☉ Ugao
Itxaso Hernandez Ramos: «Kirolean euskaraz egiteko izan dudan zailtasun handiena hiztegiarena izan da»
Euskarak ugaotarraren bizitzaren hainbat arlotan izan duen tokiaz aritu gara, eta baita Euskaraldiko hamaikoakoan egoteak berarentzat duen garrantziaz ere
Itxaso Hernandez Ramos (Ugao, 1979) Euskaraldiako hamaikakoaren parte izango da Ugaon, ariketaren laugarren edizioan. Bere bizitzak buelta asko eman baditu ere eta hemen eta hor bizi izan bada ere, euskara zutabe oso garrantzitsua izan da betidanik. Denboraldi bitan Ugaoko futbol taldeko neskak entrenatu izan ditu eta gure hizkuntza erreminta berezia izan da entrenamendu saio zein asteburuetako partidetarako, bai kirolariekin komunikatu ahal izateko, bai aurkari erdaldunen aurka baliabide estrategiko modura erabiltzeko. Gainera, 17 urte daramatza Mediaset enpresan, kamera atzean lan egiten.
Euskaraldiaren testuinguruan, gure hizkuntzak bere bizitzan izan duen garrantziaz mintzatu gara berarekin eta bizi izandako esperientziak jaso ditugu.
Nolako garrantzia dauka euskarak zure bizitzan? Ahal dudan egoera guztietan erabiltzen saiatzen naiz. Zortea daukat etxean ama izan dudalako euskara txikitatik praktikan jarri ahal izateko. Aitak ez zekien baina asko gustatzen zitzaion eta liluratuta gelditzen zen euskara entzuten. Hain argi izan dut beti euskararen garrantzia nire inguruan, bost urtez Errioxan bizi ostean etxera bueltatu eta bai lanean, bai nire egunerokoan erabili nahi nuelako.
Duela gutxira arte Ugaoko neskak entrenatu dituzu. Nolako balioa izan du euskarak futbolaren esparruan? Euskara jakiteak ez dauka pisurik edo garrantzi berezia futbolaren munduan, hori jaso dut behintzat entrenatzaile moduan jardun izan dudanean. Futbolean hasi nintzenean, beharbada, leku erdaldunetan jokatu izan dugunean balio erantsia izan ohi zuen euskeraz aginduak emateak edo jokalarien artean hitz egitea. Baina orain, zorionez, edonon hitz egiten da gure hizkuntza, neurri handi edo txikiagoan.
Zure entrenamendu saioetan nolakoa izan da euskararen garrantzia? Normala izan da, euskeraz etxean aritzen direnak normaltasunez jarraitzen dute futbolean erabiltzen. Nik beti saiatzen naiz beraiekin euskaraz komunikatzen. Hala ere, beti kontuan hartu izan dut euskaraz ez dakiten pertsonak ere egon badaudela. Horiei erdaraz egin izan diet.
Gauza bat euskara eguneroko bizitzan erabiltzea da eta beste bat kirolean praktikatzea. Nolako erronka da zuretzat gure hizkuntza futbolean aplikatzea? Ez dut ikusi inposatutako arau bat balitz moduan. Izan ere, “euskañola” erabili dut normaltasunez. Azken batean, hobe hori erderaz dana egitea baino. Hala ere, beraientzat oso normala da euskeraz hitz egitea. Hortaz kirolaren arloan egitea, gauza normalen artean dago ere.
Gure hizkuntza kirolean erabiltzeko zailtasunik egotekotan, non legoke zure kasuan? Zailtasunak egon badaude, eta asko! hiztegiari dagokionez, umeak askotan ez dakite erderaz zer den “extremo” bat, beraz euskeraz hegalean jokatzen duela esaten badiozu… eta gainera lekuz aldatzen badiot eta hitz horren esanahia ‘aurrelaria’ dela esaten badiot… eta gainera zutoinitik kentzeko oihukatzen badiot… jokalariak azkenean ulertu egiten didanean gola sartu digute (barreak).
