Sareak

☉ Hego Uribe

Eutsi kirolari, eta eman aukera bat euskarari

Basauriko, Etxebarriko, Galdakaoko eta Ugaoko 19 kirol-klubek hartuko dute parte 2023/2024 ikasturtean gazteen kirol esparruan euskara sustatzeko programa batean. Markel Baroja Ebeteko kidearekin berba egin dugu proiektu honi buruz

|

Euskara eta kirola. Bi esparru horiek batzen dituen proiektua gauzatuko da Hego Uribeko hainbat herritan: Basaurin, Etxebarrin, Galdakaon eta Ugaon, alegia. Euskara eskolarekin bakarrik ez lotzea, eskolatik kanpo euskararen erabilpena erraztea eta hizkuntza egoera positiboekin lotzea da proiektuaren helburua.

Horretarako, azken urteetan Udalak, kirol klubekin hasitako harreman sare eta bideari jarraipena emango diote Ebete hizkuntza-zerbitzuko teknikariek. Proiektu hau 2020an jarri zuen martxan Ebetek lehen aldiz, gazte eta nerabeek euskararen erabileran dituzten gabeziak arintzeko asmoz. Proiektuak, klubeko zuzendaritza taldeekin egiten du lan lehendabizi, kirolak eduki dezakeen garrantzia gazteek euskararekiko duten ikuspegia aldatzeko, eta hurrengo urteetan erronka formatuen bidez, klubak egingo dituen aurrerapasuoak zehaztuz.

Entrenatzaileen formazio praktikoak eskaintzen ditu Ebetek, “euskarak lekua eduki dezan entrenamenduetan”. Kirol kluben komunikazio sareetan arreta jartzen dute eta elebietan idazteko baliabideak eskaintzen dizkiete. Gainera, kirolariekin partidu osteko bideo elkarrizketak sortuko dituzte hizkuntzaren erabilpena jorratzeko eta gertuko erreferenteekin dinamikak proposatuko dituzte.

“Hau guztia zehaztuz, emaitza hobeak lortzea espero da, hizkuntzaren erabileran, hizkuntzaren pertzepzioan eta taldearen hizkuntza irizpideen hobekuntzei begira”, dio Markel Baroja Laita (Bilbo, 1996) Ebete hizkuntza-zerbitzuko kideak. Hain zuzen ere, Ebete hizkuntza-zerbitzuak enpresak aholkularitza eta laguntza eskainiko die bide horretan kirol-klubei.

Proiektua hiru urtera dago zehaztuta, baina epe horiek errealak ez direla jakitun da Markel: “Ohiturak aldatzea oso zaila da. Badakigu denok hori. Ezin dugu pentsatu hiru urteko kontu bat dela: ohitura bat aldatzeko denbora behar da eta ondoren proiektua eraginkorra izango da. Eta ez dut esaten guk mantendu behar dugunik. Agian hemendik urte gutxira gu ez gaude eta klubak izango dira ardura hori hartuko dutenak”.

19 kirol klub

Guztira, Hego Uribe eskualdeko 19 kirol-klubek hartuko dute parte. Horiek dira: Basaurin Eskubaloi Taldea, Indartsu Futbol Kluba, Basconia Futbol Taldea, Bidebieta Pilota Elkartea, Artunduaga Atletismo Eskola, BSK Saskibaloi Taldea eta Baskauri Futbol Taldea; Etxebarrin Urdin-gorri Futbol Taldea, Berdezurigorri Eskubaloi Taldea, Kukullaga Eskubaloia eta Kukullaga Areto Futbola; Galdakaon Adiskide Pilota Elkartea, Ibaizabal Saskibaloi Taldea, Galdakao Atletismo Taldea, Galdakao Boleibol Taldea, GDKO Igeriketa, Galdakao Futbol Taldea eta Txirrindularitza Gela; eta Ugaon Ugao Futbol Taldea. Txikienetatik hasi eta kadete kategorira arte esku hartuko du Ebetek.

“Batzuk proiektuan estreinatuko dira eta beste batzuk, berriz, bigarren edo hirugarren urteko jarraipen batean hartuko dute parte”, dio Barojak. Datuak datu, Basaurin Artunduaga Atletismo Eskola, BSK eta Baskauri ikasturte honetan hasiko dira programan parte hartzen: “Indartsu, Basconia, Basauri Eskubaloia eta Bidebieta klubak aurreko ikasturtean hasi ziren programa honetan lanean eta aurten jarraipena egingo dute”, dio Barojak.

