☉ Ugao
Maite Otsoa eta Leire Untzueta: «Gazte Egunarekin herrian geratzeko alternatiba bat proposatzen ari gara»
Apirilaren 22an bigarren Gazte Eguna egingo dute Ugaon. Herriko aisialdia eta parranda giroa sustatzeko, bazkaria, jolasak eta kontzertuak antolatu dituzte
Gizarte-harremanek eragin handia dute norberaren bizi-garapenean, bereziki nerabezaroan. Izan ere, identitatearen eraikuntza betean harrapatzen ditu, eta berdinekin identifikatzea funtsezkoa da ulertuak sentitzeko eta askatasunez adierazi ahal izateko. “Kantatu, maitatu eta dantzatu ezin bada, ez da gure iraultza” lelopean, Gazte Eguna antolatu dute Ugaon premia horiek asetzeko. Maite Otsoak (Ugao, 2003) eta Leire Untzuetak (Ugao, 1997) azaldu dutenez, gazteentzako kultura- eta aisialdi-gune berri bat sortzeko proposamena izan da, eta iazko arrakasta ikusita, apirilaren 22an bigarren edizioa egingo dute. Haiekin egon gara jarduera honen nondik norakoak ezagutzeko. Bazkarirako tiketak salgai daude jada Lurdes, Lainoa, Dorretxea, Felipe eta Aldapa (Arrigorriaga) tabernetan.
Noiz ikusi zenuten herriko gazteak saretzeko beharra?
Maite Otsoa (M.O.): Pandemiaren ondorioz izan zela esan dezakegu. Etxetik irteten utzi zigutenean, Ugaon geratzea zen geneukan aukera bakarra. Orduan, batzen hasi ginen, nahiko giro ona sortu zen gure artean eta hori bultzatzeko aukera ikusi genuen; nahiz eta pixkanaka mugikortasun askatasuna berreskuratu, ez genituela eraiki genituen harremanak moztu behar. Adin ezberdinen artean hartu-emanak izan ditugu, ideia berberak partekatzen ditugula konturatu gara eta elkarrengandik asko ikas dezakegula uste dugu, garapenari bide emanez.
Leire Untzueta (L.U.): Ugaon zegoen joera kanpora joatea zen; hau da, beste herri batzuetan bakoitzak bere lagunekin planak egitea. Eta egia da COVID-19aren ostean herri giro hori sortu egin dela. Herri moduan mesede egin digula, alegia. Gutxi gara, espazio gutxi ditugu eta ditugun espazioetan biltzen gara guztiok. Beraz, nahi ala nahi ez harremanak sustatu ditugu koadrilen artean. Orain denok batera mugitzen gara, eta juergan ere askotan elkarrekin amaitzen dugu.
Nola sortu zen Gazte Eguna antolatzeko ideia?
M.O.: 2021ean Ugaoko jaietarako jarduerak prestatzen saiatu ginen, baina COVID-19a oraindik oso presente zegoen gizartean eta, nahiz eta planteamendu ezberdinak luzatu, ezin izan genituen aurrera eraman. Bizi izandako garai gogorraren ondoren gazteriak ospatzeko zuen gogoa eta bideragarritasuna ikusita, jai herrikoietatik banatzea erabaki genuen. Orduan, egun bat hartu eta Gazte Eguna burutzeari ekin genion. Garrantzitsua iruditzen zaigu jendeari alternatiba bat ematea beste edonora ez joateko; Ugaon geratzeko herria egiteko.
L.U.: Gazteak albo batera uzten dira normalean eta herrian aisialdia sustatzeko txokoen faltan sumatzen dugu. Gazte Egunak hutsune hori betetzen du, espazio kultural bat sortuz. Elkarlana sustatzeko bilera irekiak antolatu genituen, edonor hurbildu eta proposamenak egin ahal izateko. WhatsApp talde bat ere sortu genuen, non koadrila guztien ordezkariak dauden. Bertatik deialdiak bidali, lantaldeak eratu eta parte hartzea bultzatzen dugu. Nabarmentzekoa da laguntzeko eta babesteko inplikazio handia dagoela herritarren partetik, bai gazteak, bai ez hain gazteak.
Iaz lehen edizioa ospatu zenuten. Jasotako erantzuna esperotakoa izan zen?
L.U.: Lehenengo Gazte Eguna izateko sekulakoa izan zen, irrikaz hartu genuen eta. Zapiak egin genituen, abesti bat sortu zen, kartel potentea atera genuen… Oso erakargarria izan zen eta jende pila bat hurbildu zen. Baita beste herrietakoa ere! Guztira 250 lagun inguru etorri ziren bazkaltzera. Eguraldia lagun izan genuen eta denak eroso senti zitezen saiatu ginen.
