☉ Ugao
Oihane Artetxe: «Gaur egungo familia-aniztasuna handia izan arren, gizartea familia tradizionalentzat soilik pentsatuta dago»
Bizitzako gorabeherek familia tradizionalaren eredutik familia gurasobakarrera aldatu zuten Oihane Artetxe. 34 urteko ugaotarrak bere alaba bakarrik hezteko erronkari eutsi zion eta familia eredu gurasobakarren inguruan berba egiteko aukera izan dugu; bere kabuz borrokatutako gerraren inguruan, alegia.
Geuria #087 Monografikoan argitaratutako elkarrizketa
“Gure Gerrak. Hego Uribe eskualdean ditugun aldarrikapen, hausnarketa eta ekintza ezberdinen solasaldiak”
Irakurri osorik PDFan
Oihane Artetxe (Ugao, 1988) haurdun geratu zen 2010ean. 22 urte besterik ez zituen eta amatasuna, bakardadearekin batera, bat-batean heldu zitzaion bizitzara. Bakardade hori indarkeria matxistaren ondorio izan zen. Gaur egun, Artetxek ez du “aita” hitza erabiltzen haurrarekin bikotekide ohiaz mintzatzen denean, “progenitore” baizik. Izan zuten azken auziaren ondorioz, bikotekideak guraso-ahalaren eskubidea guztiz galdu zuen eta ordutik, haurrak hilabete batzuk baino ez zituenetik, amak zainduta hazi eta hezi zen umetxoa. Parkera irteten zenetan ez zuen bere adineko neskarik ikusten Oihanek, eta hain zoragarria izan beharko lukeen bizitzako fase hori benetan garratza egin zitzaion, lehen urteetan bereziki.
Hasierak beti dira zailak, baina momentua iritsi arte Oihanek ez zuen pentsatu hainbesterako izango zenik. Ugaotarrak bere bizitza berreraiki zuenetik 12 urte igaro dira, familia tradizionalaren eredua alde batera utzi eta amatasunari bakardadean eutsi zionetik, horrek dakartzan ondorio guztiekin.
Herrian batek baino gehiagok behin baino gehiagotan galdetu dio ea diru-laguntzarik jasotzen duen guraso bakarra izateagatik, eta Artetxek uste horiek “mitoak” direla azaldu digu. Eskolan, haurrak ere bere familia-eredu ikusezinaren ondorioak jasan izan ditu behin baino gehiagotan, eta harrituta galdetu dio amari zelan egin zezakeen ezagutzen ez duen aitaren eredua edo nola ospa zezaketen ‘aitaren eguna’, “aitarik ez badu”.
Zergatik ari zara gerra honetan borrokatzen?
Gaur egun familia-eredu mota asko daude gizartean eta estatu mailan 2 milioi gurasobakar bereiz daitezke. Horietako 85.000 gutxi gorabehera Euskal Herrian bizi gara. Egungo gizartearen zati handi batek pentsatzen du familia desegituratuak garela, mito asko daude. Askoren ustetan, esaterako, diru-laguntzak jasotzen ditugu eta hori ez da egia, inondik inora ere: familia gurasobakarrek ez dugu diru-laguntza berezirik jasotzen gure egoeragatik eta ez dugu politika sozial espezifikorik: alargunek bakarrik jasotzen dituzte. Gure borrokaren helburua guraso bakarreko familien eskubideak gainontzeko familienak bezalakoak izatea da.
Datu hauek ondo baino hobeto ezagutzen dituzu zuk, Oihane. Zertan ari zara lanean gaur egun?
Euskal Herriko Unibertsitatean irakasle bezala nabil lanean, Bilboko Hezkuntza fakultatean, didaktika eta eskola-antolakuntza sailean.
Kasu bereziak ezagutuko zenituen zure lanean, ziur.
