Azaroan Zinebin estreinatu ondoren, Itoiz euskal taldearen jatorriari buruzko ‘Itoiz. Udako sesioak’ dokumentala urtarrilaren 24an helduko da zinema aretoetara.

Basaurin sei egun geroago ikusi ahal izango da Social Antzokian, Zine Kluba programaren barruan: urtarrilaren 30ean, ostegunez, 17:30ean eta 20:00etan. Sarrera 5 euroan dago salgai eta Socialeko bazkideek sarrera doakoa dute.

Bestetik, Galdakaon ere proiektatuko dute dokumentala, Torrezabalen: urtarrilaren 26an 20:15ean eta urtarrilaren 27an 20:00etan. Sarrerak 4 euroan daude salgai.

70eko hamarkadaren erdialdean eztanda egin zuen bandak eta euskal musikaren panoraman erreferente bilakatu zen Itoiz. 10 urteko historia labur baina arrakastatsuaren ondoren, Juan Carlos Perezek abentura amaitutzat eman zuen. Kritikari eta zaleen harridurarako, unerik gorenean erabaki zuen ibilbidea etetea. Itoizeko partaide izan zen Jose Garate sanmigeldarra ‘Foisis’ ezizenez ezaguna dena.

Urtarriletik aurrera GEURIAren informazioa Mastodon sare sozialean ere jarraitu ahalko dute herritarrek, TOKIKOMek martxan jarri duen tkm.eus zerbitzariaren bidez. Mastodon erabiltzaileek [@geuria@tkm.eus] kontuaren bidez jarraitu ahalko dute gure edukia.

“Tokikomen erabaki dugu Mastodon sare sozial irekira jauzi egitea. Mastodon hainbat komunitate txikiz osatutako sareen sare bat da, eta haren atzean ez dago korporazio multinazional gaiztorik, bere helburu bakarra erabiltzaileen arteko komunikazioa sustatzea da”, diote Tokikometik.

Bizkaiko Buruz buruko esku pilota txapelketako finalak jokatu ziren urtarrilaren 18an, larunbatez, Basauriko Artunduagako frontoian.

Lau final jokatu ziren: kadeteak, gazteak, emakumeak eta nagusiak. Kadete mailan, Zaratamoko Upo Mendi taldeko Oier Gil izan zen txapelduna, Basauriko Bidebieta klubeko Jon Aperribai garaituz (18-14).

“Kadeteen partiduan nahiko urduri zeuden biak, bai Jon bai Oier. Hasieran partidua berdinduta zegoen: txandaka ibili ziren markagailuan. Momentu batean Jon jarri zen aurretik (14-11), baina sakean akatsak eginda, Oierrek esku hartu eta 18ra heldu zen Zaratamoko klubeko pilotaria (14-18)”, adierazi dio GEURIAri Mikel Karrillo Bidebieta Pilota Taldeko entrenatzaileak.

Emakumezkoen finalean Bidebietak ordezkaria izan zuen Eva Martinezekin, eta txapela jantzi zuen finalean. Aurkari izan zuen Durangoko June Agirrebeitia (22-18).

“Emakumeen partiduan biek elkar oso ondo ezagutzen zuten —binakakoan batera aritzen dira, Junek Bidebietan lagatuta jokatzen baitu—, eta biek badakite besteak non egiten dituen akatsak: Evak argi zeukan partidua aurreko koadroetara eraman behar zuela, eta Junek argi zeukan atzera eta atzera joko behar zuela; azken batean, June atzelaria da eta Eva aurrelaria. Hasieran June aurreratu zen (3-0), baina Evak aurre hartu zion (3-6). Azken txanpan, Evak aurre egin zuen, baina June sakeei esker hurbildu eta emaitza 18-22 izan zen Evaren alde”, dio Karrillok.

Gazteen mailan, Olaburu klubeko Aratz Diezek irabazi zuen finala Lagun Arteako Galder Buruagaren aurka, eta nagusien kategorian Danak Bat klubeko Enaitz Arandiak jantzi zuen txapela, Lezamako Markel Cabello gailenduta.

Langabezian dauden eskualdeko 10 gazte kontratatuko dituzte aurten Nerbioi Ibaizabal eskualdeko enpresetan lan egiteko.

Praktika ordainduak izango dira, eta beka jasoko duten gazteek hilean 871,66 euro gordin jasoko dituzte egunean 6 orduz lan egitearen truke. Kontratuen iraupena sei hilabetekoa izango da.

Ordaindutako praktika hauek egin nahi dituzten gazteek ondoko baldintzak bete behar dituzte: Nerbioi Ibaizabal eskualdeko udalerriren batean erroldatuta egotea; Lanbiden enplegu eskatzaile bezala izena emanda egotea; unibertsitate titulua, erdi mailako nahiz goi mailako prestakuntza zikloa, hirugarren mailako doktoregoa edo profesionaltasun ziurtagiria izatea edota azken urteko ikaslea izatea; jasotako prestakuntzarekin lan esperientziarik ez izatea, edo lan esperientzia hiru hilabetetik beherakoa izatea; eta 18 eta 29 urte artean izatea (26 eta 29 urte bitartean Gazte Berme Sisteman izena emanda egon beharko dute).

Beka hauen helburua gazteen enplegagarritasuna hobetzea eta laneratzea sustatzea da, beren lanbide heziketarekin edo prestakuntza akademikoarekin lotuta dauden eskualdeko enpresetan esperientzia hartuz.

Hauek dira programa honetan parte hartuko duten eskualdeko enpresak: IK–Ingurumenaren Kideak Ingeniería, S.L. (Basauri), Camp Tecnológico–Argi Ventures S.L. (Basauri), Asesoria Etxebarri, S.L. (Etxebarri), Euskal Korreo Postal Mailing, S.L. (Etxebarri) eta Dinosa, S.A.L. (Galdakao).

Irekita dago dagoeneko programa honetan parte hartzeko eskaera epea. Interesdunek esteka honen bitartez eman dezakete izena.

Arrigorriaga, Basauri, Etxebarri, Galdakao, Ugao, Zaratamo, Zeberio, Arakaldo, Arrankudiaga-Zollo, Urduña eta Orozkoko udalek sustatzen dute programa, Bizkaiko Foru Aldundiaren eta Nerbioi Ibaizabal Mankomunitatearen laguntzarekin. Kudeaketa Novias Salcedo Fundazioarena da.

Urte berriarekin batera, Eusko Jaurlaritzak eta Espainiako Gobernuak adostutako hainbat transferentzia gauzatu dira.

Horien artean, Hego Uriben eragin nabaria duen bat dago: Renferen C3 linearen kudeaketa, Bilbotik Urduñara doan tren ibilbidearena, alegia, gure eskualdea zeharkatzen duena, Basauritik Ugaoraino.

Kudeaketa Eusko Jaurlaritzarena izango den arren, Renfek 2027ko abendurarte dauka kontratua. Ondoren, 2028an, lehiaketa publikoa egingo da.

Esku aldaketa horretaz harago, hainbat dira Renfetik azken hilabeetan iragarri dituzten hobekuntzak: alde batetik,  Urduña eta Bilbo konektatzen dituen C3 lineako trenen maiztasuna handituko du Civis izeneko zerbitzuaren bidez.

Zerbitzu honen ibilbidea C3 lineako berbera izango da, baina trenek geldialdi gutxiago izango dituzte.

Bestetik, Bilbo eta Laudio arteko lanegunetako tren zerbitzuko maiztasuna 15 minutura laburtuko dute, eta 84 trenetik 92ra pasako dira.

Asteburuen kasuan, aldiz, 55etik 76ra.