Eskualdeko gainerako herriei dagokionez, Ugao Basauri ondoren sartu zen proiektuan iaz, ondoren Etxebarri eta azkenik Galdakao. “Galdakaon luzerako joango da proiektua. Orain ekimena aurkezten ari gara, eta euskararen egunerako dinamika bat prestatu dugu bertako klubekin, Basaurin bezala”, dio.

“Eskualdean zerbait ederra lortu dezakegu klubekin batera”, dio Barojak. Gainera, ikasturte amaieran iaz Basaurin egin zuten ‘Eutsi kirolari, gogor euskarari’ egitasmoa antolatu nahi du Ebetek Udalekin batera: “Herriz herri mugitzen den txapelketa bat imajinatzen dugu eta kirol berriak probatzea, euskarazko ingurune batean eta urtean zehar herri desberdinetan parte hartu duten kirol taldeekin egitea da asmoa”. Oraindik ez dakite non egingo duten txapelketa, baina Santurtzin edo Enkarterrietan antolatzea planteatzen ari dira.

Programaren mamia

Markel Baroja ari da, besteak beste, Hego Uribeko kirol-klubekin harremanetan. Programaren nondik norakoei buruz galdetuta, zera dio Barojak: “Zazpi atmosferetan banatzen dugu programa. Kirol esparruan euskararen sustapenean gazteengan eragin beharko luketeen zazpi atmosfera dira. Lehenengo urtean zentratzen naiz zuzendaritza taldeetan eta entrenatzaileetan, bigarren urtean kirolarietan eta komunikazioan eta orain hirugarren urte bat diseinatzen ari gara gurasoekin eta erreferenteekin lotuta”.

“Kirol elkarteek oinarrian bolondres lana egiten dute eta horrek zailtasun asko ekartzen dizkio euskararen sustapenean. Zergatik? Bada ez dagoelako normalkuntza arduradun bat, entrenatzaileek ez dute soldata on bat kobratzen, eta askotan errepikatzen den mezua da: “egiten dutenaz gain, hau ere [euskara sustatzea] egiun behar dute?”, dio Barojak.

Markelek azaldu digunez, hasteko zuzendaritza taldeekin jartzen da harremanetan: “Lehenik eta behin erronka batzuk planteatzen ditugu. Guk zerrenda bat helarazten diegu eta eurek aukeratuko dituzte zein erronka dituzten egingarri. Hiru urteko proiektua izango balitz, bide bat markatzen diegu eta helburua da pixkana-pixkana zuzendaritza taldeek pausoak ematea”, dio.

Ondoren, entrenatzaileekin formakuntza antolatzen du Ebetek. “Entrenatzaileetan aurkitzen ditugun profilak lau dira: euskalduna, badakiena baina ohiturarik gabekoa, badakiena baina euskara oxidatua duena, eta hizkuntza gaitasun baxua duena. Tarteko profilak kontzientziatzeko lan egiten dugu aurrena —lehenengoa dagoeneko kontzientziatua dagoelako—, eta material praktikoa edo gida ematen diegu entrenamenduetan euskara erabiltzeko, hala nola, harrerarako zer aukera dauden, beroketa eta luzaketa errutinak euskaraz, beroketa-jolasak, teknifikazio ariketa batzuk, hiztegia edo animatzeko leloak. Modu horretan, kirolariak, batez ere, gaztetxoenak, ohituko dira entrenatzailea euskaraz entzuten”, dio Barojak: “Zuzendaritzaren herraminta bakarra entrenatzaileak dira, eta entrenatzaileen motibazio puntu bakarra da kirolariek euskaraz egiten hasten badira”.

“Gurasoekin eta familiekin egin nahi ditugun saioak guztiz berriak dira, baita erreferenteekin antolatu nahi ditugunak ere”, dio Barojak: “Erreferenteei dagokienez, gure helburua litzateke eredu berriak ezagutaraztea gazteei. Eta horretan profesionala eta ezaguna desberdintzen ditugu: profesionalak eredu dira, erreferente dira, baina euren klubean, goreneko taldean jokatzen duten kirolariak ezagunak eta erreferenteak dira aldi berean. Orduan, bilatzen duguna da bien arteko oreka bat”. Zentzu horretan, Ebete diseinatzen ari dena da Basauriko ikastetxeekin irteera egun bat antolatu, kirol-guneetara bideratu umeak eta bertan elkarrizketa bat edukitzea kirol arloko erreferente batekin.

