Eguneroko zalapartan, deskonektatzeko eta norbere buruarekin konektatzeko une bat aurkitzea luxu bat izan daiteke. Hala ere, Nagore De la Torre Amurizak (Usansolo, 1997) eta Zuriñe Gutierrez Santiagok (Astrabudua, 1992), sormena maite duten bi ekintzailek, Kala Studio sortu eta ireki dute Galdakaon, artea eta inspirazioa biltzen dituen gunea, eta eurek dioten bezala, “irudimenak mugarik ez duen espazioa”.

Hainbat tailer eskaintzen dituzte: margolaritza, josteko tailerrak, kakorratz-lanak, zeramika, sormenezko idazketa, brodatuak, kosmetika naturala eta umeentzako margolaritza, besteak beste.

Bakoitzak bere arropa-dendarekin (Ene Gertu Usansolon eta So Much Galdakaon), bi diseinatzaileek indarrak batzea erabaki dute komunitateari leku bat eskaintzeko, non eskuzkoa eta pertsonala elkartzen diren, eguneroko errutinan etenaldi sortzaile eta eraldatzailea eskainiz.

Lehenik eta behin, zer da Kala Studio?
Nagore De la Torre: Kala Studio Galdakaon sortu dugun sormen tailerra da. Guk esaten dugun bezala, Kalan irudimenak ez du mugarik. Esperientzia eta tailer desberdinen bidez, sormena lantzeko sortutako lekua da. Bertan, kakorratz-lanak, marrazketa, buztina eta josteko tailerrak eskaintzen ditugu, beste batzuen artean. Teknikak ikasteaz gain, prozesuaz disfrutatzeko espazioa da. Egia esateko, kafe eta infusio gunea ere sortu dugu, (des)konektatzeko eremu gisa. Egunerokotasuna alde batera uzteko eta sormena pizteko lekua da, hain zuzen.

Margolaritza, josteko tailerrak, kakorratz-lanak, zeramika, sormenezko idazketa, brodatuak, kosmetika naturala eta umeentzako margolaritza eskainitzen dituzte Kala Studion, Galdakaon // Kala Studio

Eta zergatik sortu duzue espazio hau?
Zuriñe Gutierrez: Betidanik gustatu izan zaizkigu eskulanak, eta sormena lantzeko espazio baten falta sentitu dugu geure inguruan. Gaiari bueltak eman, eta gure espazio propioa sortzea erabaki genuen. Eta horrela sortu da Kala Studio!

Nagore, zu ezaguna zaitugu, baina ez zaude bakarrik proiektu honetan: Zuriñe duzu ondoan.
N.DT.: Hori da, Zuriñe eta biok gara proiektu honen sortzaileak. Zuriñek @so_much_shop moda-denda kudeatzen du Galdakaon eta nik @ene_gertu izeneko artisau proiektua dut Usansolon, non eskuz egindako produktuak saltzen ditudan Usansolon.
Z.G.: Elkar ezagutu genuen gure proiektuei esker eta konturatu ginen biok gustuko genuela sortzea zein eskulanetan aritzea. Denbora luzez bata bestearekin ideiak elkarbanatzen ibili ginen eta Kala Studio sortzea erabaki genuen.

Noiz hasi zineten proiektu hau ehuntzen?
Z.G.: Ideia kafe bat hartzen genuen bitartean atera zen. Duela hilabete batzuk, uda aurretik, hasi ginen proiektua ehuntzen.

Zein helbururekin?
N.DT.: Gure helburua beti izan da espazio bat sortzea jendeak bere denboraz disfrutatu, lasai egon, sormena garatu eta (des)konektatu dezan.

Norberak bere buruarekin konektatzeko eta egunerokotasunaz (des)konektatzeko espazioa dela diozue.
Z.G.: Egunerokotasuneko zurrunbiloan murgilduta bizi gara eta Kala Studion erritmo hori aldatzen saiatzen gara. Norbere buruarekin konektatzea, sortzea eta erlaxatzea bilatzen dugu. Ideia des(konektatzea) da: egunerokotasunetik deskonektatzea, eta aldi berean, zure barne-sormena piztuz konektatzea!

Pintura, kosmetika, marrazketa, idazketa, zeramika, joskintza edota diseinua bezalako tailerrak eskainiko dituzue. Eskualdean ba al dago horrelakorik?
N.DT.: Gure inguruan ez dago antzeko proiekturik eta beharrezkoa ikusten genuen horrelako bat sortzea. Baina ez gara soilik tailerrak ematen dituen espazio bat, komunitate bat sortzen ari baikara; eroso sortzeko eta deskonektatzeko talde bat, alegia.