Itxaso, Arandia futbol zelaian // Utzitakoa
Eta haurrek berdin ulertzen dituzte aginduak euskaraz edo gaztelaniaz? Orokorrean bai, baina badaude euskeraz entzutera ohituta dauzen hitz batzuk, adibidez ezkerra edo eskerra esaten dudanean erderaz barreak botatzen ditugu.
Zein herrikoak izan dira entrenatu izan dituzun neskak eta nolakoa izan da jokalari horiek gure hizkuntzarekiko duten jarrera? Ugao, Zeberio, Arrankudiaga, Bilbo ta Urduñako neskak izan ditut taldean. Noizbait neska latinoamerikar batzuk etorri izan dira baina liga bukatzear zegoela, kirola ezagutzeko gehienbat. Taldeko gehienak euskaraz aritzen dira etxean, eta hauentzako ez da inolako arazoa, baina hori bai: ohitura hori falta den etxeetan gabezia nabari da. Hala ere, nirekin bazekiten saiatu behar zirela eta betebehar bat ez izatean, hobeto hartu dute eta lehen momentutik saiatu izan dira.
Nolakoa izan da euskararen bilakaera Ugaoko neskak entrenatzen hasi zinenetik lana utzi zenuen arte? Nik gora egin duela esango nuke, edo behintzat gutxiagora ez dela joan, eta hori izan da nire hasierako nahia. Gurasoen artean ere eskertu dute haiekin euskeraz zuzentzeko aukera erabiltzea.
Futbola telebistan ikusten al duzu? Hala bada, zein hizkuntzatan egiten duzu? Egia esateko telebistan ikusten badut erderaz da, tabernetan delako. Kotxean edo etxean ezin badut telebistan ikusi euskadi irratian entzuten dut, gustatzen zaidalako zelan bizi duten, beharbada pertsonalki ezagutzen ditudalako gure lana dela eta.
Komunikazioaren esparrua alde batera utzi barik, gaur egun Mediaset enpresan egiten duzu lan. Nolakoa da zure lana eta zein da bertan euskarak duen presentzia? Nire lana kamara atzean da, albisteak grabatzen ditut. Nik hotza pasatzen duen pertsona hori naiz, ikus-entzuleek etxean bero bero neguan elurra dagoela jakin dezazuen (barreak). 17 urte daramatzat bertan lan egiten.
Eta euskarak presentziarik al du Mediaset bezalako enpresa batean? Hasi nintzenean askoz gehiago, eta horrek asko poztu ninduen. Lankide euskaldunak nituen eta nahiz eta katea euskalduna ez izan, elkarrizketak erderaz egiten ditugu baina tratua beti euskaraz izan ohi dugu euskal hiztunekin. Orain lankideek ez dakite euskaraz edo ez zaie axola. Nik, nire partetik jarraitzen dut hori zaintzen, eta ez daukat zerikusirik ‘Guecho’ idazten dutenean ‘Getxo’ idatzi ordez, esaterako. Niri lotsa ematen dit horrek, Madrilekoei, berriz, horrek ez die batere axola!
Euskal Herrian ETB eta herri komunikabideek sustatzen dute euskara. Horrez gainera, bestelako hedabideek ezer egin dezakete euskara bultzatzearren? Egia esateko ez dakit. Gure gauza dela esango nuke. Gure hizkuntzak beti izan ditu traba guztiak. Ez da bat ere erreza izan eta gure esku izan dugu euskara mantentzea eta hedatzea. Horrek holan jarraitzen du ta ez du balio “hurrengoak egingo du eta kitto!” bezalakoak esatea. Buruzagiek eta enpresetako jabeek kontratazioak egiteko orduan langile euskaldunak saritzeko aukera dute, baina ez dute erabaki hori hartzen.
