Usansoloko dendak eta tabernak itxita, herriko ekonomia-jarduera eten egin da ordubetez. Eta tarte horretan usansolotarrak kalean izan dira geltokia erdigunean nahi dutela aldarrikatzeko. Zehazki, giza-katea egin dute ospitaletik egungo tren geltokira bitartean. Geltokia Erdigunean plataformako kideek adierazi dutenez, mila lagun inguru batu da ekimenera, denak zapi horia lepoan eta eskuan. GEURIAk antolakuntzako auto batean igotzeko aukera izan du eta argazki hauek egin ditu:

Usansolo erdigunean tren geltokia mantentzea aldarrikatzeko borrokan jarraitzen du Geltokia Erdigunean plataformak, herritarren babesarekin.

Bizkaiko Batzar Nagusietan ordezkaritza duten alderdi politikoei manifestu bat bidali zieten plataformatik, “Usansolo erdigunean geltoki bat aurreikusten duen alternatiba bat ezartzea eskatzeko”.

Ordezkaritza duten bost alderdietatik hiruk egin dute Geltokia Erdigunean plataformaren aldarrikapenekin: “EH Bilduk, PPk eta Elkarrekin Podemosek baino ez dute gure aldarrikapenekin bat egin. Tamalez, EAJk uko egin dio dokumentua sinatzeari, eta PSEk ez digu erantzun ere egin. Badakigu ez dugula haien babesik Usansoloko erdigunerako geltoki bat aldarrikatzeko, baina horrek ez gaitu adoregabetu behar”, diote.

“Plataformatik uste dugu garrantzitsua dela alderdien jarrera politikoak argi egotea eta orain hala daude: mobilizatzen jarraitzea dagokigu gobernuan dauden alderdi politikoek entzun eta gure aldarrikapena haiena egin dezaten. EAJ eta PSE dira gure helburu. Usansolo ez da geldituko erdigunean geltoki bat lortu arte”, diote.

Ildo horretan, alderdi jeltzaleak, alderdi sozialistak eta ETSk Bilbon dituzten egoitzen aurrean elkarretaratzeak egin ostean, giza-kate bat egingo dute usansolotarrek.

Apirilaren 4an, ostiralez, izango da eta ospitalea eta gaur egungo geltokia lotzea dute helburu. Giza-katea 18:00etatik 19:00etara bitartean egingo dute.

Zehazki, 18:00etan Txapelenan batuko dira herritarrak eta bertan zehatzuko dute bakoitzari egokituko zaion tokia; 18:30ean entsegua egingo dute; eta 18:45ean giza-katea grabatu egingo dute.

“Usansolo osoa deituko dugu giza-kate bat eraikitzera. Gainera, herriko taberna guztiek bat egin dute aldarrikapenarekin eta ordu tarte horretan tabernek geldiunea egingo dute zerbitzu eskaintzan. Beraz, ez dago ez bertaratzeko arrazoirik”, adierazi dute.

Asteburu honetan ekimenaren inguruko nondik norakoak azaltzeko informazio mahaiak jarriko ditu plataformak herrian.

Galdakao-Usansoloko Unibertsitate Ospitaleko Zainketa Intentsiboen Unitateak (ZIU) “zainketen humanizazioaren bikaintasuna” ziurtagiria jaso du Aenorren eskutik, HU-CI proiektuaren esparruan.

HU-CI proiektuaren helburuetako bat zainketa intentsiboen unitateetako hainbat arlo ebaluatzea da, zainketa intentsiboak humanizatzeko, senideen, pazienteen eta profesionalen arteko topagune eta foro izateko, zainketa intentsiboak hedatzeko eta humanizazio-trebetasunei lotutako prestakuntza sustatzeko.

“Ziurtagiri horrek pazienteengan oinarritutako arreta-emateko Osakidetzaren konpromisoarekiko erantzukizuna islatzen du, zeinak asistentzia-alderdia ez ezik, haien ongizate emozionala eta psikologikoa ere barne hartzen dituen; hori guztia pazientearen senideei zein talde asistentzialari ere behar den arreta eskainiz”, diote ospitaleko arduradunek.

Galdakao-Usansoloko Unibertsitate Ospitaleko ZIUk 2018an ekin zion Humanizazioko Jardunbide Egokien Ziurtagiria lortzeko ibilbideari, eta prozesu horretan maila aurreratua lortu zuen 2022an. Bi urte geroago, ekintza jakin batzuk ezarri eta beste auditoretza batera aurkeztu ondoren, bikain mailadun ziurtagiria eskuratu du.

