Sareak

☉ Galdakao

GDKO Ibaizabal saskibaloi taldea maila-igoera lortzeko bidean

|

galdakao gdko ibaizabal saskibaloia

Apirilaren 28tik maiatzaren 1era bitartean Emakumezkoen Saskibaloi Ligan egoteko dauden bi postuak eskuratzeko fasea jokatuko da Extremaduran eta bertan Galdakaoko Ibaizabal kluba arituko da maila-igoera lortzeko ahaleginetan. 

Fase honetan bi multzo egongo dira eta bakoitzean lau klubek jokatuko dute. Galdakoztarrak fase honetako bigarren taldean daude: GDKO-Bizkaia, Araski AES (Araba), Grupo EM Leganés eta Fundal Alcobendas. Apirilaren 28an 16:00etan jokatuko dute galdakoztarrek lehendabiziko partidua Arabako Araski taldearen kontra, apirilaren 29an Leganeseko taldea izango dute aurkari (16:00etan) eta hilaren 30ean 12:00etan GDKO-Bizkaia eta Fundal Alcobendas taldeen arteko norgehiagoka jokatuko dute.

Multzo bakoitzeko lehenengo biak sailkatuko dira finalerako (maiatzaren 1ean 17:00etan eta 19:30ean). Hortik aurrera, hala geratuko lirateke norgehiagokak: lehenbiziko taldean sailkatutako lehena bigarren taldeko bigarrenarekin, eta lehenengo taldeko bigarrena bigarreneko lehenengoarekin.

☉ Galdakao

Galdakaok ofizioak, emakume sortzaileak eta kultur aniztasuna aldarrikatuko ditu M8ko jardueretan

|

Martxoaren 8an eguerdian manifestazioa deitu dute Galdakaon // Geuria

Galdakaoko talde feministek, emakume taldeek eta Udalak elkarrekin hainbat jarduera prestatu dituzte martxoaren 8a, Emakumeen Nazioarteko Eguna, dela eta. Martxoaren 19ra arte luzatuko da programa, solasaldi, dokumental, prestakuntza eta kultur proposamenekin.

Galdakaon antolatu dituzten jarduerek emakumeen lanbideak gogoratuko dituzte, emakume garbitzaileei, sukaldariei eta dinamitariei buruzko hitzaldiekin eta horiei buruzko dokumentalekin.

Kultura aniztasuna ere presente egongo da M8a kultura ezberdinetan nola bizi den aztertuz eta gainera emakume sortzaileei buruzko tailer bat egongo da. Gainera, azken lege-aldaketei eta horien ondorioei buruz informatzeko eta hausnartzeko topaketak izango dira.

Bestalde, martxoaren 8an bertan, emakumeek elkarrekin gosaldu eta bazkalduko dute, herria apaindu eta mural bat egingo dute. Manifestazioa deitu dute 13:00etan.

Jarduera guztiak Basandere, Ninaiz, Erabide, Erlantza emakumeen elkarteek, Mairi Feminista Batzak eta Momoak Talde Feminista talde feministak antolatu dituzte, Galdakaoko Udalarekin elkarlanean.

Hauek dira Galdakaon, Aperribain eta Usansolon prestatu dituzten egitarauak:

Egitaraua / M8 Galdakaon

Martxoak 1, ostirala
Dokumentala eta solasaldia (elebiduna): ‘Latsariak’. Estibaliz Maguregi, Argenis Mesa eta Irune Lauzirika
19:00 Torrezabal Kultur Etxea

Martxoak 7, osteguna
Dokumentala eta solasaldia (elebiduna): ‘ Ellas primero. Pioneras de la cocina’. Ana Vega, Zuriñe Garcia eta Marian Gerrikabeitia
19:00 Torrezabal Kultur Etxea

Martxoak 8, ostirala
09:00 Gosari kolektiboa
09:30 Kale mozketa
10:00 Herria apaindu
11:00 Mural margoketa (lekua zehazteke)
13:00 Manifestazioa udaletxetik
14:00 Tupper bazkaria Plaza Gorriko aterpean
19:00 Manifestazioa Bilbon