Egoera oso larriak gertatzen dira jasaten dugun babesgabetasuna dela eta. Duela gutxi unibertsitaterako egin dudan ikerketa kualitatibo batean 55 familia gurasobakarrek hartu dute parte eta, egia esateko, kasu oso larriak bistaratu dira; ama batek, adibidez, ezin izan du belaunean ebakuntza bat egin ez zeukalako umea norekin utzi ospitalean egon ahal izateko. Beste adibide bat: Lehen Hezkuntzako ume bat ikastetxeko aisialdi jarduera batzuetatik baztertu zuten amak ez zuelako sinatuta irudi-baimena (aita erasotzaile batengandik babesteko). Beste hainbatek ezkutuan eraman behar izan ditu haurrak lanera ez zeukatelako norekin utzi, eta lanik gabe ezin dute bizi. Horiek adibide batzuk baino ez dira… Eta konfinamendu garaian, noski, arazo guztiak areagotu ziren.
Ni, egia esateko, pribilegiatua naiz: nire gurasoak Arrankudiagan bizi dira eta ikasi edo lan egin behar izan dudanean zein gauza larriren bat gertatu zaidanean beti egon dira laguntzeko prest. Beste guraso batzuek ez daukate zorte hori.
Familia eredu asko existitzen badira ere, familia tradizionalaren garrantzia nabarmena da oraindik gaur egun.
Gizartea familia tradizionalentzat pentsatuta dago gaur egun: politika fiskalak, sozialak, lan-baimenak… den-dena familia tradizionalaren eredura begira antolatuta dago. Horren adibide argia da eskola kurrikuluma. Kurrikulum horrek ez du gure familia-eredua kontuan hartzen: gaur egun zentro askotan aitaren eta amaren eguna ospatzen jarraitzen dute. Familia guztiek, arrazoia edozein izanda ere, ez dute zertan guraso bi izan behar. Aniztasun handia dago gizartean eta agian familia batzuetan ez dago aita edo amaren figurarik edo aita bera erasotzailea izan daiteke. Eskolaren antolakuntzak gaur egungo egoerara egokituta egon behar du; bestela, ondorio modura, azkenean haurrak dira kaltetu bakarrak.
Bestelako adibiderik jar dezakezu?
Jaiotza-baimenagaz ere gertatzen da, esaterako: ume bat jaiotzen denean, familia tradizionaleko kideek 32 asteko baimena dute seme-alabak zaintzeko. Guraso bakarrek, ordea, 16 aste dituzte guztira. Beste adibide bat edoskitzea litzateke; guraso bakarrek ezin dituzte baimen horiek eskatu honako baldintza bete ezin dutelako: bigarren pertsona bat (familia tradizionalean, beste gurasoa, alegia) lanean egon behar da. Guraso bakarren kasuan, bigarren pertsona hori ez da existitzen. Horregatik, epe luzeagoko baimen hori eskatzea ezinezkoa da. Kasu horretan bazterketa jasaten dute guraso bakarreko familiek.
Zer dela eta bazterketa hau?
Legeek eta politikak, oro har, ideologia markatua dute. Egia da beste autonomia erkidego batzuetan estatus moduko bat existitzen dela guraso bakarrentzat: Nafarroan, Aragoin, Katalunian, Kanariar uharteetan… Familia ugariek eta alargunek politika espezifiko batzuk dituzte Euskal Herrian, baina guraso bakarren kasuan ez dago ezertxo ere: ez dugu estatus berezi hori, ezta inolako onurarik ere. Adibide moduan, esan dezaket Euskal Herriko Unibertsitatean (EHUn) matrikula egiterakoan deskontuak dauzkatela familia ugariek baina amatasuna bakardadean bizitzen dugunok ez daukagu deskonturik prezio publikoetan.
Familia giza erakunde zaharrena dugu, urtez urte aldatuz doana. Nolako bilakaera izan du erakunde honek denborak aurrera egin ahala?