160 jardunbide egoki

Ziurtagiriak egiaztatzen du humanizazioaren arloko segidako 7 ildo estrategikoetan banatzen diren 160 jardunbide egoki betetzen direla: senideek zainketetan parte hartzea eta pazientearekin egotea; komunikazioa hobetzea; pazienteen ongizatea ziurtatzea; profesionalak zaintzea; ZIU osteko sindromearen prebentzioa, detekzioa eta jarraipena; arkitektura humanizatua; eta hiltze-prozesuko arreta.

Zazpi ildo estrategikoetan banatzen diren 160 jardunbide egoki betetzen dira Galdakao-Usansolo ospitaleko ZIUn // Argazkia: Barrualde-Galdakao ESI

Ainara Arana Unitateko gainbegiraleak adierazi duenez, “paziente eta senide bakoitzak, ospitaleko egonaldi osoan, tratu duina eta errespetuzkoa jasotzen duela bermatzeko ZIUko taldea osatzen duten profesional guztien diziplina anitzeko ahaleginaren emaitza da lorpen hori; profesionalen euren zaintza ere barne hartzen duena”.

Galdakao-Usansolo ospitaleko ZIUk 1.300 paziente baino gehiago artatzen ditu urtean, eta zerbitzu nabarmenen artean dago familien gela. Maite Esteban ZIUko Erizaintzako Zaintza Osagarrietako teknikaria da proiektu horren buru, eta berorren helburua da pazientearen senideak inplikatzea senidearen zaintzan, dauzkaten prestakuntza- eta emozio-premiei entzunez eta erantzunez.

Era berean, Zainketa Intentsiboen Osteko Sindromearen jarraipena egiteko kontsulta bat ezarri dute. Virginia Arnaiz ZIUko medikua arduratzen da kontsultaz. Bertan jarraipena egiten diete ZIUn ospitaleratuta egon diren paziente larrienei, ospitaleko alta eman ondoren. Orain arte 72 pazienteren jarraipena egin dute.

Uxue Urgoiti eta Irene Azkona usansolotarrek Gabni txapelketa jokatuko dute asteburutik aurrera Bizkaiko selekzioarekin. 

Urgoitik paleta gomako gazte kategorian jokatuko du eta lehenengo partidua martxoaren 22an, larunbatez, izango du. Larrabetzun izango da (10:00) eta aurkari izango du Gipuzkoa.

Hurrengo jardunaldia (txapelketako hirugarrena) Iruñan jokatuko du Urgoitik Nafarroaren kontra martxoaren 29an.

Eta azkenengo partidua apirilaren 12an jokatuko du Arabaren aurka Gasteizen.

“Bi urte daramatzagu txapelketa hau jokatzen eta Bizkaiko selekzioak irabazi izan du. Aurten ere espero dugu finalera heltzea eta txapela berriro Bizkaira ekartzea”, adierazi dio GEURIAri Urgoitik. 

Bestetik, Irene Azkonak esku pilota modalitatean jokatuko du. Bere lehehengo partidua martxoaren 22an ere izango da, baina Gautegiz Arteagan, Gipuzkoaren kontra.

Ondoren, martxoaren 30ean txapelketako hirugarren jardunaldia jokatuko du Iruñan, Nafarroaren aurka.

“Iaz ez genuen txapela irabazi, baina aurten saiatuko gara. Gogo askorekin nago. Txapelketa oso polita da, jende berria ezagutzen dugu. Espero dut emaitza onak lortzea eta ondo pasatzea”, esan dio GEURIAri Azkonak.

Euskaraldia abian da Usansolon. Martxoaren 14an aurkeztu zuten herriko Hamaikakoa: Patri Espinar, Lorea Telletxea, Laiene Etxezagarra, Alex Estibez, Josu Grandibal, Iñaki Olano, Edurne Ojanjuren, Nagore De la Torre, Monika Olazabalaga, Rocio Gomez, Iker Valderrama, Maria De La Natividad, Maribel Olabarri eta Iker Pagazaurtundua.

“Nor bere bidetik hurbildu da euskarara; nork bere hautua egin zuen noizbait euskararen alde; nork bere modura bizi du euskara… Baina denok euskarararen erabileran eragiten duzue, bakoitzak bere modura”, adierazi dute Usansoloko Euskaraldiako arduradunek: “Geure eredu zarete! Usansoloko Euskaraldiaren enbaxadorerik onenak!”.

Hamaikakoaren aurkezpenarekin batera, bertso-triki-poteoa antolatu zuten. Bertan izan ziren Oihana Bartra eta Etxahun Lekue bertsolariak eta Oinarinen txaranga.

Herritarrek izena emateko epea zabalik dagoela gogorarazi dute Usansolon, eta 500 usansolotarrek izena emateko erronka hartu dute: “Zeu Ahobizi ala Belarriprest izango zara? Baietz 500 usansolotar batu Euskaraldiara! Lortuko ete dugu? Eutsi erronkari!”.