Martxoak 11, astelehena
Topaketa: Solasaldia emakume dinamitariekin. Moderatzailea: Iratxe Lopez Leon
18:30 Torrezabal Kultur Etxea

Martxoak 12, asteartea
Tailerra eta ibilaldia: Ibilketa nordikoa
10:45-11:30 Hastapen-tailerra Lehendakari Agirre plazan. Izena ematea: 675 708 032
11:30-13:30 Ibilaldia Lehendakari Agirre plazatik

Martxoak 14, osteguna
Liburu aurkezpena (elebiduna): ’10 emakumek, mundua dantzan’. Bea Aparicio, Jeima Cano eta Eider Zaballa
18:00 Torrezabal Kultur Etxea

Martxoak 15, ostirala
Zine-foruma: ‘En los margenes’. Eskarne Larrinaga Goiogana
10:00-13:00 Torrezabal Kultur Etxea

Martxoak 16, larunbata
Bisita kulturala: Bilboko goiko auzoetan oinezko ibilbidea, ‘Con alma de mujer’
11:00
Informazioa eta izena ematea: mairigaldakao@gmail.com

Martxoak 17, igandea
Tailerra (euskaraz): ’10 emakumek, mundua dantzan’. Martha Graham, Pina Bausch, Isadora Duncan… Zatoz 10 emakume hauek dantzan jarri zituzten mundua
12:00-14:00 Torrezabal Kultur Etxea
Izena ematea: torrezabal@galdakao.eus

Martxoak 19, asteartea
Kartografia kolektiboa: Emakume dinamitarien ehunezko kartografia kolektiboa sortzea
18:30-20:00 Torrezabal Kultur Etxea

Egitaraua / M8 Aperribain

Martxoak 6, asteazkena
Topaketa interkulturala
18:00 Eperlanda

Martxoak 15, ostirala
Hitzaldia: ‘Conociendo nuestros derechos: últimos cambios legislativos’. Lis Quintana, aholkulari juridikoa eta aktibista feminista
18:30 Aperribaiko Auzo Elkartearen lokala

Martxoak 18, astelehena
Kontzertua: Tibeteko kuenkoak
16:30-18:30 Eperlanda

Egitaraua / M8 Usansolon

Martxoak 8, ostirala
Usansolo apaintzea
10:00 Txapelenatik Emakumeen plazara

Martxoak 14, osteguna
Hitzaldia: ‘Violencia machistas: nuevas leyes, más derechos’
18:00 Txapelena baserria

Osorik irakurri

☉ Galdakao

Txomin Bustinza hil da, Galdakaoko baserrien erreplika errealen sortzailea

Hileta gaur, otsailak 26, izango da Galdakaoko Santa Maria elizan

|

Txomin Bustinza, Galdakaoko baserrien erreplika errealen aurrean // Galdakaoko Udala

Txomin Bustinza Ibarrondo hil zen otsailaren 24an, larunbatez, 86 urte zituela. Galdakaoko etxeen eta baserrien erreplika errealak sortu izan ditu urteetan zehar eta Gabonetan bere tailerreko ateak irekitzen zituen berak egindako Jaiotza ikusarazteko.

Ekintza horrekin bere eskuzabaltasuna erakusten zuen Bustinzak. Izan ere, ekimen horrekin dirua biltzen zuen Bustinzak; ez zuen sarrera kobratzen, baina borondatea jasotzen zuen ondoren Bizkaiko minbiziaren aurkako ekarteari dohaintzan emateko. Iaz 3.900 euro bildu zituen, minbiziaren kontrako lanera eta ikerketara bideratu daitezen.

“Udaletik gure doluminak adierazi nahi dizkiegu senide eta lagunei, eta eskerrak eman nahi diogu kausa solidarioekiko erakutsi zuen eskuzabaltasunagatik. Galdakaok faltan botako du urtero atsegin genuen Jaiotza, baina askoz gehiago bera”, adierazi dute udal ordezkariek sare sozialen bidez.