Nolako etorkizuna ikusten diozu euskarari, Itxaso? Ona! Nire itxaropen aletxoa jartzen dudan era berean, nire aurretik egin dutenek eta nire atzetik datozenek egingo dutela uste dut. Gure hizkuntzaren alde bultzada eman behar dugula argi daukat, hori horrela da. Baina inork ez zuen esan bide erraza izango zenik!
☉ Ugao
Bideoa | El Kangri: «Egiten dudan rap-ak nire bizitza du oinarri, inor kaltetzeko asmorik gabe»
Ugaoko jaietan emanaldia eskaini zuen ‘El Kangri’ artistak. Horren haritik, bere proiektua ezagutzeko elkartu gara Udiarragako Amabirjinaren ermitaren aurrean
Duela urte batzuk ‘El Kangri’ musika proiektua martxan ipini zuen Asier Azpillaga Nuñez ‘El Kangri’k, (Ugao, 1986). Artista honek, rap melodikoa oinarri, bizipen propioak plazaratzen ditu mikro baten bidez eta DJ Kalibre eta Markel ‘Uri’ managerraren laguntzarekin. Musika eszenan tarte bat zabaltzeko gakoa emankortasuna dela dio Ugaokoak eta proiektua 2013an hasi zuenetik helburua urtero 12 abesti kaleratzea da (bideoklipak YouTuben eta abestiak bestelako plataformetan edo Instagrameko @elkangriiiii izeneko kontuan argitaratuz).
Bere musika rap klasikoaren aurreiritzietatik “urrundu” egiten dela aitortu dio GEURIAri artistak, “errespetutik” abiatuz betiere. El Kangrik bere bizipenetan oinarritzen ditu bere abestiak, bizitzak irakatsitako lezioetan oinarrituz. Proiektu honetan, Markel ‘Uri’ manager zaratamarra du bidelaguna. Proiektuaren inguruko gomendioak emateaz gainera, laguntza eman dio Ugaoko artistari eta emaitza modura lagunen arteko “familia” txiki bat sortu dute, musika profesionalak eta lagunak elkartzeko topagunea izan delako beraientzat.
El Kangri. Lehenik eta behin, azalduiguzu izen honen jatorria. Nire izen artistikoa berezia izatea nahi nuen. Ni naizen bezala identifikatu behar ninduen. Txikia nintzenean, lagunekin hondartzara joaten nintzenean ‘Kangrejo’ esaten zidaten, karramarroek gorputz zabala eta hanka luze eta meharrak dituztelako. Izan ere, hanketan karramarroen haginak ditut tatuatuta. Horrela ezagutzen nau mundu guztiak, ‘El Kangri’ ezizenarekin, eta hori mantentzea erabaki nuen.
Gaur egun Orozkon bizi bazara ere, 30 urte Ugaon eman dituzu. Nolakoa da herriarekin duzun harremana? Bertan nire ama eta anaia bizi dira. Kalean galdetzen didaten bakoitzean Ugaokoa naizela esaten dut beti, herrian lagun asko ditudalako. Lotura berezia daukat Ugaorekin.
Joan den irailarten 13an Ugaoko jaietan eskaini zenuen emanaldia. Herrian jotzeko gogo izugarria neukan eta aurten eduki dut ametsa egi bihurtzeko aukera. Duela hiru urte Aker tabernako plazatxoan jotzeko aukera izan genuen eta 400 lagun baino gehiago elkartu ziren bertan eta oilar-bataila eta guzti antolatu genuen. Harrera oso ona izan zuen eta horren haritik jaio zen aurtengo jaietan jotzearen ideia.
2013an hasi zenuen zure proiektuaren ibilbidea: El Kangri. Musikarekin 2013an hasi nintzen. Letrak idaztea betidanik izan dut gustuko eta entretenitzeko helburuarekin egiten nuen hasieran. Izan ere, eskola garaian, etxerako lanak egin beharrean idaztea gustatzen zitzaidan. “Zer ari zara idazten, Asier?”, galdetzen zidaten irakasleek. Nik nire istorio pertsonalak idazten ari nintzela esaten nien eta horrek zeharo harritu egiten zituen. Ondoren, horiei erritmoa jartzen hasi nintzen. Neure burua artista profesionaltzat jotzen dut eta aurretik lan asko dut egiteko. Horregatik beti diot bultzada txiki baten zain nagoela proiektua zazpi haizetara zabaltzeko. Egunez egun, astiro-astiro aurrera doa proiektu hau, ikusgarritasuna egunero landu behar den zerbait delako.
