→Ugao

Ibilgailu astunek zerga ordainduko dute bihartik aurrera Hego Uribeko sei herritako errepidetan

Bihartik aurrera, Bizkaiko Foru Aldundiak N-240 eta BI-625 errepideetatik zirkulatzen duten ibilgailu astunei kobratzeko sistema jarriko du martxan

Lapatzako arkua BI-625ean // Maps

Bizkaiko Foru Aldundiak N-240 eta BI-625 errepideetatik zirkulatzen duten ibilgailu astunei kobratzeko sistema jarriko du martxan. Bihartik aurrera (urtarrilak 25), 3.500 kilotik gora pisatzen duten garraiobideei ezarriko diete zerga Laudiotik Basaurira eta El Gallotik Ubideara doazen bi bideetatik igarotzeko.

Hego Uriben, sei herritan jarri dituzte ordainketa puntuak: Ugaon, Zaratamon, Basaurin, Galdakaon, Arrigorriagan eta Usansolon. Horietako bakoitzean, Aldundiak free flow motako hainbat egitura eraiki ditu bide ertzetan, kobrantza sistema automatikoa ahalbidetzeko. Hain zuzen, sistemak arku motako estrukturaz daude osatuta, bertatik zirkulatzen duten ibilgailuen matrikula irakurri eta hainbat datu biltzeko (igarotzeko orduak zein egindako kilometroak) helburuarekin.

Gerora, automatikoki, ordainketaren faktura helarazten diete kontrol-puntuetatik pasatzen diren ibilgailuei: zenbatekoa ezberdina, igarotzen diren arkuaren arabera. Eta Hego Uriben Foru Aldundiak azaldu duenez,  honakoak izango dira aplikatu dituzten zergak:

– Bilbao BI-625 errepidean (Laudiotik Basaurira): guztira 8 arku free flow egongo dira, eta honakoak, Hego Uriben:
– Ugaon (ordainketa bi norazkoetan aplikatuko da: Arabarantzakoan zein Bilborantzakoan): 1,01 eurokoa izango da I motako ibilgailu astunentzako, eta 1,13 eurokoa, II motakoentzako
– Zaratamon, bi noranzkoetan: 0,64 eta 0,72
– Lapatzan, Bilboranzko noranzkoan: 0,40 eta 0,44
– Basaurin, Arabarako noranzkoan: 0,14 eta 0,15
– Irubiden, bi noranzkoetan: 0,36 eta 0,40
– Arrigorriagan, Arabarako noranzkoan: 0,26 eta 0,29

– Barazar N-240 errepidean (El Gallotik Ubideara): 9 arku free flow egongo dira, eta honakoak, Hego Uriben
– Usansolon, bi noranzkoetan: 0,43 eta 0,48

Errepideen kontserbaziorako

Neurri hau errepide sarearen “egoera optimoa” lortzeko pausoa dela adierazi du Foru Aldundiak. Ordainketa sistemarekin lortutako funtsek bideen mantenurako, kontserbaziorako eta ustiaketarako inbertsioak ziurtatuko dituzte, eta aldi berean, trafikoaren segurtasuna bultzatu eta istripuen intzidentzia txikitzeko bide izango da sistema.

Bestalde, ingurumenari lotuta, CO2 emisioak murrizteko bidea ere izango da zerga. Izan ere, gutxien kutsatzen duten ibilgailu astunei hobariak eta deskontuak ezarriko dizkiete, hala nola % 25eko beherapena elektrikoei, hibridoei eta gasarekin dabiltzanei zein 0 etiketa edo ECO sailkapena dutenei; % 20koa, Euro 6 direnei; eta % 15ekoa, Euro 5ei. Gainera, errepidea asko erabiltzen dutenentzako ere deskontuak egongo dira, garraiolariei laguntze aldera.

Gora

Geuria Laguntzaileak Geuria Laguntzaileak