Sareak

☉ Galdakao

Ibaizabal ibaia uholdeetatik babesteko obretan 9,5 milioi euro bideratuko ditu URAk Galdakaon

Ibaizabal ibaian uholdeei aurre egiteko hirugarren faseko lanak martxan dira. Obrak Bengoetxeko presa txikitik Plazakoetxeko zubiraino egingo dituzte eta 2022. urte hasieran bukatuko dituztela aurreikusi dute URA Agentziako eta Eusko Jaurlaritzako ordezkariek.

|

URA Uraren Euskal Agentziak abian jarri ditu Galdakaon Ibaizabal ibaian uholdeei aurre egiteko hirugarren faseko lanak. Obrak Bengoetxeko presa txikitik Plazakoetxeko zubiraino egingo dituzte, hau da, 1.640 metroko tartean esku hartuko du URAk. Zehazki, ibaiaren egokitzapen hidraulikoa egingo dute, ibilguaren arroka-ohearen kota jaitsiz eta ur gutxiko ibilgu bat sortuz. Horretarako, 190.000 metro kubiko harri eta lur induskatuko dituzte, hau da, 19.000 kamioi inguru.

Mercadillo zubiari dagokionez, hustutze-ahalmena handitu egingo dute eta begi berri bat irekiko diote zubiari. Gainera, eraginkortasun hidraulikoa eta ondare kulturala babestea eta balioestea da URA eta Eusko Jaurlaritzaren asmoa. Hain zuzen ere, zubi hori monumentu kategoriako kultura-ondasun gisa katalogatuta dago 2016tik Euskal Kultura Ondarearen Inbentario Orokorrean. “Balio historiko eta kulturadun ondare gisa babestua, emariaren joanari oztopo egiten dio nabarmen, eta aldamenean sor litezkeen uholdeak asko areagotu lituzke. Ondorioz, ur-goraldi errepikakorrek arrisku handia sortzen dute: inguruko pertsonentzat, komunikazio-bideei eta zerbitzu-azpiegiturei eragin diezaieketelako, eta galera ekonomiko handiak eragin diezazkioketelako inguruko industria-jarduerari”, dio Antonio Aiz URAko zuzendari nagusiak: “Lanok zubiaren ondarea lehengoratzea ahalbidetuko dute. Hori egin ahal izateko, besteak beste, gaur egungo ibilguaren parean, ibilgu berri bat sortuko da: aurrerantzean, ohiko emaria ibilgu-ibilbide berritik joango da, eta Mercadilloko zubiaren arkuen azpitik ur askoko sasoietako emariak igaroko dira”, dio Aizek.

“Ibaizabal ibaiaren ibilgua, Galdakaotik igarotzean, estutu egin zen uholde-lautaden okupazioaren ondorioz. Hori zela eta, ibilguari ez zitzaion sekzio edo zabalera nahikorik utzi, zer eta, Euskadiko Kantauri isurialdeko ibairik jariotsuenaren ur-goraldien emariei eusteko. Beraz, geroztik, ageriko arriskua sortzen die biztanleei eta ibaiaren lurraldeetan finkatu diren erabilerei”, dio Amaia Barredo Eusko Jaurlaritzako Ingurumen sailburuordeak: “Euskadin uholdeei aurre egiteko lehentasunezko obretako bat da”. Antonio Aiz eta Amaia Barredo bera Mercadillo zubiaren parean aurkeztu dute datozen hilabeteetan Ibaizabal ibaian burutuko duten proiektua.

Lanok 9,5 milioi euroko inbertsioa beharko dute, eta 15 hilabeteko epea aurreikusi dute obrak amaiatzeko: “Aurreikuspenen arabera, 2022ko martxora arte luzatuko dira obrak”, dio Barredok. Nerbioi-Ibaizabal ibaia bideratzeko lanen hiru faseetan 32,1 milioi euro inbertitu dituzte guztira URAk eta Eusko Jaurlaritzak.

