Hego Uribeko erromeriak agur esango die ordu txikietako kontzertuei eta azken kontzertuaren data eta lekua iragarri dute: 2026ko urtarrilaren 24a, Bilborock aretoan.

“Hasieratik argi geneukan zein zen gure helburua: jendea dantzan, kantuan eta irribarrez jartzea”, azaldu dute erromeriatik. “Eta zuei esker, amets hori egia bihurtu da”.

‘Azken Erromeria Dantza’ izeneko azken bira hau joan den urriaren hasi zuten Izarran (Araba) eta harrezgeroztik Agurainetik, Bagatzatik, MallabiatikPortugaleteko EZK-FESTetik eta Zollotik igaro dira.

Ainize Perez Ipiña (Ugao, 1997) Beranduegiko abeslariarekin berba egiteko aukera izan zuen GEURIAk joan den otsailean, eta zazpi urteko ibilbidean denbora asko inbertitu dutela azaldu zuen: “Nik oso argi neukan aurtengoa nire azkenengo urtea izango zela eta asko hitz egin eta asko pentsatu eta gero, erabaki dugu itxiera on bat ematea merezi duela Beranduegik”.

Ainize, Ugaon // Geuria

Proiektua martxan jartzeak lan asko eman zituen baina jo eta su ibili ziren, erromeriari forma emateko. Hasierako kontzertuetan urduritasuna nagusi zen eta “edozein baldintzetan” jo zutela aitortu zuen Ainizek: “Hau guztia apur bat aldatu da: orain ziurtasun handiagoa dugu eszenatoki gainean. Urduritasuna badago, baina lehenengo abestiko lehenengo akordeak entzun eta desagertzen doa. Hasieran gaztetxoak ginen eta hori ere nabaritzen da, urteekin esperientzia handituz joan gara. Aitortu behar dut nostalgia puntu batekin baina harrotasunez gogoratzen dudala Beranduegiren hasiera, niretzat egi bilakatutako ametsa izan da”.

Ainize Perez, Beranduegiko abeslaria: “Nik oso argi neukan aurtengoa nire azkenengo urtea izango zela eta asko hitz egin eta asko pentsatu eta gero, erabaki dugu itxiera on bat ematea merezi duela Beranduegik”

Jendea dantzan eta kantutan jartzeaz gainera, taldeak erronka handi bati eutsi zion hasieratik: euskara kontzertuetako ardatz nagusia izatea, “euskal musika eta Euskal Herriko artisten sorkuntzak herri desberdinetara eramatea, hain zuzen”.

Festekin gertatzen den modu berean, bideari amaiera emateko ordua dela laburbildu dute Beranduegi Erromeriatik eta isilik egingo ez dutela azpimarratu dute. Azken dantza horien artean Arrigorriagako Gaztetxearen zortzigarren urteurrenean eskaini beharreko kontzertua dago (Niere eta Tobogan taldeekin) eta azkena Bilboko Bilborock aretoan izango da.

“Eskerrik asko bihotzez, urte hauetan guztietan gure istorioaren parte izateagatik. Hau da agurra… Beti Beranduegi”.

Ugaoko Gazte Eguna datorren urteko apirilaren 11n antolatu dute.

Hala iragarri dute @ugaokogazteeguna instagram kontutik. Momentuz “data gordetzeko” eskatu diete herritarrei. Laster informazio gehiago iragarriko dute.

Udalerriko ekonomia biziberritzeko eta herritarren kontsumo-ohiturak indartzea helburu, Ugaoko Udalak 15.000 euro bideratuko ditu tokiko merkataritzara.

“Deialdi hau 2025eko eta 2026ko ekitaldietan egindako inbertsioei dagokie, eta eskaerak aurkezteko epea 2026ko abenduaren 31ra arte egongo da zabalik”, azaldu dute udal ordezkariek. Laguntzak jarduera ekonomikoa Ugaon garatzen duten negozioei bideratuko dizkiete “Ugaon establezimenduak, baita egoitza soziala beste udalerri batean dutenak ere, baldin eta beren jarduera hiribilduan garatzen badute”.

