☉ Galdakao
‘Gurean’ plataforma digitala kaleratuko du Galdakaoko Udalak, udalerriko dendak, ostalaritza eta negozio txikiak bistaratzeko
Galdakaoko dendari, ostalari eta negozio txikiak bistaratzeko ‘Gurean’ plataforma digitala kaleratuko du Udalak datorren urte hasieran.
Galdakaoko dendari, ostalari eta negozio txikiak bistaratzeko ‘Gurean’ plataforma digitala kaleratuko du Udalak datorren urte hasieran. Egun plataforma hori garatzen ari dira eta asmoa da datozen asteetan Galdakaoko merkatari, ostalari eta autonomoei horren berri ematea eta parte hartzeko gonbidapena egitea. ‘Gurean’ plataformak herriko denda, ostalaritza-establezimendu eta negozio txiki guztiak bildu nahi ditu, herritarren eskura ‘klik’ batean egon daitezen.
Plataforma digitala doakoa izango da bai merkatari, ostalari eta autonomoentzako, bai herritarrentzako. Establezimendu bakoitzaren datuak, helbidea, telefono zenbakia, sare sozialetara estekak, saltzen dituzten produktuen argazkiak edota taberna zein jatetxeen kartak jasoko ditu ‘Gurean’ plataformak. Plataforma digital hau ez da denboran mugatua izango, eta etorkizunean birirautea da asmoa: “Pixkana-pixkanaka hasiko gara. Haurtzaindegian bagina bezala ondoren Unibertsitatean bukatzeko. Hau da, lehenik eta behin komertzio, taberna, jatetxe eta negozio txiki guztiek bat egitea da asmoa. Galdakaon 500 negozio txiki inguru daude, eta 130 taberna inguru. Ondoren, helbide elektronikorik ez dutenentzako horrelako bat sortzea, whatsapp zenbakirik ez dutenentzako horrelako beste bat sortzea edota sare sozialetan izena ematea izango litzateke hurrengo urrats bat. Gero aztertuko dugu zeintzuk diren premia nagusiak”, dio Aitziber Bonilla Dendari Elkarteko lehendakariak: “Online erosteko aukera ere aztertuko dugu, beharrak horrela esaten badu, baina jakitun gara prozesua ez dela hain azkarra izango. Teknologia berrietara ez gaude denak ohituta, beraz, pixkanaka joango gara plataforma garatzen”. Hain zuzen ere, teknologia berrietan trebeak ez diren horiei laguntza eskainiko diete Udaletik: “Edukiak plataformara igotzeko laguntza izango dugu beti”, dio Bonillak.
Maraka eta Cuchillo sormen taldeak batera ari dira ‘Gurean’ plataforma digitala garatzen. Galdakaoko Udalak 30.000 euro inguruko inbertsioa egingo du. “Asmoa da urtero plataforman zenbait berrikuntza gehitzea”, dio Bonillak. Garazi Camino Maraka taldeko kidea da, eta plataforma diseinatu duen lantaldean ari da lanean. “Ikerketa fase sakona egin behar izan dugu, alde batetik denda, ostalaritza-establezimendu eta negozio txikien beharrak identifikatzeko, eta bestetik, herritarren nahiak zeintzuk diren jakiteko”, dio Caminok. Ondoren, plataformak izango dituen ezaugarriak edota edukiak nolakoak izango diren garatzen ari dira: “Erabiltzeko erraza izango da. Kategoriak eta iragazkiak egongo dira, herritarrek bilatzen dutena errazago aurkitzeko”.
Plataforma erraldoien aurrean, tresna lagungarria
“Tokiko dendek, ostalaritza-establezimenduek eta negozio txikiek herritarren laguntza behar dute, eta are gehiago bizi dugun egoera honetan. Erosteko eta kontsumitzeko egoera aldatzen ari da eta horretara egokitu behar dugu. Gainera, pandemiak azkartu egin du hau guztia. Instituziook bidelagun izan behar dugu; derrigorrezkoa dugu tokiko merkataritza, ostalaritza eta negozio txikiak laguntzea, eta Galdakaoko Udalak apostu irmoa egin du”, dio Iñigo Hernandoalkateak: “Plataforma erraldoien aurka egitea oso zaila da, baina tresna honek lagundu egingo du tokikoa sustatzen. Herriko komertzioak eta ostalaritza defendatu behar ditugu”.
Javier Ibarretxe Sustapen Ekonomikorako zinegotziak Hernando alkatearen hitzekin bat dator: “Erosteko eta kontsumitzeko sistema aldatzen ari da eta horregatik berritzaileak izan behar dugu. Herriko saltoki, taberna, jatetxe eta negozio txiki guztien base bat sortu behar da, horiek denak bola berean sartzeko”, dio Ibarretxek: “Tokikoak diren guztiak ezagutzera eman nahi dugu, izan herri erdigunekoak zein erdigunetik kanpokoak izan”.
☉ Galdakao
Tokiko produktuak goi-mailako sukaldaritzara eramateko jardunaldiak antolatu dituzte Galdakaon
KM0 Jardunaldi Gastronomikoak antolatu dituzte Galdakaon urriaren 15etik 17ra bitartean.