Nolako gaiak jorratzen dituzu zure lanetan? Azken boladan egiten ditudan abesti gehienetan desamodioa gailendu egiten da. Duela urte bi banandu nintzen eta gaur egun semearekin bizi naiz. Nire ustez, artista bakoitzak bizi duen egoera emozionalaren arabera idazten ditu bere letrak. Nire kasuan, egun txarrak igaro ditut. Hortik gai jakin batzuk landu izana.
Noiz idazten duzu? Edozein momentu da ona idazteko: kalean, haurrarekin parkean nagoenean… inspirazioa heltzen denean ideia edonon gorde eta etxera heltzen naizenean estudioan sartu eta konposizio lanak nire kabuz egiten hasten naiz. Bakarrik. Egia da asteburu askotan Markel ‘Uri’ managerrarekin elkartu egiten naizela proiektu eta ideia jakin batzuk lantzeko, baina ideia nagusiak bakarrik nagoenean heltzen dira burura.
Egoera emozionala edozein delarik ere, rap melodikoak lagunduta sortzen dituzu zure abestiak. Nire letrek bizi izandako egoeren barruak kanporatzea dute helburu. Bizi izandako eskarmentuak botatzen ditut abestien bidez, baina zuk esan bezala, rap melodikoaren bidez.
Zer esan nahi du horrek guztiak, baina? Rap klasikoan errespetu falta asko entzuten dira eta politika kontuetan murgildu egiten dira abeslariak. Nik ez diot errespetua galduko generoari edo beste abeslariei; rapa nire bizipenen inguruan eraikitzen dut, inori kalterik eragin gabe. Nire lehen entzulea semea da: YouTubera jo eta bere aitaren musika entzutea maite du. Nire lehen followerra da eta ikastolan behin baino gehiagotan esan du handitan bere aita bezala raperoa izan nahi duela (barreak).
“Nire musikarekin inspiratzen naiz. nire letrak nik neuk egiten ditut, bestelako inspiraziorik behar gabe”
Hala ere, eta zure estiloa ez bada ere, rap klasikoko erreferenterik izango duzu. Nire musikarekin inspiratzen naiz, egia esan behar bada. Hala ere, Estatu mailan Nadal 015, Grind, Lopes eta Natos y Waor edo El Jincho bezalako artisten musika entzun dut ere. Hala ere, nire letrak nik neuk egiten ditut, bestelako inspiraziorik behar gabe. Markel estudiora datorren bakoitzean, abesti jakin bati forma emateko gomendioak ematen dizkit batzuetan eta horrek asko laguntzen dit.
Rapak, edozein musika estilori gertatu lez, aldaketa sakona izan du sare sozialen ondorioz: duela urte asko, artistek lanak sortzen zituzten eta helburua diskoa kaleratu eta hori saltzea zen. Gaur egun folowerrak eta interakzioa sartu dira jokoan. Nola daramazu kontu hau? Bideo pare bat kaleratzen ditugu hilabetero. Nire asmoa urtean 12 bideo argitaratzea da. Sare sozialetan mugitu egiten da dena gaur egun eta nik, YouTube kanalaz gainera Instagram edo TikTok plataformak erabiltzen ditut eta nire sormenak jarraitzaile edo follower horiekin partekatzea gustuko dut. Azken batean horiek dira nire lanen kontsumitzaileak eta horiek daude argitalpen berrien zain dauden jarraitzaile nagusiak. Musika zabaltzeko YouTubeko kanala erabiltzen zen antzina. Gaur egun Distrokid plataforma digitala erabiltzen dugu horretarako. Horren bidez, nire abestiak Spotify, Amazon Music edo ITunes bezalako plataformetan dago entzungai.