Azkeneko hamarkadetan familia eredua aldatuz joan da politikak eta legeak ere aldatuz joan direlako. Abortuaren legearekin ere gauzak aldatu egin dira, emakumeak etxetik kanpo lan egiten hasi gara, dibortzioaren legeak aurrera egin du… Familiak gauza garrantzitsua izaten jarraitzen du, etengabe aldatuz doana. Gaur egun aniztasun handia dago gizartean: adituen arabera, estatu mailan 56 familia eredu bereiz daitezke gaur egun. Mota horien artean kokatu beharrekoa da guraso bakarrena; Ekonomia Lankidetza eta Garapenerako Antolakundeak (ELGAk) dioenez, gehien azaleratzen ari den familia-eredua gara.
Antzina kartzelagaz zigortzen zituzten ama ezkongabeak. Gaur, kartzela zigorrik ez badago ere, egoera ez da zoragarria, ezta gutxiago ere.
Gaur egun ikusezinak gara gizartean, politiketan kontuan hartzen ez gaituztelako. Kalean “zu guraso bakarra izateagatik diru-laguntza jasotzen ari zara” eta horrelakoak entzun behar izaten ditugu behin baino gehiagotan, sinesgaitza bada ere. Genero ikuspuntutik begiratuta, guraso bakarren familia eredua guztiz feminizatua dagoen kolektiboa dugu. Horrek arazo intersekzionala dakar, emakumeok berez emakume izateagatik bazterketa jasaten dugulako dimentsio askotan: beharrean, kalean, politikan… Imajinatu gainera amatasunean eta, horrez gain, amatasuna bakardadean eroaten. Ama langilea edo ikaslea izatea gogorra bada, are gogorragoa ama etxeko buru izanda!
Bestalde, testuinguru historikoari begira, instituzioek ez dute inolako babesik ematen, eta lehen esan bezala ikusezin bihurtzen gaituzte legeetan zein eskola-kurrikulumean, adibidez. Bazterketa horiek testuinguru ideologiko zehatz batean dute oinarria. Berez, duela hamarkada gutxi arte, Espainiako gobernuak kartzela antzeko zentro batzuetan sartzen zituen amatasuna bakardadean gauzatzen zuten emakumeak, umeak barne. Beste batzuei, “zorte” gutxiago zeukatenei, seme-alabak lapurtzen zizkieten: horren adibide dira Espainian lapurtutako 30.000 haurtxo jaio berriak.
Guraso bakarra izanik, nolako aldea ikusten duzu familia tradizional eta guraso bakarren familien artean?
Egia da guk sare gutxiago daukagula familia lez: azken batean figura bakarra dago seme-alabak zaindu ahal izateko. Hortik harago, gizarteak uste du guraso bakarren familiek hutsuneak dituztela eta gure familia ereduak “desegituratuak” bezala definitzen ditu. Baina “arazo” honi gertutik begiratzen badiogu, “hutsune” horiek gizarteak, gobernuak edo sistemak berak sortzen ditu. Gure familiak diren bezalakoak dira, besterik gabe!
Nola heldu daiteke pertsona bat guraso bakarra izatera?
Bide ezberdinetatik heldu daiteke: lagundutako ugalketa baten ondorioz, espetxeratze bat dela eta, migrazio batengatik, alargun bilakatzeagatik, indarkeria matxista jaso duen emakumea izatearen ondorioz…
Zu zeu egoera horietako batean izan zinen duela 12 urte.
22 urte nituela haurdun geratu nintzen, Balear uharteetan nengoela. Haurra jaio zenean ez zegoen nire adineko pertsonarik herrian nire umearen adina zuen seme-alabarekin. Nire kasuan, indarkeria matxista jasan izanagatik hasi nuen bizimodu berri hau guraso bakarra lez.
Familia hezteko orduan zer nolako oztopoei aurre egin behar diete guraso bakarrek?