Neurri gehiago

Ibaizabal ibaia Galdakao parean berregituratzeko obra horiek egiteko beste jarduketa batzuk egin beharko dituzte. Hala nola, Plazakoetxeko zubiko pilak indartzea edota Bengoetxeko presa txikia egokitzea. Era berean, Galdakaoko Udalak Zuhatzu auzoa eraldatzeko plan berria aurkeztu zuen azaroan. Ibaizabal ibaiko bideratze lanez gain, bi esku hartze nagusi proposatu ditu Galdakaoko udal gobernu taldeak: alde batetik, biribilgune berri bat egingo dute N-634 errepidean, Plazakoetxera heldu aurretik norabide aldaketa dagoen gunean; eta bestetik, Txomin Egileor kalea norabide bakarreko bihurtuko du, oinezkoen eta bizikleten mesedetan.

Zuhatzu auzoa eraldatuko du Udalak, URAk Ibaizabal ibaia hobetzeko lanak hasi ondoren

Txomin Egileor kalean dauden hiru etxebizitza eraitsiko dituzte, Zaratamoko Arkotxa parean. Hiru blokeetako bat Zaratamoko udalerriari dagokio eta beste biak Galdakaokoari. “URA Euskal Agentziarekin batera gauzatu ditugu Txomin egileor kaleko blokeen etxegabetzeak”, adierazi zuen azaroan Alberto Ugarriza Zaratamoko alkateak: Urte osoan zehar negoziazioak egiten egon ostean adostasuna erdietsi dugu auzotarrekin eta akordioa sinatu dugu”. Etxebizitzak abenduan zehar bota eta Ibaizabaleko ur bideraketaren obrak berehala hasiko dituzte.

Txomin Egileor kaleko hiru etxebizitza botako dituzte Ibaizabal proiektuko hustubiderako

Ibaiertzak landareztatzea ere sartzen da proiektuaren barruan, eta horretarako espezie autoktonoak jarriko dituzte: Salix albaS. atrocinerea eta S. purpurea, alegia. “Ibilgutik hurbil dauden eremuetan, landaredia ahalik eta gehien errespetatuko da, landaretza eta sastrakak kentzea saihestuz”, diote arduradunek: “Neurri horiek guztiek nabarmen hobetzen dute uholdeekiko segurtasuna: lanok gauzatutakoan, ibaiaren ibarretako eremurik ez du kalterik jasango 100 urteko errepikatze-denborako ur-goraldietan”.

Ibaizabalen Galdakao parean egingo duten jarduketa horrek uholdeei aurre egiteko eta jada egindako lanen lehenengo faseko (Nerbioi ibaiaren 2.020 metroko tarte batean egindako jarduketa, Euskotren zubian hasi eta Basauriko Ariz zubiraino iritsi zena) eta bigarren faseko (Ibaizabal ibaian egindako jarduketa, Nerbioi ibaiaren eta Bengoetxeko presa txikiaren arteko 3.240 metroko zati batean) defentsa-eraginkortasuna areagotuko du. Hirugarren faseko obrak 2022ko martxoan bukatzea aurreikusi dute URAko eta Eusko Jaurlaritzako ordezkariek.

☉ Galdakao

Galdakaoko Ibilaldia aurkeztu du Eguzkibegik Euskaltzaindiaren egoitzan

|

Galdakaoko Eguzkibegi Ikastolako eta Getxoko San Nikolas Ikastolako ordezkariak Euskaltzaindiaren egoitzaren aurrean // Argazkia: Eguzkibegi Ikastola

2025eko maiatzaren 25ean Ibilaldia antolatuko du Eguzkibegi Ikastolak Galdakaon. Duela hilabete leloa eta logoa aurkeztu zituzten Kurtzeko plazan, eta Oihane Arana Eguzkibegi Ikastolako lehendakariarekin berba egiteko aukera izan genuen GEURIAn.

Gaur, uztailak 11, Galdakaoko Ibilaldiaren aurkezpena egin dute Euskaltzaindiaren egoitzan, Bilbon. Eguzkibegi Ikastolako ordezkariez gain -tartean Oihane Arana lehendakaria-, aurten Ibilaldia antolatu duten Getxoko San Nikolas Ikastolako ordezkariak ere izan dira aurkezpenean.

