☉ Galdakao
Oroimen bulegoa zabalik dago Galdakaon, 1936tik gaur arte izandako eskubide urraketen testigantzak batzeko
Oroimen bulegoa irekita dago urrian zehar Galdakaon, 1936tik gaur egunera arte izandako eskubide urraketen testigantzak batzeko. Aranzadi Elkartea ari da eskubide urraketa horiek aztertzen, baina horretarako herritarren parte hartzea behar dute: “Informazio guztia ez dago dokumentatuta, horregatik behar ditugu herritarren testigantzak. Beharrezkoak eta ezinbestekoak dira”, dio Javi Buces Aranzadi Zientzia Elkarteko Antropologia saileko historialari eta ikerkalariak. Gauzak horrela, galdakoztarren informazio, datu eta testigantzak jasotzeko, Oroimen bulegoa zabalik dago Torrezabalen urriaren 6an, 13an, 20an eta 27an, 10:00etatik 13:00etara eta 15:00etatik 18:30era. “Informazio bilketa egin, eta erradiografia bat osatzea da helburua”, dio.
“Gure herrian hainbat sufrimendu eta pasarte latz izan ditugu. Badakigu batzuentzat gogorra izango dela, baina jendea animatu nahi dugu bere kontakizunak ematera, herriak argazki integral bat izan dezan”, dio Iñigo Hernando Galdakaoko alkateak. Hain zuzen ere, “orain jasoko ez dena, etorkizunean ez dela existituko” adierazi du Bucesek: “Izan ere, 1936ko gerra bizi zutenen testigantzak jasotzeko dagoeneko zailtasunak daude, eta lehenago batu ez diren datu asko dagoeneko galdu dira”, dio. Gauzak horrela, gertuko historiaren berri orain emateko eskatu du: “Berandu baino lehen kontatu daitezela motibazio politikoko indarkeriak eragindako mota eta jatorri guztietako urraketak, dokumentatu eta jasota geratu daitezen”, dio Bucesek: “Gure lana ez da errelatoa egitea, metodologia zehatz batzuk jarraituta erradiografia egitea baizik”.
Konfidentzialtasuna
Informazioa eta testigantzak ematerako orduan konfidentzialtasuna “ezinbestekoa” dela zehaztu du Bucesek: “Ez da beharrezko kamara baten aurrean kontatzea bere edo bere senideen sufrimendua. Batzuk nahiago dute idatziz kontatu, batzuk ez dute izenik eman nahi eta inizialak soilik jartzen dira. Egoera guztiak kontuan hartu eta errespetatzen dira”.
Garrantzitsua da jatorri guztietako testigantzak jasotzea, eta horretan ahalegin berezia egingo dute bai Udalak bai Aranzadik. Hain zuzen ere, Udalean ordezkaritza duten alderdi eta talde guztien babesa du egitasmoak. Hala adierazi zuten ekainean, Aranzadirekiko lankidetza aurkezteko agerraldian parte hartuta, EH Bilduko, EAJko, Auzoakeko, PSEko, Usansolo Herriako eta Podemoseko ordezkariek zein atxiki gabeko zinegotziak.
Hitzaldiak
Urriko asteazkenetan Torrezabalen egokituko den bulegoan, informazioa jasotzeaz gain, informazioa eman ere egingo dute. “Batzuetan etortzen dira senideak, adibidez aitari buruzko daturik dugun galdetzen. Leku askotako datuak ditugu eta kasu batzuetan gertakariak argitzen lagun dezakegu”, dio Bucesek.
Bestetik, gaiaren garrantziaz hausnartzeko, bi adituen hitzaldiak antolatu dituzte Gandasegi ikastetxean urriaren 7an eta 14an. Lehenengo hitzaldia ‘Biktimen politikak: azterketa kritikoa’ da eta Jon Mirena Landa EHUko Zuzenbide Penaleko katedradunak emango du, eta bigarren hitzaldia Josu Chueca EHUko Historia Garaikideko doktoreak emango du: ‘Atzoko mugak, gaurko hesiak: migrazioak, erbesteratzeak, harrera eta gaitzespena Europa garaikidean’. Hitzaldi biak 19:00etan izango dira.
Aranzadirekin harremanetan jartzeko 943 466 142 telefono zenbakia eta memoria@aranzadi.eus helbide elektronikoa daude herritarren eskura.
☉ Galdakao
Ager Estebanek eta Oier Palmak brontzezko dominak lortu dituzte Euskadiko Borroka Txapelketan
Urreta Taekwondo Klubetik ere nabarmendu dute Peio Fernandezen seigarren postua
Urtarrilaren 17an, larunbatez, kadete mailako Euskadiko Borroka Txapelketa jokatu zen Miribillan.
