Trafikoa, aparkalekuak eta oinezkoentzako pasabideak berrantolatuko ditu Usansoloko Udalak.

Helburua da hiri-mugikortasuna eta oinezkoen eta gidarien arteko elkarbizitza hobetzea.

Eta, asmo horrekin, jarduera nagusia izango da Ander Deuna kalea noranzko bakarrekoa eta errei bakarrekoa bihurtzea.

“Neurri horri esker bigarren ilaran aparkatzea saihestuko da eta trafikoaren arintasuna hobetuko da”, diote udal ordezkariek.

Gainera, berrantolaketa horrekin pilaketak murriztuko direla eta segurtasuna handituko dela adierazi dute Usansoloko Udaletik.

“Etorkizunean, Ander Deuna kalean espaloiak handitzea aztertu ahal izango da, kale nagusi honi izaera atseginago, irisgarriago eta pertsonengan zentratuago bat emateko”, diote.

Aparkalekuen berrantolaketa

Herriko aparkalekuen berrantolaketa izango da Udalak gauzatuko duen beste jarduera bat.

Ildo horretan, aparkatzeko guneak behar bezala ezarri eta mugatuko ditu Udalak, “ibilgailuak leku desegokietan aparkatzea saihesteko eta oinezkoen zirkulazioa eta sarbide-guneak errespetatzea bermatzeko”, diote.

“Aparkalekuen antolaketa argi baten faltak eragin du ibilgailu asko gaizki aparkatzea, gune ez egokituak okupatuz, oinezkoen pasabideak inbadituz eta oinezkoen zirkulazioa oztopatuz. Egoera honek zailtasunak sortzen ditu bai ibilgailuen zirkulazioan bai oinezkoen mugikortasunean, eta gainera, pertsonen segurtasunerako arrisku bat ere badakar”, esan dute.

Besteak beste, Ander Deuna kalean —Txapelena Baserriaren parean eta Unkina plazaren ondoan— , lineako aparkaleku berriak sortuko dituzte.

Eta, Ander Deuna kaleko 8tik 12ra, Oletxe eta Iturritxu kaleen artean, bateriako aparkaleku berriak sortuko dituzte.

Lineako aparkaleku berriak ere egokituko dituzte Oletxe, Oio Baroja eta Taberna Zaharra kaleetan eta Lekubaso bidearen trenbide gaineko zubian.

Arreta bereziko guneak

Halaber, oinezkoen pasabidearen irisgarritasuna eta segurtasuna hobetzeko xedearekin, Laminarrieta kalean, eskoletarako bidean, esku hartuko du Usansoloko Udalak.

“Puntu hori arreta bereziko gune gisa seinaleztatuko da eta pasabidearen ikusgarritasuna eta egoera hobetuko dira, eskolara doazen ikasleen eta ibilbide hori erabiltzen duten gainerako oinezkoen segurtasuna indartuz”, diote.

Usansoloko Udalak aparkaleku eta zirkulazio arauak errespetatzearen garrantzia azpimarratuko du, “eta haien betetzea bermatzeko beharrezko neurriak hartuko dira, Ertzaintzaren eta datorren urtean martxan egotea espero den Udaltzaingoaren bitartez”, diote: “Horrela, espazio publikoaren erabileran errespetu eta erantzukizunaren kultura sendotu nahi da, hirigune seguruago, ordenatuago eta irisgarriago bat sortuz herriko bizilagun guztientzat”.

Usansoloko Merkataritza, Ostalaritza eta Zerbitzuen Elkartea sortu berri dute, Cecobi Bizkaiko Merkataritzako Enpresarien Konfederazioaren laguntzarekin eta Usansoloko Udalaren babesarekin.

Helburua da herriko jarduera ekonomikoa sendotzea eta tokiko merkatari eta ostalarien arteko elkarlana indartzea.

Diego Dominguez da Usansoloko Merkataritza Elkarteko presidentea (Kiram), eta bere esanetan, elkartzeak “indartsuago” egingo ditu herriko merkatariak.

“Erronkak partekatu nahi ditugu, gure kaleak biziz beteko dituzten eta Usansoloren ezaugarri den komunitate sentimendua indartuko duten proiektuak sortu”, esan du Dominguezek.

Momentuz 30 saltoki atxiki dira elkartera, eta aholkularitza teknikoa, tresnak eta babesa jasoko dituzte Cecobiren eskutik.