Laguntzak zuzenean eslaituko dituzte eta gehienez 2.000 eurokoa izango da bakoitza, egindako inbertsioaren % 50era artekoa. Diru horrekin era honetako gastuak estali ahalko dira:

– Establezimenduen hobekuntza orokorrera bideratutako inbertsioak: lokalaren
barruko eta kanpoko egokitzapen-lanak, oztopo arkitektonikoen ezabaketa
– Segurtasun-neurriak ezartzeko edo irisgarritasuna hobetzeko neurriak
– Makinaria, altzariak edo establezimenduaren erabilera esklusiboko ekipamendu
informatikoak (hala nola TPV-ak) erostea
– Kalitate arauak ezartzeko aholkularitza zerbitzuak eta salmenta-puntua
optimizatzeko jarduketak, hala nola argiztapena, erakusleihoak edo girotzea

Diru laguntzak abenduaren 31ra bitartean eskatu ditzakete interesdunek. Deialdia Bizkaiko Aldizkari Ofizialean argitaratu dute dagoeneko

Udalak emakumeak ahalduntzeko prozesu berri bat ipini du martxan, talde-tailer baten bidez.

Helburua emakumeak indartzea, eta elkarren arteko zaintza eta ikuspegi feminista eta komunitariotik laguntza sareak sortzea da. Tailerra abenduaren 10era antolatu dute Jane jauregian. “Prozesuan zehar funtsezko alderdiak landuko dira, hala nola autoestimua, adierazpen emozionala, muga pertsonalak, sormena, komunikazioa edo osasun intimoa, besteak beste”, azaldu dute udal ordezkariek.

“Dinamika parte-hartzaileen, mugimenduaren, hitzaren eta adierazpen artistikoen bidez, norbere burua ezagutzeko, indartzeko eta elkarrekin bide berriak proiektatzeko espazio bat eraikitzea da helburua”. Lehen saioak azaroaren 4an eta 5ean izan ziren eta ahalduntzearen gaiari heldu zioten.

Hurrengo hitzorduan, azaroaren 11n, zoru pelbikoaren osasunari begiratuko zaio. Udalak azpimarratu du tailerrak “modu kolektiboan indartu, esperientziak partekatu eta norbera errekonozitzeko proposamen integrala” eskaintzen duela.

Ugaoko Udalak aurrekontu parte-hartzaileen prozesua ipini du martxan beste urte batez eta herritarrei laguntza eskatu die 2026ko kontuak elkarrekin osatzeko.

“Urtero bezala, Udalak ugaotarrak gonbidatzen ditu beren ideiak eta proposamenak helaraztera, udalerriko bizi-kalitatea hobetuko duten benetako proiektu bihur daitezen”, azaldu dute udal ordezkariek.

Azken urteetan hainbat proiektu gauzatu dituzte udaletik herritarren parte hartzearen ondorioz: Leitokiko eskolako gimnasioko hobekuntza akustikoak, ibilgailuentzako kargagailu elektrikoak instalatzea, panel fotovoltaikoak jartzea, kiroldegia hobetzea eta energia-aholkularitzako zerbitzu bat abian jartzea…

Prozesuan parte hartzeko modu bi daude: aurrez aurre eta modu telematikoan: aurrez aurre egin nahi dutenek hurrengo egunetan  etxez etxe banatuko duten galdetegia Jane jauregian, Gazteinfo Gazteen Emantzipazio Zerbitzuan eta kiroldegian ipiniko dituzten postontzietan bota beharko dituzte. Interneten bidez egin nahi dutenek, ostera, esteka honetan prestatu duten formularioa bete beharko dute.

Beste urte batez, Ekaitz Mentxaka alkatearen bulegoaren ateak zabalik egongo dira herritarren proposamenak jaso edo prozesuaren inguruko zalantzak argitzeko. Bilerak azaroaren 17an eta 24an egingo dira 08:30etik 14:00ak bitartean eta 17:00etatik 19:00ak arte.

“Prozesuaren azken fasea amaitzeko, auzotarren proiektuak eta 2026ko udal- aurrekontuaren ildo nagusiak aurkeztuko dira, abenduaren 10ean, asteartea,
17:00etatik 19:00etara, Jane Jauregian”, azaldu dute Udaletik.