☉ Galdakao
Unai Etxezarraga usansolotarrak Everesteko oinarrizko kanpalekura igoera hasi du gaur
Mendizaletasuna gogoz bizi du Unai Etxezarraga usansolotarrak. Horrenbeste, munduko mendi altuenetariko bat igotzeari ekin diola gaur bertan: Everest mendia, alegia. Ez du zortzi milakoa osorik egingo (8.850 metro ditu Everest mendiak), baina oinarrizko kanpalekura heltzea da bere asmoa, gutxi gorabehera 5.300 metrotara. Zazpi laguneko talde batekin joan da Unai Nepalera: Ibai Etxezarraga bere lehengusuaz gain, lau galiziar eta beste euskaldun bat.
Urtarrilaren 3an iritsi ziren Kathmandura, eta gaur goizean bertan trekkinga hasi dute Lukla herritik (Nepal) Everesteko kanpamentu nagusira: “Kathmandutik abioneta bat hartu eta Luklatik hasiko dugu trekkinga. Hortik aurrera honako ibilbidea egingo dugu: Phakding (2.600 metro), Namche Bazaar (3.440), Tyangboche (3.860), Dingboche (4.410), Lobuche (4.910), Gorakshep (5.288) eta Everesteko kampamentu nagusia (5.364). Ondoren, Kala Pattharretik Lobuchera buelta egingo dugu, eta bertatik Luklara eta Kathmandura itzulera”, dio Etxezarragak. Guztira 17 egun egingo dituzte Nepalen.
Atzo gauean bertan hitz egin ahal izan genuen Unairekin, Everesteko oinarrizko kanpalekura igoera hasi aurretik: “Urtarrilaren 3an heldu ginen Kathmandura eta lehenengoko egunean hiria ikusteko erabili ginun. Lehenengo inpresioa benetan ikaragarria izan zan! Kathmandura heldu eta hurrengo egunean hiria bisitatu genuen: Swayambhunath (Tximuen tenplua ezizenaz ere ezaguna) eta Boudhanath Katmanduko estupa sakratuena bisitatu genituen eta gauean Pemba gure Kathmanduko gidak afaltzera gonbidatuozkun bere xerpa lagun bategaz. Xerpa horrek Everest zazpi bider igo dauz, beste hainbet zortzi milakoen artean, noski”, dio Etxezarragak.
Unai eta Ibai Etxezarraga Reinhold Messner alpinistarekin // U.E.
Unai Etxezarraga Swayambhunath estupan, Tximuen tenplua ezizenaz ere ezaguna // U.E.
Erronka hau egiteko fisikoki prestatu behar izan duten galdetu diogu Unairi, eta zera erantzun digu: “Fisikoki egin doguz irteera handi batzuk, baina ez dogu egin normalean egiten ez dogun ezer. Egin doguzen irteerak material barrie probatzeko izan da batez be, hala nola, botak, motxila edota traileko zapatilak”, dio Etxezarragak: “Bidaiaren prestaketari dagokionez erraza izan da. Hilabete batzuk arinago pasaportea iraungi barik dekoguzela egiaztatu gendun. Txorakeria dirudi, baina gauza horrek dire gero barrizterakoan denbora gehien behar daurienak. Gero material zerrenda bat egin gendun eta ia gehiena erosten hasi ginen Ibai eta biok. Kathmandun, danetarik dau erosteko, beraz, gauza batzuk hemen bertan erosi doguz”.