Partidu osteko elkarrizketak

Gazteen kirol esparruan euskara sustatzeko programaren bitartez hainbat ekintza sustatuko dituzte kirol-klubek. Besteak beste, partidu osteko elkarrizketak. “Urtarriletik aurrera hasiko da proiektua martxan. Apirilera arte. Helburua da gazteek motibatuta egin dezaketen ekintza hau konturatu gabe euskaraz egitea”, dio Barojak: “Finaean bilatu duguna izan da: ‘zer proposatu ahal diegu gazteei euskaraz gustatuko zaiena?’, eta kiroletik honek funtzionatzen du. Probatu genuen Deustun duela hiru urte eta funtzionatzen du”.

Egitasmo horrek bere prozesua daukala ere zehaztu du Markelek: “Ezin dituzu umeak edo gazteak mikrofono baten aurrean hitz egiten jarri. Lehenengo gurasoen bilera bat deituko dugu; ondoren, online saioak antolatuko ditugu sei-zortzi laguneko taldetxoetan hizkuntza-gaitasunak irabazteko; eta azkenik, partiduen osteko elkarrizketak”.

Elkarrizketa batek dituen atalak edo kirol arloan ohikoak diren esaldiak edo gehien erabiltzen diren esaldiak irakatsiko dizkiete kirolari gazteei saio horietan. Era berean, erreferenteen ereduak jarriko dizkiete. “Dinamika horrekin bilatzen duguna da kirolariak hitz egiten hastea eta sare sozialetatik eurek bideo-elkarrizketak zabaltzea”, dio Barojak: “Proiektuaren ardatza kirolarien elkarrizketak dira. Behin hori hasita, uste dut gauza gehiagora iristen hasiko garela”.

Basauri, aitzindari

Pandemia eta gero hasi zen Ebete proiektu hau garatzen, baina lehenago antzekoa izan zitekeen beste proiektu bat gauzatu zuen Basaurin: “Ez nuke esango poroiektu bera denik. Pandemia eta gero erabaki genuen Ebeten, estrategikoki, kirolaren arloari garrantzia gehiago ematea”. Ildo horretan, Basauri —Santurtzirekin batera— aitzindari izan dela nabarmendu du Barojak: “Urteak daramatzagu euskara sustatzeko ahaleginetan Basaurin eta Santurtzin. Gerora sartu ziren Ugao, Enkarterriko mankomunitatea, Etxebarri eta Orozko. Eta aurten berriak dira Galdakao eta Urduña”.

Basaurin programa martxa jarri dutenetik izan diren lorpenek inguruan galdetu diogu Markeli: “Bada, lortu dena da: zuzendaritzetan argi edukitzea honetan ere egon behar direla. Agian oraindik ez daukate erraztasunik kudeatzeko, baina badakitela eta kontziente direla argi dago. Nabarmenduko nuke Indartsuk eta Bidebietak landu dutena: Euskadi mailan zabaldu daitekeen proiektu eredugarriak landu dituzte. Euskararen sustapena errotuta daukate jada”, dio, eta gaineratu du: “Klub horiek gu barik ere jarraipena emango liokete euskararen sustapenari. Eta hori da bilatzen duguna”.

“Zuzendaritza taldeetan badator errelebo bat, euskalduna dena edo behintzat euskaraz ikasi duena, beraz, erraztasuna gero eta handiagoa da”, dio Barojak.

Motibazio falta?

Erreleboa badagoela esan du Markelek, baina uste du lanketa handi bat egin behar dela gazteekin: “Hainbat gazteen egunerokoan, euskara, ikasgai bat gehiago besterik ez da”. “Nire ustez ez da motibazio kontua: sistematizatu dugun zerbait da. Egiten dudan hausnarketa da: euskara dago eskolan, guztiok gaur egun ikasten dugu euskara eskolan, eta eskolak ume batzuei esperientzia positiboak ekartzen dizkie, beste batzuei esperientzia ez hain positiboak, eta beste batzuei esperientzia txarra. Baina guztiek lotzen dute euskara eskolarekin”.

