Sareak

☉ Ugao

Ernesto Fernández (UB5): “Dramedia bat sortu dugu Ugaon: ukitu barregarriekin sortutako drama”

Covid-19ak UB5 Teatroko Verdades a tiempo, mentiras a dos tiempos obra Ugaoko Ostiralero Antzerkiarekin Bat programatik atera du, datorren urterako atzeratuz

|

Ernesto Fernández / Geuria

[2020ko azaroan 26an paperean argitaratuko elkarrizketa] UB5 teatro taldeak Ugaoko Ostiralero Antzerkiarekin Bat ekimenean eskaini behar zuen ikuskizuna atzeratu behar izan dute koronabirusak kutsatu dituen pertsona kopuruak gora egin izanagatik. Ernesto Fernandez idazkari eta aktorearen ustetan, ‘Verdades a tiempo, mentiras a dos tiempos’ datorren urtearen hasieran oholtzaratuko dute Ugaon. Horri buruz eta antzerki taldearen bilakaeraz berba egin dugu Ugaoko aktorearekin.

Zer deritzozue Ugaoko Ostiralero Antzerkiarekin Bat antzerki hilabeteari? Zoragarria da. Aurtengoa 17. edizioa dugu eta gu betidanik izan gara bertan: momentura arte publiko bezala egon gara eta aurten Ostiralero Antzerkiarekin Bat ekimenean oholtzara igo behar ginen iazko antzezlan berbera eskainiz. Azaroan bertan estreinatu genuen lana eta harrera ona izan zuen, baina koronabirusa heldu zen eta programatuta geneuzkan data guztiak bertan behera utzi behar izan genituen.

Zer dela eta ez duzue lana antzeztuko ekimenean? Entseguengatik. Teatroko aktore batek infekzio-arriskuan dagoen pertsona batekin egiten du lan eta gainera bikotekideak osasun arazoak izan ditu eta gure artean elkartzeko beldur zen. Azken batean, proba saioak lokal itxi batean egiten ditugu eta infekziodunen kopurua gora egiten ari dela ikusita… tentuz jokatzea erabaki dugu. Badakigu Udala behar bezala jokatzen ari dela segurtasun neurri guztiak jarraituz: maskararen derrigorrezko erabilera, gutxienezko distantziak mantentzea, eskuak gelarekin garbitzea… UB5 Teatroaren barne erabakia izan da, beldurra daukagulako. Zapore garratza utzi digu erabaki hau hartzeak.

Noiz uste duzue izango dela posible antzezlana oholtzan ikustea? Espero dugu urtarrilean edo otsailean lana publiko aurrean antzeztea. Hala ere, Udalari erraztasun guztiak ematearen alde azaldu gara: gurea Ostiralero Antzerkiarekin Bateko azken antzezlana zen eta ordezkorik behar izatekotan, Udalari gure laguntza eskaintzeko prest gaude, talde ugari ezagutzen ditugulako.

Herriko ekimenetan ibilitakoak zarete. Lehen Ugaoko jaietako antzerki-lana egiten genuen urtero. Antzerki hori gauzatzen denbora asko ematen dugu eta ardura izugarria da guretzat eta urtean formatu berriko ordu biko antzezlana egin izan dugu eta horrek lan asko ematen du. Horregatik, gure jarduerari norabide aldaketa ematea erabaki genuen, bestelako proiektuetan parte hartuz.

Ugaoko Bidea antzerki elkartea eta izen bereko antzerki taldea izatetik UB5 Teatro izatera igaro zarete. ‘Gure Hiribilduaren Fundazioa’ antzezlana egitea eskatu zigutenean oraindik ez zegoen antzerki talderik ezta elkarterik ere. Dagoeneko emakumeen Ibilgura elkartea zegoen soilik. 2010eko azaroan Hiribilduaren antzezlan izugarria egin genuen eta 2011n Ugaoko Bidea sortu genuen antzerki taldeko 20 lagun inguruk. Denborak aurrera egin ahala jaietarako antzezlanak prestatu genituen, kaleko antzerkia… Urteak pasa dira 2011tik eta pixkanaka-pixkanaka eta antzerki taldeko partaideen kopurua nabarmenki gutxitu da. Duela hiru urte lau partaide eta zuzendaria geunden taldean, eta taldea eraberritzea erabaki genuen UB5 deituz. UB Ugaoko Bidea-tik dator, eta 5 taldekide kopuruagatik.

Izen berriarekin batera eskaintza ere aldatu al duzue? Hasiera bateko teatroaren antzezlanak egin ditugu jaietan, baina formatu arinagora salto egitea erabaki genuen, eta jaietako antzerkia egiteari utzi eta jaialdietako formatuetara jo genuen. Horrez gain, Ondarearen Europako Jardunaldiak bezalako proiektuetan parte hartu dugu eta baita gertuko herrietako egitasmoetan ere.