Covid-19ak eragina izan du Unairen eta taldekideen bidaian: “Materialaren ostean tramitazio gehienak Covidagaz izan dute zerikusia”, dio Etxezarragak, eta gaineratu du koronabirusaren gaia izan dela “txarrena”: “Batez ere PCRen kontua. Gauza da hegazkina hartzeko PCR bat eduki behar dozule bai ala bai eta proba azken 72 ordutan eginda egon behar dala. Bizi doguzen garaietan ez dozu imaginetan zein zaila dan PCR bat lortzea eta 72 orduen barruen emaitza lortzea. Buelta asko eta asko emon ostean, Quiron klinika pribatura joan behar izan gendun 88 euroko PCRa egiteko, eta gero atzamarrak gurutzatu emaitza negatibo izateko! Eta, eskerrak, horrela izan zan! Gero aireportuan dokumentu guztiek eskatzen dauriez: Covid ziurtagiria, PCRa… Eta horiez gain, Dohan (geldialdia bertan egin gendun) Nepalera bidaiatzeko galdetegi bat bete behar izan gendun Internetetik eta bertan Covid-ari buruzko hainbat galdera ere eginozkuen: zein motatako txertoa jaso dogun edota noiz txertagu ginen bezalako galderak”.
-20ºko lo-zakua eta kutun bat
Everestera joateko erabakia duela urtebete inguru hartu zuen Etxezarragak: “Nire lehengusua dan Ibai Etxezarragaz berbaz hasi nintzen bidaia handi bat antolatzeko. Biok gabiz arraunean, Deustuko taldean, eta denboraldie amaitutakoan bidaia itzel bat prestatzeko asmoa eduki zauela esaozten Ibaik. Antza, Lur Uribarrenegaz —Kaikuko patroi ohia eta mendi-gida bezala ibiltzen dana— berba egin zauen eta Nepalera bidaia bat prestatzen zebilela esaotzen. Hortik gutxira hirurok batu ginen Usansoloko taberna batean eta erabakie hartu gendun: Nepalera bagoaz!”, dio Etxezarragak: “Bidaia honen zergatia oso argi dau: biok mendie maite doguleko eta guretzat Nepal, mendi arloan, munduko tokirik eta bereziena delako. Everest eta beste zortzi milako hainbet mendi ikusteak ez dekolako preziorik mendizale batentzako”.
Zazpi laguneko taldea, Pemba gidarekin eta xerparekin afaltzen // U.E.
Urtarrilaren 3an iritsi zen Kathmandura zazpi laguneko taldea // U.E.
Motxilan zer sartu behar izan duten galdetu diogu Unairi: “Motxilako % 90a kiroleko arropa da. Lurrek zerrenda bat bidaliozkun beharrezko gauza batzukaz, adibidez, -10°tako eskularruak, -20°tako lo-zakua, neguko galtzerdiek, neguko txanoa… Horrek izan dire erosi behar izan doguzenak, bestea: trekkingeko prakak, goretex jakea, plumas on bat, termikak, bota on batzuk, traileko zapatilak, ezpainetako babesa eta eguzkitako krema, mendiko betaurreko onak, buffak, frontala…”. Motxilan beste gauza bat du Unaik; bere bikoteak oparitutako kutun bat: “Everesteko kanpamentu nagusira heldutakoan, gure helburue heldutakoan, zabalduko dot”, dio Etxezarragak.
☉ Galdakao
Argazkiak / Ibilaldiaren urteari hasiera emateko Herri kirolen desafioa giro bikainean ospatu dute Galdakaon
Ibilaldia antolatuko du maiatzaren 25ean Eguzkibegi Ikastolak Galdakaon. Herrian giroa prestatzeko ekintzak antolatzen hasi dira: gaur, urtarrilak 18, Herri kirolen desafioa izan da Kurtzeko plazan. Eguraldi bikainarekin, giroa ezin hobea izan da! Hona hemen GEURIAn egin ditugun 86 argazki!
Euskaraldia udaberrian izango da aurten: maiatzaren 15etik 25era bitartean. Lau hilabete falta direla, Galdakaon Euskaraldia koordinatzeko taldea martxan jartzeko lehen bilera deitu dute Udalak eta euskalgintzako eragileek.
Urtarrilaren 22an, asteazkenez, izango da lehen bilera hori, 18:00etan udaletxeko bilkura aretoan. Bilera horretara Galdakaoko taldeak, eragileak eta norbanakoak daude gonbidatuta.
“Bertan, Euskaraldia koordinatzeko talde motorra martxan jarriko da eta bigarren erronka lortzeko oinarriak jarriko dira: maiatzeko ariketan lortutako aurrerapena egunerokoan mantentzea”, diote udal ordezkariek.
