Sareak

☉ Ugao

Ruth Morgado: «Loreekin gustu ona izateak ez du balio; lore-sorta ondo egiten jakin behar da»

Ruth Morgadok 25 urte zituela ireki zuen bere negozio propioa: Arrigorriagako Kreta Floristas. Lore-sortak, lore-konponketak eta landareak dauzka eskura bertan

|

Ruth Morgado, Kreta Floristas // Geuria

Loradendak pixkanaka desagertzen doazen garaian, Arrigorriagako Kreta Floristas dendako Ruth Morgado Elorzek (Zaratamo, 1977) herritarrak landareetara hurbiltzeko sekretua aurkitu duela dirudi. Whatsapp-en hedapen zerrenden bidez eta sare sozialak erabilita, eskaintza bereziak egiten dizkie bezeroei, eta abisatu eta 20 minutu eskasera, dendatik pasatu, eta nahi dutenek lore-sortak azkar batean izan ditzakete eskura. Ugaon 15 urte baino gehiagoz bizi izan den lorazainak gogoko ditu erronkak: 25 urte zituenean ireki zuen loradenda propioa, gaztetan “gauza berriak” egiteko gogoa sentitu zuelako, eta gogo horrek, oraindik ere, irauten duelako. Aurten, gainera, publikoaren arreta bereganatzeko beste lorpen bat egin du Morgadok, Bizkaidendak elkartearen IV. Erakusleiho Lehiaketako Arrigorriagako lehen saria irabazita.

Noiz hasi zinen loragintzari lotutako lanak egiten? Kreta Floristas denda 2001eko abenduan ireki nuen, 25 urte neuzkanean. 1998tik aritu naizenez loreen munduan, ordurako baneukan esperientzia. Izan ere, nire negozioa zabaldu baino lehen, Ugaon, Bilbon eta Leioan lan egin izan dut: nire osabaren dendetan, Flores Elorzen, eta Leioan, Elexalde dendan. Hala ere, onena nire aldetik jardutea zela erabaki nuen, eta familiaren laguntzarekin (ama ere nirekin dago Arrigorriagako dendan) pausoa eman eta autonomo egitea erabaki nuen. Egun, egia bihurtu den ametsa da nire kabuz lan egitea.

Familiak honetan jarduten bazuen, zergatik sortu denda propioa? Jakin-min handia izan dudalako betidanik. Gainera, 25 urte nituenean, lanbideak eskatzen zuen heldutasuna neukala sentitzen nuen, eta, beraz, ausartu egin nintzen. Gaztetan gauza berriak egiteko gogoa neukan, eta oraindik ere badut.

Loregintza lanbidea izanik, esperientzia soilaz gain, ikasketak ere egongo dira horretan trebatzeko. Bai, noski! Ni prestatu egin naiz loregintzan jarduteko; hau ez da magia, ezerezetik sortzen den gaitasun bat. Lore-sortak ez dira politak ausaz, lanaren atzean dauden tekniken eta pausoen araberakoak dira. Loreekin gustu ona izateak ez du balio; lore-sorta ondo egiten jakin behar da. Eta horretarako, ikastaroak daude, sektorean profesional bihurtzeko balio dutenak. Ni prestatzen nenbilenean, guztiak ziren ordainpekoak, eta orain ez dakit berdin izaten jarraitzen ez badute. Hori bai, heziketa zentroetan eskaintzen ez den zerbait den arren, loregintza lanbide bat da.

Zertan trebatu zara Kreta Floristasen jarduteko? Dendan bezeroen neurrira egokitzen diren lore-konponketak egiten ditugu, norbere beharren araberakoak: sorta txikiak, espazio handietarako dekorazioak, lore naturalak edo freskoak erabiliz zein lore lehorrekin. Horretaz gain, landareak ere badauzkagu, gehienbat, barnekoak. Kaleko landareak saltzen ditugun arren, etxeetan espazio berdeak izatea oso modan dago gaur-gaurkoz, eta horregatik, opariak eta dekoraziorako lanak eskaintzen ditugu, bereziki.

