☉ Galdakao
‘Galdakao Oroimenak’ Gerra Zibiletik eskubide urraketak jasandako 503 galdakoztar identifikatu ditu
“Prest al dago euskal gizartea Gerra Zibiletik gaur egunera arte eskubide urraketak jasan dituztenen egia ezagutzeko?” galdetu du Aranzadi Elkarteko Javi Buces kideak ‘Galdakao Oroimenak’ webgunearen inaugurazio aurkezpenean
“Prest al dago euskal gizartea Gerra Zibiletik gaur egunera arte eskubide urraketak jasan dituztenen egia ezagutzeko?” galdetu du Aranzadi Elkarteko Javi Buces kideak ‘Galdakao Oroimenak’ webgunearen inaugurazio aurkezpenean. Jaio berri den webgune honek Aranzadi Elkarteak azken bi urtetan Galdakaoko Udalaren babesaz egindako ikerketen emaitzak jasotzen ditu: “1936tik gaur egun arte eskubide urraketak jasan dituzten galdakoztarren “erradiografia” egin dugu”. Horrela azaldu du Bucesek Torrezabaleko Erakusketa Aretoan egindako aurkezpen jendetsuan.
Guztira 40 herritar baino gehiago, Galdakao Gogorako kideak eta Udaleko alderdi ia guztietako ordezkariak hurbildu dira memoria historikoaren inguruko webgune berriaren aurkezpenera (PSE eta atxiki gabeko zinegotzia salbu). “Galdakaon konpromiso sakon bat dago”, hasi du Aranzadikoak hitzaldia. “Gerra garaitik gaur egun arte gertatuakoa ezagutzeko konpromiso irmoa”. Bucesen arabera herriak galdakoztarrek azken 80 urteetan gertatutakoaren inguruko informazioa ezagutu eta “izen-abizenak jarri nahi dizkio gertatutakoari”.
Hots, Galdakaon gertatutakoaren “erradiografia” atera nahi du Galdakao Oroimena webgunearen bidez, “kontakizunik gabekoak”, gerra garaian eta ostean gertatutako egia, justizia eta erreparazioa printzipioak sakonean ezagutzeko“, azaldu du Bucesek. “Historialari bezala, gure helburua lehen printzipioa ezagutzea da: egia. Berau ezagutu gabe ezin dugu justizia eta erreparazioa eskatu”, argitu du Bucesek. Egia azaleratzeko sortu dute Galdakao Oroimena webgunea.
Herritarrak, aurkezpenean // Geuria
Webgunea, sakonean
Galdakao Oroimena webgunean klik egin eta berehala atal bi bereiztuko ditu erabiltzaileak: Oroimen historikoa, 1936. urtetik 1959 urterainokoa, eta Gertuko Oroimena deiturikoa, 1960tik gaur egunera artekoa. Oroimen historikoaren atalean Galdakao Gogora taldekoek egindako aurretiko lana eskertu eta azpimarratu du Javik. “Gertuko Oroimenak, aldiz, diktadura, trantsizioa eta Demokrazia garaiak jasotzen ditu. Garai hartan beste mota bateko urraketak egon ziren. Atal honetan lana 0tik hasi genuen”.
Aranzadik azken urte bitan egindako bi garaietako ikerketen emaitzak webgunean eskegi dituzte baina horrek ez du esan nahi lana bukatuta dagoenik; “Asmoa da webgunea herritarrei zabaltzea da eta eurek ere ekarpenak egitea, herritarrentzako erreminta baita”, argitu du Bucesek “Tresna bizia da webgunea eta herritarren zerbitzura egongo da”.
Oroimen historikoa eta Gertuko oroimena ataletan 503 pertsona identifikatu ditu Aranzadi elkarteak gaur egun arte eta plataforma honek pertsona horien fitxak aurkitzeko aukera ematen du bilatzaile sistema baten bidez. Horrela, erabiltzaileak pertsona horien datu pertsonalak, argazkiak, biografia txikiak, testigantzak, jasandako urraketa eta bestelako informazioa eskuratzeko aukera izango du.
Lan hau burutu ahal izateko, Erandioko Udalarekin gertatu bezala, akordioa lortu behar da herriko Udalarekin, eta Galdakaok hala egin zuen ere. Dagoeneko, Erandio eta Galdakao proiektu hau garatu duten Bizkaiko udalerri bakarrak dira momentuz.