Asko dira, baina adibide praktiko bezala, guraso biz osatutako familiek onurak dituzte garraioan, kiroldegian, Ondasun Higiezinen gaineko Zerga (OHZ) ordaintzeko orduan, errenta aitorpena egin behar denean, bekak, lana eta familia bateragarri egiteko laguntzak eskatzeko orduan… Gu, halako abantailarik ez izateaz gain, baztertuta geratzen gara gizartean. Guraso bakarra izatearen alde txarrena haurraren aita edo ama gaixotzen denean izan ohi da, zaintza ezin dugulako behar bezala gauzatu. Alderik onena, ostera, seme-alaba horiekin dugun lotura sendoa litzateke: benetan berezia eta indartsua da.
Zer egin dezakete guraso bakarrek gaur egungo egoera aldatu ahal izateko?
Gaur egun emakume asko injustizia horiei aurre egiteko salaketak jartzen ari dira, familia tradizionalen aitatasun edo amatasun baimen horiek erdiesteko, baina horrek ezagutza maila altua izatea eta inbertsio garrantzitsua egitea dakar eta hori ez dago edonoren esku, zoritxarrez.
Sistema honetatik zer aldatuko zenuke zuk, guraso bakar bezala, lehenik eta behin?
Gaur egun politikak, eskola-kurrikuluma… bizi dugun egoerara egokituko nituzke: familia eredu pilo bat existitzen dira gaur egungo gizartean eta ezaugarri ezberdinak izan arren, eskubide berdin-berdinak izan beharko lituzkete.
Betidanik esan izan digute familia bat guraso bik eta seme-alaba(k) osatzen dituela, baina praktikan, familia ez al da indibidualismotik ihes egiten eta jendea nolabait “elkartzen” duen giza egitura, odol kontu hutsa baino?
Jendeak uste du familia odoleko ahaideek sortutako taldea dela. Nire ustez, antzinako pentsaera edo erlijioarekin lotutako kontua da hori. Azken batean, familia bizitzan zehar sortzen dugun “gauza” bat da.
☉ Ugao
‘Umeentzako Antzerkiak’ hiru antzezlan eskainiko ditu euskara hutsean Ugaon
Abenduaren 8tik 22ra antolatu dituzte antzezlanak. Saioak doakoak izango dira eta 12:30ean prestatu dituzte Jane jauregian
Ugaoko Udalak Umeentzako antzerki zikloa antolatu du euskara hutsean eta doan abenduaren 8tik 22ra. ‘Erbia eta dordoka’, ‘Ama, amama, mamuak!’ eta ‘Kuku: ezkutuan dauden emakumeak’ izango dira haurrentzako saioak eta Jane jauregian prestatu dituzte 12:30ean.
Glu Glu taldeak ‘Erbia eta Dortoka’ alegia mitikoa taulara eramango du. Kondaira zaharrek haurrak dibertitzeaz gain, hezteko ere balio dute. Umeek primeran pasatzen duten bitartean adimena garatzen laguntzen dien istoriak dira. Kasu honetan, lanaren, konstantziaren eta ahaleginaren garrantziaz jardungo gara.
Erbiak dortokari beti barre egiten dio, zergatik eta poliki ibili ohi delako, gauzak astiro egiteko ohitura duelako. Halako batean, Dortokak lasterketa egitea proposatuko dio erbiari: ea zeinek mendia azkarren gurutzatu. Erbiak pozarren onartuko du erronka.
Erbiak eta Dortokak beste animalia askorekin topo egingo dute bidean. Denen artean, alegia klasikoa kontatzeaz gain, abesti herrikoien laguntzaz, lasterketa hau antzezlan komikoa bihurtuko dute.
‘Kuku: ezkutuan dauden emakumeak’ // Eidabe teatroa
‘Ama, amama, mamuak!’ antzezlanak hildakoei, mamuei eta oroitzapenei buruzko abentura zirraragarria erakutsiko die 5 eta 12 urte bitarteko haurrei. Nerea Ariznabarreta eta Aitor Vinagreten obra honek laguntasunaz, familiaz eta bizitzaren zikloaz hitz egiten duen istorioa taularatuko du. “Gogoratzen ditugunak gurekin izango ditugulako. Gogoan geratzen dena hiltzen da azkena”.
