Sareak

☉ Galdakao

[Sakonean] Afizioa ereitearen fruituak

Adiskide Pilota Elkarteak 40. urteurrena ospatzeko jaialdia egin berri du. Kluba eratu zenetik hainbat pilotari ezagun irten dira bertatik, tartean Larunbe, Elezkano eta Urrutikoetxea profesionalak

|

galdakao 1980 kurtzea frontoia

Adiskide Pilota Elkarteak 40. urteurrena ospatzeko jaialdia egin berri du. Kluba eratu zenetik hainbat pilotari ezagun irten dira bertatik, tartean Larunbe, Elezkano eta Urrutikoetxea profesionalak

1975. urtea zen Galdakaok eskupilota modu ofizialean zabaldu zuenean. Izan ere, denboraldi horretan Adiskide Pilota Elkartea sortu zuen “lagun talde batek”, dio Juan Luis Ibarretxek, gaur egungo zuzendaritza-batzordeko kideak eta kazetariak.

Klubak ez du datu zehatzik lehendabiziko denboraldiaz, baina honakoa ziurtatu du Ibarretxek: “1975. urtean bazegoen ohitura handia pilotan jokatzeko. Zuhatzu auzoan futbolean jokatzen omen zuten bertakoek eta Kurtzean, berriz, pilota omen zen nagusi”. 70eko hamarkadan bere kabuz jokatzen zuen pilotari asko zegoen Galdakaon, “baina ez zegoen egitura ofizial eta sendo bat. Horregatik Adiskide sortzeko ideia izan zuten”, dio Ibarretxek.

Horren harira, arazo batekin topo egin zuen lagun taldeak: denbora hartako udaletxeak gaztelaniaz jarri nahi izan zuen taldearen izena. Garai hartan Francoren diktadura amaitu berri zen eta Espainia Trantsizio garaian murgildu zen. Frankismoan (1936-1977) jazarpen latza pairatu zuen euskarak eta Trantsizioan ere ez zuen ofizialtasunik izan. Horregatik elkarte berrien sorreran euskarazko izenak jartzean trabak jartzen zituzten maiz.

Hala eta guztiz ere, Adiskide aurrera ateratzea lortu zuten eta “apurka-apurka umeak izena ematen hasi ziren klubean. Esate baterako, 80. hamarkadaren hasieran Eguzkibegi Ikastolan jokatzen zuten ume asko pasatu ziren Adiskide klubera”, dio Juan Luisek.

Taldearen filosofia

Gaur egun 61 pilotari daude Adiskide Pilota Elkartean, zazpi mailatan banatuta -aurre benjaminak, benjaminak, alebinak, infantilak, kadeteak, gazteak eta nagusiak-. Galdakoztarrak dira gehiengoa, baina Zaratamoko, Basauriko zein Dimako pilotariak ere badaude taldean.

galdakao 1980 adiskide pilota elkartea

Galdakaoko XII Eskupilota Txapelketa 80. hamarkadan :: Adiskide Pilota Elkartea

Adiskideren helbururik garrantzitsuena da “afizioa sortzea eta umeek eskupilotaz gozatzea, emaitzak alde batera utzita”, dio Ibarretxek. Kirol guztietan bezala, hori da oinarririk hedatuena, baina ez da askotan urrunegi iristen. Juan Luis Ibarretxek dioenez, “gazteek zaletasun hori galdu egiten dute nerabezarora heltzen direnean. Askok eskupilotan jokatzeari uzten diote eta hori oso kezkagarria da. Txikitatik hasi bai, baina oso gutxik jarraitzen dute aurrera nagusien mailara iritsi arte”.

Hala ere, dena ez da ezkortasuna: “Adiskide Elkarteak senior arteko maila dauka, hau da, pertsona batek 40 edo 50 urte dituen arte joka dezake klubean, lasai-lasai”. Ibarretxek azaldu du orain dela urte batzuk beteranoen arteko txapelketak antolatzen zituela Adiskidek eta bertan 60 urtetik gorako pilotariak ere lehiatzen zirela.