Ohikoa den elkarlanaz gain, herritarren inplikazioa “funtsezkoa” dela adierazi dute udal arduradunek eta herriko euskalgintzako eragileek.
Kaltetutako edo gaixotutako zuhaitzak ordezkatzeko eta berriak jartzeko lanak hasi ditu Galdakaoko Udalak. Guztira 80 zuhaitz berri landatuko dituzte herriko hainbat eremutan:
- Juan Bautista Uriarte kalearen hegoaldeko espaloian: 32 zuhaitz berri
- Gandasegin, Plaza Gorrian eta Simon Linazan: 17 zuhaitz berri
- Juan Sebastian Elkano kalean: 6 zuhaitz berri
- Iturrondon: 4 ale berri
- Ganguren kalean: 3 zuhaitz berri
- Sixta Barrenetxean: 3 zuhaitz berri
- Gernika kalean: 3 zuhaitz berri
- Aranzelai 5-7 kalean: 3 zuhaitz berri
- Zuhatzun: 2 zuhaitz berri
- Ardanza parkean: 2 zuhaitz berri
- San Inazion: 2 zuhaitz berri
- Mugu kalean, udal igerilekuetan, Elexalden eta Lapurdin ale berri bana
Bestetik, Bizkai kalean jarraipena emango diote duela bi negu hasitako ordezkapenei, eta Urretan zuhaitz bat ere ordeztuko dute. Gainera, Juan Bautista Uriarte kalean aurreko faseetan landatutako zuhaitzak berrantolatuko dituzte, “eta aurreko zereginetan landatutakoak haztea zailtzen duten zuhaitzak kenduko dira”, zehaztu dute udal ordezkariek.
Udalak 49.000 euro bideratuko ditu zuhaitzak ordezkatzen eta berriak landatzen. Lanak sei hilabetez luzatuko dira, eta aurrena Bizkai eta Juan Bautista Uriarte kaleetan hasiko dira.
2022an udalerriko zuhaitz eta landare guztien egoeraren azterketa orokorra egin zuen Udalak. “Eta analisiak ondorioztatu zuen zuhaitz asko hilda edo gaixorik zeudela, eta beraz, Udalak modu ordenatuan antolatu zuen haien ordezkapena, faseka”, diote udal ordezkariek. Oraingoa hirugarren fasea da.
☉ Galdakao
Ganguren Mendi Taldearen 233 argazki eta dokumentu digitalizatu dituzte bere sorreraren 80. urteurrenean
Galdakaoko Ganguren Mendi Taldeak 80 urte beteko ditu aurten. Eta urteurrena aprobetxatuz, mendi elkartearen funtsaren zati bat digitaliatu du Udalak, Gangureneko kideen laguntzarekin.
Guztira, elkartearen 233 argazki, plano, araudi edota estatutu digitalizatu dituzte. Gainera, euskaraz eta gazteleraz bakoitzaren deskribapena osatu dute eta sailkatu dituzte.
Ganguren Mendi Taldearen funts digitala esteka honen bitartez ikus dezekete herritarrek.
“Horren bidez, Ganguren Mendi Taldeak egindako jardueren lagin bat zaindu, kontserbatu eta herritarrei zabaldu nahi zaie, bai eta haren historia zabalaren zati bat aurkeztu ere”, diote udal ordezkariek.
Hasierak, ezkutuan
1945. urtean eratu zuten Ganguren Mendi Taldea Jesus Altunak, Victor Legorburuk eta Kepa Yurrebasok, eta 1946an legeztatu zuten 50 bazkiderekin.
Ganguren Mendi Taldeko lehen bazkideak 1945an, Balzolan // Ganguren MT
“Nabarmentzekoa da bere estatutuetan (Athletic Clubekoak hartu zituzten erreferentzia gisa) emakumeak bazkide bezala sartzen zirela eta lehenengo bi asteetan 11 bazkidetu zirela”, diote.