Osorik irakurri

☉ Galdakao

Olabarrietako Katamar Haurreskolako jolastokiak estalkia izango du ikasturte berritik aurrera

|

Estalkia jartzeko lanak uztailaren 15ean hasiko dituzte eta sei astez luzatuko dira // Galdakaoko Udala

Estalkia jarriko diote Galdakaoko Olabarrietako Katamar Haurreskolako jolastokiari. Lanak uztailaren 15ean hasiko dituzte eta sei astez luzatuko dira, Galdakaoko Udaletik zehaztu dutenez.

Estalkiaren egitura metalezkoa eta egurrezkoa izango da eta sabaia zeharrargia izango da, “argi naturala sar dadin”. Led motatako argi puntuak ere izango ditu.

Estalkia jartzearekin batera, jolastokian gomazko zoru berria ipiniko du Udalak.

Aurreikuspenen arabera, ikasturte hasterako jarrita egongo da estalkia. Udalak 60.000 euroko inbertsioa egin du.

Osorik irakurri

☉ Galdakao

Maria Casillas igerilari galdakoztarrak Munduko eta Europako errekorrak hautsi ditu errelebotan, Master kategorian

Casillasekin batera erreleboen taldea osatu dute Lara Vicandi Telleriak (Donostia), Ane Ibarrondo Garciak (Getxo) eta Naia Ibarrondo Garciak (Getxo), denak Swim Camp Getxo klubekoak

|

Maria Casillas (zutunik, eskuman), Lara Vicandi, Ane Ibarrondo eta Naia Ibarrondorekin batera // Utzitakoa

Maria Casillas Chueca igerilari galdakoztarrak Munduko eta Europako errekorrak hautsi ditu errelebotan, asteburuan São João da Madeiran (Portugal) izandako XXV. Masters Verão txapelketan.

Casillasekin batera erreleboen taldea osatu dute Lara Vicandi Telleriak (Donostia), Ane Ibarrondo Garciak (Getxo) eta Naia Ibarrondo Garciak (Getxo), denak Swim Camp Getxo klubekoak.

Munduko errekorrari dagokionez, 4×50 crol +100 proban 1’49”9ko denbora egin zuten, zegoen errekorra —2016koa— hautsiz (1’50”28).

Munduko errekorra hausteaz gain, Europakoa ere hautsi zuten lau igerilariek 4×100 estilos +100 proban, 4’37”39 denborarekin (aurreko marka 4’42”20koa zen).

“Gogor prestatu genuen txapelketa eta atzetik entrenamendu asko dago. Errekorrak haustea zaila zen: laurok ia gure markarik onenak egin behar genituen, eta motibazioarekin lortu genuen bi markak haustea. Sekulakoa izan zen!”, adierazi dio GEURIAri Mariak.

Igeriketa “oso kirol sakrifikatua” dela dio Mariak: “Oso gutxitan ematen ditu fruituak, baina kasu honetan eman ditu eta oso pozik gaude!”.

“Talde honetan oso argi daukagu ondo igeri egiteko denon artean oso ondo konpondu behar dugula eta giro oso ona egon behar duela. Eta hori da gure errealitatea”, dio Mariak.

Osorik irakurri

☉ Galdakao

Kurtzeko frontoiko estalkia eta teilatu-hodiak konpontzeko lanak udazkenean hasiko dituzte

Uztailean frontoiko tabernaren estalkiko arazoak konponduko dituzte, eta irailetik aurrera ekingo diete lan handiei. Kasu batean zein bestean obrek ez diote frontoiko erabilerari eragingo

|

Aste honetan frontoiko tabernaren estalkiko arazoak konpontzen hasiko dira // Google

Kurtzeko frontoian dauden ur-filtrazioak konponduko ditu Galdakaoko Udalak. Aste honetan frontoiko tabernaren estalkiko arazoak konpontzen hasiko dira: estalkiko lamina iragazgaitza aldatuko dute, zaharra zulatua baitago eta ura sartzen baita.

Lan hauek “egun gutxitan” amaituko dituztela adierazi dute udal ordezkariek, eta frontoiaren eta tabernaren erabileran eraginik ez dutela izango zehaztu dute.

Bestetik, estalkiko hegal nagusia berritzeko lanak egingo ditu Udalak: alde batetik, teilatu-hodi berria jarriko dute aurrealdean, txapa ordezkatuko dute eta erremateak egingo dituzte; eta bestetik, atzealdeko teilatu-hodia ere konponduko dute.