Era berean, gaur egungo zuzendaritza-batzordeak asmo berria dauka buruan: neskak eta emakumeak pilota munduan barneratzea. “Orain dela urte batzuk neska bat izan genuen Adiskiden. Oso pilotari ona zen, baina 14 edo 15 urte zituela pilotan modu o zialen jokatzeari utzi zion. Izan ere, lehen ez zen nesken lehiaketarik antolatzen eta orain, zorionez, gauzak aldatu eta pixkanaka-pixkana genero berdintasunari aurre egiten ari zaio Federakuntza”. Hori dela eta, emakumeek izena eman dezaten deia zabaldu du Ibarretxek, “Galdakaon ere emakume txapeldunik egon daitekeelako, noski!”.

Pilotariez gain, Adiskidek bazkideak ere baditu. “Guztira, 300 bazkide inguru egongo dira gaur egun izena emanda eta partiduez disfrutatzeko aukera zabalagoa dute”, dio Ibarretxek. Bazkideek ere zaletasuna indartzen laguntzen dute eta pilotariak ez ezik, haiek ere garrantzitsuak direla adierazi du Juan Luisek.

Beharrezko diziplina

Teknika lantzeko eta eskupilotarenaganako zaletasun hori pizteko era askotako entrenamenduak egiten dituzte, kategoriaren arabera: “Ezberdina da umeekin entrenatzea edo gazteekin eta nagusiekin entrenatzea”, dio Ibarretxek: “Diziplina bat egon behar da, baina harrobiko umeekin gehien lantzen duguna heziketa da, ez lehiaketak. Ondo pasatzea da gakoa”. Federazioko Txapelketetan aritzen direnekin entrenamendu gogorragoak prestatzen dituzte eta horretan zer ikusia dute Oliden, Ariznabarreta eta Sainz entrenatzaileek.

Txapelketei dagokienez, Bizkaiko Txapelketa jokatzen dute denboraldi hasieran; Gabonak pasa eta gero, Euskal Liga hasten da eta bertan sailkatzerik ez dutenek Udaberriko Torneoa jokatzen dute. “Bestetik, pilotari batzuek –Kerman Galarzak, esaterako- Lezama, Mungia edo Zaldibarko Torneo pribatuetan hartzen dute parte, eta eskola-mailan Uribe-Kosta Torneoa jokatzen da urritik abendura bitartean”, dio Ibarretxek.

Adiskideren lorpenik nabarmenen artean aurki daitezke: Bizkaiko Herriarteko Txapelketak (2009an eta 2011n), Berria Txapelketa eta Euskal Herriko Txapelketa (2015ean). Era berean, Ander Elezkanok -Danel Elezkanoren anaiak- nagusi mailako Bizkaiko Buruz Buruko Txapelketa irabazi du aurten eta Karregal-Artola bikoteak Bizkaiko Txapelketako Gazte Mailako Binakako titulua lortu dute.

Pilotalekua, elkartzeko tokia

Kurtzea Frontoia da Adiskide Klubaren arima. “Leku aproposa da jendea erakartzeko eta elkartzeko”, dio Juan Luis Ibarretxek: “Izan ere, Euskal Herriko udalerri guztietan frontoia beti egon izan da udaletxe, plaza eta elizaren ondoan eta horrek herritarrak hurbiltzea eragiten zuen”.

Aitzinean estaligabea zen Galdakaoko frontoia eta jendea elizatik irten ondoren, pilotakadak entzun eta frontoira hurreratzen zen. “Gaur egun ohitura hori galdu egin den arren, frontoia estaltzea beharrezkoa zen: pilotazaleen artean aldaketa nabarmenena erosotasuna izan da. Ostiralero giro polita sortzen da Kurtzean eta herritarrak hurbildu egiten dira eskupilotaz gozatzera”.



galdakao adiskide 2016 6 pilotari

☉ Galdakao

Galdakaoko XII. Herri Krosa apirilaren 28an izango da

|

Galdakaoko Herri Krosa iaz // Geuria

Galdakaoko XII. Herri Krosa apirilaren 28an, igandez, izango da. Federatuta daiden korrikalariek zein federatu gabekoek parte har dezakete.

