Urtero bezala, eta abenduaren bueltan, Ugaoko Udalak “Ugaobono” kanpaina jarri du martxan herriko merkatariekin batera, udalerriko merkataritza-establezimenduetan kontsumoa sustatzeko asmoz. Guztira 1600 bono jarri dituzte herritarren eskura, eta udalak 15.000 € bideratu ditu kanpaina honetara.

Bonuak Udaletxean daude eskuragarri abenduaren 4tik 31ra arte (edo bonuak amaitu arte), udaletxeko lehen solairuan, astelehenetik ostiralera 7:30etik 14:00etara, eta astelehenetan baita 17:00etatik 19:00etara ere.

18 urtetik gorako ugaotar bakoitzak NAN bakoitzeko gehienez 2 bonu erosi ahal izango ditu, gehienez 2 NAN aurkeztu ahal izango dituelarik, eta 2023ko abenduaren 4tik abenduaren 31ra arte erabili ahal izango ditu. Epe hori igarotakoan, ordainbide gisa duten balioa galduko dute.

Bi bonu mota egongo dira:

• 30 euroko balioa duten 1.250 bonu, bonu bakoitza 20 euroko
  eskuratze-kostuarekin.
• Eta beste 350 bonu, 15 euroko balioarekin, bonu bakoitzeko 10
  euroko eskuratze-kostuarekin.

Beraz, bonuak erosten dituzten pertsonek 20 euro edo 10 euro ordainduko dituzte bonu bakoitzeko, eta, ordainetan, 30 euroko edo 15 euroko gastua egin ahal izango dute, hurrenez hurren, kanpaina honi atxikitako edozein establezimendutan, erosketetan %33 aurreztuz eta, aldi berean, tokiko
merkatariei lagunduz haien salmentak bultzatuz.

Bonuak “UgaoBono 2023” kanpainari atxikitako establezimenduetan (kanpainaren identifikazio-kartela izango dute erakusleihoan) erabili ahal izango dira.

Abba, Senegalgo arrantzale familia batean jaiotako haurra da. Berak ongi daki Maam Kumba kantuan hasten denean bere bihotzean bizi den Arrain Argitsua mila kolorez piztu eta, herritarrek arrantzatu dezaten, arrainak erakartzen dituela Arrainen Etxera, horrela deitzen baitote haiek itsasoari. Baina zoritxarrez itsasontzi handiek haien bizimodua eraldatu dute, Maam Kumbaren bihotzeko arraina sare artean arrapatuta, Maam Kumba mutu gelditu da, isildu da jakituriaren kantua, mutu geratu da herria, arrainik gabe Arrainen Etxea. Eta ondorioz Abba ezustekoz beteriko bidaia luzean murgilduko da.

Hori da datorren abenduaren 10ean, 12:30ean Jane jauregian eskainiko duten “Gure kanoa” antzezlanaren sinopsia. Migrazioa, hemisferio ezberdinetako pertsonen arteko harremana eta lurraren zaintza bezalako gaien inguruan arituko dira txotxongilo maitagarriak.

Antzezlan hau Ugaoko Udalak familientzako antolatu duen antzerki zikloaren barruan kokatzen da.

Urtero bezala Ugaoko umeek Hiri Kolonietaz gozatzeko aukera izango dute, abenduaren 26tik urtarrilaren 5era arte. 2013. eta 2019. urteen artean jaitako umeei zuzenduta dago, eta ordutegia 10:30etatik 13:30etara izango da.

Ordutegi horrek badauka ñabardura bat, baina, eta da goiztiarrenek 8:00etan eta 9:00etan joateko aukera izango dutela.

Leku mugatuak dira, eta izen emateari buruzko informazio guztia jane Jauregiko beheko solairuan emango dute.

Ugaoko Greba Feminista Orokorra aldarrikapen eguna izan da Ugaon. Eguraldiak askorik lagundu ez duen arren, gogotsu ekin zioten grebari gauerdi partean kalejira zaratatsuarekin.

Dagoeneko egun argiz, hainbat izan dira antolatu dituzten ekintzak, hala-nola kalejira zaratatsua, pikete solidarioa, kafea eta salda, manifestazioa eguerdi partean, eta bukatzeko bazkari autogestionatua. Horren ondoren, eguneko momenturik hunkigarrienetakoa heldu da, parte hartzaileek bizipenak konpartitzeko tartea izan baitute.

16:00etan Bilborako bidea hartu dute, bertako manifestazioarekin bat egiteko.

Hamarkada bat bete da Ugaoko Udala aurrekontuak modu parte hartzailean lantzen hasi zenetik. 2024koei begira ere, dagoeneko hasi dira bidea urratzen. Lehen pauso moduan, udalak galdetegi bat zabaldu du herriko etxe guztietara, 2300 ale, hain zuzen ere, eta bertan ekarpenak egiteko argibideak daude. Modu berean, herriko hainbat lekutan ere galdetegiak jaso, bete eta utzi daitezke: Jane Jauregian, Gazteinfo Gazte Informazio gunean eta Kiroldegian, betiere abenduaren 4a baino lehen. Telematikoki ere proposamenak jasoko dira, imprimaki digital hau betez.

Aurrez aurreko bilerak

Modu berean, udal gobernua aurrez aurreko bilerekin hasi da, aurrekontuaren berri eman eta sortu daitezkeen zalantzak argitze aldera. Ekaitz Mentxaka alkateak gidatzen ditu bilerak, lehena azaroaren 21ean egin zuten, eta bigarrena 27an, 08:30etik 14:00etara edo 17:00etatik 19:00etara. Asmoa da bai bilera hauetan eta bai beste bideetatik jasotako ekarpen eta iradokizunak udal aurrekontuan txertatzea, betiere teknikoki eta ekonomikoki bideragarriak eta udal eskumeneko proposamenak badira. Egindako lanketa guztiaren emaitza eta aurrekontu proposamena bera abenduaren 11an aurkeztuko lukete udal arduradunek, Jane Jauregiko atikoan.

Bukatzeko, udal ordezkariek zehaztu dute prozesu hau abian jarri zenetik, “toki-administrazioak hainbat proiektu eta eskaera gauzatu dituela, hala-nola, gaur egun egiten ari diren kiroldegiko estalkia berritzeko lanak, San Bartolomeko arkupeak hobetzea eta ibaiaren ingurua udalerriaren erdigunearekin lotzea”.