M.O.: Gure poltsikotik ateratako proiektua dela kontua hartu beharra dago. Zapiak salgai jarri eta diru-laguntza bonuak ere atera genituen, eta egia da erantzuna oso positiboa izan zela. Batzuk erosketak egiteaz eta janaria prestatzeaz arduratu ziren, beste batzuk egitaraua antolatzeaz, dekorazioaz… Goizean, elektrotxarangarekin ibilbide bat egin genuen herrian barrena, txosnetatik hasiz, eta laguntza eman ziguten tabernetatik pasa zedin ziurtatuz. Tokiko lokalak bultzatzeko eta mesedea itzultzeko modua ere izan zen. Frontoian bazkaldu ondoren jolasak egin genituen, hala nola bingo musikatua, eta Hodei eta Ilargiren aldeko futbol partida solidarioa jokatu zenez, geldialdia egin genuen horren alde egiteko. Zorte handia dugu herrian bertan gazte sortzaile ugari daudelako, eta jardunaldiari bukaera emateko kontzertuak egon ziren.
Gazte mugimendua bizirik dagoela erakutsi duzue.
L.U.: Jendeak Ugaoren aldeko hautua egiten duela erakutsi dugu. Haren alde egiten dutela ahal duten heinean. Pandemia osteko lehen ekitaldia izan zen Gazte Eguna, baina normaltasunez mugitzen hasi gara berriro eta ez ditugu herrian eman genituen aurrerapausoak galdu nahi. Horregatik, kaleak gureak ere badirela aldarrikatzen jarraitzen dugu, eta dagokigun arreta eta zaintza nahi dugu.
M.O.: Poztu egiten gaitu Hego Uribeko herrietan ere gazte mugimendu indartsu bat sortzen ari dela ikusteak. Ez dakigu gu izan ote garen eskualdean lehenak egiten, azken finean Gazte Egunak beti ospatu izan direlako, baina frogatu egin da herri batean ondo funtzionatzen duela, beraz, besteetan zergatik ez? Bestalde, nahiz eta Ugaon geratu, beti mugitzen gara alboko herrietara babesa emateko eta sarea eraikitzen jarraitzeko.
Pasa den urteko Gazte Eguna Ugaon // Geuria
Eta aurten, zer daramazue esku artean apirilaren 22rako?
M.O.: Pasa den urtean bezala, egitarau potentea antolatzen saiatu gara. Goizean bafle poteoa eta jolasak egongo dira, eguerdian paellada egingo dugu frontoian eta arratsaldean elektrotxaranga eta kontzertuak: Itziarren Semeak, Iheskide, erromeria eta DJa.
L.U.: Aurreko urtearekin dagoen alderik nagusiena da lortu genituen irabaziak bigarren Gazte Eguna hobetzeko inbertitu ahal izan ditugula. Aurten 2:00etan bukatu beharrean, 4:30era luzatuko dugu, eta jai giroan egoten dakien oro gonbidatuta dago. Hori argi uzten saiatu gara beti, eta segurtasuna bermatzeko protokolo bat jarri dugu martxan. Pasa den urtean zabaldu genuen eta taldekide guztiek ezagutzen dugu. Besoko moreak jantzi genituen, arazorik egonez gero, norengana jo behar zuten jakiteko. Barran, adibidez, beti egongo da norbait.
☉ Ugao
Urtzi Verak maila guztietako zaleentzako argazkilaritza monografikoa eskainiko du Ugaon
Izena emateko azken eguna urriaren 18a izango da eta klaseak hilaren 23an hasiko dituzte Jane jauregian
Ugaoko Jane jauregiak Urtzi Vera argazkilariaren argazkilaritza digitaleko 27 orduko tailerra hartuko du. Ikastaroaren lehen eguna urriaren 23an izango da eta asteazkenero izango dira klaseak 17:00etatik 20:00ak arte.
Udal ordezkarien arabera, jarduera maila guztietako interesdunei zuzenduta dago eta izen emateak urriaren 18ra arte egongo dira zabalik webgune honen bidez. Edukiera mugatua izango da eta monografikoan parte hartzearen prezioa 29 eurokoa. Ugaon bizi direnek lehentasuna izango dute.
Irakasleari buruz
Urtzi Vera artea eta natura maite dituen argazkilaria da eta sari ugari jaso ditu bere ibilbidean zehar eta guztien artean Fritz Polking izenekoa (2014) nabarmentzen da, urtero ematen dena eta Alemaniako argazkilariaren izena daramana. Basauriko I. Bridgestone Fotomaratoi solidarioa irabazi zuen 2022an ere, eta ez hori bakarrik; Amurriokoak bestelako sariak irabazi ditu eta den-denak bere webgunean iragarrita ditu.
