Sareak

☉ Galdakao

Galdakaoko IV. Herri Krosa apirilaren 26an izango da

|

galdakao herri krosa

Galdakaoko IV. Herri Krosean izena emateko epea zabalik dago dagoeneko eta lasterketa egunera arte irekita mantenduko da

Galdakaoko Udalak eta Atletismo Taldeak elkarlanean antolatzen duten Herri Krosa herrikoia da eta bertan atleta federatuek zein herritarrek partekatu ahal izango dute ibilbidea asfalto gainean. 11:00etan hasita, 8 urtetik beherakoek (nagusi batek lagunduta) eta benjaminek (2005 eta 2006 urteetan jaioak) 600 metroko ibilbidea egingo dute. Kimuen (2003 eta 2004 urteetan jaioak) lasterketak 1.000 metro izango ditu eta 11:15ean hasiko da. Haurren eta kadeteen (2000, 2001 eta 2002an jaioak) txanda 11:30ean helduko da eta 2.000 metroko ibilbidea egingo dute. Kategoria paralinpikoa 12:00etan hasiko da eta 1.000 edo 2.000 metroko ibilbidea markatu zaie. 16 urtetik gorakoek, hau da, gazteek, juniorrek, seniorrek eta beteranoek 12:30ean hasiko dute krosa: Gazteen eta juniorren distantzia 4.120 metrokoa da eta seniorrena eta beteranoena 8.240 metrokoa.

Udal webgunean egin daiteke inskripzioa, baita krosaren egun berean ere goizeko 09:00etatik 10:30etara Antolakuntzako standean, Urreta kiroldegiaren ondoan. Izen ematea 5 eurokoa izango da. Aurreneko 900 inskripzioek oroigarrizko kamiseta jasoko dute.

SARIAK GUZTIENTZAKO

Kategoria seniorrean bai gizonezko bai emakumezko lehenengo sailkatuek garaikurra eta txapela eramango dute. Bestetik, kategoria absolutuan sariak eskudirutan emango zaie emakumezko eta gizonezko lehengo hirurentzat: 100, 60 eta 40 euro hurrenez hurren. Era berean, herriko emakumezko eta gizonezko lehenengoarentzat saria egongo da kategoria absolutuan.

Lasterketa eta sexu bakoitzeko lehenengo hirurentzat ere garaikurrak banatuko zaizkie, eta proba amaitutakoan janari eta edari poltsa bat banatuko zaie parte-hartzaileei eta izena eman duten atleta guztien artean sari-zozketa egingo da.

☉ Galdakao

Urreta kiroldegia handitzeko lanak udan hastea aurreikusi du Galdakaoko Udalak

|

Urreta kiroldegiak izango dituen zenbait espazio berri // Galdakaoko Udala

Urretako kiroldegiaren barnealdea eraberritzeko eta handitzeko obrak egingo ditu Galdakaoko Udalak. Aurreikuspenaren arabera lanak “uda ingururako” hasi nahi ditu Udalak.

Besteak beste, ariketa kardiobaskularrak, indar ariketak edota yoga egiteko erabilera anitzeko aretoak sortuko dituzte eta horretarako eraikin berri bat eraikiko dute kiroldegiaren sarreraren eta igerilekuaren arteko gune hutsean, solariuma deitzen dioten gunean, alegia.

Era berean, solarium horren azpian dagoen sotoa ere egokituko dute, 500 metro karratu ingurukoa.

Guztira, 1.000 metro karratu berri gehiago izango ditu kiroldegiak, eta aireztapen naturala ezarriko dute. Inbertsioa 3 milioi eurokoa izango da.

Hiru fase

Obrak hiru fasetan burutuko dituzte, “erabiltzaileei ahalik eta kaltre txikiena eragiteko”, diote udal ordezkariek.

Hasteko, beheko solairuaren barrualdea konpontzeko eta hobetzeko lanak egingo dituzte: “Igerilekuetarako irisgarritasuna hobetuko da arrapala bitartez, egungo aldagelak berrituko dira eta bina aldagela eta komun egokitu gehituko dira”, diote udal arduradunek. Lehen fase honetako lanak egiteko lau hilabete erabiliko dituzte, gehienez.

Bigarren fasea kiroldegia handitzekoa izango da. “Solarium gisa ezagutzen den gunean bi solairu eraikiko dira, eta horretarako, lur azpian dagoen sotoa egokituko da aurrena. Fitness eta kardio ariketetarako eremu berriak jarriko dira bertan, eta aldagela berriak. Larrialdietarako irteera berri bat ere gehituko da, besteak beste”, diote. Bigarren faseko iraupena, gehienez, zozrtzi hilabetekoa izango da.