Herri Krosean izena emateko epea zabalik dago apirilaren 25era arte. Aldez aurretik izena emateagatik parte-hartzaileek 10 euro ordainduko dituzte eta lasterketaren egunean bertan, interesdunek 15 euro ordainduko dituzte.

Proba doakoa da 14 urtetik beherakoentzat (2010etik aurrera jaiotakoek) eta kategoria paraolinpikokoentzat baldin eta apirilaren 25a baino lehen izena ematen badute. Lasterketaren egunean bertan 5 euro ordaindu beharko dituzte.

Galdakaoko Herri Krosa Galdakao Atletismo Taldeak eta Udalak antolatzen dute, eta Bizkaiko Atletismo Federazioaren egutegi ofizialaren barruan dago. Aurten hamabigarren edizioa da, eta urtero ehunka partaide biltzen ditu.

Galdakaoko XII. Herri Krosa 2024 – Apirilak 28

Kategoriak eta distantziak

11:00 Benjaminak (2014-2015 urte bitarteetan jaiotakoak)
600 metro, itzuli bat A zirkuituari

11:15 Kimuak (2012-2013 urte bitarteetan jaiotakoak)
1.000 metro, itzuli bat B zirkuituari

11:30 Haurrak eta Kadeteak (2009-2011 urte bitarteetan jaiotakoak)
2.000 metro, bi itzuli B zirkuituari

11:45 Kategoria paralinpikoa
– Kategoria egokitua: 1.000 metro, itzuli bat B zirkuituari
– Kirol trebetasuna: 2.000 metro, bi itzuli B zirkuituari

12:00 Gazteak (2006-2007 urte bitarteetan jaiotakoak), Juniorrak (2004-2005 urte bitarteetan jaiotakoak), Seniorrak (34 urte arte) eta Beteranoak (35 urtetik gorakoak)
– Gazteak-Juniorrak: 3.854 metro, bi itzuli C zirkuituari
– Seniorrak-Beteranoak: 7.708 metro, lau itzuli C zirkuituari

Sariak

Galdakaoko XII. Herri Krosak hainbat sari banatuko ditu: Senior kategoriako irabazleei (lehen gizonezkoa eta lehen emakumezkoa) garaikur bat eta txapel bat emango dizkiete, baita gizonezkoen eta emakumezkoen kategoria absolutuko lehen hiru sailkatuentzat 150 euro, 90 euro eta 60 euro emango dizkiete, hurrenez hurren.

Kategoria absolutuan sailkatzen den Galdakaoko lehen gizonezkoarentzat eta lehen emakumezkoarentzat ere saria egongo da, eta baita garaikurrak lehenengo hirurentzat kategoria eta sexu bakoitzean.

Dortsala jasotzean, parte-hartzaile guztiei probaren oroitzapenezko kamiseta bat oparituko diete, eta poltsa bat emango diote parte-hartzaile bakoitzari helmugara iritsi bezain laster, elikagaiekin eta freskagarriekin. Gainera, sarien zozketa egingo dute proba amaitzean.

Osorik irakurri

☉ Galdakao

#A21 / Emaitzak / Galdakao / EAJ garaile, baina inoizko lehia estuena EH Bildurekin

#A21 / Galdakao / Eusko Legebiltzarrerako hauteskundeak 2024 / Emaitzak

|

Osorik irakurri

☉ Galdakao

Urreta kiroldegia handitzeko lanak udan hastea aurreikusi du Galdakaoko Udalak

|

Urreta kiroldegiak izango dituen zenbait espazio berri // Galdakaoko Udala

Urretako kiroldegiaren barnealdea eraberritzeko eta handitzeko obrak egingo ditu Galdakaoko Udalak. Aurreikuspenaren arabera lanak “uda ingururako” hasi nahi ditu Udalak.