Galdakaoko Urreta Taekwondo Klubak hiru ordezkari izan zituen, eta emaitzak hauek: Ager Estebanek eta Oier Palmak brontzezko domina bana irabazi zuten, eta Peio Fernandezek seigarren postua lortu zuen.
☉ Galdakao
Argazkiak telefono mugikorrarekin ateratzen ikasteko tailerra antolatu du Clic eta Click elkarteak Galdakaon
Dagoeneko talde bat osatu dute, baina oraindik ere izena emateko aukera dute herritarrek. Bestetik, haurrei zuzendutako doako ikastaroa ere antolatu dute
Click eta Click elkarteak argazkigintza herritar guztiei zabaltzeko ikastaroak antolatu ditu ekainera bitartean.
Hain zuzen ere, bi dira antolatu dituzten tailerrak: telefono mugikorrarekin argazkiak ateratzen ikastekoa eta haurrei zuzendutakoa.
Telefono mugikorrarekin argazkiak egiten ikasteko ikastaroari atzo, urtarrilak 12, ekin zioten. Talde bat osatu dute eta astelehenero bilduko dira 17:00etatik 19:00etara Zamakoa kaleko 21 zenbakian duten lokalean.
Hala ere, oraindik interesa dutenek izena eman dezakete tailerrean: “Talde berriak sortzeko aukera dago!”, diote.
Haurrentzako ikastaroari dagokionez, 8 eta 12 urte bitartekoei dago zuzenduta eta doakoa izango da. Larunbat arratsaldetan izango da ikastaroa, eta taldea osatu bezain laster hasiko da.
Izena eman nahi dutenek Click eta Clicken lokalean bertan egin dezakete, asteazken eta ostegunetan, 17:00etatik 19:00etara, edo clicketaclikc@gmail.com helbide elektronikora idatziz.
☉ Galdakao
Torrezabalek zuzeneko 22 ikuskizun tauratuko ditu urtarriletik ekainera bitartean
Eneko Sagardoy, Iraia Elias, Klara Badiola, Ramon Agirre, Pepe Viyuela, Pako Revueltas eta Depedro igoko dira, besteak beste, Torrezabaleko eszenatokira
Urtarriletik ekainera bitarteko programazioa aurkeztu du Torrezabal Kultur Etxeak. Guztira 22 ikuskizun izango dira: euskarazko zazpi, gaztelerazko bost, testu barik lau dira eskainiko dituzten antzezlanak, eta dantza eta kontzertuak ere izango dira.
“Ikuskizun bakoitza emozio berriak esploratzeko, ikuspegiak zabaltzeko eta kultura esperientzia partekatu gisa bizitzeko gonbita da”, dio Edurne Espilla Galdakaoko Udaleko Kultura arloko zinegotziak.
Programazioak “tradizioa eta berrikuntza” orekatzea bilatzen duela esan du Katrin Schlegel Torrezbaleko programatzaileak, “izen ezagunak eta sortzaile berriak uztartuz, jakin-mina pizten duten proposamenekin”, dio.
“Horrela, ikuskizun bakoitza hausnarketa egiteko, emozionatzeko eta artearekiko hurbileko esperientzia bat bizitzeko aukera bihurtzen da”, dio Schlegelek.
Torrezabal, sortzaileen etxea
Torrezabal Euskal Herriko sortzaileen “lantoki eta etxe” dela azaldu du Espillak: “Ateak zabaldu dizkiegu sortzaileei, euren sormen-prozesuak Torrezabalen bertan egiteko”, dio.
Horren adibide da Metrokoadroka Kolektiboa Galdakaon eta Torrezabalen bertan ontzen ari den ‘Bi baso bat ur’ antzezlana. ‘Geuretik Sortuak’ programari esker garatzen ari dira eta otsailaren 19an estreinatuko dute Torrezabalen. Ondoren, bira egingo dute Euskal Herri osoan zehar.
Antzezlanak alaitasunaren izaera soziala jartzen du erdigunean, eta agerian uzten du minaren ostean alaitasunaren eta umorearen jabe egitea mina gainditzeko eta ahalduntzerako ezinbesteko tresna dela.
Edurne Azkarate da antzezlanaren zuzendaria eta obra garatzeko prozesua “oso aberasgarria” izaten ari dela dio: “Astean zehar antzokiak itxita egon ohi dira eta eskertzen dugu horrelako aukerak eman izana”.
Gidoia osatzeko Galdakaon ikerketa egin zuten, abenduan zehar entseguak egin zituzten Torrezabalen eta laster berriro elkartuko direla zehaztu du Oier Guillan antzerkigileak. Gainera, asmoa daukate estreinaldia izan baino lehen entsegu ireki bat egiteko.
