Sareak

☉ Galdakao

Xabier Garcia Gaztelu eta Jon Bienzobas preso galdakoztarrak Euskal Herriratuko dituzte

|

Estremeratik eta Dueñastik (Palentzia) Eusko Jaurlaritzaren eskumeneko espetxeetara lekualdatuko dituzte bi presoak // Barne Ministerioa

Espetxeetako Idazkaritza Nagusiak eta Eusko Jaurlaritzako Berdintasun, Justizia eta Gizarte Politiketako Sailak, administrazio bakoitzaren eskumenen esparruan, hamahiru preso lekualdatzea erabaki dute. Horien artean daude Xabier Garcia Gaztelu eta Jon Bienzobas Arretxe preso galdakoztarrak. Estremeratik eta Dueñastik (Palentzia) Eusko Jaurlaritzaren eskumeneko espetxeetara lekualdatuko dituzte, oraindik zehaztu barik zeinetara eta noiz.

Xabier Garcia Gaztelu 2005eko abenduaren 15ean espetxeratu zuten eta 30 urteko zigorra ezarri zioten hilketak, bahiketak, atentatu-delituak, legez kanpo elkartzea, arma-gordailua, lapurreta, faltsifikazioak, suteak eta kalteak egitea leporatuta. 2023ko abuztuan zigorraren hiru laurdenak beteko ditu eta Estremerako espetxeko Tratamendu Batzordeak bigarren graduan utzi du. Zigorra EAEko espetxe batean betetzen jarraitzea ebatzi du Idazkaritza Nagusiak.

Jon Bienzobas Arretxe 1999an atxilotu zuten Pauen (Okzitania) eta 2006an epaitu zuten Espainiako Auzitegi Nazionalean, 216 urteko espetxe zigorra ezarrita. Frantzian, Saint Maur espetxean, bete zuen zigorraren zati bat —13 urte—, eta 2018an Frantziar estatuak Espainiaratu zuen. Urte hartako urtarrilaren 3an kartzelaratu zuten eta 266 urteko zigorra betetzen ari da (ez dago jasota metaketa juridikorik). Hilketak, terrorismo-delituak eta armak eta lehergaiak gordetzea egotzita atxilotu zuten. Palentziako espetxeko Tratamendu Batzordearen gehiengoaren proposamenaren ondoren, EAEko espetxeetako batera lekualdatuko dute.

☉ Galdakao

Argazkiak / Dozenaka lagun batu dira Galdakaon Azaroaren 25eko elkarretaratzean

|

Emakumeen kontrako indarkeriaren aurkako nazioarteko eguna da gaur, azaroak 25. Galdakaon elkarretaratzea deitu du Momoakek udaletxeko plazan. Dozenaka lagun batu dira kontzentraziora.

Osorik irakurri

☉ Galdakao

Galdakaoko bederatzi tabernak parte hartuko dute Pintxo Lanperna txapelketan

|

azaroaren 24tik 26ra bitartean izango da Pintxo Lanperna txapelketa Galdakaoko bederatzi tabernatan // Galdakaoko Udala

Perretxikoak oinarri dituen Pintxo Lanperna txapelketa izango da azaroaren 24tik 26ra bitartean. Guztira bederatzi tabernak hartuko dute parte: On Kafe, Sorgiñe, Aterpe, Goxoa Bakery, Ostatu, Atseden, Batzokia, Ganguren eta V-Bat.

Pintxo txapelketa honetan parte hartzen duen taberna bakoitzak perretxikoekin osatutako pintxo bat prestatuko du, eta pintxoa eta ardo ondua edota ur botilatxoa 3 euroan eskainiko du.

Honako ordutegi hauetan eskainiko dituzte lehiaketarako prestatutako pintxo berezi horiek: azaroaren 24an 19:00etatik 23:00etara, azaroaren 25ean 12:30etik 15:30era eta 19:00etatik 23:00etara, eta azaroaren 26an 12:30etik 15:30era.

Zozketak

Lehiaketako pintxoak herritarrek eta epaimahai profesional batek baloratuko dituzte. Herritarren sariaren irabazlea boto gehien biltzen dituen pintxoa izango da, eta saria herriko saltokietan gastatu ahal izateko 100 euroko opari-txartela izango da. Sari profesionalaren pintxo irabazlea epaimahai profesionalak aukeratuko du.

Pintxo irabazlea aukeratzen laguntzen dutenek eta kartoi meheak zigilurekin eta establezimenduaren izenarekin azaroaren 28eko 13:00ak baino lehen entregatzen dituztenek 50 euroko opari txartela baten zozketan parte hartuko dute. Zozketa azaroaren 28an egingo da 14:00etan, Dendari Elkarteko egoitzan.