Ekimenak tokiko produktuak goi-mailako ostalaritzara eraman nahi ditu, “sukaldaritza sortzaile, berritzaile eta ausart baten aldeko apustua eginez, sustraiak ahaztu gabe eta lehengai nagusi gisa gertuko eta kalitateko produktua aldarrikatuz”, diote udal ordezkariek.
Jardunaldiak Galdakaoko Ostalaritza Eskolan izango dira, 17:00etatik 20:00etara.
Galdakaoko Udalak eta Ostalaritza Eskolak antolatu dituzte jardunaldiok, “tokiko jarduera ekonomikoa sustatzeko konpromisoaren ildotik”.
Erakustaldi praktikoak
Jardunaldien helburua da diziplina anitzeko prestakuntzaren bidez Galdakaon ostalaritza sektore indartsuagoa eta nabarmenagoa ezartzea.
Horretarako erakustaldi praktikoak eta hitzaldiak antolatu dituzte. Hizlariak “lehen mailakoak” izango dira: Beñat Ormaetxea Jauregibarria jatetxeko eta Palacio Arriluze hoteleko nagusia; Jon Bastante Berrizko Ibarra Baserriko barazki ekoizlea; Jose Pablo Larrea Baserria Km0 kooperatibako bozeramailea; eta Gari Rios Itsasmendi upategiko zuzendari teknikoa.
Muguru parkeko jolasak berrituko ditu Galdakaoko Udalak. “Denboraren eta erabileraren ondorioz hondatu eta apurtu egiten dira zabuak eta berritzeko beharra sortzen zaie”, diote udal arduradunek.
Zehazki, zabuak margotuko dituzte, zorua aldatuko dute eta txirrista berria jarriko dute.
Lanak hilabetez luzatuko dira, eta konponketa lanek irauten duten bitartean jolas parkea ezingo da erabili.
Galdakaoko Udalak 88.000 euro bideratuko ditu lan horietara.
☉ Galdakao
Garapen jasangarriaren alde gazteen pentsamendu kritikoa sortzea bilatuko dute Galdakaon
Ekoizpen eta kontsumo arduratsua, pobrezia desagerraraztea, desberdintasunak murriztea, kalitatezko hezkuntza eta helburuak lortzeko aliantza landuko dituzte Gazte Plazaren bidez
Garapen jasangarrirako helburuak gazteei ezagutarazi eta horietako batzuen inguruan sakontzeko jarduerak antolatu dituzte Galdakaon urriaren 17tik 22ra bitartean.
Gazte Plaza ekimenaren bidez, ekoizpen eta kontsumo arduratsua, pobrezia desagerraraztea, desberdintasunak murriztea, kalitatezko hezkuntza eta helburuak lortzeko aliantzak bezalako gaiak landuko dituzte gazteek.
Ardanza parkean jarriko duten karpan erakusketa bat egongo da, 12:00etatik 19:00etara bitartean. Karpa zabalik egongo da edozein herritarrentzat; hala ere, 12:15etik 16:00etara bitartean DBHko 3. eta 4. mailako ikasleak bertaratuko dira.
Gainera, bisita gidatuak, tailerrak, ihes-gela eta orientazio saioak ere antolatuko dituzte. “Jokoaren bidez Garapen Jasangarrirako Helburuei buruzko ezagutza areagotzeko, hainbat ihes-gela saio egingo dira. Saio horiek ordubetekoak izango dira, zazpi proba izango dituzte eta eskola ordutegitik kanpo egingo dira”, diote udal ordezkariek.
“Gazte Plazan proiektua gazteen artean pentsamendu kritikoa sortzeko beharrari lotutako ekimena denez, Garapen Jasangarrirako Helburuak gaurkotasuneko gaiekin lotuko dira, parte-hartzaileek jarrera desberdinak landu ditzaten”, diote.
Ildo horretan, orientazio saioa egingo dute herriko kaleetatik: “Gazteak taldeka banatu, eta, Gazte Plazatik abiatuta, herriko espazio eta dinamikak ezagutuko dituzte hainbat proben bidez. Horrela, hiri eta kolektibo inklusiboak, seguruak, erresilienteak eta jasangarriak nolakoak diren hausnartzeko aukera izango dute”, diote.
Gazte Plaza 2024
Urriak 17, osteguna
09:00-13:30 UN Etxeko tailerrak
09:30-11:30 Plazatik kaleetara jarduerak
12:00-19:00 Karpako erakusketaren irekiera
17:00-20:00 GJHen Ihes-gela
Urriak 18, ostirala
09:00-13:30 UN Etxeko Tailerrak
09:30-11:30 Plazatik Kaleetara jarduera
12:00-19:00 Karpako erakusketa ibiltariaren irekiera ordutegia
17:00-20:00 GJHen Ihes-gela
Urriak 19, larunbata
12:00-19:00 Karpako erakusketa ibiltariaren irekiera ordutegia
17:00-20:00 GJHen Ihes-gela
Urriak 20, igandea
12:00-19:00 Karpako erakusketa ibiltariaren irekiera ordutegia
Urriak 21, astelehena
09:00-11:00 UN Etxeko Tailerrak
12:00-19:00 Karpako erakusketa ibiltariaren irekiera ordutegia
Urriak 22, asteartea
12:00-19:00 Karpako erakusketa ibiltariaren irekiera ordutegia
Galdakao Gogora elkarteak irteera bat antolatu du Gurseko kontzentrazio-esparrua ezagutzeko. Urriaren 26an, larunbatez, izango da irteera: “Gurseko kontzentrazio zelaia bisitatuko dugu, baita ondoan dagoen Navarrens herria ere”, diote Galdakao Gogoratik.
