gehien norekin gozatu duzun galdetuko banizu…
Erraza: lagunekin!  Hala ere, nire lana maitatzearen beste motibo bat, gizaki ezberdinekin lan egin eta modu berezian erlazionatu ahal izatea da. Bidelagun bakoitzak gauza desberdinak ematen dizkizu, batzuk onak eta beste batzuk, ez horrenbeste. Jende berria eta gauzak egiteko modu berriak etengabe ezagutzea bezalakorik ez dago, helmugarik gabeko etengabeko ikasketa prozesu bat da bidea, gainera, jolas kode batean egiten dena.

Eta norekin lan egin nahiko zenuke etorkizunean?
Jende berria ezagutzen jarraitu nahiko nuke. Ikusmolde berriak eskaini ahal izango dizkidan edozein pertsonarekin lan egingo nuke. Agian zahartu ahala, ezagutza gose hau amatatzen joango zait, eta dagoeneko ezaguna zaidanarekin gelditu nahi izango dut. Baina momentuz, beste bide horretan zoriontsu sentitzen naiz.

Zeintzuk dira zure hurrengo proiektuak?
Oso lan ezegonkorra da hau, hori argi izan behar du lanbide honetan aritu nahi duen edonork, eta egun asko izan ditzaket diru iturri izan daitekeen lan barik. Epe laburrean, zorionez, proiektu pare bat dauzkat. Ikus-entzunezkoetan gauza txikiak egiteko aukera ematen didate tarteka eta bestetik, martxoan Arriaga antzokian estreinatzekoa den ‘Guridi. Magical bidaia’ proiektuan parte hartuko dut, Pako Revueltasek zuzenduta. Gero, auskalo!

☉ Galdakao

#A21 / Emaitzak / Galdakao / EAJ garaile, baina inoizko lehia estuena EH Bildurekin

#A21 / Galdakao / Eusko Legebiltzarrerako hauteskundeak 2024 / Emaitzak

|

Osorik irakurri

☉ Galdakao

Urreta kiroldegia handitzeko lanak udan hastea aurreikusi du Galdakaoko Udalak

|

Urreta kiroldegiak izango dituen zenbait espazio berri // Galdakaoko Udala

Urretako kiroldegiaren barnealdea eraberritzeko eta handitzeko obrak egingo ditu Galdakaoko Udalak. Aurreikuspenaren arabera lanak “uda ingururako” hasi nahi ditu Udalak.

Besteak beste, ariketa kardiobaskularrak, indar ariketak edota yoga egiteko erabilera anitzeko aretoak sortuko dituzte eta horretarako eraikin berri bat eraikiko dute kiroldegiaren sarreraren eta igerilekuaren arteko gune hutsean, solariuma deitzen dioten gunean, alegia.

Era berean, solarium horren azpian dagoen sotoa ere egokituko dute, 500 metro karratu ingurukoa.

Guztira, 1.000 metro karratu berri gehiago izango ditu kiroldegiak, eta aireztapen naturala ezarriko dute. Inbertsioa 3 milioi eurokoa izango da.

Hiru fase

Obrak hiru fasetan burutuko dituzte, “erabiltzaileei ahalik eta kaltre txikiena eragiteko”, diote udal ordezkariek.

Hasteko, beheko solairuaren barrualdea konpontzeko eta hobetzeko lanak egingo dituzte: “Igerilekuetarako irisgarritasuna hobetuko da arrapala bitartez, egungo aldagelak berrituko dira eta bina aldagela eta komun egokitu gehituko dira”, diote udal arduradunek. Lehen fase honetako lanak egiteko lau hilabete erabiliko dituzte, gehienez.

Bigarren fasea kiroldegia handitzekoa izango da. “Solarium gisa ezagutzen den gunean bi solairu eraikiko dira, eta horretarako, lur azpian dagoen sotoa egokituko da aurrena. Fitness eta kardio ariketetarako eremu berriak jarriko dira bertan, eta aldagela berriak. Larrialdietarako irteera berri bat ere gehituko da, besteak beste”, diote. Bigarren faseko iraupena, gehienez, zozrtzi hilabetekoa izango da.