Eta hori “hausteko” eratu dute kirolean euskara sustatzeko programa: “Euskalgintzan lan egiten dugunok oso estretagiko ikusten dugu kirola. Datu batzuk aipatzeko, umeen % 85ak kirola egiten du. Eta proiektu honekin lor daitekeena da euskararekiko duten pertzepzioa positiboa izatea”, dio Barojak.

“Ume batek bere kirol erreferentean, hezkuntza ez formaleko aisialdian, euskara entzuten badu, ohitu egingo da euskara bere egunerokotasunean, eskolatik kanpo ere entzuten. Eta esperientzia positiboarekin lotuko du”, dio Barojak.

☉ Hego Uribe

Rockein lehiaketaren 12. edizioak marka berria ezarri du: 195 artistak eman dute izena

|

Finala azaroaren 16an izango da Basauriko Social Antzokian // Rockein

Rockein musika lehiaketak marka berria hautsi du: aurten 195 artistak eman dute izena. Atzo bukatu zen izena emateko epea eta bederatzigarren urtez jarraian parte-hartze marka gainditu du.

Datuak datu, Hego Uribeko talderik onenari saria eskuratzeko 33 proiektu aurkeztu dira (iaz 31); euskarazko talderik onenari sarirako hautagaiak 55 dira (iaz 40); eta Eskarabilera saria irabazteko 15 talde edo artista daude (iaz 19).

Tokiko talderik onenari sariari dagokionez, aurreko edizioetan Basauri, Arrigorriaga, Galdakao eta Laudioko artistak bakarrik sartzen ziren, eta aurten lehiaketa eskualde osora zabaldu du antolakuntzak: Basaurin, Arrigorriagan, Etxebarrin, Galdakaon, Ugaon, Usansolon edo Zaratamon erroldatutako kide bat gutxienez duten taldeek eskuratu dezakete saria.

“Nabarmentzekoa da euskarazko taldeen igoera (% 8ko hazkundea 2023arekiko eta izen emandako guztien % 28a) eta izena eman duten proiektuen % 30a (58) berriak direla 2023arekiko. Rockein talentu berriak detektatzerako orduan Euskal Herrian erreferentea den lehiaketa bezala berresten duten datuak dira”, diote.

Jasotako proposamen guztien artean, sektoreko profesionalek osatutako epaimahai batek sei finalista aukeratuko ditu finalean jotzeko. Eta antolakuntzatik adierazi dutenez, finalisten izenak uda ostean emango dituzte jakitera. Finala azaroaren 16an izango da Basauriko Social Antzokian.

Rockein lehiaketa Basauriko Udalak antolatzen du eta Hego Euskal Herriko bakarlari eta taldeei dago zuzenduta.

Nobedadeak

Artista irabazleak EP profesional bat grabatuko du Bilboko El Tigre estudioetan, baita bideoklip profesional bat grabatu ere, eta kontzertua emango du 2025eko MAZ Basauri festibalean. Iaz Lova Loisek irabazi zuen lehiaketa:

Tokiko artistarik onenak, aurtengo nobedade bezala, bideoklip profesional bat grabatuko du, eta aurreko edizioetan bezala, kontzertua eskainiko du 2025eko MAZ Basauri festibalean.

Euskarazko artistarik onena eta Eskarabilera sariko irabazlea 2025eko MAZ Basauri festibalean arituko dira.

Beste berrikuntza bat lehiaketan da tokiko kategoriak Hego Uribe eskualde osoko musika proposamenetara zabaldu duela bere estaldura-eremua. Hain zuzen ere, Basaurin, Arrigorriagan, Etxebarrin, Galdakaon, Ugaon, Usansolon edo Zaratamon erroldatutako pertsona bat gutxienez duten taldeek edo bakarlariek kategoria horretako saria eskuratu ahal izango dute.