Nolako lan-taldea dago El Kangriren atzean ekoizpen horiek egin ahal izateko? Abestia sortu eta grabatzeko lanak nik neuk egiten ditut, Markelen oniritziarekin. Azken urteetan entzuleen ohiturak aldatu egin dira eta lehen lau minutuko abesti batek ondo funtzionatzen bazuen ere, gaur egun denbora tartea erdira laburtu da. Istorio erakargarrienak laburrenak izan ohi dira. Hala ere, nire proiektuan sei pertsonak egiten dute lan: arlo bisualean Markel manager eta filmakerra dago. Gainera, Iban argazkilaria eta beste lagun batzuk ageri dira ere.
Datarik al duzue etorkizuneko emanaldiei begira? Datorren urteari begira Arkotxako jaietan jotzeko asmoa dugu. Arkotxako Jai Batzordeko kideak Ugaoko jaietako emanaldian egon ziren eta bertan eskainitakoa gustatu zitzaiela esan ziguten. Gainera, Arrigorriagako Madalenetan jotzea izugarri gustatuko litzaidake: azken batean rapa gustuko duen jende asko dago bertan.
Proiektua aireratzen doa. Non ikusten duzu zeure burua hemendik 10 urtera? Ez dakit noiz iritsiko den nire momentua, baina helduko dela ziur nago. Espero dut ordurako Estatu mailan kontzertuak egiten egotea: Madril, Bartzelona, Galizia, Asturias… eta batek daki, Estatu mailako erreferente bat izatea, gailurrera iristea eta familiari bizi-kalitate ona eskaintzea da. Momentuz esan dezaket eskerrak eman nahi dizkiedala bidean zehar laguntza eskaini didaten pertsona guztiei: jarraitzaileei, lantaldeari, gure lanaren berri ematen duten komunikabideei…
☉ Ugao
Elkarretaratzea, antzezlanak eta hainbat jarduera antolatu dituzte Ugaon, A-25eko testuinguruan
Azaroaren 26an IV. Berdintasun Plana entzuteko gunea izango da ere, eta herritarren ekarpenak eta proposamenak ezagutzeko gune parte-hartzailea izango dela iragarri dute Udaletik
Ugaoko Udaleko Berdintasun sailak, Emakumearen aurkako Indarkeria Ezabatzeko Nazioarteko Egunaren testuinguruan, hainbat hezkuntza eta sentsibilizazio-jarduera antolatu ditu azaroaren 14tik 27ra.
Izan ere, aurten, Emakumearen aurkako Indarkeria Ezabatzeko Nazioarteko Eguneko elkarretaratzeaz gainera, bestelako jarduerak antolatu dituzte Udaletik: Antzerki saioak, ikusgarritasun lesbikoari buruzko bideo proiekzioa eta mahai-ingurua, Berdintasunaren aldeko martxa herrian zehar…
“Ekimen honen helburua da indarkeria matxistaren aurkako borroka ikusaraztea eta herritarrek emakumeen eta gizonen arteko benetako berdintasunarekiko duten konpromisoa indartzea”, azaldu dute udal ordezkariek.
Txiki eta gazteen programazioari dagokionez, jarduerak Ludotekan, Gaztelekuan eta Mirabatxon burutuko dituzte: “‘Pepuka y el monstruo que se llevó su sonrisa’ ipuin-kontaketa feminista, azaroaren 25, 26 eta 27an udal ludotekan egingo dute, baita Gaztelekuan eta Mirabatxo Klubean ere, hilaren 22an.
Azaroaren 26an IV. Berdintasun Plana entzuteko gunea izango da ere, eta herritarren ekarpenak eta proposamenak ezagutzeko gune parte-hartzailea izango dela iragarri dute Udaletik.