Lan horiek amaitu ondoren ekingo diote solarium guneari teilatua jarri eta bi solairu eraikitzeari. “Beheko eta lehenengo solairuetan bi gune diafano egongo dira, besteak beste, askotariko ekintzetara egokitzeko”, diote. Enpresa esleipendunak 14 hilabete erabili ahalko ditu, gehienez, lan hauetarako. Guztira, 26 hilabete.

Azterketa fasean

Urretako kiroldegiaren barnealdea eraberritzeko eta handitzeko lizitazio prozesua azken txanpan da. Apirilaren 17an, asteazkenez, epea bukatu zen enpresek euren eskaintzak egiteko epea.

Orain prozesua azterketa fasean dago, udal teknikarien esku. Apirilaren 24an eta 30ean bilduko da kontratazio mahaia eta bertan erabakiko dute zein enpresak gauzatuko dituen obrak.

Osorik irakurri

☉ Galdakao

Herritarren parte hartzerako lehen ordenantza onartu du Galdakaoko Udalak

|

Herritarrak Udalak sustatutako parte-hartze prozesu batean lanean // Galdakaoko Udala

Herritarrek Galdakaoko udalgintzan parte hartzeko bideak eta moduak batzen dituen arautegia onartu du lehen aldiz Galdakaoko udalbatzak gobernu taldearen aldeko botoekin eta EAJren eta PSEren abstentzioarekin.

Parte-hartze ordenantzaren bitartez erabakiak hartzeko prozesuetan eta udal intereseko gaien kudeaketan herritarren parte hartzea erraztu eta bultzatuko du Udalak. Besteak beste, Udalaren aurrean herritarrek parte hartzeko dituzten eskubideak jaso dituzte arautegian, baita galdakoztarrek parte hartze prozesuak, kontsultak edo osoko bilkurako gai zerrendan gai bat sartzeko aukera ere.

“Eskaera hauek, eta egin daitezkeen beste batzuk ere, sinadura bilketaren bidez babestu behar dira. Sustatu nahi den ekintza motarako beharrezkoa den sinadura kopurua ere jasotzen du ordenantzak, esaterako”, diote udal ordezkariek. Ordenantzak guztira 170 artikulu ditu, bederatzi titulutan eta 28 kapitulutan banatuta.

2022tik lanean

Ordenantza honen edukia lantzeko, hainbat ekintza bildu dituen partaidetza prozesu publiko bat abiatu zuen Udalak 2022an herritarren, elkarteen, kolektiboen, udal teknikarien eta Udalean ordezkaritza duten alderdi politikoen ekarpenak eta ideiak jasotzeko.

Jasotako proposamenekin eta Donostia, Gasteiz, Oñati, Tolosa, Bartzelona eta beste udal batzuetako araudien azterketa egin ondoren, ordenantzaren lehen zirriborro bat idatzi zuten.

Iazko abenduaren 21eko osoko bilkurak dokumentuaren behin behineko onespena egin ostean, martxoko osoko bilkuran behin betiko onartuko du udalbatzak.

Osorik irakurri

☉ Galdakao

Sakeleko telefonoa erabiltzeko doako tailerra antolatu dute Galdakaon jubilatuei zuzenduta

|

Galdakaoko Udaleko Gizarte Ekintzako Adinekoen Dinamizazio Zerbitzuak telefono mugikorra erabiltzeko tailerra antolatu du apirilaren 22an eta 24an.

Tailerra doakoa da eta Iberluzeko Etxea Anaitasuna Adinekoen Zentroan egingo da 16:30etik 18:30era bitartean.

“Bi saioko tailer horretan telefono mugikorrari etekin handiagoa ateratzeko ikasiko dute parte hartzaileek”, diote udal ordezkariek.

Tailerrean izena emateko epea zabaldik egongo da apirilaren 8tik aurrera. Interesdunak Adinekoak Dinamizatzeko Zerbitzuaren bulegora bertaratu daitezke astelehenetik ostiralera 10:00etatik 13:30era, eta ostegunetan 16:00etatik 18:00etara.