Rockein, urtez urte

2013: 85 parte-hartzaile
2014: 105 parte-hartzaile
2015: 95 parte-hartzaile
2016: 110 parte-hartzaile
2017: 129 parte-hartzaile
2018: 135 parte-hartzaile
2019: 146 parte-hartzaile
2020: 169 parte-hartzaile
2021: 179 parte-hartzaile
2022: 188 parte-hartzaile
2023: 191 parte-hartzaile
2024: 195 parte-hartzaile

Osorik irakurri

☉ Hego Uribe

Esklerosi Anizkoitza ikertzearen aldeko ekimenak egingo dituzte igandean Hego Uriben

|

Arrigorriagan, Etxebarrin, Ugaon eta Basaurin antolatu dute kanpaina // Argazkia: Euskadiko Esklerosi Anizkoitza

Esklerosi Anizkoitzaren alde ‘Busti zaitez!’ ekimena egingo da Euskadiko hainbat hondartza, igerileku eta plazetan uztailaren 14an, igandez. Aurtengoa 27. edizioa da.

Hego Uribe eskualdean Arrigorriagako, Etxebarriko eta Ugaoko igerilekuetan, eta Basauriko Begoñako Andra Mari kalean antolatu dituzte jarduerak eta elkartasun-dendak zabalduko dituzte dirua biltzeko.

Bilduko duten dirua Euskadin Esklerosi Anizkoitza duten pertsonen bizi-kalitatea hobetzeko erabiliko dute: errehabilitazio- eta laguntza-zerbitzuekin jarraitzeko, alegia.

Osorik irakurri

☉ Hego Uribe

Laura eta Javi: “Txernobyl inguruan lehendik egoera gogorra bazen, orain latzagoa da gerra dela eta”

Chernobil Elkarteko kide dira Laura eta Javi. 2011tik dira harrera-familia, eta aurten lehen aldiz Kyrylo, 6 urteko mutila, hartu dute udan

|

Ezkerretik eskumara, Javi, Luar, Kyrylo eta Laura, Basozelaiko skateparkean // Geuria

Txernobylgo hondamendia gertatu zenetik 38 urte igaro dira. Historiako istripu nuklearrik larriena izan zen. Urte dezente igaro direla pentsa daitekeen arren, hainbat ikerketek ondorioztatu dute gaur egun ere, eta luzaro, kutsatutako zonaldean bizi diren milioika pertsonek ondorio kaltegarriak jasango dituztela euren osasunean.

Euskal Herriko Chernobil Elkarteak ondorio horiek gutxitzeko ahaleginetan lan egiten du urtero, hondamendi eremuko haurrak gurera ekarriz. Azken urteetan, gainera, adingabeei arnasa emateaz gain, gerratik eta horren ondorioetatik urrun egon daitezen lanean ari da Chernolbil Elkartea.

Elkartetik adierazi digutenez, aurten Ukrainiatik hiru haur etorri dira Hego Uribera uda pasatzera: Basaurira, Etxebarrira eta Ugaora.

GEURIAn harrera-familia batekin hitz egiteko aukera izan dugu: Laurarekin eta Javirekin, alegia. 2011n hasi ziren Chernobil Elkartearekin elkarlanean: orduan, eta urte luzez, Mykita izan zuten etxean, eta aurten lehen aldiz Kyrylo izeneko 6 urteko mutila hartu dute udan etxean. Basozelaiko skateparkean batu gara Laurarekin, Javirekin, Luarrekin (Lauraren eta Javiren sei urteko semea) eta Kyrylorekin.

Laura eta Javi, noiztik zarete Chernobil Elkarteko harrera-familia? 2011. urtea izan zen gure lehen urtea Chernobil elkartean. Hala ere, lehendik ezagutzen genuen elkartea lagun batzuei esker.

Eta elkartea eta Txernobylgo haurrak laguntzea erabaki zenuten. Bai. Gure lagunen esperientzia ezagututa animatu ginen.

Aurten Kyrylo hartu duzue, bere lehen aldia Euskal Herrian. Hala da. Kyrylok 6 urte ditu eta bere lehen aldia da Euskal Herrian. Egun gutxi daramagu elkarrekin, baina ume oso alaia da, baita mugitua ere (kar, kar, kar). Jolastea asko gustatzen zaio eta keinuen bidez bagoaz elkar “ulertzen”.

Uztailaren 1ean etorri zen Kyrylo. Nolakoa izan zen lehen kontaktu hori eta aurrez aurre ezagutzea? Lehen kontaktua oso berezia izan zen. Lehehengo egunean, gauean, etxera heldu ginenean, oheratu nahi genuen, baina ez zuen ohera joan nahi eta jolasten egon zen kotxe batzuekin.

