Sareak

☉ Hego Uribe

Istanbulgo atentatuak gaitzesteko elkarretaratze isilak deitu dituzte Hego Uriben

Eudelek “irmo gaitzesten du” bart gauean Turkian izandako atentatua, “zeinaren ondorioz dozenaka lagun hil diren eta ehundik gora zauritu diren”.

|

turkia istanbul 2016 atentatua

Eudel Euskadiko Udalen Elkarteak jakinarazi duenez ekainaren 30ean elkarretaratze isilak deituko dituzte zenbait udalerrik. Izan ere, Eudelek “irmo gaitzesten du” bart gauean Turkian, Istanbulgo Atatürk aireportuan, izandako atentatua, “zeinaren ondorioz dozenaka lagun hil diren eta ehundik gora zauritu diren“.

Horiek horrela, Basauriko, Arrigorriagako eta Galdakaoko Udalek Eudelen deialdiarekin bat egingo dute eta 12:00etan hildakoei eta euren senideei laguntza eta elkartasuna adierazteko 5 minutuko kontzentrazio isila egingo dute udaletxeen aurrean.

 

☉ Hego Uribe

Arrigorriagan galdutako teckel arrazako txakur baten bila dabiltza Hego Uribe eskualdean

Joan den apirilaren 7an galdu zen Milka Arrigorriagako Ollargan auzoan eta zenbait aldiz ikusi dute Ugaotik azken boladan

|

Milka // Utzitakoa

Joan den apirilaren 7an teckel arrazako 15 hilabeteko Milka izeneko txakur bat galdu zuten Arrigorriagako Ollargan auzoan.

Marroi kolorekoa da Milka eta lepoko gorri bat du. Bertan, jabeen izenak eta telefono zenbaki bat ageri da. “Txakurra ikustekotan, ez ezazue jarraitu”, azaldu dute Milkaren jabeek. “Ikusi zer egiten duen eta 637 030 770 telefono zenbakira deitu jarraibideak emateko. Aukera izanez gero argazkia atera, mesedez”.

Milka galdu zenetik zenbait alditan ikusi dute eskualdean zehar eta azken aldiz Ugaotik ikusi zutela azaldu diote jabeek GEURIAri. “Edozein motako laguntza eskertuko dugu, espero dugu Milka laster etxean egotea”.

Milka // Utzitakoa

Osorik irakurri

☉ Hego Uribe

#A21 / Hego Uribe / EAJ garaile argia, EH Bildu gero eta indartsuago eskualdean

#A21 / Hego Uribe / Eusko Legebiltzarrerako hauteskundeak 2024 / Emaitzak eta irakurketa

|

Lehia estua aurreikusten zen Eusko Legebiltzarrerako hauteskundeetan EAJ eta EH Bilduren artean, eta inkestetan aurreikusitakoa bete zen oraingoan. Gurera ekarrita, EAJri garaipen argia ematen zioten inkesta guztiek Bizkaian, eta hala izan bazen ere, aipatzekoa da EH Bilduren igoera. Modu berean, beste datu garrantzitsu bat da parte hartzeak gora egin duela, 2020ko Hauteskundeak pandemia betean egin baitziren.

Hego Uriben ere, EAJ gailendu da: Guztira, 19.184 boto jaso ditu, 2020an baino 2.583 boto gehiago. Garaipena lortu du Basaurin, Galdakaon, Etxebarrin, Arrigorriagan, Ugaon edo Zaratamon.

Bestetik, aipatzekoa da EH Bilduk botoetan gehien hazten jarraitzen duen alderdia dela: ezker koalizioak 14.589 boto irabazi ditu eskualdean, 2020an baino 4.626 boto gehiago. Zeberion eta Usansolon lehen indarra izan da, EAEko hauteskundeetan lehen aldiz, eta hazkunde nabarmena izan du Galdakaon edo Arrigorriagan. Hori gutxi ez, eta Basaurin zein Etxebarrin bigarren indarra izatea lortu du, aurrenekoz, PSEri aurre hartuta.

Podemosek izan du kolperik handiena eskualdean. Izan ere, 2020an laugarren indarra izan zen Hego Uriben (2016an bigarren indarra izan zen eskualdean), eta aurtengo hauteskundeetan seigarren indarra izatera pasa da, PPren eta Sumarren atzetik. Duela lau urteko datuekin alderatuta, 2.618 boto galdu ditu Podemosek Hego Uriben.

