Urtero bezala, Galdakaoko SantaKurtzak jaietan igoera antolatu dute Ganguren mendira Ganguren Mendi Taldekoek. Aurtengo hitzordua irailaren 10ean izango da eta 09:00etan abiatuko dira mendi taldearen egoitzatik bertatik. Bederatzigarren aldiz egingo dute igoera hau herriko jaietan.

12,5 kilometroko ibilbidea doakoa izango da eta edonork hartu dezake parte. Itzulerako ordua 13:00ak eta 14:30ak aldera izango dela aurreikusi dute Galdakaoko mendizaleek. Ganguren Mendi Taldetik azaldu dute izena ematea beharrezkoa dela eta parte-hartzearekin pintxo bat emango diete parte-hartzaileei Ganguren Tabernan.

Pavotseko gailurra // Mendikat

Iraileko irteerak

Galdakaoko jaietako ibilaldiaz gainera bestelako irteerak prestatu dituzte urte amaiera arte Ganguren Mendi Taldekoek: irailaren 2an eta 3an Huescako Pirinioetara joango dira, Pavots gailurrera (3.124mt): “Goi-mendia izango da egun biko irteera hori”, azaldu dio Eduardo Olea Ganguren Mendi Taldeko kideak GEURIAri.

Irteera irailaren 2an egingo dute 07:00etan Galdakaoko udaletxeko plazatik. Bertan autobusera igo eta Pirinioetara abiatuko dira. Helmugara helduta, lehenik eta behin zailtasun ertaineko ibilbidea egingo dute Angel Orus aterpetxera.

Hurrengo egunean, hilaren 3an, Pavots gailurrera igoko dira eta abiapuntura bueltatuko dira, autobusera igo eta Galdakaorako bidaiari ekingo  diete mendizaleek. Ibilaldi osoa Ganguren Mendi Taldeko webgunean eskegi dute, hementxe ikusgai.

Ibilbidearen iraupena 6 ordu eta 10 minutukoa izango da eta gailurrerainoko igoera zailtasun handikoa dela azaldu diote GEURIAri mendi taldetik. Bazkideek 70 euro ordaindu beharko dute eta bazkideak ez direnek, berriz, 85 euro. “Gomendagarria da eskularruak, elurretarako betaurrekoak, arropa beroa, praka luzeak eta era horretako arropa eramatea”, azaldu dute Ganguren Mendi Taldetik, “Baita gauerako frontala eramatea ere”.

Hildako mendizaleei eskainitako monumentua, Betsaiden // Elorrio Turismo

Beste irteera aipagarri bat Betsaiderako ibilbidea izango da. Irailaren 17an egun erdiko irteera bat prestatu dute Betsaidera (Gipuzkoa, 555 mt). Betsaide 564 metroko garaiera duen muino txiki bat da, Anboto (SO) eta Udalaitz (NE) mendiguneen arteko erdibidean kokatua.

Oharkabean pasatuko litzateke, baina bertako gailurrean Bizkaiko, Arabako eta Gipuzkoako mugak elkartzen dira, eta horrek egiten du berezi lekua. Tontorrean, 50eko hamarkadan, euskal mendizale federazioak hildako mendizale guztien omenezko monumentu bat eraiki zuen.

Betsaideko tontorrean, 50eko hamarkadan, euskal mendizale federazioak hildako mendizale guztien omenezko monumentu bat eraiki zuen

Gaur egun, iraileko hirugarren igande guztietan, hiru herrialdeetako eskaleak biltzen dira leku horretan, azken urtean hildako lankideak gogoratzeko. “Aipamen txiki hau omenaldi xume bat da, guk oraindik horretarako zortea dugunaz gozatzen zuten bitartean utzi gintuztenontzat”, azaldu dute Ganguren Mendi Taldetik. Ibiltzen hasteko ordua 09:45ak izango da eta 14:30-15:00ak aldera Galdakaora heltzea espero dute.

Irailaren 30ean Hiru Gurutzeak martxa antolatu dute, mendi taldeko esanguratsuenetarikoa

Irailaren 30ean Hiru Gurutzeak martxa antolatu dute, gauerdian. Ganguren Mendi Taldetik azpimarratu dute ibilaldi hau taldeko jarduera garrantzitsuenetarikoa dela. Irteera 00:05etan egingo dute eta 80 kilometroko ibilaldia izango da. 19:00ak arte iraungo du kirol proba honek.

Urrira begira beste hainbeste irteera prestatu dituzte Galdakaoko mendi taldetik: Hiru Gurutzeak, Picos de Europako Torre Blancarako igoera, Elexaldeko jaietako ibilbidea, Euskal Mendizaletasunaren jaia, Aia-Pagoeta-Zarautzerako ibilbidea (Gipuzkoako Parke Naturala) eta baita Everesterako baserako trekking saioa (6.000 mt).