Zein material mota erabiliko duzue tailerretan?
Z.G.: Gure tailerretan eskainiko ditugun materialak kalitatezkoak dira, eta ahal dugun guztietan, inguruko saltokietan erositakoak.

Elkarlanik ba al dago beste ekintzaileekin Kala Studion?
N.DT.: Bai. Egia esan, geure tailerrak eskainiko dituzten irakasleak inguruko herrietakoak dira, besteak beste, Areatzakoak, Sopelakoak, Plentziakoak, Bilbokoak…

Zuen sareetan ikusi ahal izan dudanez, tailerreko mahaiak zuek eginak dira.
Z.G.: Bai, bai! Mahaiak guk eskuz egindakoak dira eta ez bakarrik itxura zaindu nahi genuelako, baita birziklapena landu nahi genuelako ere. Eta ez mahaietan bakarrik! Aulkiak antzinako altzariak dira, bigarren eskuko azoketan erositakoak. Horrela, espazio oso berezi bat sortzea izan da gure asmoa. Gainera, zoragarria izan da sortze-prozesu hau elkarrekin bizitzea!

Zu, Nagore, iaz ezagutu zintugun: Ene Gertu proiektuaren sortzailea zara. Enen sortutako zure diseinuak edo ideiak irakatsiko dituzu Kalan? Ez al duzu beldurrik zure ideiak “lapurtuak” izan daitezkeelako?
N.DT.: Beldurra? Baita zera ere! Egia esan, proiektu desberdinak dira, helburu desberdinekin. Noizean behin tailerrak eskainiko ditut Kalan, beti er, teknikak eta prozesuak irakasteko asmoarekin, Ene esentzia mantenduz, noski!

Jasangarritasunaren eta ingurumenaren alde ere egingo duzue Kala Studion.
Z.G.: Bai, jasangarritasuna oso garrantzitsua da Kalan, Ene Gertun eta So Much dendetan bezala. Materialak tokiko saltokietakoak edo birziklatuak izan daitezen saiatzen gara, behintzat ahal dugun guztietan, eta tailerretan sortzen ditugun produktuak ere horretan oinarrituko dira. Zabor gutxiago sortzea eta birziklatzea dira gure lehentasunak.

Ekintzaileak zaretela esan dezakegu. Zer suposatzen du gaur egun ekintzaile izateak?
Z.G.: Gure ustez, ekintzaile izatea da zure pasioa ofizio bihurtzea. Gogorra da ekintzaile izatea, baina aberasgarria ere bai. Zure ametsei jarraitzea, arriskatzea eta, aldi berean, beti ikastea eta egokitzea. Horregatik maite dugu egiten duguna!

Laguntzarik jaso duzue Kala Studioa martxan jartzeko?
N.DT.: Hasiera batean gehiena gure kabuz egin genuen, baina badugu familiaren eta lagunen laguntza, eta hori oso garrantzitsua izan da proiektua aurrera eramateko.

Badago ekintzailetza munduan laguntza nahikorik proiektu edo negozio berriak abiarazteko, ala zerbait gehiago egin dezakete erakundeek?
Z.G.: Laguntzak badaude, baina horrek ez du esan nahi laguntza horiek guztiak jasoko ditugunik. Horretarako, hainbat baldintza bete behar dira eta ez da gauza erraza. Administrazio-prozesuek sinpleagoak izan beharko lukete eta, batez ere, ekintzaile berrientzako baliabideak eskuragarriagoak egin.
Zer ekarpen egingo diozue Galdakaori eta Hego Uribe eskualdeari? N.DT.: Kala Studiok Hego Uribe eskualdeari sortzeko eta deskonektatzeko espazio bat eskaintzen dio. Egia esan, oso beharrezkoa dugu horrelako espazio bat egunerokotasuneko estresa alde batera uzteko.

Gogotsu hasi zarete lanean. Etorkizuneko ametsei buruz galdetuko banizue?
N.DT.: Asko gustatuko litzaiguke jendeak Kalan disfrutatzea eta gure proiektua babestea.
Z.G.: Ametsa? Inguruko sormen-espazio erreferente bihurtzea eta, zergatik ez, etorkizunean beste toki batzuetara ere zabaltzea!