#A21 / Hego Uribe / Emaitzak

EAJ: 19.184 boto (+2.583 boto)
EH BILDU: 14.589 boto (+4.626 boto)
PSE: 7.674 boto (+1.547 boto)
PP: 3.094 boto (+1.197 boto; 202oan Cs-rekin aurkeztu zen PP; 2016an Pk 3.506 boto jaso zituen; Ciudadanosek 897)
SUMAR: 1.674
PODEMOS: 1.142 boto (-2.618 boto)
VOX: 976 boto (+360 boto)
PACMA: 264 boto (+18 boto)
EB-AZ: 117 boto (+16 boto)
PH: 71 boto (+35 boto)
IZAN: 64 boto
PUM+J: 57 boto (+14 boto)
PCTE/ELAK: 43 boto (-15 boto)

Eusko Legebiltzarrean EAJk eta EH Bilduk 27na eserleku lortu dituzte: alderdi jeltzaleak lau ordezkari galdu ditu eta ezker koalizioak sei irabazi ditu.

PSE (12 eserleku, +2) hirugarren alderdi bozkatuena izan da, eta laugarrena PP (7 eserleku, +1).

Sumar sartu da lehen aldiz Eusko Legebiltzarrean eserleku batekin, VOXek adina (2020an sartu zen alderdi ultraeskuindarra).

#A21 / Hego Uribe / Herriz Herri / Emaitzak

Osorik irakurri

☉ Hego Uribe

Autobus zerbitzu osagarria jarri du Metro Bilbaok Etxebarri eta Basauri artean

Autobus zerbitzua 20 minuturo izango da Etxebarritik zein Basauritik, gaurko eguna bukatu arte. Trenak hasi dira bi geltokien artean zirkulatzen, baina trenbide bakar batetik egingo dutenez, maiztasunak txikiagoak dira

|

Trenak bi geltokien artean zirkulatzen hasi dira, baina trenbide bakar batetik, eta hortaz, maiztasuna txikiagoa da // Artxiboko irudia, Geuria

Gaur goizean Basauri metro geltokia itxi dute katenarian gertatutako “sute txiki” baten ondorioz, eta Etxebarri eta Basauri geltokien artean zerbitzua etenda egon da.

Metro Bilbaok duela ordubete jakinarazi duenez, 15:10etik aurrera autobus zerbitzua jarri du martxan Etxebarri eta Basauri arteko ibilbidea betetzeko, bi noranzkoetan.

Autobusak Etxebarritik, metro geltokitik, zein Basauritik (Arizko Ikastolaren ondotik eta Begiratokietatik) aterako dira 20 minuturo (15:10-15:30-15:50… hurrenez hurren), Arizen gelditu gabe. Autobus zerbitzua gauera arte luzatuko dute.

Gainera, trenak bi geltokien artean zirkulatzen hasi direla adierazi dute, “baina trenbide bakar batetik egingo dutenez, maiztasunak txikiagoak dira”, diote.

Metro Bilbaotik adierazi dutenez, matxura gauean zehar konponduko dute, “goizeko lehen ordutik ohiko zerbitzua eskaini ahal izateko”.

Osorik irakurri

☉ Hego Uribe

Hego Uribeko dozenaka pentsiodun Gasteizen batu dira 1080 euroko gutxieneko pentsioa aldarrikatzeko

|

Guztira 3.000 pentsiodun batu dira Gasteizko mobilizaziora // Utzitakoa

Eusko Legebiltzarrerako hauteskundeen atarian, Euskal Herriko Pentsiodunen Mugimenduak (EHPM) manifestazioa egin du gaur Gasteizen.

“Apirilaren 21ean hauteskundeak izango dira EAEn. EHPMk zuzenean interpelatuko diegu aurkezten diren alderdi politikoei, 1080 euroko gutxieneko pentsioa berehala ezartzeko konpromisoa hartzeko; genero-arrakalarekin amaitzeko; eta osasun-zerbitzu publikoak eta mendekotasunaren eta zaintzaren arretarako zerbitzu publikoak hobetzeko neurri eraginkorrak hartzeko”, diote.

Datuak datu, 2024ko martxoan EAEn 165.000 pentsiodunek eta Nafarroan 50.000k 1080tik beherako pentsioak dituztela adierazi dute EHPMtik, “horietatik 110.000 EAEn eta 32.000 Nafarroan emakumeak”.

“Egia esan, EAEko emakume pentsiodunen % 44k eta Nafarroan % 52,7k 1080tik beherako pentsioak kobratzen dituzte. Esan daiteke 2023ko martxoko zenbakiak oraingoko berdinak zirela: ez da ezer aurreratu”, diote.

