→Ugao

Biribilgunea eta 15 aparkaleku berri egingo dituzte El Jaro kiroldegian

Udan iragarritako atzerapenaren ondoren, joan den astean abiatu dituzte Ugaoko El Jaro kiroldegiko aparkalekua handitu eta irisgarritasuna hobetzeko obrak. Autoentzako 15 aparkaleku gehiago eraikiko dituzte inguruan dagoen lursailean. Era berean, bide segurtasuna hobetzeko asmoz, erreia bikoizteko obrak egingo dituzte.

El Jaro kiroldegiko aparkalekuko obrak // Ugaoko Udala

Udan iragarritako atzerapenaren ondoren, joan den astean abiatu dituzte Ugaoko El Jaro kiroldegiko aparkalekua handitu eta irisgarritasuna hobetzeko obrak. Udalak 113.180 euro inbertituko ditu (BEZa barne) zentroaren kanpoaldeko parking eremua eta errepidea egokitzeko, eta bi hilabete barru bukatuko dutela aurreikusi dute.

Autoentzako 15 aparkaleku gehiago eraikiko dituzte El Jaro inguruan dagoen lursailean. Era berean, bide segurtasuna hobetzeko asmoz, erreia bikoizteko obrak egingo dituzte: biribilgune txiki bat eraikiko dute ibilgailuek noranzkoa aldatu eta BI-3524 foru errepidera “ikuspen eta segurtasun baldintza onetan” sartzeko aukera izan dezaten.

Ekaitz Mentxaka alkateak nabarmendu duenez, Udalarentzat “lehentasuna” izan da kiroldegiko obrak ahalik eta azkarren burutzea; izan ere, “El Jaro oinezkoen eta autoen joan-etorri handiko gunea da, batez ere ordu jakinetan”. Egingo dituzten obrekin “hobekuntza handia” nabarituko dute bai gidatzen doazenek, baita ibiliz hurbiltzen direnek ere.

El Jaro kiroldegiko aparkalekua 2021ean // Geuria

Uztaileko atzerapena

Udalak uda baino lehen hasi nahi zituen aparkalekua handitzeko obrak. Halere, uztailaren 26an egindako osoko bilkuran iragarri zuten atzerapenak egongo zirela, adjudikazioa egin ostean, lehiaketa publikoa irabazi zuen enpresak ez zuelako kontratua bere horretan bete nahi. Hasieran onartutako prezioa baino diru gehiago eskatu zuenez eraikuntza burutzeko, azkenean, Udalak lehiaketa publikora aurkeztu zen bigarren enpresari eskaini behar izan zion obra.

Gora

Geuria Laguntzaileak Geuria Laguntzaileak