Galdakaoko Udalak, Gu Dendari elkartearen eta Galdakaoko Ostalaritza Eskolaren laguntzarekin antolatzen dute Pintxo Lanperna txapelketa.

Osorik irakurri

☉ Galdakao

Auzoetako beharrak identifikatu eta estretagia bat landuko du Galdakaoko Udalak datozen urteetan

Auzoen garapen integral eta orekatua bilatzeko azterketa parte hartzailea egingo du Udalak alde batetik Aperribai, Olabarrieta, Txistulanda eta Jugu auzoetan, eta bestetik Tximelarre Goikoa, Urtebieta, Zuatzaurre eta Urreta auzoetan

|

Aperribai auzoa // Geuria

Auzoen garapen integral eta orekatua sustatzeko asmoz, Auzotik Galdakao dinamika jarriko du martxan Udalak datozen asteetan. Proiektuak bi helburu nagusi ditu: auzoen behar nagusiak identifikatzea eta datozen urteetan zehar horiei erantzungo dien estrategia bat lantzea.

Dinamikarekin hasteko, bi eremu aztertuko ditu Galdakaoko Udalak: alde batetik, Agirre, Aperribai, Azpuru, Olabarrieta, Txistulanda, Aperribai Zaharra eta Jugu, eta bestetilk, Tximelarre Goikoa, Urtebieta, Zuatzaurre eta Urreta. “Datozen asteetan bi eremu horien diagnosia egiteko lanarekin abiatuko dugu Auzotik Galdakao proiektua, gune horietatik bertatik”, diote udal ordezkariek.

Horretarako herritarren parte hartzea bilatuko du Udalak. Bi eremu horietan bizi diren auzokideei zein jarduera bertan egiten duten bizilagunei edo eragileei inkestak egingo dizkie Udalak: “Inkestatzaile taldea auzo bakoitzeko hainbat etxetara joango da galdera sorta txiki batekin, eta, nahi duenak, galdetegiari online erantzuteko aukera ere izango du. Ondoren, lanketa parte hartzailea egingo da interesa dutenekin”, diote udal arduradunek.

Lanketa parte hartzaileari dagokionez, zenbait hitzordu eta jarduera antolatu ditu Udalak urtarrilean: urtarrilaren 15ean, astelehena, 18:00etan Urreta 2 eskolan, auzoei buruzko hausnarketa, 2. eremuko herritar eta elkarteekin; urtarrilaren 16an, asteartea, 18:00etan Aperribai eskolan, auzoei buruzko hausnarketa, 1. eremuko herritar eta elkarteekin; urtarrilaren 21ean, igandea, 11:00tan, ibilbide gidatua 2. eremuko auzoetan zehar, azterketarako garrantzitsuak diren lekuak ikusteko; eta urtarrilaren 28an, igandea, 11:00etan, ibilbide gidatua 1. eremuko auzoetan zehar, azterketarako garrantzitsuak diren lekuak ikusteko.

Jarduera horietan parte hartzeko izena eman behar dute interesdunek erabaki.galdakao.eus parte hartze plataformaren bitartez edo 688 830 479 telefono zenbakira deituta zein telegram edo whatsapp bidez mezua bidalita.

“Herritarren beharrizanei ahalik eta ondoen erantzuteko ezinbestekoa da herriaren, bertako guneen eta auzoen egoerak aztertu, horien beharrizanak ezagutu, eta proposamen zehatzak lantzea. Jakina da lekuan lekukoak izaten duela bertoko egoeraren berririk zuzenena, eta, hori abiapuntu hartuta, parte hartzerako dinamika berri bat jarriko dugu: Auzotik Galdakao. Herria herritarrek eraiki behar dutelako, guneka, auzoka edo zonaldeka batu, eta guztien ekarpenak uztartuta. Galdakao hobea elkarlanean sortzeko proposamena da horregatik honakoa; nork bere auzo edo gunetik Galdakao osatzekoa”, diote udal ordezkariek.

Osorik irakurri

☉ Galdakao

Transfusio zentroko langileei adostutako soldata igoera Osakidetzak ordaindu ez diela salatu du ELAk

|

Usansoloko Transfusioen eta Giza Ehunen Euskal Zentroko langileen elkarretaratzeetako bat iaz // Geuria

Bi urte baino gehiagoko borrokaren ondoren, Usansoloko Transfusioen eta Giza Ehunen Euskal Zentroko (TGEEZ) langileek soldata parekatzeko akordioa lortu zuten Osakidetzarekin ekainean, eta hortaz, soldataren % 4ko osagarria jasoko zuten.