Aranzadi elkarteko Javi Buces // Geuria
“Duela bi urte bide berri bat hasi genuen Udalean Memoria Historikoan sakontzeko asmoagaz”, azaldu du Iñigo Hernando Galdakaoko alkateak. “Hori dela eta murgildu ginen proiektu honetan: 1936tik gaur egunera arteko giza eskubideen urraketen inguruko azterketa sakon bat egiteko”.
Alkatearen arabera proiektuak lau ardatz ditu: “Lehena, aurrean dugun pertsona entzutearen garrantzia azpimarratzea, ulertu eta enpatizatzeko; Bigarrena, bizipen ezberdinak errespetatzeak ez du esan nahi norberak dituenari uko egitea; Hirugarrena, memoriaren duinaren beharra dugula; Laugarrena, helburuak argi izan behar ditugu bidea eraikiz eta pausuak emateko, gizarte hobeagoa sortuz datozen belaunaldientzat”. Proiektu honek aurrera egiteko, Udaleko alderdi guztien babesa jaso du eta hori bera eskertu du herriko alkateak, besteak beste.
“Gure eskubidea da gerra garaitik gaur egun arte gertatutako egi integrala ezagutzea”, laburbildu du Javi Bucesek. “Hemen ez dago kontakizunik. Hau ez da liburu bat. Zorionez, erradiografia honetan pertsonak ageri dira eta zailtasun guztien gainetik proiektu sendoa garatzea lortu duzue herritarrek”.
☉ Galdakao
Argazkiak telefono mugikorrarekin ateratzen ikasteko tailerra antolatu du Clic eta Click elkarteak Galdakaon
Dagoeneko talde bat osatu dute, baina oraindik ere izena emateko aukera dute herritarrek. Bestetik, haurrei zuzendutako doako ikastaroa ere antolatu dute
Click eta Click elkarteak argazkigintza herritar guztiei zabaltzeko ikastaroak antolatu ditu ekainera bitartean.
Hain zuzen ere, bi dira antolatu dituzten tailerrak: telefono mugikorrarekin argazkiak ateratzen ikastekoa eta haurrei zuzendutakoa.
Telefono mugikorrarekin argazkiak egiten ikasteko ikastaroari atzo, urtarrilak 12, ekin zioten. Talde bat osatu dute eta astelehenero bilduko dira 17:00etatik 19:00etara Zamakoa kaleko 21 zenbakian duten lokalean.
Hala ere, oraindik interesa dutenek izena eman dezakete tailerrean: “Talde berriak sortzeko aukera dago!”, diote.
Haurrentzako ikastaroari dagokionez, 8 eta 12 urte bitartekoei dago zuzenduta eta doakoa izango da. Larunbat arratsaldetan izango da ikastaroa, eta taldea osatu bezain laster hasiko da.
Izena eman nahi dutenek Click eta Clicken lokalean bertan egin dezakete, asteazken eta ostegunetan, 17:00etatik 19:00etara, edo clicketaclikc@gmail.com helbide elektronikora idatziz.
☉ Galdakao
Torrezabalek zuzeneko 22 ikuskizun tauratuko ditu urtarriletik ekainera bitartean
Eneko Sagardoy, Iraia Elias, Klara Badiola, Ramon Agirre, Pepe Viyuela, Pako Revueltas eta Depedro igoko dira, besteak beste, Torrezabaleko eszenatokira
Urtarriletik ekainera bitarteko programazioa aurkeztu du Torrezabal Kultur Etxeak. Guztira 22 ikuskizun izango dira: euskarazko zazpi, gaztelerazko bost, testu barik lau dira eskainiko dituzten antzezlanak, eta dantza eta kontzertuak ere izango dira.
“Ikuskizun bakoitza emozio berriak esploratzeko, ikuspegiak zabaltzeko eta kultura esperientzia partekatu gisa bizitzeko gonbita da”, dio Edurne Espilla Galdakaoko Udaleko Kultura arloko zinegotziak.
Programazioak “tradizioa eta berrikuntza” orekatzea bilatzen duela esan du Katrin Schlegel Torrezbaleko programatzaileak, “izen ezagunak eta sortzaile berriak uztartuz, jakin-mina pizten duten proposamenekin”, dio.
“Horrela, ikuskizun bakoitza hausnarketa egiteko, emozionatzeko eta artearekiko hurbileko esperientzia bat bizitzeko aukera bihurtzen da”, dio Schlegelek.
