☉ Ugao
Joseba Urrutikoetxea: “Estatu gehienek ez dute onartzen hizkuntza eta identitate ezberdinak izatea”
Erdialdeko eta Hego Amerikako hamabi hizkuntza gertutik ezagutu dituzte eta komunitatearekin bertatik bertara bizi izan dira Wakaya proiektuko kideak.
Erdialdeko eta Hego Amerikako hamabi hizkuntza gertutik ezagutu dituzte eta komunitatearekin bertatik bertara bizi izan dira Wakaya proiektuko kideak
Joseba Urrutikoetxea (Ugao, 1990) ugaotarra Wakaya proiektuan murgilduta dabil eta hainbat hilabetetan Erdialdeko eta Hego Amerika zeharkatzen dabil, hango lau hizkuntzetatik bat desagertzeko zorian baitago. Mapa linguistikoa osatuko dute bertatik bertara, aurrerago dokumental interaktiboa grabatzeko asmoz. Hauek dituzte eginkizun: Sustraiei eutsi, hizkuntzak desagertzeko arazoa jakinarazi, herrien autonomiari eusteko hizkuntzak giltzarri direla erakutsi eta kultura zein hizkuntza aniztasuna defendatu. Hizkuntza kulturaren motor baita, hau da, edozein komunitatetan hizkuntzaren bidez adierazten dituzte ideiak, baloreak sentimenduak eta mundua ulertzeko erak.
Zergatik sartu zinen proiektu honetan?
Proiektua orain dela ia bi urte hasi genuen. Bartzelonan bidaia-kazetaritza master bat egin nuen eta bertan hasi ginen ideiari bueltak ematen. Masterra azaroan bukatzen zen eta ez genekien zer egin amaitu ondoren. Bagenekien Hego Amerikan bidaia bat egin nahi genuela, baina aitzakia bat behar genuen. Bertan elkartu ginen lankideok gutxi-gorabehera ikuspuntu politiko eta ideologiko bera genuen eta erraza izan zen proiektua sortzea. Abuztuan izan genuen lehen bilera. Ondoren, prestaketa lanak, hegazkina hartzeko unean dena prest egon zedin. Azaroan, ikasketak amaitzean, bakoitza bere etxera bueltatu ginen -bakoitza estatuko eta munduko hainbat tokitakoak gara- lan egin eta dirua aurrezteko.
Nire kasuan, Euskal Herriak antzeko egoera bat bizi du hizkuntzarekiko eta mundua ikusteko beste era batzuk ezagutu nahi nituen. Dokumental sozialak egitea gustuko dut eta proiektu aproposa da niretzat. Baita bidaiatzeko aukera ezin hobea ere, noski!
Ugao eta lagunak urrun daude?
Oso. Nahiz eta bizi garen mundu globalizatu honetan erraza izan edozein puntutako norbaitekin harremanetan jartzea, berotasun falta nabari da pilo bat. Bi une garrantzitsu pasa dira jada, Gabonak eta nire urtebetetzea, eta horiek zure eremutik kanpo igarotzea batzuetan gogorra da, baina badakit hau ez dudala berriz izango eta aprobetxatu beharra dago. Ordutegi ezberdinak izatera ohitzea egiten zait zailena: nik zeozer kontatu nahi eta zuok han lo. Euskal musika mobilean jartzeak ere laguntzen dit hurbilago sentiarazten. Baina bai, gehien estimatzen dudana herria eta lagunak dira, noski.
Euskaldun izateak laguntzen al dizu beste hizkuntzen arazoak hobeto ulertzen?
Asko laguntzen du bai. Hala ere, hemengo errealitatea guztiz desberdina da gurearekin alderatuz gero. Euskararen kasuan pribilegiatuak gara ditugun oinarri eta sareekin. Estatu askok, ia gehienek, ez dituzte onartzen ez identitate ez hizkuntza ezberdinak, zapalkuntza ikaragarria da zenbait komunitatetan. Espainola ez den leku batetik zatozela eta beste hizkuntza bat hitz egiten duzula azaltzean harritu egiten dira eta nolabait konexio bat sortzen da, horrek lanean asko laguntzen dit. Baina euren egoerak eta istorioak entzutean konturatzen zara bizi duten errealitatea oso gordina dela. Ospitaletan, auzitegietan… euren hizkuntza propioan ezin agertzeak arazo larriak sortzen dizkie bertoko biztanleei, ez baitute espainola ezagutzen edo ez dira eroso sentitzen berba egitean. Gobernuek ez dute horren alde ezer egiten edota itzultzaile zatarrak ipintzen dizkiete eta euren kabuz egin behar dituzte proiektuak holako egoeretan laguntzeko, dena boluntarioki eta inongo diru-laguntzarik gabe normalean.