Etxe handietarako izango dira gehienak. Ni pisu batean bizi naiz, eta landare asko dauzkat: mahai gainean jartzen direnak, zoruan, egongelan, logelan, sukaldean eta balkoian.

Landareak dira gehien saltzen direnak? Zeren bila dator jendea? Niri gehien gustatzen zaidana eta bezeroek ere asko eskatu ohi dutena lore freskoen konponketak dira. Ebakitako loreekin sortak eta lore-zentroak egiten ditugu.

Eta, egun, herritarrek gehiago eskatzen dituzte loradendetako zerbitzuak edo gutxiago? Bada, zoritxarrez, ez da hazten ari den sektorea; guztiz kontrakoa. Ni Arrigorriagan hasi nintzenean, bi geunden dendan, baina orain, bakarrik gelditu naiz. Herri txikietan, pixkanaka-pixkanaka, dendak desagertzen ari dira: Ugaokoa eta ez dakit San Migelen dagoena ere ez duten itxi. Ez dago honetan jardun nahi duen belaunaldi berririk, lan merkatua oso txikia baita. Baina gu, behintzat, aurrera goaz, eta egiten duguna ondo egiten jarraitzen dugu.

Jendearengana hurbiltzeko bide berriak, publiko ezberdina… Nola egin herritarrak lore-sortetara erakartzeko? Whatsapp-en hedapenerako taldea daukagu, nahi duena sar dadin. Bertan, asteroko eskaintzak zabaltzen ditugu: lore-sortak, landareak… Nahi duenak bertatik eska dezake produktua, eta ordu erdian jaso dezake dendan. Era berean, orain, sare sozialen bidez ere ematen dugu hemen egiten dugunaren berri: Facebook-en zein Tik Tok-en. Azken honetan, gainera, publiko berria daukagu, umeak. Neska-mutilei gustatu egiten zaizkie loreak, eta amari, aitari, aitona-amonei eta familia kideei oparitu nahi dizkiete. Gurasoek ere loreak oparitu nahi badituzte, seme-alaben iritzia asko hartzen dute kontuan.

Loregintzaren sektoreak ba al du indarrik Euskal Herrian? Loreak hemendik eta atzerritik ekartzen dituzue? Ekoizle askorekin egiten dugu lan. EAE mailan kaleko landareak dira gehien eskatzen direnak, baina baita denboraldiaren araberako loreak ere: pazko-loreak, adibidez, Bizkaiatik ekartzen ditugu, hemengo klimara ondo egokituta egoteaz gain, nire ustez, politenak ere badirelako. Orokorrean, Bizkaian erosi dezakedan guztia hemen erosten dut, baina ebakitako lorea ez da onenetarikoa. Hori Espainiako hegoaldetik ekarri ohi dugu, Cadiztik edo Chipionatik, besteak beste. Herbehereetatik edo Kosta Ricatik ere “bereziagoak” diren espezieak eta aldaerak ekartzen ditugu, eta Ekuadortik, arrosak, gehien gustatzen zaizkidan aleak baitituzte bertan. Beraz, bai, zenbaitetan, hurbiltasuna sakrifikatzen dugu kalitate hobeko produktuak lortzeko.

Nola jartzen zarete harremanetan ekoizle hauekin? Enpresek Bizkaian daukate egoitza, eta loreak kanpotik etorri arren, denak heltzen dira gune berera. Hortik banatzen dizkigute inguruko lorezainei.

Lore onenak hautatzeko proba egiten duzu erosi baino lehen? Bai. Pazko-lorearekin, adibidez, astebete lehenago hasten dut probatzea: Kantabriatik hartzen ditugu batzuk, Errioxatik beste batzuk eta Bizkaitik ere bai. Gabonetarako lore asko behar ditugunez, erosketa handia egin behar dugu; beraz, ondo egin behar dugu aukeraketa. Probatzen ditugunetik gehien gustatzen zaidana aukeratzen dut. Gero, behin hautaketa eginda, astero egiten dugu erosketa. Herbehereetara eskatzen dugunean, berriz, online egiten dugu: Bizkaira ekartzen dituzte eta bertako enpresak nire bidaltzen dizkit aleak.