Hala ere, ELA sindikatuak salatu duenez, “Osakidetzak ez die ordaindu adostutako osagarria langileei”. Akordioan 2023ko ekaineko, uztaileko, abuztuko, iraileko eta urriko hilekoen ordainketa jasotzen zen, eta urriko nominan ordaindu behar zituen Osakidetzak.

“Osakidetzak ez du bete SATSEk, UGTk eta SMEk 31 eguneko greba ixteko gutxiengoan sinatutako akordioa, eta ez du % 4ko osagarria ordaindu. Akordioa ekainean sinatu zuten Osakidetzak eta SATSE, UGT eta SME sindikatuek. Hala ere, Osakidetzak ez du akordioa bete, eta ez ditu parekatu Transfusio eta Giza Ehunen Euskal Zentroko (TGEEZ) langileen eta Osakidetzako gainerako profesionalen soldatak”, salatu dute ELA sindikatuko ordezkariek. ELAk ez zuen akordioa sinatu, “beste kolektibo batzuk baztertzen zirelako, hala nola, EAGetako zeladoreak edo Lehen Arretako hainbat kategoria”.

Osakidetzako arduradunek zehaztu dutenez, ez dute % 4ko osagarria ordaindu, “akordioa ez duelako onartu Eusko Jaurlaritzaren Gobernu Kontseiluak”.

“Hori ez da berria: gauza bera gertatu zen LABek, CCOOk eta UGTk gutxiengoan adostu zutenean Osakidetzak 2013tik 2021era bitarteko Lanbide Garapenagatik langileei zor zizkien zenbatekoak kentzea. 2019tik bakarrik ordaindu zen, eta akordioa sinatu ondoren, beharrezkoa izan zen gehiengo sindikalak, besteak beste ELAk, grebak deitzea, azkenean Osakidetzak LABekin, CCOOrekin eta UGTrekin adostutakoa ordain zezan, urtebete baino gehiagoren ondoren”, diote ELAtik.

Abenduaren 19an sektore publikoko beste greba bat deitu dute, eta ELAk Transfusioen eta Giza Ehunen Euskal Zentroko langileek bat egin dezaten animatzen ditu.

Osorik irakurri

☉ Galdakao

Galdakaoko Andra Mari ikastetxeko kotxe elektrikoa hirugarren sailkatu da Greenpower Bridgestone lasterketan

|

Andra Mari Lanbide Heziketako ikasleek sortutako auto elektrikoak 23 itzuli egin zizkion Galdakaoko zirkuituari // Argazkia: Bridgestone

Galdakaoko erdigunea auto lasterketen zirkuitu bilakatu zen atzo, azaroak 19. Izan ere, Greenpower lasterketa antolatu zuen Bridgestonek, Galdakaoko Udalaren laguntzarekin, Zamakoa eta Ganekogorta kaleetan.

Besteak beste, Galdakaoko Andra Mari Lanbide Heziketako ikasleek sortutako auto elektrikoak lasterketan parte hartu zuen eta hirugarren sailkatu zen 16 eta 25 urte bitartekoen kategorian (Formula 24+ kategoria). Guztira, 23 itzuli egin zizkion zirkuituari Galdakaoko kotxeak.

Kategoria berean, Laredoko (Kantabria) Fuente Fresnedo Institutuak irabazi zuen lasterketa zirkuituari 35 itzuli emanez. Bigarren sailkatua Santurtziko San Jorge ikastetxea izan zen.

Bestetik, 11 eta 16 urte bitartekoen kategorian (Formula 24) Bilboko La Perrera zentroak irabazi zuen (46 itzuli) eta bigarren eta hirugarren sailkatuak izan ziren: Bilboko Madre de Dios ikastetxea (45 itzuli) eta Deustuko Ikastola (34 itzuli).

Greenpower-Bridgestone zirkuitua hezkuntza-programan parte-hartzaileek 9 eta 25 urte bitarteko haur eta gazteak dira. Eta helburua da auto elektrikoa diseinatzea eta sortzea, ondoren lasterketean parte hartzeko. Lehiaketetan, irabazlea bateria agortu gabe kilometro gehiago egitea lortzen duena da, hau da, ez du azkarrenak irabazten, modu eraginkor, energetiko eta jasangarrian gidatzen duenak baizik.

Osorik irakurri