Besteak beste, ariketa kardiobaskularrak, indar ariketak edota yoga egiteko erabilera anitzeko aretoak sortuko dituzte eta horretarako eraikin berri bat eraikiko dute kiroldegiaren sarreraren eta igerilekuaren arteko gune hutsean, solariuma deitzen dioten gunean, alegia.

Era berean, solarium horren azpian dagoen sotoa ere egokituko dute, 500 metro karratu ingurukoa.

Guztira, 1.000 metro karratu berri gehiago izango ditu kiroldegiak, eta aireztapen naturala ezarriko dute. Inbertsioa 3 milioi eurokoa izango da.

Hiru fase

Obrak hiru fasetan burutuko dituzte, “erabiltzaileei ahalik eta kaltre txikiena eragiteko”, diote udal ordezkariek.

Hasteko, beheko solairuaren barrualdea konpontzeko eta hobetzeko lanak egingo dituzte: “Igerilekuetarako irisgarritasuna hobetuko da arrapala bitartez, egungo aldagelak berrituko dira eta bina aldagela eta komun egokitu gehituko dira”, diote udal arduradunek. Lehen fase honetako lanak egiteko lau hilabete erabiliko dituzte, gehienez.

Bigarren fasea kiroldegia handitzekoa izango da. “Solarium gisa ezagutzen den gunean bi solairu eraikiko dira, eta horretarako, lur azpian dagoen sotoa egokituko da aurrena. Fitness eta kardio ariketetarako eremu berriak jarriko dira bertan, eta aldagela berriak. Larrialdietarako irteera berri bat ere gehituko da, besteak beste”, diote. Bigarren faseko iraupena, gehienez, zozrtzi hilabetekoa izango da.

Lan horiek amaitu ondoren ekingo diote solarium guneari teilatua jarri eta bi solairu eraikitzeari. “Beheko eta lehenengo solairuetan bi gune diafano egongo dira, besteak beste, askotariko ekintzetara egokitzeko”, diote. Enpresa esleipendunak 14 hilabete erabili ahalko ditu, gehienez, lan hauetarako. Guztira, 26 hilabete.

Azterketa fasean

Urretako kiroldegiaren barnealdea eraberritzeko eta handitzeko lizitazio prozesua azken txanpan da. Apirilaren 17an, asteazkenez, epea bukatu zen enpresek euren eskaintzak egiteko epea.

Orain prozesua azterketa fasean dago, udal teknikarien esku. Apirilaren 24an eta 30ean bilduko da kontratazio mahaia eta bertan erabakiko dute zein enpresak gauzatuko dituen obrak.

Osorik irakurri

☉ Galdakao

Herritarren parte hartzerako lehen ordenantza onartu du Galdakaoko Udalak

|

Herritarrak Udalak sustatutako parte-hartze prozesu batean lanean // Galdakaoko Udala

Herritarrek Galdakaoko udalgintzan parte hartzeko bideak eta moduak batzen dituen arautegia onartu du lehen aldiz Galdakaoko udalbatzak gobernu taldearen aldeko botoekin eta EAJren eta PSEren abstentzioarekin.

Parte-hartze ordenantzaren bitartez erabakiak hartzeko prozesuetan eta udal intereseko gaien kudeaketan herritarren parte hartzea erraztu eta bultzatuko du Udalak. Besteak beste, Udalaren aurrean herritarrek parte hartzeko dituzten eskubideak jaso dituzte arautegian, baita galdakoztarrek parte hartze prozesuak, kontsultak edo osoko bilkurako gai zerrendan gai bat sartzeko aukera ere.

“Eskaera hauek, eta egin daitezkeen beste batzuk ere, sinadura bilketaren bidez babestu behar dira. Sustatu nahi den ekintza motarako beharrezkoa den sinadura kopurua ere jasotzen du ordenantzak, esaterako”, diote udal ordezkariek. Ordenantzak guztira 170 artikulu ditu, bederatzi titulutan eta 28 kapitulutan banatuta.