Astero egiten dituzue eskaerak? Dendara egunero heltzen dira loreak. Agian, astelehenetan, Levante ingurutik heltzen direnak sartzen dira; astearteetan, Espainia hegoaldetik datozenak; asteazkenetan, Herbehereetakoak… Beharrizanen arabera. Gaur, adibidez, ostegunez, Errioxakoak helduko zaizkigu, eta bihar, Kantabriakoak.

Asko eskatzea arriskutsua izan daiteke gero saltzen ez bada. Gure produktua galkorra da, eta, noski, noizbehinka, loreak botatzen ditugu. Arraindegietan egiten den bezala, edo produktu iragankorrekin lan egiten duten denda guztietan bezala da hemen ere. Baina 20 urte baino gehiago lan honetan egon eta gero, badakigu nola kudeatu, eta gutxi botatzen ditugu.

Nola kontserbatzen dituzue loreak dendan dituzuen bitartean? Loreak saldu baino egun bat lehenago ekartzen ahalegintzen gara. Ondoren, kontserbatzeko produktuekin tratamendua jartzen diegu, azukreen antzeko osagaiekin eginda dauden produktuekin. Horrek loreak gehiago irautea ahalbidetzen du: nik heldu eta bost egunera saldu ditzaket, eta bezeroak, etxean, beste 15 egunez izan ditzake egoera onean.

Sikatu eta gero, beste modu batera berrerabili edo gorde daitezke? Jende askok eskatzen dizkigu sikatuta gorde daitezkeen loreak. Kolore askotako lore-sortak, mota jakin bateko aleekin, eta 15 egun igaro ondoren sikatzen utzi eta hilabete askoz horrela kontserba daitezkeen loreak nahi dituzte.

Noiz eskatu ohi ditu jendeak lore-sortak, egun berezietan baino ez? Normalean, bai. Otsailean, adibidez, San Balendin egunez, arrosa gorri asko eskatu ohi dizkigute. Hainbat aletako sortak ere egiten ditugu, baina arrosak dira gehien saltzen direnak. Martxoari dagokionez, 8an, Emakumeen Nazioarteko Egunean, lore asko oparitzen dira: emakumeen artean, amak alabari edo alabak amari… Denetarik dago. Egun berezi horien artean, baina, Domu Santu Eguna alde batera utzi behar izan dugu, ezin dugulako gustatuko litzaigukeen bezalako arreta eskaini. Egun horretan, lore freskoak eskatu ohi dira, eta, beraz, lore-sortak azken orduan egin behar dira, aleak gaizki jarri ez daitezen. Langile gutxi garenez, ezin diegu eskaera guztiei erantzun.

Arrosak, maitasunarekin; berdea, poztasunarekin… Lore motak eta beren koloreak oso egoera eta sentimendu konkretuekin lotzen dituzte batzuek. Bai, badago jendea loreen hizkuntza gogoko duena. Niri ez zait asko gustatzen. Uste dut norbaitek loreak oparitzen badizkizu —berdin da zein lore edo zein kolorekoa den—, pertsona horrek estimua dizun, maite zaituen edo zuretzako mezu bat duen seinale dela. Loreek beren kabuz hitz egiten dute.

☉ Ugao

Emahots Talde Feminista ugaotarra jaio da M8aren atarian

Datorren martxoaren 5ean taldearen aurkezpena egingo dute Jane jauregian, M8ko programazioari hasiera emanez

|

Emahotseko kide batzuk, Ugaon // Geuria

Emahots Talde Feminista jaio da Ugaon eta aurkezpena datorren martxoaren 5ean egingo dute Jane jauregian. Argazkian taldea osatzen duten gazte batzuk ikus daitezke, baina kideak faltan dira bertan: “Argazki honetan Emahotseko taldekideak falta dira: ez daudenak eta oraindik heldu ez direnak. Zuen zain gaude”, azaldu diote GEURIAri neska gazteek.