Urtzi Vera irudien garai digitalean murgildu zen duela hamabost urte baino gutxiago. Ogibidez Industri ingeniari teknikoa da eta arkatz, errotulagailu eta plastilina artean eman zuen haurtzaroa. Betidanik maite izan zituen marrazketa eta jolas sortzaileak.
Unibertsitateko ikasketak amaitu ondoren, marrazketa, pintura eta eskultura tailerretara itzuli zen Vera. Oso urte entretenigarriak eta ikaskuntza handikoak izan ziren berarentzat, eta, ziurrenik, haien lanaren oinarriak finkatu ziren.
Natura eta animaliak inspirazio-iturri izan ditu beti. 2005ean, mendira kamera konpaktu bat eramatea bururatu zitzaion… eta momentu hartan piztu zitzaion argazkigintzarekiko grina.
☉ Ugao
‘Musika Barra-Barra’ zikloak Striknina ekarriko du Ugaoko Felipe tabernara
Musika Barra Barra zikloa joan den martxoan hasi zen eta Kairos, Boogie Riders eta Gailu taldeen kontzertuak ekarri ditu Ugaoko tabernetara
Urriaren 4an Striknina taldearen kontzertua antolatu du Sarea Sound System elkarteak Ugaoko Felipe tabernan. Kontzertu hau Musika Barra-Barra zikloaren barnean kokatuta dago eta urriko bakarra izango da. Punk rock arin, melodiko eta arraro bezala sailkatutako kontzertua 20:00etan programatu dute.
Musika Barra-Barra zikloak joan den martxoan hasi zuen ibilera Ugaoko hainbat tabernetan zehar helburu nagusi batekin: kontzertuak Jane jauregitik atera eta jendea dagoen lekuetara eroatea: tabernetara, alegia: “Oraingo honetan ez gara zure zain egongo, oraingo honetan zeugana joko dogu, bai, tabernetan” lelopean, lau kontzertu eta bakarrizketa bat antolatu zituzten joan den martxotik abendura arte.
Estrategia aldaketa honek tabernetan bilatu nahi ditu kontzertuetako target-ak eta Sareak kontzertu sorta interesgarria antolatu du udaberri eta udazkeneko datetan. Lehena martxoaren 1an izango da (bariku honetan): Hego Uribeko Kairos taldeak lehen kontzertua (estreinaldi kontzertua) eskaini zuen Ugaoko Dorretxea Herriko tabernan, eta atzetik igaro dira Boogie Riders eta Gailu, Beti Alai eta Zelai tabernetan.
Hurrengo jarduerei begira, azaroaren 1ean Ane Lindanek bakarrizketa eskainiko du Lainoa tabernan eta abenduaren 1ean Mississippi Queen izango da jubilatuen etxean.
Egitaraua | Musika Barra-Barra 2024
Martxoak 1, barikua
21:30 Kairos, Ugaoko Dorretxea Herriko Taberna
Apirilak 14, domeka
13:00 Boogie Riders, Beti Alai
Maiatzak 3, barikua
20:00 Gailu, Zelai
Urriak 4, barikua
20:00 Striknina, Felipe taberna
Azaroak 1, barikua
20:30 Ane Lindane (bakarrizketa), Lainoa
Abenduak 1, domeka
20:00 Mississippi Queen, Jabilatuen etxea
☉ Ugao
Auzo Foroa sortu du Ugaoko EH Bilduk, herritarren beharrak entzuteko
Lehen saioa Usila, Markio eta Iturrigorrialdeko herritarrekin antolatu dute datorren urriaren 7an
Ugaoko EH Bildu alderdiak Auzo Foroa izeneko ekimena ipini du martxan, herria osatzen duten auzoetako beharrizanak entzuteko: “Gure herriko auzoen garapen integral eta orekatua helburu duten tokiko politikak diseinatu eta abian jartzera zuzendutako herritarren parte-hartze, gogoeta eta lankidetza osatzea da”, azaldu dute EH Bildutik. Ekimen hau azken hauteskundeetako udal programaren barruan eraman zuen EH Bilduk.
Foroak auzoka prestatu dituzte eta lehen saioa Usila, Markio eta Iturrigorrialdeko herritarrekin antolatu dute datorren urriaren 7an. “Herritarren beharrizanei ahalik eta ondoen entzuteko ezinbestekoa da herriaren, bertako guneen eta auzoen egoerak aztertu, horien beharrizanak ezagutu eta proposamen zehatzak aztertzea, herria herritarrek eraiki behar dutelako”, azaldu dute Ugaoko EH Bilduko ordezkariek.