Torrezabal, sortzaileen etxea
Torrezabal Euskal Herriko sortzaileen “lantoki eta etxe” dela azaldu du Espillak: “Ateak zabaldu dizkiegu sortzaileei, euren sormen-prozesuak Torrezabalen bertan egiteko”, dio.
Horren adibide da Metrokoadroka Kolektiboa Galdakaon eta Torrezabalen bertan ontzen ari den ‘Bi baso bat ur’ antzezlana. ‘Geuretik Sortuak’ programari esker garatzen ari dira eta otsailaren 19an estreinatuko dute Torrezabalen. Ondoren, bira egingo dute Euskal Herri osoan zehar.
Antzezlanak alaitasunaren izaera soziala jartzen du erdigunean, eta agerian uzten du minaren ostean alaitasunaren eta umorearen jabe egitea mina gainditzeko eta ahalduntzerako ezinbesteko tresna dela.
Edurne Azkarate da antzezlanaren zuzendaria eta obra garatzeko prozesua “oso aberasgarria” izaten ari dela dio: “Astean zehar antzokiak itxita egon ohi dira eta eskertzen dugu horrelako aukerak eman izana”.
Gidoia osatzeko Galdakaon ikerketa egin zuten, abenduan zehar entseguak egin zituzten Torrezabalen eta laster berriro elkartuko direla zehaztu du Oier Guillan antzerkigileak. Gainera, asmoa daukate estreinaldia izan baino lehen entsegu ireki bat egiteko.
Beste alde batetik, ‘Bi baso bat ur’ antzezlana ontzeko aukera horrez gain, Torrezabal zabalik egongo da Euskal Herriko Orkestra Barrokoarentzat. Otsailean ‘Masquarade’ estreinatuko dute Bilboko Arriagan eta Donostiako Kursaalen, baina aurretik entsegua egingo dute Torrezabaleko oholtzan.
“Honek erakusten du Torrezabaleko ateak zabalik ditugula. Sortzaileen ondoan egon nahi dugu eta Torrezabal euren etxea sentitzea nahi dugu”, dio Espillak.
Programazioa | Torrezabal
2026 Urtarrila-Ekaina
Urtarrilak 16, ostirala
Antzerkia: ‘Vulcano’ (Eneko Sagardoy, Belen Ponce de Leon, Ivan Lopez-Ortega, Javi Coll, Macarena Sanz)
Gazteleraz
Urtarrilak 24, larunbata
Antzerkia haurrentzat: ‘Alma’
Testu barik
Urtarrilak 30, ostirala
Antzerkia: ‘Nor naizen baneki’ (Ramon Agirre, Garoa Bugallo, Maialen Diaz, Aline Etxeberri, Manex Fuchs, Idoia Tapia, Oier Zuñiga)
Euskaraz
Otsailak 6, ostirala
Antzerkia: ‘Encerrona’ (Pepe Viyuela)
Testu barik
Otsailak 8, igandea
Musika eta umorea: ‘Da Capo Banda eta Martina’
Otsailak 19, osteguna
Antzerkia (estreinaldia): ‘Bi baso bat ur’ (Intza Alkain, Javier Barandiaran, Marina Suarez, Iraia Elias)
Euskaraz
Otsailak 21, larunbata
Antzerkia haurrentzat: ‘Hodei guztien gainetik’ (Markeliñe)
Testu barik
Otsailak 28, larunbata
Haurrentzako ikuskizuna: ‘Mimesis’
Testu barik
Martxoak 1, igandea
Antzerkia: ‘Desobedienteak 18/98’ (Miren Arrieta/Aiora Enparantza, Iñigo Azpitarte, Klara Badiola, Kepa Errasti, Omar Somai)
Euskaraz
Martxoak 7, larunbata
Antzerkia haurrentzat: ‘Kimu’ (Marie de Jongh)
Euskaraz
Martxoak 13, ostirala
Dantza-antzerkia: ‘Zambra de la buena salvaje’ (Isabel Vazquez)
Gazteleraz
Martxoak 27, ostirala
Antzerkia: ‘El lenguaje de las flores’ (Mikel Losada, Olatz Ganboa, Unai Izquierdo, Getari Etxegarai)
Gazteleraz
Martxoak 29, igandea
Kontzertua: ‘Bost’ (Oreka Reed Quinted eta Da Capo Musika Banda)
Apirilak 12, igandea
Dantza-antzerkia: ‘Hasta el ultimo baile’ (Aiala Etxegarai, Yolanda Bustillo, Amaia Santamaria)