Beste alde batetik, ‘Bi baso bat ur’ antzezlana ontzeko aukera horrez gain, Torrezabal zabalik egongo da Euskal Herriko Orkestra Barrokoarentzat. Otsailean ‘Masquarade’ estreinatuko dute Bilboko Arriagan eta Donostiako Kursaalen, baina aurretik entsegua egingo dute Torrezabaleko oholtzan.
“Honek erakusten du Torrezabaleko ateak zabalik ditugula. Sortzaileen ondoan egon nahi dugu eta Torrezabal euren etxea sentitzea nahi dugu”, dio Espillak.
Programazioa | Torrezabal
2026 Urtarrila-Ekaina
Urtarrilak 16, ostirala
Antzerkia: ‘Vulcano’ (Eneko Sagardoy, Belen Ponce de Leon, Ivan Lopez-Ortega, Javi Coll, Macarena Sanz)
Gazteleraz
Urtarrilak 24, larunbata
Antzerkia haurrentzat: ‘Alma’
Testu barik
Urtarrilak 30, ostirala
Antzerkia: ‘Nor naizen baneki’ (Ramon Agirre, Garoa Bugallo, Maialen Diaz, Aline Etxeberri, Manex Fuchs, Idoia Tapia, Oier Zuñiga)
Euskaraz
Otsailak 6, ostirala
Antzerkia: ‘Encerrona’ (Pepe Viyuela)
Testu barik
Otsailak 8, igandea
Musika eta umorea: ‘Da Capo Banda eta Martina’
Otsailak 19, osteguna
Antzerkia (estreinaldia): ‘Bi baso bat ur’ (Intza Alkain, Javier Barandiaran, Marina Suarez, Iraia Elias)
Euskaraz
Otsailak 21, larunbata
Antzerkia haurrentzat: ‘Hodei guztien gainetik’ (Markeliñe)
Testu barik
Otsailak 28, larunbata
Haurrentzako ikuskizuna: ‘Mimesis’
Testu barik
Martxoak 1, igandea
Antzerkia: ‘Desobedienteak 18/98’ (Miren Arrieta/Aiora Enparantza, Iñigo Azpitarte, Klara Badiola, Kepa Errasti, Omar Somai)
Euskaraz
Martxoak 7, larunbata
Antzerkia haurrentzat: ‘Kimu’ (Marie de Jongh)
Euskaraz
Martxoak 13, ostirala
Dantza-antzerkia: ‘Zambra de la buena salvaje’ (Isabel Vazquez)
Gazteleraz
Martxoak 27, ostirala
Antzerkia: ‘El lenguaje de las flores’ (Mikel Losada, Olatz Ganboa, Unai Izquierdo, Getari Etxegarai)
Gazteleraz
Martxoak 29, igandea
Kontzertua: ‘Bost’ (Oreka Reed Quinted eta Da Capo Musika Banda)
Apirilak 12, igandea
Dantza-antzerkia: ‘Hasta el ultimo baile’ (Aiala Etxegarai, Yolanda Bustillo, Amaia Santamaria)
Gazteleraz
Apirilak 18, larunbata
Antzerkia haurrentzat: ‘Sesamo, ireki zaitez’
Euskaraz
Apirilak 19, igandea
Kontzertua: ‘Lur’ (Maddi Oihenart, Juantxo Zeberio Etxetxipia)
Euskaraz
Apirilak 26, igandea
Antzerkia: ‘Massilia’ (Laura Maria Gonzalez, Lluis Marques, Julia Molins, Marti Salvat)
Gazteleraz
Maiatzak 8, ostirala
Antzerkia: ‘Calla y come’ (Pako Revueltas, Enriqueta Vega, Na Gomes)
Gazteleraz
Maiatzak 16, larunbata
Kontzertua haurrentzat: ‘Loa eta Laia zuzenean’
Euskaraz
Maiatzak 22, ostirala
Antzerkia: ‘Promesarik txikiena’ (Intza alkain, Maite Aizpurua Olaizola, Maiana Etxeberri Keufterian, Ane Garcia Lopez)
Euskaraz
Maiatzak 24, igandea
Kontzertua: ‘Su motelean: zentzumenentzako kontzertua’ (Da Capo eta Jose Miguel Olazabalaga sukaldaria)
Testu barik
Ekainak 6, larunbata
Kontzertua: ‘Universo Depedro’ (Depedro)
Gazteleraz
☉ Galdakao
Urreta Taekwondo Taldeak urrezko bi eta brontzezko lau domina irabazi ditu Euskadiko Poomsae Txapelketan
Itxaso Hernandezek eta Esther Pomarrek urrezkoa irabazi dute, eta Laia Hernandezek, Irati Gonzalezek, Ivan Gallardok eta Hodei Huetek zilarrezkoa
Urtarrilaren 10ean Euskadiko Poomsae Txapelketa jokatu zen Bilboko Miribilla frontoian eta bertan Urreta Taekwondo Taldeko kideek hartu zuten parte.