Ondarearen Europako Jardunaldiak aipatu dituzu. Gustura ibili ahal zinen Don Florencio antzezten Jane Jauregian? Oso arin prestatu genuen antzezlana izan zen eta egia esateko esperientzia oso polita izan zen. Antolatu genituen zortzi saioak bete genituen eta jendeari gustatu zitzaiola dirudi. Hasiera batera scape room klasikoa egitea pentsatu genuen, baina egoera berriak Jane Jauregiko barrualdea eta baita kanpoaldea ere erabiltzera behartu gintuen, eta toki batetik bestera Ugaoko istorioa kontatu nien bisitariei.

Antzezlanak propioak dira? Jose Luis Urrutia zuzendariak betidanik idatzi dizkigu antzezlanen gidoi guztiak, eta aktore bakoitzari pertsonaia berezi bat prestatzen dio beti. Horrela egin dugu lan Ugao Bidearen hasieratik UB5 Teatro taldera arte. Gidoiak sortu eta erregistratu ondoren antzeztu egiten ditugu.

Zer nolako eragina dauka antzerkiak jendearengan? Arazoetatik aldentzeko tresna ezin hobea dugu antzerkia, deskonektatzeko eta ondo pasatzeko baliabidea.

‘Verdades a tiempo, mentiras a dos tiempos’ antzezlana, ordea, ez dugu komedia bat. Obra berezia dugu honako hau, bi erdietan banatutako antzezlana. Gai nagusia garaiz ez esandako egiak sor dezakeen kaltea dugu. Egia behar den momentuan esan beharrean, arrazoi batengatik gezurrekin ezkutatu ohi dugu, gero eta handiagoa egiten den pilota bat sortuz.

Egungo gizartearen kritika izan daiteke? Bai, noski. Askotan, gezurrak esan ohi ditugu gainontzeko pertsonei mesede egiten diegula uste dugulako, baina gezur horrek ez dauka kontrolik azkenean. Jose Luisek gaur egungo gizartearekin lotura zuen obra berezia sortu nahi zuen, eta egoera ezberdinak planteatzen dituen antzezlan honetan hainbat problema planteatu zituen zuzendariak. Nolabait, publikoari erakutsi nahi zaio beste modu batean jokatuz, irteera errazagoa izango lukeela arazoak.

Umorea teatro taldearen ardatza dela dio webguneak, baina azken antzezlanak drama dirudi. Beste erregistro bat landu dugu azken honetan. Testuen irakurketak egin genituenean umoretik aldentzeko beldurra izan genuen eta ez genekien zer nolako harrera izan zezakeen. Lan sakonagoa izan arren, umore puntuak egon ziren eta jendeari asko gustatu zitzaizkion. Dramedia bat sortu dugu, ukitu barregarriekin eraikitako drama. Emaitza modura, jendea barrez negar egiten ikusi genuen publiko artean, azken batean emozio oso ezberdinak konbinatu ditugulako. Esaten da barrea eragitea negarra eragitea baino zailagoa dela eta jendea behar bezala barre egitera bultzatzen baduzu, zeurea dela publikoa.

UB5 teatroak, gainera obra guztiak YouTubeko kanalera igo ditu. Obra guztiak grabatu egiten ditugu, etorkizunean hobetu daitezken mugimenduak aztertzeko. Horrez gainera, itxialdian zehar bideo horiek guztiak kanalera igo ditut, astean bi aldiz.

☉ Ugao

Udaberriko Hitzaldi Zikloa antolatu du Ugaoko Dorretxea Herriko Tabernak

Maiatzaren amaieran eta ekainaren hasieran hitzaldi bi eta LAB sindikatuaren dokumental bat proiektatuko dute

|

LABeko manifestari bat, 2022an, Basaurin // Geuria

Ugaoko Dorretxea Herriko Tabernak hitzaldi bi eta dokumental baten proiekzioa antolatu ditu Udaberriko Hitzaldi Zikloan.

Maiatzaren 24an, gatazka politikoaren ondorioz izan eta diren preso eta erbesteratu ohiei egungo gizartean duintasunez bizi eta egokitu daitezen behar duten laguntza eskaintzea helburua duen hitzaldia eskainiko du Ugaoko Harrera elkarteak. Hitzordua 18:30ean izango da.

Maiatzaren 30ean, 18:30ean, LAB Zabaltzen izeneko dokumentalaren proiekzioa antolatu dute sindikatuaren 50. urteurrena ospatzeko. Amaieran solasaldia egingo dute dorretxean bertan.

