Sareak

☉ Galdakao

Kronika / Irakurleen txoko birtualean

Mikel Ayllon idazlearen ‘Zoriontsuak izatea aukeratu genuen’ liburua aztertu du apirilean Galdakaoko Irakurketa Taldeak. Bideo-deian sartu da GEURIA.

|

Apirileko bileran egin dugu bat Galdakaoko Irakurle Taldearekin // Geuria

Apirilaren 26a da, astelehena. Sei t’erdietan hitzordua dut Meet plataforman. Aspaldiko partez, berriro ere bideo-deia. Hilero bezala, Galdakaoko Irakurketa Taldeak zita dauka eta sudurluze bat sartuko da euren bideo-deian. Hori ni naiz. Sudurluzea bai, baina aldez aurretik adostutakoa. Helburua da Irakurketa Taldearen dinamika lehen pertsonan ezagutzea eta horren berri ematea. Emaitza: irakurtzen ari zaren kronika hau.

18:30. Nagorek Whatsapp bidez aurretiaz bidalitako estekan klik egin dut. Nire izena jarri eta bideo-deian sartu naiz. Badaude Irakurketa Taldeko zenbait kide. Hasieran sei, gero hamar. Pixkanaka-pixkanaka taldeko kide gehiagok euren ordenagailuak piztu dituzte bilera berri batera konektatzeko. Azkenean, hamabi bat lagun elkartu gara bileran, tartean, Amaia, Karmele, Marijo, Laura, Nagore, Yolanda, Txaro, Txelis, Josebe eta Maite.  Gaur, Mikel Ayllon (Laudio, 1980) idazle laudioarraren azken liburuaz hitz egingo dute: ‘Zoriontsuak izatea aukeratu genuen’. Iaz argitaratu zuen Ayllonek ipuin-bilduma hori eta Donostia Hiriko Kutxa Literatura Saria irabazi zuen. Ipuin-bildumak zoriontasunaren bila normaltasuna abandonatu duten pertsonei buruzko sei kontakizun biltzen ditu: “Anjak lana, familia eta sorterria utziko ditu, ezagutu duen maitearen atzetik joatearren; Marcok haurtzaroko mendietako mamuak ahaztu nahiko ditu itsas lainoen artean; Rosalía beretik eman eta eman ariko da, ordainetan deus gutxi eskatu gabe; Amaiak ez du bere institutuko lagunen moduan amaitu nahi; Izaskunek badaki beste pertsonei nola lagundu, bere buruarekin asmatzea falta… Zoriontsu izan nahi dute istorio hauetako protagonistek, baina badakite zoriona ez dela iragarkietako zelofanetan bildutako opari hori; are, susmatzen dute, ahaleginduagatik ere, ez zaiela trukean etorriko betiereko paradisurik. Baina ezin bertan goxo geratu, ezin etsi…”. Galdakaoko Irakurketa Taldeko kide denak bat datoz puntu batean: “Liburua irakurterraza izan da”. Hala ere, iritzi desberdinak izan dira liburuaren inguruan: batzuei gustatu zaie, eta beste batzuei ez. “Zoriontasuna zer da?” bezalako gogoetak azaleratu dituzte literatura-zaleek: “Zoriontasunaren bila egiten ditugu gehienetan gure bideak, baina zer aurkitzen dugu? Batzuetan zoriontasuna topatzen dugu; beste batzuetan, ez. Zorion perfektua ez da existitzen. Liburua hortik joan dela uste dut”, esan du, adibidez, Txelisek. “Irakurleok zoriontasunari buruz hitz genezan nahi bazuen, helburua lortu du idazleak. Horri buruz ari gara”, dio Karmelek. Beste batek esan du normaltasunak ematen diola zoriontasuna norberari; eta beste batek: “batzuk normalak gara, eta batzuetan zoriontsuak ere bai”. Denon barreak piztu ditu esaldi horrek, baita beste honek ere: “Zoriontasuna litzateke denak mahai baten inguruan izango bagina, pandemia aurretik egiten genuen bezala”. Liburuaren azalak ere barreak piztu ditu: “Portadan pertsona bat agertzen da, azal zurikoa. Hilda dagoela esan nahi du ala etzanda lasai dagoela?”. 