Asmoa lehen bilerako formatua beste auzoetan errepikatzea da, bertako herritarrekin elkartu eta eskaerak, zalantzak eta ideiak jasotzeko: “Ondoren lanketa sakon bat egingo dugu eta jasotako informazioarekin Ugaoko Udalean ideiak luzatzeko”.
☉ Ugao
Ugaok Aisialdiko Monitore ikastaroan izena emateko epea zabalduko du astelehenean
Ikastaroa prestakuntza jaso eta arlo honetan titulazioa lortu nahi duten gazteentzat diseinatu dute eta izena emateko azken eguna urriaren 10a izango da
Ugaoko Udalak Aisialdiko Monitore ikastaroan izena emateko epea zabalduko du irailaren 30ean “Gazteinfo” gazte emantzipazio eta enplegu bulegoaren bidez. Ikastaroa prestakuntza jaso eta arlo honetan titulazioa lortu nahi duten gazteentzat diseinatu dute eta joan den maiatzean abiarazitako Txapelfest ekimenetik dator, udalerriko gazteek egindako iradokizunetatik.
Guztira 310 orduko ikastaroa izango da: 150 ordu teoriko eta 160 praktikak egiteko. “Eskola teorikoak 12
asteburutan emango dira, urritik maiatzera”, azaldu dute udal ordezkariek, eta honela banatu dituzte: bederatzi asteburu Ugaon eta hiru Ugaotik kanpoko aterpetxe batean. Klaseen ordutegia ostiraletan 18:30etatik 21:00etara eta larunbatetan 10:00etatik 18:00etara izango da.
Ikastaroan izena emateko azken eguna urriaren 10a izango da eta Gazteinfo bulegora hurbilduz egin daiteke (Astelehen eta asteazkenetan 17:00etatik 20:00etara eta astearte, ostegun eta ostiraletan 12:00etatik 15:00etara). Ikastaroaren zenbatekoa 360 eurokoa da eta baldintza bakarra interesdunek 18 urte beteta izatea da.
“Aukera bikaina da aisialdiko begirale gisa dituzten trebetasunak garatu eta hezkuntzaren eta aisialdiaren esparruan esperientzia teorikoa eta praktikoa eskuratu nahi dutenentzat”, azaldu dute udal ordezkariek.
Informazioa handitzeko 747 402 383 telefono zenbakia eta gazteinfo.ugao@ortzadar.es helbidea ahalbidetu dute.
☉ Ugao
Hiru herritar kontratatuko ditu Ugaok enplegua sustatzeko toki ekintzetarako
Kontratatuak lanaldi osokoak izango dira eta aukeratutako herritarrak urrian hasiko dira lanean
Ugaoko Udalak, Lanbide Euskal Enplegu zerbitzuarekin lankidetzan zerbitzu anitzetako peoi bi eta artxibatzeko eta digitaziorako administrari laguntzaile bat kontratatuko ditu lanaldi osoan urrian bertan hasteko.
Zerbitzu anitzetako peoi bien kontratuak lau hilabeterako izango dira eta administrari laguntzailearena, sei hilabeterako: “Hautaketa Lanbidek emandako zerrendako hautagaien artean bakarrik egingo da”, azaldu dute udal ordezkariek, betiere deialdian ezarritako hurrengo baldintzak betetzen badituzte:
– Kontratatutako pertsonek langabezian eta izena emanda egon beharko dute, eta Lanbide-Euskal Enplegu Zerbitzuan enplegu-eskatzaile gisa alta emanda ere
– Ugao erroldatuta egotea gutxienez 6 hileko antzinatasunarekin
– Lan-esperientzia, lanpostuarekin lotutako prestakuntza akademikoa, eta egoera soziolaborala zein familiarra baloratuko dira
Informazioa handitzeko Gazteinforekin harremanetan jartzea gomendatu dute Udaletik 946 322 014 edo 747 402 383 telefono zenbakietara deituz edo zuzenean bulegora joanez (Udiarraga kalea, 39), astelehenetik ostegunera, 17 :00etatik 20:00etara eta ostiraletan 10:30etik 13:30era.
Bideoa / Jon (Los Gambas): “Playbackean pailazoarena egitea da gehien gustatzen zaiguna”
Zeberioko Santa Kurtze ermitako lanak hilabete bukaeran amaituko dituzte
Arrigorriagak 7.000 Arrigobono ipiniko ditu eskuragarri herriko 40 saltokitan
Argazkiak / San Migeleko jaietako Playback lehiaketan ere txapeldun Los Gambas kuadrilla
Argazkiak / Los Gambas kuadrilla izan da txapeldun San Migeleko jaietako Olinpiadetan