Gazteleraz
Apirilak 18, larunbata
Antzerkia haurrentzat: ‘Sesamo, ireki zaitez’
Euskaraz
Apirilak 19, igandea
Kontzertua: ‘Lur’ (Maddi Oihenart, Juantxo Zeberio Etxetxipia)
Euskaraz
Apirilak 26, igandea
Antzerkia: ‘Massilia’ (Laura Maria Gonzalez, Lluis Marques, Julia Molins, Marti Salvat)
Gazteleraz
Maiatzak 8, ostirala
Antzerkia: ‘Calla y come’ (Pako Revueltas, Enriqueta Vega, Na Gomes)
Gazteleraz
Maiatzak 16, larunbata
Kontzertua haurrentzat: ‘Loa eta Laia zuzenean’
Euskaraz
Maiatzak 22, ostirala
Antzerkia: ‘Promesarik txikiena’ (Intza alkain, Maite Aizpurua Olaizola, Maiana Etxeberri Keufterian, Ane Garcia Lopez)
Euskaraz
Maiatzak 24, igandea
Kontzertua: ‘Su motelean: zentzumenentzako kontzertua’ (Da Capo eta Jose Miguel Olazabalaga sukaldaria)
Testu barik
Ekainak 6, larunbata
Kontzertua: ‘Universo Depedro’ (Depedro)
Gazteleraz
☉ Galdakao
Urreta Taekwondo Taldeak urrezko bi eta brontzezko lau domina irabazi ditu Euskadiko Poomsae Txapelketan
Itxaso Hernandezek eta Esther Pomarrek urrezkoa irabazi dute, eta Laia Hernandezek, Irati Gonzalezek, Ivan Gallardok eta Hodei Huetek zilarrezkoa
Urtarrilaren 10ean Euskadiko Poomsae Txapelketa jokatu zen Bilboko Miribilla frontoian eta bertan Urreta Taekwondo Taldeko kideek hartu zuten parte.
Itxaso Hernandezek eta Esther Pomarrek urrezko domina bana irabazi zuten.
Eta, Laia Hernandezek eta Irati Gonzalezek brontzezkoa lortu zuten banakako eta binakako modalitateetan, Ivan Gallardorekin eta Hodei Hueterekin batera.
Gainera, Izaskun Velezen seigarren postua eta Enara De Santiagoren eta Lucia Da Silvaren debuta nabarmendu dituzte Urreta Taekwondo Taldeko arduradunek: “Merezitako bosgarren eta seigarren postuak lortu zituzten”, diote.
☉ Galdakao
Galdakaok Itzuliako etapa baten irteera eta helmuga hartuko ditu aurten
Oraindik ez dute zehaztu zein egunetan izango den, baina Itzulia bera apirilaren 6tik 11ra bitartean izango da, eta azken etapa Bergaran jokatuko da
2026ko Itzulian Galdakaok etapa baten hasiera eta amaiera hartuko ditu. Oraindik ez dute zehaztu zein egunetan izango den, baina Itzulia bera apirilaren 6tik 11ra bitartean izango da, eta azken etapa Bergaran jokatuko da.
Galdakaok kultura eta historia zabala dauka txirrindularitzaren arloan, eta, urteen joan-etorrian, harreman estu-estua izan du Itzuliarekin. Hori nabarmendu du Iñigo Arriandiaga Hernando alkateak (abizen-aldaketa egin du), eta zentzu horretan, Galdakaoko Txirrindulari Elkarteari, Mozoilo Triatloi Elkarteari eta Txirrindulari Gelari egiten duten lana eskertu du.
“Azken horretan, hain zuzen ere, lan nekaezina egiten da Igor Antonen zuzendaritzapean, txirrindularitzaren kultura neska-mutilen artean sustatzeko asmoz. Ziur jarraipena emango diotela Galdakaok txirrindularitzarekin daukan harreman horri. Talde horientzat guztientzat, harrobi horrentzat eta herritar guztientzat berezia izango da gure herrian munduko txirrindulari onenei harrera egitea”, esan du Arriandiagak.
Gaur sinatu dute hitzarmena Galdakaoko Udalak eta Oceta Euskadi Txirrindularitza Antolakuntzak Itzuliako etapa bat Galdakaon hasi eta bukatzeko.