Kyryloren adin bereko seme bat daukazue, Luar. Zelan hartu du berak Kyrylo? Ilusio handiz hartu du Kyrylo. Egunak zenbatzen egon zen Kyrylo noiz etorriko zain. Hasieratik oso ondo konpondu dira elkarrekin: lau hilabeteko aldea baino ez dute. Jolasten eta jolasten ematen dituzte egunak, eta noizean behin ere haserretu ere egin dira, biek jostailu bera nahi dutelako. Hala ere, orokorrean algara batean ibiltzen dira biak .

Zer egingo duzue uda honetan? Kanpin batera joango gara. Udan furgonetagaz bidaiatzen dugu eta plan desberdinak egingo ditugu: hondartza, igerilekua, mendia… Udaz gozatu nahi dugu ekintza desberdinak eginez.

Noiz arte geratuko da gurean Kyrylo? Abuztuaren bukaeran bueltatuko da Kyrylo Ukrainiara autobusean, Chernobil Elkarteko gainontzeko umeak bezala.

Aipatu duzuenez, ez da zuen lehen aldia harrera-familia bezala. Ez. 2011n Mykita hartu genuen, 6 urterekin; orain 19 urte ditu eta gerra dela eta ezin da etorri.

Zein da gaur egun egoera Ukrainian eta Txernobylen? Txernobyl inguruan lehendik egoera gogorra bazen bertako familientzat, orain latzagoa da egoera gerra dela eta. Mykitak azaroan 20 urte beteko ditu eta gerra hasi zenean ikasketak bukatzen zegoen Kieven. Gaur egun lanean dago Ukrainian.

Mykitarekin harremanetan jarraitzen duzue orduan. Bai. Mykita etxekoa dugu. Harreman ona dugu berarekin eta kontaktuan jarraitzen dugu. Berak badaki gu hemen gaituela eta ahal dugun guztian lagunduko dugula.

Azken urteak gogorrak izan dira: lehenengo Covid-19aren pandemia, gero gerra. Zelan bizi dituzue zuek azken urte hauek, Laura eta Javi? Pandemia gogorra izan zen danontzat. Gerra hasiera urduritasun handiz bizi izan genuen: Mykita Kieven zegoen eta berak esan zigun iluntzean euren etxeetara bueltatu behar zirela. Gero asteak pasa genituen komunikazio barik, elektrizitaterik eta estaldurarik gabe egon zirelako. Ahal zuen bakoitzean mezutxo bat bidaltzen zigun gu lasai egoteko. Baina oso gogorra izan zen. Etxean albisteak ez genituen ikusten negar batean hasten ginelako. Gaur egun “ohitu” gara. Oso luze egiten ari da. Gure beldurra gaur egun da gerrara bidaliko ote duten.

Osorik irakurri

☉ Hego Uribe

Malmasin mendia “ingurumen-irizpideen arabera” berreskuratu nahi du Sagarrak talde ekologistak

Arrigorriagako eta Basauriko Udalei eta bertan ordezkaritza duten talde guztiei helarazi diete euren proposamena

|

Malmasingo pistetan entresaka baten ondorioz egin zuten txikizioa // Utzitakoa

“Alkatetzei, Hirigintza eta Ingurumen sailei eta Arrigorriagako eta Basauriko udaletan ordezkatuta dauden talde politiko guztiei” luzatu die proposamena Sagarrak talde ekologistak.

Proposamen honen zioa argi baino argiago azaltzen dute hasiera-hasieratik: “Zuengana jotzen dugu ingurune horren egungo egoeraz dugun kezka helarazteko eta, ondorioz, ingurumen-irizpideen arabera eremu hori berreskuratzera bideratutako ekintza bateratu bat egiteko gure nahia helarazteko”.

Kezka horretatik abiatuta, egurra moztu eta garraitzeko erabiltzen den makinaria astunak sortu duen kaltea nabarmendu dute.

GEURIAk ere horren berri eman zuen orain dela bost hilabete, eta Jagoba Hidalgo arkeologoarekin ingurunea bisitatu genuen, Malmasingo Kastroa bezalako ingurune babestu batean horrelako jarduketek izan dezaketen eragina ezagutzeko.

Aipatzekoa da, baita, ingurune horretan aspalditik lanean ari dela Arrigorriagako Malmasingo lagunak  taldea.