Aurkezpen honek hasiera emango dio Martxoaren 8aren aferan prestatutako programazio osotuari. Martxoaren 5etik 8ra taldearen beraren aurkezpena, bizipenen kontaketa eta bertso pintxo-potea antolatu dituzte herrian zehar.

Martxoaren 8an ekitaldi nagusi bi egingo dituzte: manifestazioa herri osotik eta amaitzeko, Ane eta Alazne taldearen kontzertu akustikoa, Ugaoko Dorretxea Herriko Tabernan.

Egitaraua | Emahots, M8

Martxoak 5, asteartea
18:30 Emahots Talde Feministaren aurkezpena, Jane jauregia

Martxoak 6, asteazkena
Adinekoen egoitzan bizipenak konpartitzen, adinekoen egoitza

Martxoak 7, osteguna
19:00 Bertso pintxo-potea, Maider Altuna eta Maddi Aiestaran bertsolariekin

Martxoak 8, ostirala
18:30 Manifestazioa, Herriaren enparantza
20:30 Kontzertu akustikoa: Ane eta Alazne, Ugaoko Dorretxea Herriko Taberna

Osorik irakurri

☉ Ugao

‘Osakidetza: sistema publiko baten suntsiketa’ hitzaldia eskainiko dute Ugaoko Dorretxean

Hitzaldia Ugaoko Dorretxea Herriko Tabernan antolatu dute gaur 18:30ean

|

Galdakao-Usansolo ospitalea // Geuria

Ugaoko Dorretxea Herriko Tabernak Osakidetza: sistema publiko baten suntsiketa izeneko hitzaldia antolatu du gaur bertan, 18:30ean.

Mahai-inguruan EH Bilduko Rebeka Uberak, LAB sindikatuko Txutxin Oñatek eta Iñaki Moreno Laudioko anbulatorioko erizainak hartuko dute parte.

Osorik irakurri

☉ Ugao

Envases Universales enpresak kaleratze kolektiboa abiaraziko du Ugaoko lantegian

Otsailaren 26an abiaraziko dute Ugaoko lantegiko kaleratze kolektiboa, enpresa batzordetik azaldu dutenez

|

Envases Universales enpresako sarrera, Ugaoko lantegian // Geuria

Envases Universales enpresak, antzina Domiberia lez ezaguna, kaleratze kolektibo baten prozesua abiaraziko du datorren otsailaren 26an (astelehena). Hala iragarri dute enpresa batzordearen sare sozialetan.

“Envases Universales zuzendaritzak, lehengo Domiberiak, enpresa-batzordeari jakinarazi dio otsailaren 26an, astelehena, Ugaoko lantegian kaleratze kolektiboaren prozedura hasteko asmoa duela”, azaldu dute batzordeko ordezkariek.

Kamioi bat, enpresako instalazioetan // Geuria

Joan den otsailaren 19an, astelehena, Envases Universales enpresako zuzendaritzak batzordeko kideak elkartu zituen Bilbon eta bertan, Endika Ibañez enpresa batzordeko presidenteak GEURIAri azaldu moduan, Aldi Baterako Enplegu Erregulazio-Espedientea (ABEE) zabalduko zietela komunikatu zieten: “Juridikoki modu legalean prozesu hau abiarazteko zazpi egun igaro behar dira, Aldi Baterako Lan Espedientearen nondik norako guztiak ezagutu ahal izateko. Espedienteak gradu ezberdinak izan ditzake: txarra, oso txarra… hiru kaleratze, 50, edo planta guztia ixtera hel daiteke, batek daki”, azaldu du batzordeko presidenteak.

Horiek horrela, egun hauetako ziurgabetasuna argitzeko, datorren otsailaren 26an, 16:00etan hitzordua dute batzordeko kideek enpresako zuzendaritzarekin, Bilbon. “Astelehenean jakingo ditugu xehetasun guztiak”.