Eidabe teatroak bi antzezle ekarriko ditu eszenatokira ‘Kuku: ezkutuan dauden emakumeak’ obrarekin. Antzerki bat egitera etorri dira, argi dute hori, baina argazkiz eta negatiboz betetako kutxa bat azaltzen da antzokiak. Nork ekarri du? Zertarako? Norenak dira argazki horiek guztiak? Vivianenak al dira? Antzerkia egin ahal izango dute, edo argazki horiek harrapatuta geldituko dira eta euren istorioak publikoarekin elkarbanatu behar izango dituzte?
☉ Ugao
Goio Ramos ugaotarrak ‘London Calling’ eleberria aurkeztuko du Durangoko Azokan
Ramosek Ahotsenean hartuko du parte hilaren 8an eta Elkar Pozan izango da abenduaren 10ean
Gaurtik hasita eta abenduaren 8ra arte izango da Durangoko Azokaren 59. edizioa eta Hego Uribeko sortzaileen artean Goio Ramos irakasle eta idazleak bere lehen liburuaren aurkezpena egingo du bertan.
Izan ere egun bitan egongo da Ramos Durangon: hilaren 8an kontzertua eskainiko du Ahotsenean Kepa Criadorekin batera 17:30ean, eta abenduaren 10ean Elkar Pozan izango da 18:30etan, bere lehen eleberriaren aurkezpen musikatua egiten.
London Calling
Iaz Zubikarai beka irabazi zuen Goio Ramos ugaotarrak eta 4.000 euroko sariaz gainera eleberri bat idazteko aukera eman zioten. Urtebeteko lanaren ostean, buruan zeukan proiektuari bizia eman dio Ramosek: ‘London Calling’.
“Istorio horren barruan pertsonaia nagusien arteko harremanak eta nondik norakoak kontatzen ditut, besteak beste”. Helduentzako eleberri bat idazten duen lehen aldia da honako hau Goiorentzat, orain arte umeentzako kontakizunak idatzi baititu.
Eleberri hau, gainera, musika taldeek kontzertuetan duten egiturarekin osatu du Ramosek (kontzertu baten egitura du: introa, setlista eta outroa), musikak ugaotarraen bizitzan duen pisu handiagatik.
London Calling liburuaren nondik norakoak artikulu honetan jaso zituen GEURIAk joan den urriaren amaieran.
☉ Ugao
Pruden Peña ‘Ecos de Ugao’ aldizkariko zuzendari ohiak aztarna sakona utzi du herritar askorengan
Ontzi-enpresa bateko zuzendaria izan zen besteak beste eta munduari sei edo zazpi aldiz bira eman ziola azaldu diote herritarrek GEURIAri
Odol emaileen ‘Ecos de Ugao’ aldizkariko zuzendari izandako Pruden Peñaren heriotzak aztarna sakona utzi die auzotar askori. Duela egun bi zendu zen ugaoko auzotarra, baina herrian utzi duen oroimenaren inguruan berba egin dugu auzotarrekin.
“Umezurtz utzi gaitu Ugaon, hainbat zentzutan. Goian bego, Pruden. Valdeande bere herriko Junkaleko Ama Birjina, eta bere beste herrikoa, Ugaoko Udiarragakoa, zu zaintzen ariko dira orain”, azaldu du Iñaki García Uribe ugaotarrak.
Pruden Peña ugaotarraren heriotzaren berri izan berri dut”, adierazi du Ekaitz Mentxaka Corral alkateak bere sareetan. “Pertsona eredugarria, arrastoa uzten duten horietakoa, ahazteko benetan zaila diren pertsona horietakoa; beti besteei laguntzeko prest eta gure herriaren alde lan egiteko prest egon izan da”.