19:30. Bukatutzat eman dute gaurko hitzordua: “Zein liburu irakurriko dugu datorren hilabeterako?”, galdetu diote elkarri, eta Txarok proposamena luzatu du: “Irati Elorrietaren ‘Neguko argiak’”. Taldekideek proposamena onartu eta hurrengo hitzordurako data zehaztu dute: maiatzak 24. Bideo-deiari amaiera emateko, gogora ekarri nahi izan dute Gernikako Bondardaketaren 84. urteurrena. Ondoren, hurrengora arte elkar agurtu dute. Nik pozik bukatu dut bideo-deia. Taldea oso atsegina da eta oso gustura sentitu naiz. Eskerrik asko guztiagatik eta beste bat arte!

Galdakaoko Irakurketa Taldea: “Talde anitza gara iritzi zein gustuetan, eta hori oso aberasgarria da”

☉ Galdakao

Zabaleako jaiak antolatu dituzte lehen aldiz: maiatzaren 25ean izango dira

|

Besteak beste paella txapelketa izango da Zabaleako jaien lehen edizioan // Artxiboa, Geuria

Lehen aldiz Zabaleako jaiak antolatuko dituzte Galdakaon. Eratu berri den Zabalea Elkarteak antolatuko ditu jaiak maiatzaren 25ean.

Besteak beste, paella txapelketa, haurrentzako ekintzak, mus eta igel txapelketak, barbakoa eta dantzaldia izango dira.

Egitaraua / Zabaleako jaiak 2024

Maiatzak 25, larunbata
10:00 Txupinazoa
10:30-14:00 Paella txapelketa
11:30 Zuberoako Maskarada elizako plazan
11:30 Haur jolasak
12:30 Kalejira
17:00 Mus txapelketa
19:00 Igel txapelketa
20:00 Barbakoa
22:00 Dantzaldia

Osorik irakurri

☉ Galdakao

Galdakaoko institutuek 567 euro lortu dituzte bigarren eskuko merkatu solidarioan

|

GBGE elkarteari emango diote lortutako dirua // Geuria

Bigarren eskuko merkatu solidarioa antolatu zuten maiatzaren 17an, ostiralez, Galdakaoko Andra Mari Lanbide Heziketako, Bengoetxeko, Elexaldeko eta Eguzkibegiko ikasleek.

Bertan izan ginen eta Aitor Salazar, Miren Muñoz eta Elizabeth Fernandez Bengoetxe Institutuko Ekodelegatuekin berba egin genuen.

Ikasleek GEURIAri adierazi diotenez, 567 euro lortu zituzten merkatu solidarioan. Bilduko duten dirua GBGE elkarteari emango diote.

“Guretzat emaitza oso ona da”, adierazi diote GEURIAri ikasleek.

Osorik irakurri

☉ Galdakao

Zuberoako Maskarada ekarriko du Galdakaora Andra Marik 33 urteren ostean

|

Pagolako gazteek aurten antzeztutako Maskaradak // Argazkiak: Maite Irizar, Amaiur Aristi (dantzan.eus)

Andra Mari Dantza Taldeak Zuberoako Maskarada ekarriko du Galdakaora, azkenekoz 33 urte izan ostean. Maiatzaren 25ean, larunbatez, izango da eta Pagolatik (Zuberoa) etorriko dira dantzariak eta barrikadak eta ofizioak antzeztuko dituzte.

Maskarada 11:30ean hasiko da Andra Mari elizatik, Ardanza parkean, eta Iturrondotik eta Santi Brouard plazatik ere igaroko dira. Arratsaldean Santi Brouard plazan izango da ekitaldia 17:00etan, eta euria bada, frontoira lekualdatuko dute.

