Euskadiko udalerrien arteko lehiaketa birtual bat martxan jarriko du maiatzean Mugiment egitasmoak: ‘Mugiment Pausu Erronka’.

EAEko Jarduera Fisikoaren Orientazio Zerbitzua (JFOZ) duten 50 udalerrien arteko lehiaketa birtuala izango da, eta helburua da herritarrek ahalik eta pauso gehien egitea erronkak irauten duen bitartean, maiatzaren 19tik ekainaren 8ra bitartean.

Hego Uribe eskualdeko bi herrik bat egin dute erronkarekin: Galdakaok eta Etxebarrik.

“Helburu nagusia da herritarrek eguneroko bizitzan ahalik eta pauso gehien ematea, osasuna eta ongizatea hobetzeko bidean”, diote Mugiment egitasmoko arduradunek.

Erronka Wellk app-aren bidez garatuko da. Parte hartzeko, nahikoa da aplikazioa deskargatzea eta norberaren udalerriko taldean izena ematea.

Aritz Guinea galdakoztarra Wellk aplikazioaren garapeneko arduraduna da // Geuria

App-a Android eta iOS gailuetan deskargatu daiteke. Interesdunak izena eman behar du, eta talde batera batu beharko da: Erronkak atalean, Taldeak sakatu eta ‘Mugiment Pausu Erronka’ ligan nahi den udalerria aukeratu behar du.

Pausuak automatikoki zenbatuko ditu aplikazioak. Baina horretarako Health (Apple) eta Health Connect (Android) aplikazioekin lotu beharko da Wellk app-a. Argibideak esteka honetan aurkituko dituzte herritarrek.

Bakarka edo taldeka parte har daiteke, eta udalerrien arteko sailkapena ere izango da ikusgai. Talde bakoitzak bere udalerria ordezkatuko du erronkan zehar.

Sariak ere izango dira bai banaka zein taldean. Pausu gehien ematen dituen emakumeak eta gizonak kirol denda baterako 75 euroko opari-txartela jasoko du. Era berean, onartutako desgaitasuna duen eta pauso gehien eman dituen emakumeari eta gizonari ere kirol denda batean 75 euro gastatzeko opari-txartela emango diote.

Taldekako sariak ere egongo dira: udalerri bakoitzean urrats gehien pilatu dituzten 5 pertsonentzat 30 euroko opari-txartela banatuko dute, eta udalerriko parte-hartzaileen artean beste 5 opari-txartelen zozketa egingo dute.

“Erronka dibertigarria eta osasuntsua”

Aritz Guinea galdakoztarra Wellk-en sortzaileetariko bat da (iazko apirilean elkarrizketa egin genion! Hemen duzu elkarrizketa!) eta berarekin berba egin dugu erronka honen inguruan: “Erronkaren bitartez, modu birtualean eta taldeka parte hartzeko aukera eskainiz, jarduera fisikoa eguneroko bizitzan integratzeko bide erakargarri eta eskuragarria eskaintzen saiatzen gara”.

“Erronkaren ideia jarduera fisikoaren kultura bultzatzeko beharraren ondorioz sortu zen, herritarren osasun fisiko eta emozionala hobetzeko helburuarekin, Wellk aplikazioaren bitartez egin daitezken dinamika desberdinekin bat eginez. Era berean, Jarduera Fisikoaren Orientazio Zerbitzua (JFOZ) duten udalerrien zerbitzua ezagutaraztea eta ikusgarritasuna handitzea ere bilatzen da. Horregatik ez dute Euskal Herriko herri guztiek parte hartzen”, dio Guineak.

Hala eta guztiz ere, Euskadiko udalerri guztiek parte hartu ez arren, erronkan parte hartzen duen udalerri bati “oparitu” ahal dizkiote herritarrek pausuak.

Galdakaoko, Etxebarriko eta eskualdeko herritarrak erronkan parte hartzera animatu ditu Guineak: “Nik lagunak eta eskualdekoak animatuko nituzke, hasteko, edonork, edonondik parte hartu dezakeelako, herri baten izenean”.

“Talde gisa parte hartzeko aukera azpimarratuko nuke. Etxebarriko eta Galdakaoko herritarrak elkarrekin lan egin dezakete euren udalerria lehen postuetan jartzeko, eta horrek taldeko espiritua eta herriaren harrotasuna indartzen ditu”, dio Guineak.

Era berean, sari “erakargarriak” daudela gogorarazi du galdakoztarrak: “Banakako eta taldeko sariak egongo dira, eta parte hartze hutsagatik ere sariak irabazteko aukera dago”.

“Ez da zertan kirolari izan behar; eguneroko ibilaldiak, paseoak edo erosketak egitera joatea nahikoa da pausuak pilatzeko”, zehaztu du, eta gaineratu du erronka “dibertigarria eta osasuntsua” dela: “Osasuna hobetzeko modu sinplea eta motibagarria da, eta gainera, mugikorreko aplikazioarekin dena erraztuta dago”.