Herritar arduratsua
Herriari ekarpen asko egin zizkion herritarra izan zen Pruden. Jende gaztearentzat ziurrenik pertsona ia ezezaguna izango zen, baina Ugaoko nagusiek eta adinekoek ondo badakite herriari modu praktiko batean laguntzeko prest zegoela beti.
Urte asko zeramatzan erretiratuta Prudenek (20 baino gehiago) eta azken urteetako osasun arazoek makal utzi zuten, baina aktibo egon zen garaian lan ezberdinetan aritu zen Ugaokoa: ontzi-enpresa bateko zuzendaria izan zen besteak beste eta munduari sei edo zazpi aldiz bira eman zion lan hartan.
“Herriko familien elkartean lan egin zuen bereziki, Ugaori dagokionez”, azaldu du Garciak. “Francoren garaitik gaur egun arte iraun duen Ugaoko elkarte bakarra da eta herriko familia guztiak elkartzeaz arduratu egiten zen”. Prudenek kolaborazio lan ugari egiten zuen odol emaileen elkartearekin, eta talde hark argitaratzen zuen aldizkariko zuzendaria zen urte askotan zehar. Argazki makina gainean eramaten zuen gainera, aldizkarian Ugaoko bizitza sozialaren inguruko publikazioak egiteko. “Estankotik ere argazkiak bidaltzen nizkion, kubritu ezin zituen jardueren edukiak izateko”.
Pruden, Adolfo Suarez Espainiako presidente ohiarekin // Iñaki García Uribe
Kazetari lan horiek egiteaz gainera odol erauzketak koordinatzen zituen herriko anbulatorioan. Udiarragako jaietako pregoilaria izan zen Peña. Iñakik azaldu du Ugaoko jaietako pregoilari izateak “ilusio berezia” egin ziola herritarrari: “Herriak berari egindako opari handiena dela uste dut”.
“Kultura handiko pertsona zen eta bere laguntza adineko jendeari bideratu zion bereziki eta ekarpen ugari egin zizkien”, gehitu du Garcíak eta Adolfo Suarez Espainiako presidenteak Ugaora egindako bisita batean berarekin argazki bat egiteko aukera izan zuen (lerro hauen gainean ikusgai) herrian poteak hartzen zituzten bitartean. “Pasarte hura benetan xelebrea izan zen!”.
☉ Ugao
Menopausiaren inguruko tailerra eskainiko dute esparruko aditu bik Ugaon
Abenduaren 10 eta 17an antolatu dute ‘Bidaia menopausian zehar, autoezagutzatik eta plazerretik abiatuta’ tailerra, Jane jauregian, 17:00etatik 19:00ak arte
Abenduaren 10 eta 17an ‘Bidaia menopausian zehar, autoezagutzatik eta plazerretik abiatuta’ izeneko tailerra eskainiko dute Jane jauregian, 17:00etatik 19:00ak arte eta izena emateko berdintasuna@ugao-miraballes.eus helbidera e-posta idatziz edo 946 480 711 telefono zenbakira deituz egin daitezke.
Tailerra Ugaoko Udaleko Berdintasun sailak antolatu du menopausia beren gorputzaren autoezagutzatik, plazerretik eta ongizatetik lantzeko deia sentitzen duten emakumeei zuzendu dute: “Edukiaren lanketa integrala izango da, alderdi klinikoak zein sexologikoak barne, eta, batez ere, generoaren aldagaia eta, honek, emakumeen bizitzan, osasunean eta sexualitatean bizitza osoan eta, bereziki, bizitzaren une honetan duen pisua kontuan hartuta”, azaldu dute Udaletik.
Tailerra Izaskun Zarrandikoetxeak eta Janire Mirandak zuzenduko dute. Izaskun sexologoa, berriz berrelkartze-terapeuta eta indarkeria matxistetan espezializatutako gizarte langilea, da eta Janire ginekologian eta obstetrizian espezializatutako erizaina, Osakidetzako emagina.