“Duela 33 urte izan genuen azken aldiz Zuberoako Maskarada Galdakaon, Altzairen eskutik. Eta orain, 33 urteren ostean berriro ere Zuberoako Maskarada dakargu gure herrira, aurten Pagolaren eskutik”, diote Andra Mari Dantza Taldetik.

Egitaraua / Zuberoako Maskarada

Maiatzak 25, larunbata

Barrikadak
11:30 Andra Mari eliza (Ardanza parkea)
12:30 Iturrondo plaza
13:30 Santi Brouard plaza

Ofizioak
17:00 Santi Brouard plaza. Euria bada, frontoian

Osorik irakurri

☉ Galdakao

Varsoviako irakasleek Galdakaoko Elexalde Institutuko metodologia ezagutu dute

|

Varsoviako Szkola Podstawowa institutuko bi irakasle izan dira Elexaldeko metodologia aztertzen // Elexalde BHI

Galdakaoko Elexalde Institutua Erasmus+ proiektuan murgilduta dago. Ikasturte honetan ‘Create and Experience a Better Europe’ proiektuan ari dira parte hartzen Galdakaoko ikasleak, Varsoviako (Polonia), Berlingo (Alemania) eta Casertako (Italia) ikasleekin.

Iazko azaroaren 24tik abenduaren 2ra bitartean Elexaldeko Institutuak harrera egin zien Varsoviako zazpi ikasleri, Berlingo seiri eta Casertako hamaika ikasleri, eta eurekin etorritako zazpi irakasleri. Eta aurtengo martxoan Galdakaoko hamabi ikaslek eta bi irakaslek Caserta (Italia) bisitatu zuten.

Maiatzean, gainera, hilaren 15etik 17ra, Varsoviako Szkola Podstawowa institutuko bi irakaslek Job Shadowing bat egiteko aukera izan dute Elexalde Institutuan: “Job Shadowing-a beste irakasle batzuek emandako eskolak zuzenean behatzean datza, beste herrialde batzuetako hezkuntza nolakoa den, zein metodologia erabiltzen duten eta ikasleek nola ikasten duten lehen pertsonan ezagutzeko. Horri guztiari esker, zer aldatu edo hobetu daitekeen hausnartu eta ondorioak atera daitezke, job shadowing-ean parte hartzen duten ikastetxeekin esperientziak eta baliabideak trukatzeaz gain”, azaldu dute Elexalde Institutuko Erasmus+ programako arduradunek.

“Gure ikastetxetik, joan den ikasturtean, bi irakasle Poloniara joan ziren Szkola Podstawowa eskolara (Varsovia), Poloniako sistemak nola funtzionatzen duen jakiteko eta sistema horren kalitatea hobetzeko gure IES Elexalde ikastetxean aplikatu ahal izateko”, diote.

Poloniako eta Euskal Herriko hezkuntza sistemei buruz hausnartu dutela diote Elexalde Institutuko arduradunek: “Era berean, Elexalde BHIk egiten dituen proposamenak erakutsi dizkiegu. DBHko hainbat taldetan ikusi dute, halaber, proiektuen metodologia gaztelania eta ingelesa dela. Halaber, Ahozkotasuna irakasgaian eztabaiden bidez eta modu ludikoan hitz egindako ingelesa nola lantzen den ikusi ahal izan dute”.

“Job Shadowing-a oso aberasgarria izan da eta etorkizunean elkarlanean jarraitu nahi dugu”, diote.

Osorik irakurri

☉ Galdakao

Bideoa / Bigarren eskuko merkatu solidarioa antolatu dute Galdakaoko institutuek

|

Bigarren eskuko merkatu solidarioa antolatu zuten ostiralean Galdakaoko Andra Mari Lanbide Heziketako, Bengoetxeko, Elexaldeko eta Eguzkibegiko ikasleek. Bilduko duten dirua GBGE elkarteari emango diote.

Aitor Salazar, Miren Muñoz eta Elizabeth Fernandez Bengoetxe Institutuko Ekodelegatuekin berba egin genuen.

Osorik irakurri