Gaur egun 108 langilek osatzen dute Envases Universaleseko Ugaoko lantaldea, jubilatu aurrekoak barne. Iazko abuztuan, Envases Universales multinazionalak Domiberia erosi eta izenez aldatu zion.

Osorik irakurri

☉ Ugao

Renfek ukatu du Ugaoko geltokian trenekin ezbeharrik egon denik

Ateak modu egokian itxita ez dauden bitartean eta segurtasun mekanismo bati erantzunez, trena ezin da martxan jarri, Renferen arabera. “Beraz, ezin du inor harrapatuta arrastaka eraman”

|

Aldiriakeko C3 lineako tren bat // Geuria

 Xabier Zaballa de la Fuente ugaotarrak herriko tren geltokian azken 10 urteetan gertatu diren gorabeherak erregistratu ditu, GEURIAn azaldu bezala. Izan ere eta Ugaokoaren hitzetan, 2012an Aldiriakeko tren baten ateek bidaiari bat harrapatu ostean eta martxan ipini zen. Iazko irailean antzeko egoera bat bizi izan zuen 64 urteko ugaotar batek herriko geltokian: “Trenera igotzen ari zela ateak itxi eta berokiaren poltsiko batetik zintzilik zeraman aterkia harrapatu zuten ateek”, azaldu du Zaballak. “Trenak pertsona arrastaka eraman zuen nasatik aterkiaren kirtena apurtu arte”.

64 urteko herritarrak gertaera hura salatu zuen Renfen eta Ugaoko Udalak, gertakari hauen berri izan ez duela aitortu arren, herritarren kexak RENFEri bideratzeko prest dagoela iragarri du.

Zaballaren arabera, arazo honen atzean bihurgunean kokatutako geltokiaren “ikuspen falta” dago: “Era honetako ezbeharrak gertatu izan direnean makinistek behin baino gehiagotan aitortu digute ikuspen arazoak dituztela Ugaoko tren geltokian”.

Renfek kontrako ikuspegia azaldu du lehen momentutik egoera honen aurrean. Alde batetik, eta tren enpresako iparraldeko komunikazio taldeak GEURIAri adierazi bezala, Ugaoko tren geltokiari dagokionez, Renfetik azaldu dute Ugaokoa bihurgune batean eraikita egon arren, tren geltoki guztiek “segurtasun araudia modu zorrotzean betetzen dutela % 100ean”.

Renfe: “Treneko ateak zabalik edo gaizki itxita daudenean trena blokeatu egiten da eta ezin da martxan jarri”

Beste alde batetik, enpresako komunikazio ordezkarien arabera, gaur egun “pentsaezina” da tren batek pertsona edo objektu bat arrastaka eramatea, ateak modu egokian itxita ez dauden bitartean trena ezin daitekelako martxan jarri, segurtasun mekanismo bati erantzunez: “Urteak dira treneko ateak zabalik edo gaizki itxita daudenean trena blokeatu egiten da eta ezin da martxan jarri”, azaldu dute tren enpresako iparraldeko arduradunek.

 

Merkantzia tren bat, Ugaoko tren geltokitik igarotzean dagoen bihurgunean // Geuria

Ugaoko tren geltokiaren inguruan gertatutako intzidentziek, beraz, alde argi bi uzten ditu agerian: alde batetik, Xabier Zaballak azken hamarkadan erregistratu dituen kasuak, eta bestetik, Renfek irmo mantentzen duen azalpen teknikoa, enpresaren segurtasun araudian oinarrituz.

“Intzidentzia horietako baten lekukoa izan nintzen ni eta neure begiekin ikusi nuen gertatutakoa”, azaldu du Xabierrek. “Gainera, salaketa ipini zuen auzotarrak dokumentuaren kopia bat dauka. Gai honekin amaierara arte heldu nahi dut, arazoari behin betiko konponbidea emateko”.