Usansoloko Udalak konpromisoa adierazi du eta datozen udal aurrekontuan partida espezifikoak aurreikusten ditu merkataritza sustatzeko, dinamizazio-kanpainak eta formakuntza-ekintzak bultzatzeko.

Usansoloko jaiak izango dira asteburu honetan. Azaroaren 28tik 30era bitartean hamaika jarduera antolatu ditu Usansoloko Jai Batzordeak. Hemen egitaraua:

Egitaraua | Usansoloko jaiak 2025, azaroa

Azaroak 28, ostirala
17:00 Jaien hasiera
17:00 Umeentzako tailerrak Ludotekan
17:00 3×3 Saskibaloi txapelketa Unkina kiroldegian
18:00 Gauargi taldea Unkina plazan
19:15 Txorizoak Unkina plazan, Izar Gorrie elkartearen eskutik
20:00 Pregoia Unkina plazan: Unkina Saskibaloi Beteranak
20:15 Photocalla frontoi txikian Lamintxuren eskutik. Mozorro gaua: Musika
20:30 Soka Batukada herritik zehar
20:45 Poteolinpiadak BMko plazan hasita Lamintxuren eskutik
22:30 Kontzertuak Unkina plazan: Mambo Express + Zeinke + Txapela Brava

Azaroak 29, larunbata
09:30 Diana Bizkaiko Gaiteroekin
10:00 Indaba eta tortilla txapelketen hasiera Unkina plazan
11:00 Artisau azoka Izar plazan
12:00 Gaiteroen kalejira erraldoiekin
14:00 Indaba eta tortilla txapelketen sari banaketa
15:00 Bazkari herrikoia
16:00 Bazkaloste musikatua Unsaoloko Orfeoiaren eta Euskara Taldearen eskutik
17:15 Umeentzako ikuskizuna Unkina plazan: Txulalai taldea
19:00 Aunitz Urtez musika taldea Izar plazan
21:15 Kontzertuak Unkina plazan: Jona Exposito + Los Zopilotes Txirriaos + Kene.mp3

Azaroak 30, igandea
09:30 Diana Bizkaiko Gaiteroekin
10:30 Artisau Azoka Unkina plazan
11:00 Arku tiroketa frontoi txikian
11:30 Emakumezkoen lehen mailako pala partidak Meatzetako frontoian
12:30 Oinarin Dantza Taldearen emanaldia Unkina kiroldegian
13:30 Pasabares gaiteroekin
17:30 Zirku tailerra Unkina plazan Gazteberriren eskutik
19:00 Jaien amaiera txokolatadarekin Unkina plazan

Galdakao-Usansolo ospitaleko aparkalekua handituko du Eusko Jaurlaritzak.

Lanak 2026an hastea aurreikusi dute, “2028an plaza berriak izateko helburuarekin”: “Jarduketa azterketa teknikoekin eta obra-azterketekin hasiko da”, esan du gaur goizean Alberto Martinez Osasun arloko sailburuak.

Aparkaleku berriak ospitalearen inguruko titulartasun publikoko partzeletan eraikiko dituzte, eta partzeletako bat Osakidetzaren jabetzakoa da.

Gainera, sailburuak adierazi du ez dutela baztertzen bigarren eremu batean esku hartzeko aukera.

“Ospitaleetako beste obra handi batzuetan jasotako esperientziak erakutsi digu oso garrantzitsua dela zuhurtasunez planifikatzea, prozesu osoan irisgarritasuna bermatzeko”, esan du Martinezek.

Osasun Sailak 1,6 milioi euro bideratuko ditu aparkalua handitzeko.

Eraikin berri bat, aparkaleku gehiagorekin

Ospitaleko aparkalekua handitu ondoren, Galdakao-Usansolo ospitaleko Kanpo Kontsulten eraikin berriaren eraikuntza hasiko du Eusko Jaurlaritzak.

Duela bi urte iragarri zuen Osakidetzak Kanpo Kontsultetarako eraikin berria.

Orduan aurkeztu zuten proiektuaren arabera, heliportuaren eta Larrialdi zerbitzuan ondoan eraikiko dute, 58.000 metro karratuko azalera izango du eta bederatzi solairu izango ditu: lau solairu lurrazalean eta bost lurrazpian 1.129 aparkalekurekin.

Orduan adierazi zuten inbertsioa 93 milioi eurokoa izango zela, baina gaur 136 milioi euroko inbertsioa izango dela esan du Martinez sailburuak.

Usansoloko metro geltokiari buruzko eztabaida egon da gaur goizean Gernikako Batzar Nagusietan.