Azken jarduera, hitzaldia, ekainaren 7an antolatu dute, 18:00etan. “Jauzi Ekosozialeko eta Goiener Energia Kooperatibako kideak dorretxean iango ditugu aldaketa ekosozialaren gakoak eta erronkak aztertzeko, azaldu dute Ugaoko Dorretxeatik.”

Osorik irakurri

☉ Ugao

Ugaoko Mirabatxo, Udaludo eta Umetxoen Gelan izena emateko epea zabaldu dute

Ugaoko Udalak maiatzaren 31ra arte zabaldu du epea haurrak udako jardueretan apuntatu ahal izateko

|

Haurra, udako kolonietan // Geuria

Ugaoko Udalak maiatzaren 31ra arte zabaldu du epea haurrak Uda Mirabatxon, Udaludon eta Umetxoen Gelan apuntatzeko.

Uda Mirabatxo 2013 eta 2016 urteen artean jaiotako gaztetxoei zuzenduta dago eta ekainaren 24tik uztailaren 19ra antolatu dute aurten, 10:30etik 13:30ak arte. Goiztiarrak 08:00etatik edo 09:00etatik sartu ahalko dira. Aurten ere igerilekura irteerak, zientzia saioak, kirola oro har, Ugao Chef eta Kids Arts bezalako saioak izango dituzte umeek, eta baita animaliak ikusteko, naturarekin zerikusia duten jarduerak praktikatzeko eta astronomiaren inguruko ekintzak lantzeko.

Udaludo ere ekainaren 24tik uztailaren 19ra arte antolatu dute eta 2017 eta 2020 urteen artean jaiotako haurrek hartuko dute parte bertan aurten, 10:30etik 13:30ak arte. Zerbitzu honek ere goiztiarren zerbitzua izango du eta umeak 08:00etan eta 09:00etan sartu ahalko dira klasera.

Umetxoen Gela zerbitzu berezia 2021ean jaiotako haurrei zuzenduta dago eta ekainaren 24tik uztailaren 19ra antolatu dute, 10:15etatik 13:15ak arte.

Erreserbak egiteko

Izen emateak egiteko zein informazio gehiago jasotzeko aurrez aurre egin dezakete interesdunek Ugaoko Jane jauregiko beheko solairuan, edo 946 480 704 telefono zenbakira deituz zein ugao-miraballes-museo@ortzadar.es helbide elektronikora mezua bidaliz.

Ugaoko Udaleko ordezkariek azaldu dute ekainaren 4an izena eman dutenen zerrenda eta itxaron-zerrenda argitaratuko direla Jane Jauregian: “Egun honetatik aurrera eta ekainaren 14ra arte, izena eman dutenek jarduera ordaindu ahal izango dute”.

Osorik irakurri

☉ Ugao

Bideoa / Sute batek zazpi auto kaltetu ditu Ugaoko Gernika enparantzako aparkalekuan

03:30ak aldera, Ugaoko Gernika enparantzako txandakako aparkalekuko auto batek su hartu du eta kalteak eragin dizkie aparkalekuan zeuden beste sei ibilgailuri

|

Kiskalitako autoak, txandakako aparkalekuan // Utzitakoak

Gaur goizean, 03:30ean, Ugaon gertatutako sute baten abisua jaso dute larrialdi zerbitzuek eta Basauriko suhiltzaileak gerturatu dira bertara. Segurtasun sailak azaldu bezala, Ugaoko Gernika enparantzako txandakako aparkalekuko auto batek su hartu du eta kalteak eragin dizkie aparkalekuan zeuden beste sei ibilgailuri. Segurtasun Saileko arduradunen arabera ez da zauriturik egon. Ertzaintza ezbeharraren arrazoiak ikertzen ari da.

Aste honetako bigarren sutea da Ugaon honako hau. Joan den maiatzaren 14ko goizaldean Udiarraga okindegiko lantegiak su hartu zuen Usilako industrialgunean. San Migelen, gainera, furgoneta batek su hartu zuen Atxukarro industrialgunetik gertu eta bertan irudiak jaso zituen GEURIA komunikabideak.

Autoak, suhiltzaileen aparrarekin, aparkalekuan // Utzitakoak

Osorik irakurri

☉ Ugao

Ugaoko jaiak iragarriko dituen kartel lehiaketak marrazkigintzarako materiala eta 500 euro banatuko ditu

Ugaoko aurtengo jaiak irailaren 6tik 9ra izango dira eta kartelak ekainaren 25era arte aurkeztu ahalko dituzte parte-hartzaileek

|

Ugaoko jaietako txupinazo eguna, iaz // Geuria

Ugaoko aurtengo jaiak irailaren 6tik 9ra izango dira eta Udalak Udiarragako Ama birjinaren omenezko jaiak iragartzeko kartel lehiaketan parte hartzeko epea zabaldu du.