Itxaso Hernandezek eta Esther Pomarrek urrezko domina bana irabazi zuten.
Eta, Laia Hernandezek eta Irati Gonzalezek brontzezkoa lortu zuten banakako eta binakako modalitateetan, Ivan Gallardorekin eta Hodei Hueterekin batera.
Gainera, Izaskun Velezen seigarren postua eta Enara De Santiagoren eta Lucia Da Silvaren debuta nabarmendu dituzte Urreta Taekwondo Taldeko arduradunek: “Merezitako bosgarren eta seigarren postuak lortu zituzten”, diote.
☉ Galdakao
Galdakaok Itzuliako etapa baten irteera eta helmuga hartuko ditu aurten
Oraindik ez dute zehaztu zein egunetan izango den, baina Itzulia bera apirilaren 6tik 11ra bitartean izango da, eta azken etapa Bergaran jokatuko da
2026ko Itzulian Galdakaok etapa baten hasiera eta amaiera hartuko ditu. Oraindik ez dute zehaztu zein egunetan izango den, baina Itzulia bera apirilaren 6tik 11ra bitartean izango da, eta azken etapa Bergaran jokatuko da.
Galdakaok kultura eta historia zabala dauka txirrindularitzaren arloan, eta, urteen joan-etorrian, harreman estu-estua izan du Itzuliarekin. Hori nabarmendu du Iñigo Arriandiaga Hernando alkateak (abizen-aldaketa egin du), eta zentzu horretan, Galdakaoko Txirrindulari Elkarteari, Mozoilo Triatloi Elkarteari eta Txirrindulari Gelari egiten duten lana eskertu du.
“Azken horretan, hain zuzen ere, lan nekaezina egiten da Igor Antonen zuzendaritzapean, txirrindularitzaren kultura neska-mutilen artean sustatzeko asmoz. Ziur jarraipena emango diotela Galdakaok txirrindularitzarekin daukan harreman horri. Talde horientzat guztientzat, harrobi horrentzat eta herritar guztientzat berezia izango da gure herrian munduko txirrindulari onenei harrera egitea”, esan du Arriandiagak.
Gaur sinatu dute hitzarmena Galdakaoko Udalak eta Oceta Euskadi Txirrindularitza Antolakuntzak Itzuliako etapa bat Galdakaon hasi eta bukatzeko.
“Hitzarmen hau oso garrantzitsua da udalerriarentzat. Pozarren gaude, txirrindularien lurra den Galdakaora itzuli garelako. Itzulia eta Itzulia Women askotan igaro dira hemendik, baina 1996az geroztik Galdakaon ez da etaparik egon”, adierazi du Javier Riaño Ocetako presidenteak.
Irteera eta helmuga Galdakaon bertan egongo direnez, udalerriak lasterketarekin daukan harreman historikoa indartuko dute, eta 2026ko edizioko ibilbidean duen agerpena sendotuko dute. Hitzarmenean, bi alderdien arteko lankidetza-esparrua ezarri dute, lasterketako jardunaldia udalerrian bertan antolatzeko eta garatzeko.
Hitzarmenaren sinadura-ekitaldian Arriandiagarekin eta Riañorekin batera izan dira Asier Korta Galdakaoko Udaleko Kirol arloko zinegotzia, Amets Iturbe Gazteria arloko zinegotzia, Iker Amarika Ocetako Harreman Instituzionalerako arduraduna eta Olatz Otero Ocetako idazkaria.
Ziortza Karranza: «Larrialdietan espezializatutako psikologoak funtsezkoak dira Kordobako tren-istripua bezalako tragedietan»
‘Pintxada Gaua’ antolatu dute Arrigorriagako Gaztetxean, ADELA elkartea laguntzeko
Fede Saiz basauriarra eta Basconiako futbol jokalari ohia hil da
Argazkiak | Lokatz artean lehiatu dira Ausartak Mendi Lasterketako korrikalariak Arrigorriagan
Argazkiak | Errege Magoek ilusioa eta gozokiak banatu dituzte Galdakaoko kabalgatan
Argazkiak | Errege Magoen Kabalgatak eta epifaniak jendez bete du Arrigorriagako plaza
Bideoa | Abeltzainak eta mendizaleak, oreka zailean Upon gora
Eder Lozano Heras: “Gure helburua da umeek 112ra deitzen ikastea eta larrialdi-zerbitzuak heldu aurretik zer egin behar duten jakitea”