Horrek ere laguntzen du guk dugun altxorra baloratzen eta hausnartzen, autokritika egiten hobe esanda. Askotan ez diogu behar duen garrantzia ematen euskarari.
Proiektuaren zein unetan zaudete?
Momentuz erdialdeko Amerika ia amaituta dugu. Ni Panaman nago Ngabe komunitatean lanean eta beste kide batzuk Costa Rican daude. Urrian hasi ginen Mexikon eta azken hilabete hauetan hamabi hizkuntza eta herri landu ditugu. Nire ustez bete duguna batez ere izan da komunitateekin eskuz esku lana egitea eta eurek gu beso-zabalik hartzea. Haien etxeetara sartzea, gune pribatuetara joatea, baita askotan langile asko heldu ez diren tokietara ere. Lortutako helburu nagusia hori da, komunitateen egoera aurrez aurre ikustea, azken finean eurak izan behar dira protagonista nagusiak.
Wakaya proiektuko kideak // Utzitakoa
Zein zailtasun dituzue bertako herritarrekin konektatzeko?
Oro har, ez ditugu arazo asko izan. Beti aurre kontaktu batekin goaz komunitateetara, inoiz ez bakarrik. Euren egoera zein den entzun, ikasi eta ondoren grabatzeko baimena eskatzen diegu. Bertakoak ezkor egotea normala da. Izan ere, sarritan etorri dira kanpotarrak proiektuak egitera eta, bertan ezer utzi gabe, joan egin dira. Gure kasuan hori beti betetzen dugu, egindako lanaren kopia bat komunitatean bertan utzi eta eurek protagonista aktibo izatea bilakatuz, azken finean bertokoek egon behar dute gustura materialarekin. Nik uste horrek gure alde jokatzen duela eta ate gehiago zabaltzen dizkigula.
Nola bideratzen duzue ekonomikoki?
Proiektua guztiz autofinantzatua da, ez dugu inongo diru-laguntza edo bekarik jasotzen. Jendea harritu egiten da hori entzutean baina hala da. Ez genuen nahi inongo gobernu edo erakunderik gure lanaren gainean egotea, askotan horrek adierazpen askatasuna murriztu dezakeelako, eta gure premia da herrien ahotsa entzutea, nahiz eta estatu edo gobernuei ez gustatu. Nik uste, hau ahalmen bat ere bilakatu dugula komunitateei proiektua aurkezterako orduan, ikusten baitute gure lana guretzat oso garrantzitsua dela. Ahalik eta gehien aurreztea da beste atal garrantzitsua. Edozein lekutan lo egiteko prest gaude: herrian bertan, etxeetan gonbidatu moduan… Herritarren harrera ikaragarria izaten ari da, gehien miresten duguna dela esango nuke. Bestalde, crowdfoundig kanpaina bat ere zabaldu genuen edonork ekarpenak egiteko: lagunak, familia, gertuko ezagunak eta gu geu gara emaile nagusiak.
Zer falta duzue proiektua amaitzeko?
Ideia Hego Amerika osorik amaitzea da, Argentinaraino. Momentuz ekonomikoki arazoak ditugu aurrera jarraitzeko baina saiakera egingo dugu, seguru. Egoera oso larria izan arte ez gara bueltatuko. Proiektua amaitzeko bueltatu behar dugu, izan ere, orain dokumentatzen besterik ez gabiltza. Bueltatzean grabatutako dena montatu eta www.proyectowakaya.com webgunean dokumental interaktiboa eskegiko dugu. Beraz, lan pilo falta da oraindik. Behin hori osatuta, doako produktu moduan eskaintzen da gure ideia, edonoren eskura jartzea. Ondo legoke bueltan bidaia bat egitea komunitateetan proiektua aurkezteko. Baina, auskalo!
☉ Ugao
Urtzi Verak maila guztietako zaleentzako argazkilaritza monografikoa eskainiko du Ugaon
Izena emateko azken eguna urriaren 18a izango da eta klaseak hilaren 23an hasiko dituzte Jane jauregian
Ugaoko Jane jauregiak Urtzi Vera argazkilariaren argazkilaritza digitaleko 27 orduko tailerra hartuko du. Ikastaroaren lehen eguna urriaren 23an izango da eta asteazkenero izango dira klaseak 17:00etatik 20:00ak arte.
Udal ordezkarien arabera, jarduera maila guztietako interesdunei zuzenduta dago eta izen emateak urriaren 18ra arte egongo dira zabalik webgune honen bidez. Edukiera mugatua izango da eta monografikoan parte hartzearen prezioa 29 eurokoa. Ugaon bizi direnek lehentasuna izango dute.