Antzerki saioetan, tailerretan eta berdintasunaren aldeko martxan izena eman nahi duten interesdunek e-posta idatzi beharko dute berdintasuna@ugao-miraballes.eus helbide elektronikora.
Egitaraua | A-25a Ugaon
Azaroak 14, ostirala
20:00 Antzerkia: Katana, Jane jauregia
Azaroak 20, osteguna
18:00 Ikusgarritasun lesbikoari buruzko bideo proiekzioa + mahai-ingurua
Azaroak 21, ostirala
20:00 Pituister, Jane jauregia
Azaroak 22, larunbata
11:00 Berdintasunaren aldeko martxa, herrian zehar
Azaroak 25, asteartea
12:00 Emakumearen aurkako Indarkeria Ezabatzeko Nazioarteko Eguneko elkarretaratze instituzionala, Herriaren enparantza
Azaroak 26, asteazkena
18:00 IV. Berdintasun Planaren entzute gunea
☉ Ugao
Irakurzaletasuna bultzatzeko tailerrak antolatu dituzte Ugaon, euskara hutsean
Izena emateko azken eguna azaroaren 29a izango da eta edukiera mugatua izango da: guztira 10 umeentzako lekua egongo da
Abenduaren 5ean, 12an eta 19an ipuin kontalarien ‘Sormen Tailerrak’ antolatu ditu Ugaoko Udalak, liburutegian, 17:30etik 18:15era.
Ekimen honen helburua haur txikiengan irakurzaletasuna bultzatzea eta irudimena lantzea dela azaldu dute udal ordezkariek: “Dinamizatzaile batek ipuin klasiko desberdin bat irakurriko du saio bakoitzean, eta ondoren haurrek ipuinarekin lotutako jarduera batean parte hartuko dute”.
Tailerrak euskara hutsean eskainiko dituzte eta guraso bakoitzak seme-alaba bakarra eraman ahal izango du. “Haur horrek, nahi izanez gero, hiru ostiraletan parte hartzeko aukera izango du”, gehitu dute Udaletik.
Izena emateko azken eguna azaroaren 29a izango da. Edukiera mugatua izango da eta guztira 10 umeentzako lekua egongo da.
☉ Ugao
Ertzaintzak gizon bat ikertu du Ugaon asteburuan, droga trafikoagatik
Gainera beste 46 pertsona identifikatu dituzte. Horien artean 16 Herritarren Segurtasuna Babesteko Lege Organikoa ezarriz zehatzeko proposatu zituzten drogak edukitzeagatik eta bi armak edukitzeagatik
Ertzaintzak prebentzio-dispositibo bat egin zuen joan den igandean Ugaon eta 50 urteko gizon bat ikertu zuen “hainbat substantzia sorgorgarri, bere ibilgailuan hauts zuri bat zuten bi poltsa eta 20 bat pastilla” atzeman ostean.
“Ertzaintzaren baliabideek guztira 46 pertsona identifikatu zituzten, eta horietako 16 Herritarren Segurtasuna Babesteko Lege Organikoa ezarriz zehatzeko proposatu zituzten drogak (kokaina, speeda, marihuana eta haxixa) edukitzeagatik eta bi armak (kuter bat eta ukabil amerikar bat) edukitzeagatik”, azaldu dute Ertzaintzatik.
Gau berean droga-kontrola egin zuten agenteek Ugaon eta zortzi gidarik positibo eman zuten substantzia sorgorgarrietan: “Esku-hartze horiek Ertzaintzak bide publikoan (oraingoan Ugaoko diskoteka baten ondoan), Arma Zuriak eta Objektu Arriskutsuak Kontrolatzeko Ekintza Planaren esparruan, egiten dituen prebentzio-lanen emaitza dira”.