C3 linea, ikusmiran

Ugaoko geltokiaren  problematikaz gain, bertako trenbideetatik igarotzen diren Renfeko C3 lineako trenak Ugaoko beste buruhauste bat dira. GEURIAk iazko urrian argitaratu zuen artikulu batek Renfeko lineak erronka bi ditu Ugaorekin: alde batetik Bilbo eta Urduña konektatzen dituen lineako tren asko kendu dituztela azaldu zuen Ekaitz Mentxaka Ugaoko alkateak, “kasu askotan abisatu gabe gainera”.

Beste alde batetik Gau Jaia zerbitzuaren itzulera aldarrikatu zuen Ugaoko alkateak, herritarren eskaerei so eginez: “Arazoari irtenbidea emateko insistituko diogu Renferi, ugaotarrentzat, eta bereziki gazteei, zerbitzu garrantzitsua eskaintzen dielako”.

Helburu horiek lortzeko, Mentxakak eta Urduñako alkateak hitzordua izan zuten Bilboko Abando geltokian Renfeko zerbitzuak emateko agentearekin eta Bilboko guneko lineaburuarekin, iazko urriaren 29an, “Aldiriakeko zerbitzuaren kalitate eskasagatik bizilagunengandik jasotzen dituzten kexa ugarien berri emateko”.

Mentxakak balorazio positiboa egin zuen Bilboko batzarraren inguruan. “Arazoa konpontzeko bidean daude eta ondorioz maiztasunaren problemari irtenbidea emateko asmoa” dutela gehitu zuen Ekaitzek, ordutegien eguneratzearekin batera.

Osorik irakurri

☉ Ugao

Ugaoko tren geltokiaren “ikuspen txarrak” azken urtean gertakari bi eragin dituela salatu dute herritarrek

Azken 10 urteetan hiru intzidentzia erregistratu ditu Xabier Zaballa de la Fuente ugaotarrak herriko tren geltokian: lehena 2012an eta beste biak iaz

|

Aldiriakeko C3 lineako tren bat, Urduñara bidean // Geuria

Ugaoko herritarrak kezkatuta agertu dira azken 10 urteetan herriko tren geltokiarekin lotutako hiru gorabeherengatik. Ugaoko RENFE geltokiko nasa bihurgune batean kokatuta dago, eta horrek ikuspen arazoak sortu ditu behin baino gehiagotan, antza, bidaiariak trenetik jaitsi eta igotzerako orduan.

 Xabier Zaballa de la Fuente herritarrak azken 10 urteetan gertatu diren gorabeherak erregistratu ditu eta beragaz berba egiteko aukera izan du GEURIAk: “Era honetako ezbeharrak gertatu izan direnean makinistek behin baino gehiagotan esan digute ikuspen arazoak dituztela Ugaoko tren geltokian”. Auzotar batek “susto” bat bizi izan zuen Ugaoko tren geltokian iazko irailean. “Aldiriakeko C3 lineako tren batek ateak itxi zituen 64 urteko pertsona bat konboira igotzen ari zela”, azaldu du ugaotarrak.

“Ateak ixtean, berokiaren poltsiko batetik zintzilik zeraman aterkia harrapatu zioten ateek”, jarraitu du Xabierrek. “Trenak pertsona arrastaka eraman zuen nasatik aterkiaren kirtena apurtu arte. Gertaera, zorionez, sustoan geratu zen, kalte handiagorik sortu barik”.

“RENFEk geltoki horretako egitura-arazoak ia alde batera utzi ditu, eta, ez hori bakarrik; istripua izan zuen erabiltzaileari egotzi dio erantzukizuna, agerian utziz ez zela errespetatu konboira igotzeko denbora tartea”

Hala ere, Zaballaren arabera, hori ez da ezbeharrak izan zuen alderik txarrena. Iazko irailean gertatutako gorabehera honi erantzunez, RENFEri salaketa ipini zion 64 urteko ugaotarrak: “Gauzarik deigarriena RENFEk erabiltzaile horri emandako erantzuna izan da. Izan ere, geltoki horretako egitura-arazoak alde batera utzi ditu, eta, ez hori bakarrik; istripua izan zuen erabiltzaileari egotzi dio erantzukizuna, agerian utziz ez zela errespetatu konboira igotzeko denbora tartea. Izan ere, erreklamazioari emandako erantzunean, RENFEtik nabarmendu dute oso garrantzitsua dela trenera igotzeko eta jaisteko erabili beharreko denbora-tarteak errespetatzea”.