Murrizketa ekonomiko eta politikoak zirela eta, elkartearen lehen urteetako ekintzak hurbileko jardueretara bideratu ziren. Hauek Josu Altunaren bizartegiko lonjan, ezkutuan, planifikatzen ziren.
Ekintzen artean, Gorbeiatik gertu dauden mendietarako sarbidea erraztuko zuen babesleku propioa izateko asmoarekin, Gangurengo mendizaleek Arrabako zelaian babesleku bat eraikitzea erabaki zuten 1949an, eta 1953an inauguratu zuten.
Arrabako aterpetxean Gangureneko bazkideak // Ganguren MT
Garai haietan 151 bazkide zituen Gangurenek, “eta garai horretan hasi ziren mendi garrantzitsuetara egindako lehen igoerak; Aneto eta Naranjo de Bulnes, esaterako”, diote. Denboran zehar, aterpea handitu eta hobetu egin dute bazkideen eskaera gero eta handiagoari erantzuteko.
Aldaketak eta egokitzapenak
Hurrengo hamarkadako lehen urteetan geldialdia gertatu bazen ere, 1968tik aurrera Ganguren bere historiaren etapa berri batean sartu zen. Urte horretan bertan egoitza berri bat inauguratu zuen eta 1970ean, 647 bazkiderekin, zilarrezko ezteiak ospatu zituen.
“Denboraldi horretan, klubak bere jarduerak dibertsifikatu zituen, haurrentzako eta familientzako txangoak sustatuz, eta kultura, jolas eta goi mendiko jardueren arloak sortuz. Horren ondorioz, 44 lagunek Mont Blanc (4.807m) eta Gran Paradiso (4.061m) igo zituzten Alpeetan”, diote.
Ganguren Mendi Taldeko emakumeak Gorbeian, 1949an // Ganguren MT
Horrek guztiak zuzenean eragin zion klubaren hazkundeari eta hamarkada amaierarako lokal sozialean zegoen espazioari. Horregatik, 1980an Gangurenek gaur egun Galdakaoko Gipuzkoa kalean duen egoitza inauguratu zuen.
Hurrengo bi hamarkadetan kultur bultzada berri bat egin zuten: “Azpimarratzekoak dira liburutegi berria eratzea, eta argazki lehiaketa eta Zinemaren eta Argazkigintzaren Asteak antolatzea. Gainera, ingurumen ekimenak egiten ere hasi ziren, hala nola, Arraban zuhaitzak landatzea eta Gorbeiako garbiketa uxaldiak”, diote.
1982an eskalada sustatzeko rokodromoa inauguratu zuten: “Gazte asko erakarri zituen, eta eski atala ere sortu zuten”.
Iñaki Apellaniz bazkidea McKinley (AEB) igo zuenekoa, 1986an // Ganguren MT
Bestalde, nazioarteko espedizioak ere egiten hasi ziren, hala nola, Iñaki Apellanizena McKinleyra 1986an, eta Jesus Gomezenak Baruntsera 1989an, Everestera 1990ean eta Cho Oyura 1993an. Eta, azkenik, klubak 3 gurutzeen (Gorbeia, Sabigain eta Lemoatxa) eta Mugarriz Mugarriz ibilaldi luzeei hasiera eman zien 1998an.
2.700 bazkide
Gaur egun Ganguren Mendi Taldeak 2.700 bazkide baino gehiago ditu, eta udal ordezkariek adierazi dutenez, “mendiarekiko grina galdakoztarrei erakusteko asmoari eutsi diote”.
Ganguren Mendi Taldeko bazkideak Candanchun eskiatzen // Ganguren MT
“Hala, azken urteotan klubak hainbat ekintza bultzatu ditu horretarako, hala nola udalerriko bideak eta mendi kotak seinaleztatzea edo familientzako, haurrentzako eta eskolen eta guraso elkarteen bidezko kultura eta mendi irteerak sustatzea. Gainera, herriko jaietan parte hartzen du eta ekitaldiak antolatzen ditu, Gangureneko igoera herrikoia, ‘Zazpi Trokak’ trail lasterketa, eta hainbat mendi irteera eta jarduera urte osoan zehar, adibidez”, diote.