☉ Ugao
Beranduegi Erromeriak urtarrilaren 24an eskainiko du azken dantza, zazpi urteko ibileraren ostean
Azken emanaldia Bilboko Bilborock aretoan eskainiko dute. Ordua laster zehaztuko dute erromeriatik
Hego Uribeko erromeriak agur esango die ordu txikietako kontzertuei eta azken kontzertuaren data eta lekua iragarri dute: 2026ko urtarrilaren 24a, Bilborock aretoan.
“Hasieratik argi geneukan zein zen gure helburua: jendea dantzan, kantuan eta irribarrez jartzea”, azaldu dute erromeriatik. “Eta zuei esker, amets hori egia bihurtu da”.
‘Azken Erromeria Dantza’ izeneko azken bira hau joan den urriaren hasi zuten Izarran (Araba) eta harrezgeroztik Agurainetik, Bagatzatik, MallabiatikPortugaleteko EZK-FESTetik eta Zollotik igaro dira.
Ainize Perez Ipiña (Ugao, 1997) Beranduegiko abeslariarekin berba egiteko aukera izan zuen GEURIAk joan den otsailean, eta zazpi urteko ibilbidean denbora asko inbertitu dutela azaldu zuen: “Nik oso argi neukan aurtengoa nire azkenengo urtea izango zela eta asko hitz egin eta asko pentsatu eta gero, erabaki dugu itxiera on bat ematea merezi duela Beranduegik”.
Ainize, Ugaon // Geuria
Proiektua martxan jartzeak lan asko eman zituen baina jo eta su ibili ziren, erromeriari forma emateko. Hasierako kontzertuetan urduritasuna nagusi zen eta “edozein baldintzetan” jo zutela aitortu zuen Ainizek: “Hau guztia apur bat aldatu da: orain ziurtasun handiagoa dugu eszenatoki gainean. Urduritasuna badago, baina lehenengo abestiko lehenengo akordeak entzun eta desagertzen doa. Hasieran gaztetxoak ginen eta hori ere nabaritzen da, urteekin esperientzia handituz joan gara. Aitortu behar dut nostalgia puntu batekin baina harrotasunez gogoratzen dudala Beranduegiren hasiera, niretzat egi bilakatutako ametsa izan da”.
Ainize Perez, Beranduegiko abeslaria: “Nik oso argi neukan aurtengoa nire azkenengo urtea izango zela eta asko hitz egin eta asko pentsatu eta gero, erabaki dugu itxiera on bat ematea merezi duela Beranduegik”
Jendea dantzan eta kantutan jartzeaz gainera, taldeak erronka handi bati eutsi zion hasieratik: euskara kontzertuetako ardatz nagusia izatea, “euskal musika eta Euskal Herriko artisten sorkuntzak herri desberdinetara eramatea, hain zuzen”.
Festekin gertatzen den modu berean, bideari amaiera emateko ordua dela laburbildu dute Beranduegi Erromeriatik eta isilik egingo ez dutela azpimarratu dute. Azken dantza horien artean Arrigorriagako Gaztetxearen zortzigarren urteurrenean eskaini beharreko kontzertua dago (Niere eta Tobogan taldeekin) eta azkena Bilboko Bilborock aretoan izango da.
“Eskerrik asko bihotzez, urte hauetan guztietan gure istorioaren parte izateagatik. Hau da agurra… Beti Beranduegi”.
Bideoa | “Euskal selekzioa-Palestina partida aitzaki, gure kaleak aldarriz bete ditugu”
Galdakaoko PSEk ez du 2026ko aurrekontua negoziatuko, “2025eko proposamen gehienak bete gabe dauden bitartean”
Eskailera margoketa egingo dute gaur Galdakaon, Euskal Selekzioren eta Palestinaren arteko partidaren atarian
Argazkiak | Basauriko bi bizilagunen etxegabetzea eta herritarren elkarretaratzea, argazkitan
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
Bideoa | “Euskal selekzioa-Palestina partida aitzaki, gure kaleak aldarriz bete ditugu”
Bideoa | El Kangri: «Egiten dudan rap-ak nire bizitza du oinarri, inor kaltetzeko asmorik gabe»