Bi irizpide horiek kontutan hartuta, naturgunearen babesa eta aztarna arkeologikoarena, Malmasin mendiaren ingurunea berreskuratzea eta leheneratze ekologikoa sustatzea proposatzen du Sagarrakek.

Helburu hori lortzeko, hainbat erabaki hartzeko beharra azpimarratu dute, batik bat ingurune horrek egungo baso-erabilera intentsiboa izaten uztea, bere leheneratze ekologikoa ahalbideratzeko, babes berezia izan dezan.

“Gure ustez”, gaineratu dute, “ez du zentzurik eremu honetan baso-ustiapen bat eta monolaborantza bat mantentzea jabetza pribatuko erregimenean eta errentagarritasun ekonomikoaren arrazoi bakarrarekin”.

Mendiaren zati handi batek babes berezia du dagoeneko, bertan aztarna arkeologikoak daudela, eta babes hori mendi osora zabaltzea eskatzen dute, horrela eukalipto-landaketak galaraziz.

GEURIA harremanetan jarri da bai Arrigorriagako Udalarekin bai Basauriko Udalarekin:

Arrigorriagako Udalak Sagarraken eskaria jaso du eta kasua aztertzen ari direla adierazi diote GEURIAri: “Sagarraken eskaria jaso dugu eta aztertzen ari gara. Gainera, Malmasingo Lagunak herriko elkartearen iritzia ere jaso nahi dugu”.

Basauriko Udaletik adierazi dute administrazioen eta partikularren artean “koordinazio aktiboa” egon behar dela, Malmasin mendiaren ingurua balioesteko proiektu bat lortzeko, “bai kastro aldean, bai mota askotako baso-masek okupatzen dituzten eraztun mugakideetan”.

“Kontuan izan behar da mendia osatzen duten lurzatien titulartasuna ez dela osorik publikoa. Baso-erabilera intentsiboa murriztu edo ezabatu nahi bada, partikularren borondatezko akordioak bilatu eta bultzatu behar dira hori lortzeko”, zehaztu dute Basauriko udal ordezkariek.

Osorik irakurri

☉ Hego Uribe

Rockein lehiaketan izena emateko epea uztailaren 11n bukatuko da

|

Kaserna 2022ko Rockeineko finalean // Rockein

Maiatzaren 27an abiatu zuten Rockein musika lehiaketaren 12. edizioa, eta gaur sareetan gogorarazi dute astebetean, uztailaren 11n bukatuko dela izena emateko epea.

Hego Euskal Herriko bakarlari eta musika talde berriak bilatzeko lehiaketa da, eta dagoeneko hainbatek eman dute izena.

Jasotako proposamen guztien artean, sektoreko profesionalek osatutako epaimahai batek sei finalista aukeratuko ditu finalean jotzeko. Finala azaroaren 16an izango da Basauriko Social Antzokian.

Finalean irabazleen izenak jakiaraziko dituzte: sari nagusia, tokiko artistarik onena, artista onena euskaraz eta Eskarabilera saria.

Nobedadeak

Artista irabazleak EP profesional bat grabatuko du Bilboko El Tigre estudioetan, baita bideoklip profesional bat grabatu ere, eta kontzertua emango du 2025eko MAZ Basauri festibalean. Iaz Lova Loisek irabazi zuen lehiaketa:

Lova Lois: “Rockein lehiaketak asko lagundu dit nire lehen EPa kaleratzen”

Tokiko artistarik onenak, aurtengo nobedade bezala, bideoklip profesional bat grabatuko du, eta aurreko edizioetan bezala, kontzertua eskainiko du 2025eko MAZ Basauri festibalean.

Euskarazko artistarik onena eta Eskarabilera sariko irabazlea 2025eko MAZ Basauri festibalean arituko dira.

Beste berrikuntza bat lehiaketan da tokiko kategoriak Hego Uribe eskualde osoko musika proposamenetara zabaldu duela bere estaldura-eremua. Hain zuzen ere, Basaurin, Arrigorriagan, Etxebarrin, Galdakaon, Ugaon, Usansolon edo Zaratamon erroldatutako pertsona bat gutxienez duten taldeek edo bakarlariek kategoria horretako saria eskuratu ahal izango dute.

Osorik irakurri