Iazko urrian, esaterako, Galdakaoko Udalak aitortza egin zion Bustinzari, “gure herriaren ondarea beste modu batez ezagutzera emateagatik”, adierazi zuen Iñigo Hernando alkateak.

Hileta otsailaren 26an, astelehenez, izango da Zabaleako Santa Maria elizan 19:00etan.

Osorik irakurri

☉ Galdakao

‘Auzotik Galdakao’ dinamika herri osora zabalduko du Udalak martxotik aurrera

Iaz herriko bi eremutan martxan jarritako proiektu pilotuko estrategia ekainean bukatu du Galdakaoko Udalak, eta konpromisoak 2025etik aurrera beteko dituzte

|

Maite Arandia, Unai Amezaga eta Iñigo Hernando gaurko prentsaurrekoan // Geuria

Auzoetako beharrak identifikatu eta estrategia bat lantzeko asmoz ‘Auzotik Galdakao‘ dinamika jarri du martxan Udalak legealdi berrian.

Proiektuak bi helburu nagusi ditu: auzoen behar nagusiak identifikatzea eta datozen urteetan zehar horiei erantzungo dien estrategia bat lantzea.

Dinamikarekin hasteko bi eremu hartu dituzte udal ordezkariek, “proiektu pilotu bezala”. Horiek dira alde batetik, Agirre, Aperribai, Azpuru, Olabarrieta, Txistulanda, Aperribai Zaharra eta Jugo, eta bestetik, Tximelarre Goikoa, Urtebieta, Zuatzaurre eta Urreta.

Azken hilabeteetan, eremu bakoitzean diagnostiko bat egin du Udalak auzotarrekin batera sortutako bi talde eragileetan. “Irailean hasi ginen eremu bakoitzeko auzotarrekin eta eragileekin biltzen eta dagoeneko lehen emaitzak ikusten ari gara”, dio Unai Amezaga Parte-hartze teknikariak.

Orain bi zonalde horietan estrategia bana lantzen ari da Udala, eta aurreikuspenen arabera ekainean bukatuko dituzte bi planak. “Hainbat proiektu eta proposamen landuko dira bi eremu horietan, denak diagnostikotik ateratakoak”, dio Amezagak. Ondoren, Udalak konpromisoak 2025etik aurrera beteko dituela zehaztu du.

Herri osora zabaltzea

Proiektu pilotuaren “emaitza onak” ikusita, dinamika herri osora zabalduko du Galdakaoko Udalak. Horretarako beste lau eremu zehaztu dituzte: Altamira, Askarri, Gumuzio, Kortederra, Padrola, Artola, Basozabal, Bekea, Bekelarre, Itzaga, Basabe, Belategi, Egia, Elexalde, Errekalde, La Mina, Uraburu, Usargoiti eta Olabarri (3. eremua); Bengoetxe, Troka, Ergoien, Zuhatzu eta Upomendi (4. eremua); Kurtzea, Tximelarre Bekoa eta Zabalgane (5. eremua); eta Berezikoetxe, Zabalea (6. eremua)

“Udalerri anitza da Galdakao: auzo asko daude —handiak, txikiak eta ertainak—, eta denen artean desberdinak. Horregatik ikusi genuen errealitate hori orekatu behar genuela”, dio Amezagak: “Bi eremutan hasi ginen dinamikarekin eta orain herri osora hedatuko dugu: txikitik handira egin nahi genuen”.

Eremu bakoitzak bere aurrekontu propioa izango du, “beharrak, ezaugarriak eta biztanle kopurua kontutan hartuta”, dio Maite Arandia Parte-hartze arloko zinegotziak.

Lehen bi eremuekin egin bezala, talde eragileak eratu nahi ditu Udalak gainerako lau eremuetan, eta horretarako bilera irekiak deituko dituzte martxoan: martxoaren 19an hirugarren eremuan, martxoaren 20an laugarren eremuan, martxoaren 25ean bosgarren eremuan eta martxoaren 26an seigarren eremuan. “Bilera horiek arratsaldez izango dira, baina oraindik ez ditugu zehaztu ezta lekuak ezta orduak ere”, dio Arandiak. Aurrerago bilera horien inguruko informazioa helaraziko du Udalak.