EH Bilduk mozioa aurkeztu du, besteak beste, Bizkaiko Foru Aldundiaren eta Geltokia Erdigunean plataformaren arteko lankidetza-esparru bat ezartzeko.

“Plataformaren eta erakunde eskudunen arteko zubiak erraztu eta sortu behar direla uste dugu, egungo egoeraren diagnostikoa egin ahal izateko eta neurri zehatzak eta komunak ezarri ahal izateko”, adierazi du gaurko osoko bilkuran Raul Mendez Urigoitia EH Bilduko bozeramaileak.

Mendezek urriaren 5ean Geltokia Erdigunean plataformak Usansolon antolatu zuen galdeketa izan du oinarri bere hitzaldian: “Kontsulta hori legez loteslea ez izan arren, horrelako ekimenek garrantzia sozial eta politikoa dutela uste dugu. Ezin dugu alde batera utzi sakoneko arazo baten aurrean gaudela eta ezin diogula pasatzen utzi irtenbide bat emateko. Uste dugu Aldundiak herritarren parte hartze prozesuak sustatu beharko lituzkeela Usansoloko geltoki berriari buruzko erabakietan. Erabakiak ezin ditugu irizpide teknikoetan bakarrik utzi, irizpide teknikoek beraiek adierazi dutenean alternatibak egingarriak direla, eta horri buruzko erabaki politiko bat hartzea dagokigula”, esan du Mendezek.

Elkarrekin Podemoseko ordezkariak hitza hartu duenean // Utzitakoa

Richar Vaquero Moreno Elkarrekin Bizkaiko bozeramaileak babesa eman dio EH Bilduren moziari: “Usansolon egin dena ez litzateke salbuespena izan behar, araua izan beharko litzateke: erabaki estrategikoak hartu aurretik herritarrei galdetzea, hain zuzen”.

PPko ordezkari den Pablo Gomez-Guadalupe Garcia-Tejedorrek adierazi du alderdi popularra Usansoloko erdigunean geltoki bat egitearen alde dagoela: “Ez gaude irtenbide periferiko baten alde, herritarrak kanpoaldera mugitzera behartzen dituena metrora sartu ahal izateko”. Aldundia eta Eusko Jaurlaritza “ez entzunarena egiten” ari direla esan du, baina abstentziora jo dute: “Ezin dugu inolako oinarri juridikorik gabe egiten den kontsulta batean oinarritzen den mozio bat babestu”, esan du Gomez-Guadalupek.

EH Bilduren eta Elkarrekin Podemosek aldeko botoekin eta PPren abstentziorekin ez da nahikoa izan mozioa onartzeko. Izan ere, EAJk eta PSEk koordinazio mahai hori sortzearen kontra bozkatu dute.

Alderdi jeltzaleko Irene Edesa Gomez batzarkideak adierazi duenez, “EH Bilduk hausnarketa bat egin behar du: ekuaziotik kendu ditu bi eragile garrantzitsu: ETS eta Usansoloko Udala. Usansolo Galdakaoko parte zenean, Galdakaoko Udalak berak, EH Bilduren gidaritzapean, eskatu zion ETSri Usansoloko geltokia ospitaletik ahalik eta gertuen egon zedin”.

“Gaur ere berriro esango dugu: Usansoloko Udalak lan egin beharko luke ETSrekin batera, herrirako konexio formularik onenak bilatzeko”, esan du Edesak. Hain zuzen ere, jeltzaleak adierazi duen moduan, ETSk erabakitzen du geltokiak non jarri, “eta ez Aldundiak”.

Eta, EH Bilduko bozeramaileak erantzun dio: “Usansoloko Udalak askotan esan du zein den bere jarrera: geltokiak erdigunean egon behar duela. Eta guk eskatzen duguna da Aldundiak gainerako erakundeekin trakzionatzea”.

Ignacio Jeronimo Moreno PSEko ordezkariak “beharrak eta itxaropenak desberdinak” direla esan du bere agerraldian, eta beharrak “beteta” daudela adierazi du: “Alder sozialistan ez gaude itxaropen faltsuak sortzeko, beharrak kalitatez betetzeko eta jendearen kezkei irtenbideak bilatzeko gaude. Eta zorroztasun- eta erantzukizun-irizpideak jarraitu ditugu, errentagarritasun sozial eta ekonomikoan eta irizpide teknikoetan oinarrituta, komenigarriena denari dagokionez”.