☉ Ugao
Bizkaidendak aplikazioak Ugaobonoak zuzenean trukatzeko aukera eskainiko die herritarrei aurten
Aurten 3.000 Ugaobono banatuko dituzte, iaz baino 1.400 gehiago, “ingurumenarekiko konpromisoa babestuz eta saltokien zein herritarren arteko banaketa zuzena bultzatuz”
Ugaobono 2024 kanpaina abenduraen 2tik 31ra antolatu du aurten Ugaoko Udalak eta 3.000 txartel banatuko dituztela adierazi dute gaur goizean osoko bilkuren aretoan egindako prentsaurrekoan, iazkoan baino 1.400 gehiago. Udalak aurrekontuko 16.000 euro bideratu ditu kanpaina honetara.
Aurten, Bizkaidendak Bizkaiko merkatarien ostalarien eta zerbitzu-enpresen elkarteen federazioaren bonuen aplikazioari esker ugaotarrek telefono mobilaren bidez trukatu ahalko dituzte kanpainako txartelak: “Prozesua arinagoa, jasangarriagoa eta txartel horiek erabili nahi dituzten pertsonen ordutegietara egokitzeko modukoa izango da”, azaldu du Ekaitz Mentxaka Ugaoko alkateak.
Berritasun honi esker, 18 urte baino gehiagoko herritarrek bonuak zuzenean trukatu ahal izango dituzte programari atxikitako establezimenduetan NANa aurkeztuz. Horrela, aurreko urteetan eman behar ziren pausuak ekiditeko aukera izango dute: udaletxera ordutegi jakin batzuetan joan, txartelak hartu…
Herritar bakoitzak hiru bonu erosi ahalko ditu: 30 euroko bat eta 10 euroko bi, eta erosketaren prozesua hiru urratsetan egin beharko dea azaldu dute udal ordezkariek: erosketak Ugaon egin beharko dira, erabiltzaileek atxikitako establezimenduan izena, abizena eta NAN zenbakia adierazi beharko dute eta atxikitako saltoki horiek Ugaobonos aplikazioaren bidez trukatu nahi diren bonuei dagokien deskontua aplikatuko diete.
Aldaketa honen ondorioz txartel fisikoak desagertuko dira “ingurumenarekiko konpromisoa babestuz eta saltokien zein herritarren arteko banaketa zuzena bultzatuz”.
Bonu mota bi
30 euroko 1.000 bonu banatuko dituzte guztira eta 20 euroko prezioa izango dute. 10 eurokoak 7,5 euroko prezioan ipiniko dituzte salgai.
“Bonuak ‘Ugaobono 2024’ kanpainari atxikitako establezimenduetan erabili ahal izango dira, eta erakusleihoetan kanpainaren identifikazio-kartela jarriko dute. Gainera, bonuen bi egokitzapen egingo dira saltokien artean, kontsumitu gabeko bonuak agortu dituzten saltokien artean banatzeko”, azaldu dute udal ordezkariek.
Udalak urtero abiarazten duen kanpaina honen helburua tokiko merkataritza indratzea da eta “ugaotarren artean aurrezpena sustatzeko konpromisoa berresten duela” gehitu dute Udaletik.
Hego Uribeko eta Kurdistango musikariek emanaldia eskainiko dute Durangoko Azokan
‘Txapel’ek ‘Izarrak eta Haitzak’ liburua aurkeztuko du Pou anaiekin, Durangon
Arrigorriagako Gazteguneak Gabonetako irteera antolatu du Donostiako izotz pista eta ihes gelara
Argazkiak / Euskara ahoan, 120 lagunek hartu dute parte Galdakaoko Mintzodromoan
Argazkiak / Tortilla, indabak eta giro bikaina Usansoloko jaietako herri bazkarian
Argazkiak / ‘Konponbidea ez bazara, arazoa zara’ lemapean manifestazioa egin dute A25ean Galdakaon
Hego Uribeko eta Kurdistango musikariek emanaldia eskainiko dute Durangoko Azokan
Bideoa / Zein da euskarak duen hitzik politena? Galdakaon erantzun dute!