“Hitzarmen hau oso garrantzitsua da udalerriarentzat. Pozarren gaude, txirrindularien lurra den Galdakaora itzuli garelako. Itzulia eta Itzulia Women askotan igaro dira hemendik, baina 1996az geroztik Galdakaon ez da etaparik egon”, adierazi du Javier Riaño Ocetako presidenteak.
Irteera eta helmuga Galdakaon bertan egongo direnez, udalerriak lasterketarekin daukan harreman historikoa indartuko dute, eta 2026ko edizioko ibilbidean duen agerpena sendotuko dute. Hitzarmenean, bi alderdien arteko lankidetza-esparrua ezarri dute, lasterketako jardunaldia udalerrian bertan antolatzeko eta garatzeko.
Hitzarmenaren sinadura-ekitaldian Arriandiagarekin eta Riañorekin batera izan dira Asier Korta Galdakaoko Udaleko Kirol arloko zinegotzia, Amets Iturbe Gazteria arloko zinegotzia, Iker Amarika Ocetako Harreman Instituzionalerako arduraduna eta Olatz Otero Ocetako idazkaria.
☉ Galdakao
Autismoa eta beste neurodibergentziak dituzten familientzako Material Bankua jarri du martxan Galdakao TEAyudak
Arreta-defizitaren eta hiperaktibitatearen nahasmendua, dislexia, disgrafia eta autismoa duten familientzako zerbitzua da: prezio altuak dituzten tresnak doan hartu ahal izango dituzte
Autismoa, Arreta-defizitaren eta Hiperaktibitatearen Nahasmendua (ADHN), Dislexia, Disgrafia eta beste neurodibergentzia batzuk dituzten familientzako Material bankua jarri du martxan Galdakao TEAyuda elkarteak.
Proiektu aitzindaria da eta helburua da prezio altuak dituzten tresnak doan hartzea familiek. Hala nola, entzumen-hipersentsibilitaterako zarataren aurkako kaskoak, presio sakonaren bidez antsietatea murrizteko mantak eta txakurrak, mugimen-ezinegona bideratzeko fidget diskretuak, denbora kudeatzeko eta ziurgabetasuna murrizteko Time Timersak, argi buzzerrak txandak hartzeko prozesua praktikatzeko, ikusmen-nekearen aurkako tresnak, Disgrafiarako eta Dispraxiarako Ellie eskularrua, gorputz-kontzientziarako mugimendu-arrabolak edota elikadura-aukeraketa lantzeko plater espezializatuak.
“Erosi aurretik, seme-alabentzat baliagarriak izan daitezkeen tresnak doan probatzeko aukera ematen die Material Bankuak familiei”, diote Galdakao TEAyudako arduradunek.
Material Bankua Galdakaoko Gaztain kaleko 4. zenbakian dago, 09:00etatik 14:00etara bitartean. Zerbitzuak 15 eguneko mailegu-sistema du, eta erabilera-gidak eta higiene-protokoloak ditu.
“Galdakaoko Udaleko Herritarren Partaidetzarako alorraren, Nafarroako Rural Kutxaren eta Graficas Galdakaoren funtsezko laguntzari esker izan da posible Galdakaon Material Bankua, baita boluntarioen eta familien lan nekaezinari esker ere”, diote.
Galdakao TEAyudak 5.000 euroko inbertsioa egin du proiektu honetan, eta 2.800 euro bideratu ditu materialak erosteko. “Materialak oso teknikoak dira eta horregatik elkarteak baliabide horien inportazioa Frantzian espezializatutako enpresa batetik kudeatu behar izan du, ez baitugu tresna sorta osoa aurkitu Estatuan”, diote.
Argazkiak | Lokatz artean lehiatu dira Ausartak Mendi Lasterketako korrikalariak Arrigorriagan
Bideoa | Abeltzainak eta mendizaleak, oreka zailean Upon gora
Urtarrilaren 19an zabalduko ditu ateak Ugaoko kiroldegi eraberrituak
Argazkiak | Lokatz artean lehiatu dira Ausartak Mendi Lasterketako korrikalariak Arrigorriagan
Argazkiak | Errege Magoek ilusioa eta gozokiak banatu dituzte Galdakaoko kabalgatan
Argazkiak | Errege Magoen Kabalgatak eta epifaniak jendez bete du Arrigorriagako plaza
Bideoa | Abeltzainak eta mendizaleak, oreka zailean Upon gora
Eder Lozano Heras: “Gure helburua da umeek 112ra deitzen ikastea eta larrialdi-zerbitzuak heldu aurretik zer egin behar duten jakitea”