Lan horiek amaitu ondoren ekingo diote solarium guneari teilatua jarri eta bi solairu eraikitzeari. “Beheko eta lehenengo solairuetan bi gune diafano egongo dira, besteak beste, askotariko ekintzetara egokitzeko”, diote. Enpresa esleipendunak 14 hilabete erabili ahalko ditu, gehienez, lan hauetarako. Guztira, 26 hilabete.

Azterketa fasean

Urretako kiroldegiaren barnealdea eraberritzeko eta handitzeko lizitazio prozesua azken txanpan da. Apirilaren 17an, asteazkenez, epea bukatu zen enpresek euren eskaintzak egiteko epea.

Orain prozesua azterketa fasean dago, udal teknikarien esku. Apirilaren 24an eta 30ean bilduko da kontratazio mahaia eta bertan erabakiko dute zein enpresak gauzatuko dituen obrak.

Osorik irakurri

☉ Galdakao

Herritarren parte hartzerako lehen ordenantza onartu du Galdakaoko Udalak

|

Herritarrak Udalak sustatutako parte-hartze prozesu batean lanean // Galdakaoko Udala

Herritarrek Galdakaoko udalgintzan parte hartzeko bideak eta moduak batzen dituen arautegia onartu du lehen aldiz Galdakaoko udalbatzak gobernu taldearen aldeko botoekin eta EAJren eta PSEren abstentzioarekin.

Parte-hartze ordenantzaren bitartez erabakiak hartzeko prozesuetan eta udal intereseko gaien kudeaketan herritarren parte hartzea erraztu eta bultzatuko du Udalak. Besteak beste, Udalaren aurrean herritarrek parte hartzeko dituzten eskubideak jaso dituzte arautegian, baita galdakoztarrek parte hartze prozesuak, kontsultak edo osoko bilkurako gai zerrendan gai bat sartzeko aukera ere.

“Eskaera hauek, eta egin daitezkeen beste batzuk ere, sinadura bilketaren bidez babestu behar dira. Sustatu nahi den ekintza motarako beharrezkoa den sinadura kopurua ere jasotzen du ordenantzak, esaterako”, diote udal ordezkariek. Ordenantzak guztira 170 artikulu ditu, bederatzi titulutan eta 28 kapitulutan banatuta.

2022tik lanean

Ordenantza honen edukia lantzeko, hainbat ekintza bildu dituen partaidetza prozesu publiko bat abiatu zuen Udalak 2022an herritarren, elkarteen, kolektiboen, udal teknikarien eta Udalean ordezkaritza duten alderdi politikoen ekarpenak eta ideiak jasotzeko.

Jasotako proposamenekin eta Donostia, Gasteiz, Oñati, Tolosa, Bartzelona eta beste udal batzuetako araudien azterketa egin ondoren, ordenantzaren lehen zirriborro bat idatzi zuten.

Iazko abenduaren 21eko osoko bilkurak dokumentuaren behin behineko onespena egin ostean, martxoko osoko bilkuran behin betiko onartuko du udalbatzak.

Osorik irakurri

☉ Galdakao

Sakeleko telefonoa erabiltzeko doako tailerra antolatu dute Galdakaon jubilatuei zuzenduta

|

Galdakaoko Udaleko Gizarte Ekintzako Adinekoen Dinamizazio Zerbitzuak telefono mugikorra erabiltzeko tailerra antolatu du apirilaren 22an eta 24an.

Tailerra doakoa da eta Iberluzeko Etxea Anaitasuna Adinekoen Zentroan egingo da 16:30etik 18:30era bitartean.

“Bi saioko tailer horretan telefono mugikorrari etekin handiagoa ateratzeko ikasiko dute parte hartzaileek”, diote udal ordezkariek.

Tailerrean izena emateko epea zabaldik egongo da apirilaren 8tik aurrera. Interesdunak Adinekoak Dinamizatzeko Zerbitzuaren bulegora bertaratu daitezke astelehenetik ostiralera 10:00etatik 13:30era, eta ostegunetan 16:00etatik 18:00etara.

Irteera Gernikara

Sakeleko telefonoa erabiltzeko tailerraz gain, jarduera gehiago antolatu ditu apirilean Gizarte Ekintzako Adinekoen Dinamizazio Zerbitzuak: bisita kulturala Gernikako Euskal Herria Museora eta Gernika-Forua-Axpe ibilaldia.

Bisita kulturala apirilaren 18an izango da eta ‘Markos Gimenoren karteletrak’ erakusketa ikusi ahal izango dute herritarrek: 11:00etan euskarazko taldea antolatu dute eta 12:00etan gaztelerazkoa.