Mozioak udaletan

Euskal Herriko Pentsiodunen Mugimenduak mozioak aurkeztu ditu azken urteetan udaletxeetan eta Batzar Nagusietan, gutxieneko 1080 euroko pentsioaren alde.

Hego Uribeko Pentsiodunen Mugimendutik GEURIAra bidali diguten argazkietako bat // Utzitakoa

“Gaur gaurkoz 179 udalek eta Gipuzkoako Batzar Nagusiek gure eskaria babestu dute; Arabako eta Bizkaiko Batzar Nagusien eta beste udal batzuen jarrera falta da, baina EAEko eta Nafarroako udal erakundeen erdiak baino gehiagotan gure mozioa onartu izana ospatzen dugu”, diote.

Hego Uribe eskualdeari dagokionez, Arrigorriagan, Etxebarrin, Galdakaon, Zaratamon eta Zeberion mozioa onartu zuten, eta Basaurin eta Ugaon, ordea, ez.

3.000 pentsiodun

Guztira 3.000 pentsiodun batu dira mobilizaziora, tartean Hego Uribeko dozenaka lagun ere.

“Hego Uribetik autobus bat eta auto bat bertaratu da Gasteizera: Galdakaotik, Ugaotik eta Basauritik. Eskualdetik guztira 60 lagun etorri gara”, adierazi diote GEURIAri.

Pentsio duinen aldeko borroka 2018ko urtarrilean hasi zuen EHPMk. Ordutik astelehenero batzen dira udaletxe aurreetan.

“Duela sei urte baino gehiagotik astelehenetik astelehenera egiten ari garen mobilizazioekin batera, babes horiek borrokan jarraitzera bultzatzen gaituzte. Bizi-baldintzen narriadura eta pentsiodun nagusien artean pobrezia-mailak handitzea ez da murrizten”, diote.

Hauek Hego Uribeko Pentsiodunen Mugimendutik GEURIAra bidali dituzten argazkiak:

Osorik irakurri

☉ Hego Uribe

‘Azpikontratak jopuntuan’ mahai-ingurua antolatu du Hego Uribeko Kontseilu Sozialistak Galdakaon

|

Hego Uribeko Kontseilu Sozialistak agerraldia egin du Galdakao-Usansolo Ospitalaren aurrean, Osakidetzako egoera salatzeko // Hego Uribeko Kontseilu Sozialista

Osakidetzako egoera salatu du Hego Uribeko Kontseilu Sozialistak. “Azken urteetako krisi kapitalistaren adierazle zuzenak diren osasungintza publikoaren kolapsoa eta azpikontratetan gero eta ohikoagoak diren lan baldintza kaxkarrak salatzen ditugu”, diote.

“Izan ere, auzi honi dagokionez gure inguruan azken hilabeteetan eman diren aldaketak nahiko nabariak dira, San Migeleko pediatriako murrizketak, ospitaleko zerbitzu ezberdinen pribatizazioa, anbulantzietako langileen greba luzeak, ospitaleko biltegietako langileen egoera…”, salatu dute.

Ildo horretan, ‘Langile boterea eraiki. Badago alternatiba’ lemapean zenbait ekintza antolatu dituzte apirilean: ‘Azpikontratak jopuntuan’ mahai-ingurua Galdakaon apirilaren 18an eta maiatzaren 1era begira herri batzarrak deitu dituzte Galdakaon eta Basaurin.

“Euskal Herriko Kontseilu Sozilistatik instituzioen alternatiba faltsuetatik haratago alternatiba erreala badagoela zabaldu nahi dugu, langile boterearen eraikuntza. Hala nola, langileriaren bizi baldintzen hobekuntza lortzeko, iruzur instituzionalen aurrean, langileriaren independentzia politikoa oinarri izanda, gure interesen alde mobilizatzen eta antolatzen jarraitzea ezinbestekoa da”, diote.

Egitaraua

Apirilak 18, osteguna
Mahai-ingurua: ‘Azpikontratak jopuntuan’. Anbulantziak Borrokan eta Bilbo Handiko borrokak CGTko kide baten eskutik
18:00 Torrezabal Kultur Etxea (Galdakao)

Apirilak 26, ostirala
Herri Batzarrak: ‘Maiatzaren 1ean mobilizatzeko beharraz’
18:30 Torrezabal Kultur Etxea (Galdakao)
18:30 Pozokoetxe Kultur Etxea (Basauri)
Luntxa egongo da

Osorik irakurri