Klubak 80 urte bete ditu eta gora-beherak izan arren beti asmatu du garai bakoitzera nola egokitu galdakoztarrei mendiarekiko grina erakusten jarraitzeko. Kudeaketa eta informazioa hobetu ditu aplikazio informatikoen, webgunearen edo sare sozialetan duen presentziaren bidez, besteak beste.
☉ Galdakao
Galdakao Emisio Gutxiko Eremu izendatzeko Eusko Jaurlaritzak duen asmoaz: “Momentuz ez dira Udalarekin harremanetan jarri”
Metroa Galdakaora heltzeak “mugikortasun eredua aldatuko” duela zehaztu du Udalak. Era berean, gaur gaurkoz Galdakaok 25.000 biztanle ez dituela adierazi dute udal ordezkariek
Eusko Jaurlaritzak Bizkaiko zazpi herritara zabaldu nahi ditu auto kutsagarrien murrizketak, Emisio Gutxiko Eremuak hedatuz.
Gaur egun, neurri hori derrigorrezkoa da 50.000 biztanletik gorako hirietan, baina orain, 25.000 biztanle baino gehiago dituzten udalerrietako erdigunerako sarbidea mugatzea proposatzen du Mugikortasun Jasangarriaren Euskal Planak.
El Correo egunkariak publikatu duenaren erabera, zazpi udalerri horien artean daude Basauri eta Galdakao.
GEURIA bi Udalekin jarri da harremanetan, eta Galdakaoko udal ordezkariekin hitz egitea lortu dugu: “Momentuz Eusko Jaurlaritzatik ez dira Galdakaoko Udalarekin harremanetan jarri. Hala ere, esan beharra dago gaur gaurkoz Galdakaok ez dituela 25.000 biztanle”, zehaztu dute udal arduradunek. Oraingoz Basauriko Udalak ez du adierazpenik egingo.
Eusko Jaurlaritzak plana egin zuenean Galdakaok 29.000 biztanle inguru zituen, baina Usansolo herri independiente bihurtu ostean, 25.000 biztanleko langa ez du gainditzen Galdakaok.
Metroaren etorrera
Bestetik, Metroa Galdakaora heltzeak mugikortasun eredua aldatuko duela adierazi dute Galdakaoko Udaletik: “Metroak aldaketa bat ekarriko du Galdakaora mugikortasunari dagokionez. Hori aprobetxatuko dugu eta herria egokituko dugu erdigunea trafikoari dagokionez lasaitzeko”, diote.
Gauzak horrela, Emisio Gutxiko Eremua izendatzearen neurria Metroko lanak bukatu ostean aztertuko dutela zehaztu dute Galdakaoko udal ordezkariek.
Emisio Gutxiko Eremuak ezartzea onartu zuen aho batez Galdakaoko udalbatzak iazko ekainean, EAJk mozio bat aurkeztu ondoren.
Argazkiak / Ibilaldiaren urteari hasiera emateko Herri kirolen desafioa giro bikainean ospatu dute Galdakaon
Argazkiak / 650 lagunek hartu dute parte Arrigorriagako Ausartak Mendi Lasterketaren azken egunean
Bideoa / Gerraren eta faxismoaren aurkako murala margotu du Hego Uribeko GKSk Basaurin
Argazkiak / Ibilaldiaren urteari hasiera emateko Herri kirolen desafioa giro bikainean ospatu dute Galdakaon
Argazkiak / 650 lagunek hartu dute parte Arrigorriagako Ausartak Mendi Lasterketaren azken egunean
Argazkiak / Errege Magoen magiak etxeko txikienen ilusioa piztu du beste urte batez
Bideoa / Gerraren eta faxismoaren aurkako murala margotu du Hego Uribeko GKSk Basaurin
Gorka Perez: «Mendiko artzaintza galtzen ari da eta han behar dira, hain zuzen ere, txakurrak»