Irakasleari buruz
Urtzi Vera artea eta natura maite dituen argazkilaria da eta sari ugari jaso ditu bere ibilbidean zehar eta guztien artean Fritz Polking izenekoa (2014) nabarmentzen da, urtero ematen dena eta Alemaniako argazkilariaren izena daramana. Basauriko I. Bridgestone Fotomaratoi solidarioa irabazi zuen 2022an ere, eta ez hori bakarrik; Amurriokoak bestelako sariak irabazi ditu eta den-denak bere webgunean iragarrita ditu.
Urtzi Vera irudien garai digitalean murgildu zen duela hamabost urte baino gutxiago. Ogibidez Industri ingeniari teknikoa da eta arkatz, errotulagailu eta plastilina artean eman zuen haurtzaroa. Betidanik maite izan zituen marrazketa eta jolas sortzaileak.
Unibertsitateko ikasketak amaitu ondoren, marrazketa, pintura eta eskultura tailerretara itzuli zen Vera. Oso urte entretenigarriak eta ikaskuntza handikoak izan ziren berarentzat, eta, ziurrenik, haien lanaren oinarriak finkatu ziren.
Natura eta animaliak inspirazio-iturri izan ditu beti. 2005ean, mendira kamera konpaktu bat eramatea bururatu zitzaion… eta momentu hartan piztu zitzaion argazkigintzarekiko grina.
☉ Ugao
‘Musika Barra-Barra’ zikloak Striknina ekarriko du Ugaoko Felipe tabernara
Musika Barra Barra zikloa joan den martxoan hasi zen eta Kairos, Boogie Riders eta Gailu taldeen kontzertuak ekarri ditu Ugaoko tabernetara
Urriaren 4an Striknina taldearen kontzertua antolatu du Sarea Sound System elkarteak Ugaoko Felipe tabernan. Kontzertu hau Musika Barra-Barra zikloaren barnean kokatuta dago eta urriko bakarra izango da. Punk rock arin, melodiko eta arraro bezala sailkatutako kontzertua 20:00etan programatu dute.
Musika Barra-Barra zikloak joan den martxoan hasi zuen ibilera Ugaoko hainbat tabernetan zehar helburu nagusi batekin: kontzertuak Jane jauregitik atera eta jendea dagoen lekuetara eroatea: tabernetara, alegia: “Oraingo honetan ez gara zure zain egongo, oraingo honetan zeugana joko dogu, bai, tabernetan” lelopean, lau kontzertu eta bakarrizketa bat antolatu zituzten joan den martxotik abendura arte.
Estrategia aldaketa honek tabernetan bilatu nahi ditu kontzertuetako target-ak eta Sareak kontzertu sorta interesgarria antolatu du udaberri eta udazkeneko datetan. Lehena martxoaren 1an izango da (bariku honetan): Hego Uribeko Kairos taldeak lehen kontzertua (estreinaldi kontzertua) eskaini zuen Ugaoko Dorretxea Herriko tabernan, eta atzetik igaro dira Boogie Riders eta Gailu, Beti Alai eta Zelai tabernetan.
Hurrengo jarduerei begira, azaroaren 1ean Ane Lindanek bakarrizketa eskainiko du Lainoa tabernan eta abenduaren 1ean Mississippi Queen izango da jubilatuen etxean.
Egitaraua | Musika Barra-Barra 2024
Martxoak 1, barikua
21:30 Kairos, Ugaoko Dorretxea Herriko Taberna
Apirilak 14, domeka
13:00 Boogie Riders, Beti Alai
Maiatzak 3, barikua
20:00 Gailu, Zelai
Urriak 4, barikua
20:00 Striknina, Felipe taberna
Azaroak 1, barikua
20:30 Ane Lindane (bakarrizketa), Lainoa
Abenduak 1, domeka
20:00 Mississippi Queen, Jabilatuen etxea
☉ Ugao
Auzo Foroa sortu du Ugaoko EH Bilduk, herritarren beharrak entzuteko
Lehen saioa Usila, Markio eta Iturrigorrialdeko herritarrekin antolatu dute datorren urriaren 7an
Ugaoko EH Bildu alderdiak Auzo Foroa izeneko ekimena ipini du martxan, herria osatzen duten auzoetako beharrizanak entzuteko: “Gure herriko auzoen garapen integral eta orekatua helburu duten tokiko politikak diseinatu eta abian jartzera zuzendutako herritarren parte-hartze, gogoeta eta lankidetza osatzea da”, azaldu dute EH Bildutik. Ekimen hau azken hauteskundeetako udal programaren barruan eraman zuen EH Bilduk.
Foroak auzoka prestatu dituzte eta lehen saioa Usila, Markio eta Iturrigorrialdeko herritarrekin antolatu dute datorren urriaren 7an. “Herritarren beharrizanei ahalik eta ondoen entzuteko ezinbestekoa da herriaren, bertako guneen eta auzoen egoerak aztertu, horien beharrizanak ezagutu eta proposamen zehatzak aztertzea, herria herritarrek eraiki behar dutelako”, azaldu dute Ugaoko EH Bilduko ordezkariek.