Aldiriakeko C3 lineako tren bat, Urduñara bidean // Geuria

Beste bi jazoera

Baina Xabierrek gertu bizi izandako kasu hori ez da bakarra: iazko maiatzean, Urduñatik bueltan trena Ugaoko geltokian gelditu zen. Ateak zabaltzean, 12 lagunez osatuko talde bat trenetik jaisten hasi zen. Horien artean 7 urteko neskatxo bat zegoen eta bosgarrena izan zen konboitik jaisten”, gogoratu du Xabierrek. “Jaisten zegoen momentuan trena irtengo zenaren soinu seinaleak entzun ziren eta ateak itxi ziren. Horrek neskak trenetik kanpora arin batean salto egitera behartu zuen eta nasara jaustean orkatila bihurritu zuen”.

Zaballaren arabera, kasu hartan ez zen harrapaketarik egon eta trenak ez zuen inor arrastaka eraman, “baina trenaren barruan zazpi pertsona geratu ziren eta horien artean haurraren gurasoak zeuden, familia estres egoera batean murgilduz”. Hala ere, eta Zaballak GEURIAri adierazi lez, egoerak ez zuen okerrera egin, tren barruan zegoen pertsona taldekoek larrialdi palankari eragin eta trena bertan gelditu zelako.

“Hiru jazoera hauek agerian uzten dute Ugaoko tren geltokian dagoen segurtasun arazoa. Eta ez da nire iritzia bakarrik; geltokiaren ikuspen arazoa tren makinistek beraiek baieztatu didate”

Trenekin gertatutako lehen inzidentzia 2012an erregistratu zuen Xabierrek. 32 urteko pertsona bat harrapatuta geratu zen bagoi baten irteerako ateen artean, sorbaldaren aldetik. “Bagoien ateak bikoitzak eta irristailuak dira. Beren artean harrapatuta geratzean, pertsona horren gorputz erdia bagoiaren barruan geratu zen (sorbalda eta bizkarra), eta kanpoan geratu ziren gorputz-adarrak eta bere haurra zeraman orga”, azaldu du Xabierrek. “Posizio horretan zegoela, trenak metro bat egin zuen aurrera. Zorionez, segurtasun-zaindari batzuk arazoaz ohartu ziren eta trena gelditu ahal izan zuten”.

“Hiru jazoera hauek agerian uzten dute Ugaoko tren geltokian dagoen segurtasun arazoa. Eta ez da nire iritzia bakarrik; geltokiaren ikuspen arazoa tren makinistek beraiek baieztatu didate”, laburbildu du Xabierrek. “Eta arazoari konponbidea emateko saiakerak egon diren arren ez dugu inolako emaitzarik izan urte hauetan zehar”.

RENFE: “Urteak dira treneko ateak zabalik edo gaizki itxita daudenean trena blokeatu egiten da eta ezin da martxan jarri”

Horiek horrela, GEURIAk RENFEko ordezkariekin berba egitea lortu du eta tren enpresak ugaotarraren ikerketa zalantzan ipini du, pertsona edo objektuak arrastaka eramateko aukerak “ezinezkoak” direla esanez: “Urteak dira treneko ateak zabalik edo gaizki itxita daudenean trena blokeatu egiten da eta ezin da martxan jarri”, azaldu dute RENFEko iparralde zonaldeko komunikazio esparrutik. “Momentu horretan seinale akustiko ez-ohikoak igortzen ditu trenak, ateak desblokeatu arte”. Ugaoko tren geltokiari dagokionez, RENFEtik azaldu dute Ugaokoa bihurgune batean eraikita egon arren, tren geltoki guztiek “segurtasun araudia modu zorrotzean betetzen dutela % 100ean”.

Osorik irakurri