“Erakusketa honetan, Markos Gimenok egindako hainbat palindromo aurkituko dira, baina baita Euskal Herriko hainbat artista, lagun eta diseinatzailek, esaldi horientzako, sortu dituzten obrak ere. Guzti hau antolatzen Joseba Sarrionandia eta Esteban Montorio izan dira”, diote udal arduradunek.

Bisita gidaturako izena emateko epea apirilaren 8an ere zabalduko du Udalak (doan), eta gehienez 15 lagun joan ahalko dira talde bakoitzeko.

Gernika-Forua-Axpe ibilaldia

Bestetik, Gernika-Forua-Axpe ibilaldia apirilaren 25ean antolatu dute. “12 kilometroko ibilbide lineal ederraz disfrutatu ahal izango dute herritarrek”, diote Udaletik.

Honako gune hauetatik igarotzen da ibilbidea: Gernika, Urbieta, Oka Ibaia, Forua, Gordiz, Zarragagoikoa, Foruko Bidea, Lakaena, Maitea Baserri, Axbiribil (Atxondo), Karabizurrieta, Goikogana, Irestagorri, Artolena, Birjinarestigoikoa, Altamira, San Bartolome, eta Axpe Ermita (Busturia).

Txangoan izena emateko epea apirilaren 12an zabalduko du Udalak (doan) eta gehienez 30 lagun joan ahalko dira.

Osorik irakurri

☉ Galdakao

Galdakaoko Jai Batzordeak logoa izango du eta hori aukeratzeko lehiaketa zabaldu dute

|

Galdakaoko jaien hasiera iaz // Geuria

Galdakaoko Jai Batzordeak logo propioa izango du. Hala erabaki dute Jai Batzordeko kideek, eta logoa zehazteko lehiaketa zabaldu dute.

Lehiaketan 16 urtetik gorako lagunek parte hartu ahal izango dute. Diseinuak bidaltzeko epea zabalik dago ekainaren 1era arte.

Parte hartzaileek galdakaokojaibatzordea2020@gmail.com helbidera elektrikora bidali behar dituzte euren diseinuak, Logo gakoa idatzita. Pertsona bakoitzak logo bat baino gehiago bidali ahal izango ditu.

Jai Batzordeko kideek zehaztu dutenez, logoa “kolore bakar batekoa” izango da eta bi modutan aurketu behar da: batean ‘Galdakaoko Jai Batzordea’ argi ikusi beharko da, eta bestean, irudia baino ez da agertuko, testurik gabe.

“Tipografia ere librea da”, diote, eta gaineratu dute debekatuta dagoela Inteligentzia Artifizialaren bitartez logoa egitea.

Ekainaren 15ean egingo dute publiko logo irabazlea eta egilearen izena. Epaimahaia Jai Batzordearen lantalde batek osatuko du, “eta komenigarriak izan daitezkeen egokitzapenak eskatu ahal izango dizkio diseinu irabazlearen egileari, halaxe baloratzen baldin badu”, diote.

Irabazleak bi pertsonentzako bi afari irabaziko ditu Galdakaoko bi jatetxetan, “2024an zehar disfrutatzeko”, diote. Gainera, “plaka oroigarri bat ere” jasoko du irabazleak.

Irabazlerik egon ezean, lehiaketa datorren urtean errepikatuko dutela adierazi dute Galdakaoko Jai Batzordetik.

Osorik irakurri

☉ Galdakao

Bertan behera Galdakaoko kale garbiketan astelehenetik aurrera aurreikusita zegoen greba

Bi urteko akordioa sinatu dute sindikatuak eta enpresak, eta Galdakaoko Udala bitartekari lanetan aritu da

|

Galdakaoko kale garbikuntzan bi asteko greba deitua zuen ELA sindikatuak datorren astelehenetik aurrera. Sindikatuko ordezkariek adierazi zutenaren arabera, urtebete baino gehiago zeramaten Andra Mari aldi baterako enpresa-elkartearekin (Enviser eta Serkom enpresek osatua) hitzarmena negoziatzen, emaitzik gabe.

Gauzak horrela, eta enpresak KPIa baino soldata eguneratze askoz txikiagoak eskaintzen zituela ikusita, datorren apirilaren 15ean hasi behar zuten greba enpresako 33 langileek.

Gaurkoan, baina, eta Udalak jakitera eman duen lez, bi urterako akordioa erdietsi dute enpresak eta sindikatuak, “udalaren bitartekaritza lanarekin”.

Osorik irakurri