Asmoa lehen bilerako formatua beste auzoetan errepikatzea da, bertako herritarrekin elkartu eta eskaerak, zalantzak eta ideiak jasotzeko: “Ondoren lanketa sakon bat egingo dugu eta jasotako informazioarekin Ugaoko Udalean ideiak luzatzeko”.
☉ Ugao
Ugaok Aisialdiko Monitore ikastaroan izena emateko epea zabalduko du astelehenean
Ikastaroa prestakuntza jaso eta arlo honetan titulazioa lortu nahi duten gazteentzat diseinatu dute eta izena emateko azken eguna urriaren 10a izango da
Ugaoko Udalak Aisialdiko Monitore ikastaroan izena emateko epea zabalduko du irailaren 30ean “Gazteinfo” gazte emantzipazio eta enplegu bulegoaren bidez. Ikastaroa prestakuntza jaso eta arlo honetan titulazioa lortu nahi duten gazteentzat diseinatu dute eta joan den maiatzean abiarazitako Txapelfest ekimenetik dator, udalerriko gazteek egindako iradokizunetatik.
Guztira 310 orduko ikastaroa izango da: 150 ordu teoriko eta 160 praktikak egiteko. “Eskola teorikoak 12
asteburutan emango dira, urritik maiatzera”, azaldu dute udal ordezkariek, eta honela banatu dituzte: bederatzi asteburu Ugaon eta hiru Ugaotik kanpoko aterpetxe batean. Klaseen ordutegia ostiraletan 18:30etatik 21:00etara eta larunbatetan 10:00etatik 18:00etara izango da.
Ikastaroan izena emateko azken eguna urriaren 10a izango da eta Gazteinfo bulegora hurbilduz egin daiteke (Astelehen eta asteazkenetan 17:00etatik 20:00etara eta astearte, ostegun eta ostiraletan 12:00etatik 15:00etara). Ikastaroaren zenbatekoa 360 eurokoa da eta baldintza bakarra interesdunek 18 urte beteta izatea da.
“Aukera bikaina da aisialdiko begirale gisa dituzten trebetasunak garatu eta hezkuntzaren eta aisialdiaren esparruan esperientzia teorikoa eta praktikoa eskuratu nahi dutenentzat”, azaldu dute udal ordezkariek.
Informazioa handitzeko 747 402 383 telefono zenbakia eta gazteinfo.ugao@ortzadar.es helbidea ahalbidetu dute.
☉ Ugao
Hiru herritar kontratatuko ditu Ugaok enplegua sustatzeko toki ekintzetarako
Kontratatuak lanaldi osokoak izango dira eta aukeratutako herritarrak urrian hasiko dira lanean
Ugaoko Udalak, Lanbide Euskal Enplegu zerbitzuarekin lankidetzan zerbitzu anitzetako peoi bi eta artxibatzeko eta digitaziorako administrari laguntzaile bat kontratatuko ditu lanaldi osoan urrian bertan hasteko.
Zerbitzu anitzetako peoi bien kontratuak lau hilabeterako izango dira eta administrari laguntzailearena, sei hilabeterako: “Hautaketa Lanbidek emandako zerrendako hautagaien artean bakarrik egingo da”, azaldu dute udal ordezkariek, betiere deialdian ezarritako hurrengo baldintzak betetzen badituzte:
– Kontratatutako pertsonek langabezian eta izena emanda egon beharko dute, eta Lanbide-Euskal Enplegu Zerbitzuan enplegu-eskatzaile gisa alta emanda ere
– Ugao erroldatuta egotea gutxienez 6 hileko antzinatasunarekin
– Lan-esperientzia, lanpostuarekin lotutako prestakuntza akademikoa, eta egoera soziolaborala zein familiarra baloratuko dira
Informazioa handitzeko Gazteinforekin harremanetan jartzea gomendatu dute Udaletik 946 322 014 edo 747 402 383 telefono zenbakietara deituz edo zuzenean bulegora joanez (Udiarraga kalea, 39), astelehenetik ostegunera, 17 :00etatik 20:00etara eta ostiraletan 10:30etik 13:30era.
Bideoa / Jon (Los Gambas): “Playbackean pailazoarena egitea da gehien gustatzen zaiguna”
Zeberioko Santa Kurtze ermitako lanak hilabete bukaeran amaituko dituzte
Arrigorriagak 7.000 Arrigobono ipiniko ditu eskuragarri herriko 40 saltokitan
Argazkiak / San Migeleko jaietako Playback lehiaketan ere txapeldun Los Gambas kuadrilla
Argazkiak / Los Gambas kuadrilla izan da txapeldun San Migeleko jaietako Olinpiadetan