Obra horiek iraila amaieran edo urrian hasiko dituzte, “Santakurtze jaiak bukatu ostean”. Kasu honetan ere kanpotik egingo dutenez lan, Udaletik aurreikusi dute lanek ez dutela eragingo frontoiaren erabileran, eta entrenamenduek “normaltasunez” jarraituko dutela adierazi dute.

Osorik irakurri

☉ Galdakao

Urreta kiroldegia itxita egongo da uztailaren 15etik abuztuaren 31ra bitartean, eraberritze-lanengatik

Uztailaren 1ean hasiko dituzte obrak, baina uztailaren 15era arte ez dute kiroldegia itxiko. Irailetik aurrera berriro irekiko dute, handitze lanak egiten dituzten bitartean

|

Lanak uztailaren 1ean hasi eta 22 hilabetez luzatuko dira // Galdakaoko Udala

Urretako kiroldegiaren barnealdea eraberritzeko eta handitzeko obrak uztailaren 1ean hasiko ditu Galdakaoko Udalak. Lanak 22 hilabetez luzatuko dira, baina faseka burutuko dituzte, “erabiltzaileei ahalik eta kalte txikiena eragiteko”, diote udal ordezkariek.

Uztailaren 1etik 14ra bitartean hormak eta zorua berritu, aldagelen distribuzioa aldatu eta irisgarritasuna hobetuko dute, baina kiroldegia zabalik egongo dela zehaztu dute Udaletik. “Fase honetako lanek eragina izango dute solairu nagusiko aldagela eta bainugela batzuetan”, diote.

Uztailaren 15etik abuztuaren 31ra bitartean, ordea, itxita egongo da kiroldegia bere osotasunean: “Beste aldagelak berritzeko lanak hasiko dituzte langileek eta dutxa zein komuna barruan dituzten aldagela irisgarriak eraikitzeari ekingo diote”, diote.

Zentzu horretan, Galdakaoko Udaletik gogorarazi dute Urretakoa itxita egongo den bitartean, Elexaldeko kiroldegia zabalik egongo dela, “erabiltzaileen kaltea arintzeko”. Astelehenetik ostiralera 09:00etatik 22:00etara, larunbatetan 09:00etatik 20:00etara, eta igandetan eta jaiegunetan 09:00etatik 14:00etara egongo da zabalik Elexaldeko kiroldegia.

Irailetik aurrera hasiko dituzte Urreta kiroldegia handitzeko obrak: “Solarium gisa ezagutzen den gunea da eraikitzeko erabiliko dena: hutsik dagoen kuboa erabilgarri jarriko da, eta bi solairu eraikiko dira gune horretan.

Fase horretan egingo den lehen gauza lur azpian dagoen sotoa egokitzea izango da, eta, besteak beste, suteen aurkako babesak areagotuko dira”, diote udal arduradunek. Handitze lan horiek egiten diren bitartean kiroldegia zabalik egongo da. Eta lan horiek bukatu ondoren ekingo diote solarium gunean bi solairu eraikitzeari eta teilatua jartzeari.

1.000 metro karratu berri

Guztira 1.000 metro karratu berri izango ditu Urreta kiroldegiak, sotoa egokituta eta beste bi solairu berri sotoaren gainean eraikita.

Besteak beste, ariketa kardiobaskularrak, indar ariketak edota yoga egiteko erabilera anitzeko aretoak sortuko dituzte eta horretarako eraikin berri bat eraikiko dute kiroldegiaren sarreraren eta igerilekuaren arteko gune hutsean, solariuma deitzen dioten gunean, alegia.

“Gune berriak 370 lagunentzako lekua izango du”, adierazi zuen duela bi urte Iñigo Hernando alkateak, proiektua aurkeztu zutenean.

“Sotoa aprobetxatu nahi dugu eta aireztatzeko prozesuak hobetuko ditugu. Gainera, igerilekiko zein saskibaloi kantxetako aldagelak berrituko ditugu, eta berriak sortuko ditugu sotoan. Urteetan zehar erabileratik gabeko gunea aprobetxatu nahi dugu”, adierazi zuen Asier Egiraun Hirigintza arloko zinegotziak.

Osorik irakurri