Irteera Gernikara

Sakeleko telefonoa erabiltzeko tailerraz gain, jarduera gehiago antolatu ditu apirilean Gizarte Ekintzako Adinekoen Dinamizazio Zerbitzuak: bisita kulturala Gernikako Euskal Herria Museora eta Gernika-Forua-Axpe ibilaldia.

Bisita kulturala apirilaren 18an izango da eta ‘Markos Gimenoren karteletrak’ erakusketa ikusi ahal izango dute herritarrek: 11:00etan euskarazko taldea antolatu dute eta 12:00etan gaztelerazkoa.

“Erakusketa honetan, Markos Gimenok egindako hainbat palindromo aurkituko dira, baina baita Euskal Herriko hainbat artista, lagun eta diseinatzailek, esaldi horientzako, sortu dituzten obrak ere. Guzti hau antolatzen Joseba Sarrionandia eta Esteban Montorio izan dira”, diote udal arduradunek.

Bisita gidaturako izena emateko epea apirilaren 8an ere zabalduko du Udalak (doan), eta gehienez 15 lagun joan ahalko dira talde bakoitzeko.

Gernika-Forua-Axpe ibilaldia

Bestetik, Gernika-Forua-Axpe ibilaldia apirilaren 25ean antolatu dute. “12 kilometroko ibilbide lineal ederraz disfrutatu ahal izango dute herritarrek”, diote Udaletik.

Honako gune hauetatik igarotzen da ibilbidea: Gernika, Urbieta, Oka Ibaia, Forua, Gordiz, Zarragagoikoa, Foruko Bidea, Lakaena, Maitea Baserri, Axbiribil (Atxondo), Karabizurrieta, Goikogana, Irestagorri, Artolena, Birjinarestigoikoa, Altamira, San Bartolome, eta Axpe Ermita (Busturia).

Txangoan izena emateko epea apirilaren 12an zabalduko du Udalak (doan) eta gehienez 30 lagun joan ahalko dira.

Osorik irakurri

☉ Galdakao

Galdakaoko Jai Batzordeak logoa izango du eta hori aukeratzeko lehiaketa zabaldu dute

|

Galdakaoko jaien hasiera iaz // Geuria

Galdakaoko Jai Batzordeak logo propioa izango du. Hala erabaki dute Jai Batzordeko kideek, eta logoa zehazteko lehiaketa zabaldu dute.

Lehiaketan 16 urtetik gorako lagunek parte hartu ahal izango dute. Diseinuak bidaltzeko epea zabalik dago ekainaren 1era arte.

Parte hartzaileek galdakaokojaibatzordea2020@gmail.com helbidera elektrikora bidali behar dituzte euren diseinuak, Logo gakoa idatzita. Pertsona bakoitzak logo bat baino gehiago bidali ahal izango ditu.

Jai Batzordeko kideek zehaztu dutenez, logoa “kolore bakar batekoa” izango da eta bi modutan aurketu behar da: batean ‘Galdakaoko Jai Batzordea’ argi ikusi beharko da, eta bestean, irudia baino ez da agertuko, testurik gabe.

“Tipografia ere librea da”, diote, eta gaineratu dute debekatuta dagoela Inteligentzia Artifizialaren bitartez logoa egitea.

Ekainaren 15ean egingo dute publiko logo irabazlea eta egilearen izena. Epaimahaia Jai Batzordearen lantalde batek osatuko du, “eta komenigarriak izan daitezkeen egokitzapenak eskatu ahal izango dizkio diseinu irabazlearen egileari, halaxe baloratzen baldin badu”, diote.

Irabazleak bi pertsonentzako bi afari irabaziko ditu Galdakaoko bi jatetxetan, “2024an zehar disfrutatzeko”, diote. Gainera, “plaka oroigarri bat ere” jasoko du irabazleak.

Irabazlerik egon ezean, lehiaketa datorren urtean errepikatuko dutela adierazi dute Galdakaoko Jai Batzordetik.

Osorik irakurri