Irteera 09:00etan izango da Galdakaoko udaletxetik, eta “iluntze aldera” itzuliko dira. Irteerara joan nahi duenak izena eman behar du urriaren 20a baino lehen galdakao.oroimena@gmail.com helbide elektronikora idatzita, eta 25 euro ordainduko ditu.
“Euskal Herritik nahiko gertu dagoen kontzentrazio zelaia izanik, aukera paregabea da zuzenean esparrua ezagutzeko. Izan ere, 1939. eta 1946. urteen artean, bertako barrakoietatik 64.000 preso pasa ziren, euretatik 6.555 euskaldunak, eta batzuk galdakoztarrak”, diote.
Irteera honen jatorria Galdakao Gogorak maiatzean antolatu zuen berbaldian dago: “Jabi Bilbaok hitzaldia eman zuen aurtengo jardunaldietan eta irteera honetan ere gurekin izango dugu, zelaiaren inguruko zehaztasunak azaltzeko”, diote.
Irteerari buruzko argibideak eta informazioa jasotzeko 667 488 691 eta 695 787 349 telefono zenbakiak jarri dituzte herritarren eskura.
☉ Galdakao
Leihotikan eta Tapia eta Leturia dira euskal ordezkariak Musika Bizianen
Musika Bizian jaialdiaren 10. edizioak Euskal Herriko taldeez gain, Herrialde Katalanetako, Ipar Irlandako eta Man uharteko taldeak ekarriko ditu Iturrondora urriaren 25ean eta 26an
Estaturik gabeko herrialdeen Musika Bizian jaialdiak 10 urte beteko ditu aurten Galdakaon, eta Euskal Herriko, Herrialde Katalanetako, Ipar Irlandako eta Man uharteko taldeak ekarriko ditu urriaren 25ean eta 26an: Leihotikan eta Tapia eta Leturia (Euskal Herria), Xavi Sarrià (Herrialde Katalanak), Brian Finnegan & Hunger Of The Skin (Ipar Irlanda) eta Tomas Callister & Friends (Man uhartea) dira Iturrondo plazako eszenatokira igoko diren taldeak.
Kontzertuez gain, luthierrek eta musikari artisauek leku berezia izango dute jaialdian: “Musika ulertzeko eta bizitzeko abagunea erakutsiko da; luthierrik eta musikari artisau barik ez legokeelako musikarik, funtsezkoak dira”, dio Uxue Bejarano Andra Mari Dantza Taldeko kideak. Hain zuzen ere, Andra Mari Dantza Taldeak antolatzen du urtero Musika Bizian jaialdia, Galdakaoko Udalaren eta Bizkaiko Foru Aldundiaren laguntzarekin.
Taberna Ibiltaria
Bizkaitik, Arabatik, Gipuzkoatik, Nafarroatik, Galiziatik, Kataluniatik eta Gaskoniatik etorriko dira aurten luthierrak eta musikari artisauak euren lanak erakustera, urriaren 26an. Gainera, kale animazioak ere ez du hutsik egingo edizio honetan: urtero moduan, Taberna Ibiltariak girotuko du Galdakaon urriaren 25eko arratsaldea, eta urriaren 26an Xistra de Coruxo talde galiziarra eta Galdakaoko Ad Libitum Txistu Banda arituko dira kalez kale.
“10 urtez musika bizitzen”
2014. urtean antolatu zuen lehendabiziko aldiz Musika Bizian jaialdia Andra Marik, eta ordutik ez du hutsik egin Galdakaoko egutegi kulturalean: “Munduko kultura aniztasunaren isla izan nahi du Musika Bizianek eta hori erakutsiko du aurten ere atzerritik etorritako taldeekin, finean, kultura gutxiengotu eta zapalduen arteko elkartasun jaialdia baita”, dio Unai Zabala Andra Mari Dantza Taldeko presidenteak: “Hamar urtez hogei lurralde desberdinetako musika bizi izan dugu”.
Andra Mari Dantza Taldeko ordezkariez gain, Iñigo Hernando Galdakaoko alkatea eta Edurne Espilla Kultura arloko zinegotzia, eta Begoña de Ibarra Bizkaiko Foru Aldundiko Kultura zuzendaria izan dira gaur prentsaurrekoan.
Tokiko produktuak goi-mailako sukaldaritzara eramateko jardunaldiak antolatu dituzte Galdakaon
Eusko Legebiltzarrera joango dira Usansoloko herritarrak metro geltokia erdigunean eraiki dezaten eskatzera
