→Hego Uribe

Herritarrek bozkatu egin dezakete energia plana nolakoa izango den Nerbio-Ibaizabalen

Arrigorriaga, Etxebarri, Ugao, Zaratamo eta Zeberio herrietako biztanleek bete dezakete online inkesta

Nerbioi Ibaizabaleko hondakinen kamioia, hondakin-bilketan Ugaon // Geuria

Nerbioi-Ibaizabal Mankomunitateak Klima-Energia Plan Integratua (KAAEPI) prestatzeko lehen pausoak eman ditu. Txostenaren helburua berotegi efektuko gasak murrizteko, energia aurrezteko eta iturri berriztagarriak sustatzeko nondik norakoak zehaztea da, mankomunitatea osatzen duten bederatzi udalerrietan. Hego Uriben, Arrigorriagari, Etxebarriri, Ugaori, Zaratamori eta Zeberiori eragingo die planak.

Horregatik, bost herrietako biztanleek esku hartze zuzena izango dute KAAEPIren konfigurazioan. Klima aldaketaren inguruan daukaten pertzepzioari buruzko informazioa jasotzeko, mankomunitateak eskualdeko bizilagunen iritziak eta ekarpenak biltzeko galdeketa egingo du sareen bidez. Horretarako inkesta zabalik dago jada, eta parte hartu nahi duten arrigorriagar, etxebarritar, ugaotar, zaratamar eta zeberioztar guztiek bete dezakete.

“Helburu nagusia udalerriotako sektoreen eta herritar guztien kezka eta premia nagusiei buruzko ahalik eta ezagutza handiena lortzea da”, azaldu dute inkestaren sortzaileek. Plana biztanleriaren “errealitateari” egokitzeko eta “denboran iraunkorra” izateko, galdeketa fasearen beharrezkotasuna azpimarratu dute, eta herritarrak parte hartzera eta inkestaren bidez energia modeloaren inguruko zalantzak eta esperientziak elkarbanatzera animatu dituzte.

2023an prest

Kontsulta fasean biztanleengandik jasotako erantzunak Global Factor eta EDE Ingenieros enpresen laguntzarekin ebaluatuko dituzte, eta hortik abiatuta erredaktatuko dute plana, 2023ko lehen erdian amaituta egon dadin. Guztira 50.530 euroko kostua izango du, eta euskal erakundeen hainbat diru laguntzarekin finantzatuko da: Eusko Jaurlaritzako Ekonomiaren Garapen, Iraunkortasun eta Ingurumen Sailarena, 15.000 euro; Bizkaiko Foru Aldundiko Iraunkortasun eta Ingurune Naturala Zaintzeko Sailarena, 7.500 euro; eta Energiaren Euskal Erakundearena, 5.856,19 euro.

Gora

Geuria Laguntzaileak Geuria Laguntzaileak