Bilera horietan parte hartzeko izena eman beharko dute herritarrek. Udal ordezkariek arabera, bilera izan baino astebete lehenago eman ahalko da izena partaidetza@galdakao.eus helbide elektronikora idatzita, 688 830 479 telefonoaren bidez (Whatsapp eta Telegram) edo erabaki.galdakao.eus plataformaren bitartez.

“Hasieratik argi geneukan herritarren parte-hartzeak gure gobernu planaren zutabe nagusienetakoa izan behar zuela, eta aurreko legealditik ari gara horretan lanean. Hain zuzen ere, parte-hartzerako teknikari bat kontratatu genuen lehen aldiz Galdakaon aurreko legealdian, eta emaitzak agerikoak dira”, dio Iñigo Hernando alkateak.

Osorik irakurri

☉ Galdakao

Emantzipazio bulegoa zabaldu dute Galdakaon, herriko gazteei zuzenduta

Bulegoa zabalik egongo da asteazkenetan (otsailaren 21etik aurrera) eta ostiraletan Torrezabal Kultur Etxean. Gazteei emantzipazio prozesuetarako aholkularitza ematea da helburua

|

Emantzipazio bulegoa zabaldu du Galdakaoko Udalak, gazteei emantzipazio prozesuetarako aholkularitza emateko asmoz.

Emantzipazio bulegoak modu indibidualean eta zuzenean emango die informazioa gazteei, eta aholkularitza ere emango die administrazioaren maila guztietan (tokikoa, eskualdekoa, erkidegokoa, Europakoa…) dauden zerbitzu, programa eta proiektuei buruz, baita emantzipazio prozesua aurrera eramaten laguntzeko Galdakaoko Udalak berak dituen zerbitzuei eta baliabideei buruzko informazioa ere.

Bulegoa zabalik egongo da asteazkenetan (gaurtik, otsailaren 21etik aurrera) eta ostiraletan Torrezabal Kultur Etxeko lehen solairuan, 17:00etatik 20:00etara bitartean.

Era berean, emantzipaziobulegoa@galdakao.eus helbide elektronikoan, 675 700 089 telefono bidez eta sare sozialetan ere eskainiko dute zerbitzua.

“Gazteen emantzipazioa gazteak osotasunez eta aukera berdintasunez gizarteratzea lortzea da, beren bizi proiektua autonomiaz eraikitzeko eta eskubide guztiak egikaritzeko aukera izan dezaten, ahultasun gehien dituzten gazteei arreta handiagoa eskainiz. Prozesu horretarako, etxebizitzari, enpleguari edo prestakuntzari buruzko informazioa ezinbestekoa da. Hain zuzen, informazio hori guztia herriko gazteek eskura izatea da Udalak zerbitzu berriarekin lortu nahi duena”, diote udal ordezkariek.

Osorik irakurri

☉ Galdakao

Edu Madina omentzeko ekitaldia antolatu dute bere lagunek Gorbeian

|

Otsailaren 5ean hil zen Edu Madina galdakoztarra // Argazkia: Inocencio Goikuria

Edu Madina Etxebarria galdakoztarra hil zen otsailaren 5ean 69 urterekin. Galdakaoko memoria historikoa berreskuratzeko lan egin zuen; are gehiago, Galdakao Gogora elkarteko sortzaileetako bat izan zen.

Galdakaoko bere lagunek bere aldeko omenaldia antolatu dute otsailaren 25ean, igandez. Gorbeia mendiko gurutzean izango da 12:00etan.

Eguraldi txarra egiten badu omenaldia 12:15ean izango da Egiriñaoko Elurretako Andre Mariaren ermitan.

Informazio gehiagorako udiarraga@hotmail.com eta 634 672 811 telefono zenbakia jarri dituzte.

Osorik irakurri