2022tik lanean

Ordenantza honen edukia lantzeko, hainbat ekintza bildu dituen partaidetza prozesu publiko bat abiatu zuen Udalak 2022an herritarren, elkarteen, kolektiboen, udal teknikarien eta Udalean ordezkaritza duten alderdi politikoen ekarpenak eta ideiak jasotzeko.

Jasotako proposamenekin eta Donostia, Gasteiz, Oñati, Tolosa, Bartzelona eta beste udal batzuetako araudien azterketa egin ondoren, ordenantzaren lehen zirriborro bat idatzi zuten.

Iazko abenduaren 21eko osoko bilkurak dokumentuaren behin behineko onespena egin ostean, martxoko osoko bilkuran behin betiko onartuko du udalbatzak.

Osorik irakurri

☉ Galdakao

Sakeleko telefonoa erabiltzeko doako tailerra antolatu dute Galdakaon jubilatuei zuzenduta

|

Galdakaoko Udaleko Gizarte Ekintzako Adinekoen Dinamizazio Zerbitzuak telefono mugikorra erabiltzeko tailerra antolatu du apirilaren 22an eta 24an.

Tailerra doakoa da eta Iberluzeko Etxea Anaitasuna Adinekoen Zentroan egingo da 16:30etik 18:30era bitartean.

“Bi saioko tailer horretan telefono mugikorrari etekin handiagoa ateratzeko ikasiko dute parte hartzaileek”, diote udal ordezkariek.

Tailerrean izena emateko epea zabaldik egongo da apirilaren 8tik aurrera. Interesdunak Adinekoak Dinamizatzeko Zerbitzuaren bulegora bertaratu daitezke astelehenetik ostiralera 10:00etatik 13:30era, eta ostegunetan 16:00etatik 18:00etara.

Irteera Gernikara

Sakeleko telefonoa erabiltzeko tailerraz gain, jarduera gehiago antolatu ditu apirilean Gizarte Ekintzako Adinekoen Dinamizazio Zerbitzuak: bisita kulturala Gernikako Euskal Herria Museora eta Gernika-Forua-Axpe ibilaldia.

Bisita kulturala apirilaren 18an izango da eta ‘Markos Gimenoren karteletrak’ erakusketa ikusi ahal izango dute herritarrek: 11:00etan euskarazko taldea antolatu dute eta 12:00etan gaztelerazkoa.

“Erakusketa honetan, Markos Gimenok egindako hainbat palindromo aurkituko dira, baina baita Euskal Herriko hainbat artista, lagun eta diseinatzailek, esaldi horientzako, sortu dituzten obrak ere. Guzti hau antolatzen Joseba Sarrionandia eta Esteban Montorio izan dira”, diote udal arduradunek.

Bisita gidaturako izena emateko epea apirilaren 8an ere zabalduko du Udalak (doan), eta gehienez 15 lagun joan ahalko dira talde bakoitzeko.

Gernika-Forua-Axpe ibilaldia

Bestetik, Gernika-Forua-Axpe ibilaldia apirilaren 25ean antolatu dute. “12 kilometroko ibilbide lineal ederraz disfrutatu ahal izango dute herritarrek”, diote Udaletik.

Honako gune hauetatik igarotzen da ibilbidea: Gernika, Urbieta, Oka Ibaia, Forua, Gordiz, Zarragagoikoa, Foruko Bidea, Lakaena, Maitea Baserri, Axbiribil (Atxondo), Karabizurrieta, Goikogana, Irestagorri, Artolena, Birjinarestigoikoa, Altamira, San Bartolome, eta Axpe Ermita (Busturia).

Txangoan izena emateko epea apirilaren 12an zabalduko du Udalak (doan) eta gehienez 30 lagun joan ahalko dira.

Osorik irakurri