Lanak aurkezteko azken eguna ekainaren 25a izango da eta kategoria bitan parte hartu ahalko dute interesdunek: A mailan (sei eta 14 urte bitartekoena) eta B mailan (15 urtetik gorakoak). A mailako saria marrazkigintzarako materiala izango da eta B mailakoa 500 euro.

Udal ordezkariek azaldu dute kartelak “berdintasunaren aldeko planteamendua” islatu beharko duela eta gaia librea izango dela: “Hala ere Ugaoko jaietako berezitasunen bat, ohikoa den zerbait, agertu beharko da proposamenean”.

Lanak Jane jauregian aurkeztu ahalko dira 10:00etatik 13:00ak arte ekainaren 25era arte. Ugaoko Jai Batzordeko kideek osatutako epaimahaiak uztailaren 5ean iragarriko ditu kategoria bakoitzeko irabazleak.

Lehiaketako oinarriak eta eskuorria Udalaren webgunean topa ditzakete interesdunek.

Osorik irakurri

☉ Ugao

Txapelfest inkestak Ugaoko gazteen beharrak aztertuko ditu aisialdiko jarduerak indartzeko

15 eta 35 urte bitarteko gazteek maiatzaren 31ra arte parte hartu ahalko dute Ugaoko Udalak martxan jarri berri duen prozesu parte-hartzailean

|

Leire López, Ekaitz Mentxaka, Urtzi eta Maite Olabarri // Geuria

Ugaoko Udala 15 eta 30 urte bitarteko gazteengana hurbildu nahi da Ugaotar gazteen beharrak eta kezkak ezagutzeko eta, horrela, kolektibo horri zuzendutako aisialdi-jarduerak indartu ahal izateko. Horretarako Txapelfest izeneko inkesta “informal eta dibertigarria” abiarazi du, “gazteentzako aisialdiko eta programazio erakargarriagoa diseinatzeko”.

Gaur egun 15 eta 30 urte bitarteko 640 biztanle bizi dira Ugaon, biztanleriaren % 15,44. “Proiektu honek aukera bikaina eskaintzen digu beraiengana hurbiltzeko, maila berean hitz egin eta entzuteko eta elkarrekin programazio erakargarriagoa eraikitzeko, haien gustuen arabera”, azaldu du Ekaitz Mentxaka Ugaoko alkateak ekimenaren prentsaurrekon. “Haien interesak ezagutzeaz gain, ekimen honek gazteekin interakziorako espazio berriak sortzeko aukera emango digu”.

Ekaitz Mentxaka: “Ekimen honek gazteekin interakziorako espazio berriak sortzeko aukera emango digu”

Gazteen bila

Hurrenketa hori gauzatu ahal izateko, Ugaoko gazteek Udalak berak diseinatutako Txapelfest izeneko inkestan parte hartu ahalko dute maiatzaren 31ra arte webgune honen bidez. Ana Guinea kultura teknikariak azaldu lez, “inkesta nahiko dibertigarria” sortu dutela azaldu die prentsaurrekora hurbildu diren komunikabideei. “Betetzeko erraza izango da eta herrian zehar ipiniko dituzten karteletako QR kodeak eskaneatuz hartu dezakete parte gazteek bertan”.

Izenik gabeko inkesta hau, kanpaina osoa dinamizatzen lagunduko duten, gazteen parte-hartzea bultzatuko duten eta, aldi berean, gazte-politika berriak abian jartzeko informazio osagarria jasoko duten kontratatutako bi gazterekin osatuko da. Langile horiek Ugaoko hainbat gunetan izango dira herriko gazteek inkestan parte hartzera animatzen: institutuan, Gaztelekuan, Gazteinfon, Kultur Etxean (Jane Jauregian) eta herriko eragileen hainbat egoitzatan .

Proiektu honekin batera kanpaina bat sortuko du Ugaoko Udalak eta parte hartzeko prozesu osoaren estrategia errespetatuko du: harritzea, erronka jotzea eta, batez ere, gazteekin konektatzea.

“Inkesta amaitzean, parte-hartzaileek zein ‘txapelfest maila’ eskuratu duten mezua jasoko dute plataformatik”, azaldu du Leire López Gazteria saileko teknikariak. “Horrela feedbacka sortuko da Udalaren eta gazteen artean”

“Legegintzaldi honen helburuen artean gazte politikari bultzada ematea da eta horixe da prozesu honen xede nagusia”, azaldu du Mentxakak.

Osorik irakurri