☉ Zaratamo
Ane, Izaro eta Miren:«Belaunaldien arteko ahalegin kolektiboa egin behar da Zaratamoko feminismoak aurrera dezan»
Ane Bikandi, Miren Ugarriza eta Izaro Iturriondobeitia zaratamar gazteekin elkartu gara herriko feminismoaren etorkizunaren inguruan berba egiteko
Zaratamoko feminismoak etorkizun oparoa izateko beharrezko gakoak ezagutzearren herriko hiru neska gazterekin elkartu da GEURIA, Irantzu Lekue artista arabarrak 2022an margotutako muralaren aurrean. Feminismoaren geroaz galdetuta, unibertsitateko ikasleek azaldu dute egin beharreko ahalegina ez dagoela bakarrik gazteen eskuetan, herrian bizi diren belaunaldi guztietako emakumeen artean baizik.
Emakume moduan, nolako herria da Zaratamo gizon eta emakumezkoen arteko berdintasunari dagokionez?
Miren Ugarriza: Azken bolada honetan emakumeak barnebiltzen dituen hainbat ekintza ikusi ditut herrian. Egia da Zaratamon eskupilotak eta frontoiak presentzia handia duela eta hor gizonak gailentzen direla. Hala ere, betidanik neskok alde batetik eta mutilak bestetik bildu garen arren, pixkanaka-pixkanaka herriak guztiok parte hartzeko aukerak ematen dituela ikusten nabil.
Matxismoaren arrastorik ikusten duzue Zaratamon?
Ane Bikandi: Zaratamon, inguruko herrietan moduan, badaude matxismoaren arrastoak. Non ez? Azken batean, gizartea den bezalakoa da eta egia da eskualdeko herri txikienetakoan bizi garela. Hala ere, esan behar da gainontzeko udalerriekin alderatuta mikro-burbuila batean bizi garela: denok ezagutzen dugu elkar eta bertan egiten den bizitza oso lasaia da: lagunekin zerbait hartu, mendira joan, familiarekin egon, bizitza estiloa hori izanik zailagoa egiten zaigu matxismoaren arrasto horiek ikustea, egia esan. Herrian bizi dugun familia giro horrek ez digu uzten Bilbo bezalako hiri batean sumatu daitezkeen matxismo arrasto horiekin alderatzen.
Landa eremua izanik, matxismoaren arrastorik ikusten al da Zaratamo bezalako herri batean? Arrastorik egotekotan, nolakoak dira?
A.B.: Egia da landa eremuan bizitzeagatik, biztanle gutxiko eremua izateagatik, alegia, harreman handiagoa dugula emakume helduagoekin. Baina harreman hori agian ez da hain estua edo politikoa. Ez dakigu zer pentsatzen duten feminismoari buruz, esaterako. Egia da azken hilabeteetan gai hauek jorratzeko taldea sortu dela Zaratamon, eta hori aurrerapauso garrantzitsua da guretzat, herrian inplikazio handiagoa dagoela esan nahi duelako, nolabait. Gainera, adin ezberdinetako emakumeez osatutako taldea da. Aurrerantz goaz, beraz, eta uste genuena baino inplikazio gehiago dugu Zaratamon, egia esateko, feminismoaren inguruan informazio gutxi geneukalako herri honetan, batere ez geneukala ez esatearren.
“Zaratamok gazteoi eskaintzen dizkigun aukerak eskasak dira. Horrek herritik joatea eragiten du”
Gazte gutxi bizi zarete herrian. Bertan ikusten duzu zuen burua etorkizunean?
M.U.: Asko gustatzen zait Zaratamok eskaintzen duen bizitza estiloa. Hemen oso lasai bizi naiz, jendea ezagutzen dut, segurtasuna ematen didana, eta aldi berean hirigunetik hurbil bizi gara. Noski, gustatuko litzaidakeela hemen jarraitzea. Hala ere, orokorrean etorkizuna latza izango da, gaur egun etxebizitza bat lortzea zaila da eta, gainera, Zaratamon ez dago etxebizitza nahikorik. Oraindik ikaslea naiz eta ez daukat oso argi nire ibilbidea norantz doan, baina Zaratamok gazteoi eskaintzen dizkigun aukerak eskasak dira, eta horrek gazteok herritik joatea eragiten du.
Talde feminista sortu dute Zaratamon orain dela gutxi. Bertan parte hartzen duzue edo horretarako asmorik baduzue?
A.B: Duela gutxi sortu zuten Zaratamoko Berdintasun Batzordea eta benetan pozten nau hauxe herrira ekarri izanak. Gauza berria da guretzat eta, egia esateko, ez dakigu norantz enfokatuko duten: talde feminista sortzea, feminismoaz berba egiteko leku seguru bezala erabiltzeko.Dena dela, taldeak antolatzen dituen ekintzetan parte hartzeko edota horien inguruan informatzeko prest egongo nintzateke.
Unibertsitatean ari zarete zuen ikasketak egiten. Berdintasuna zaintzen den esparrua da edo oraindik asko dago egiteko?
A.B: Egia da unibertsitatean, gizartean ondo edo gaizki egiten diren gauzak bereizi egiten dituztela. Hala ere, unibertsitatean lan egiten edo ikasten duten pertsonek matxismoa bereganatuta dute eta oraindik ikusten den kontua da hori. Ikasketei begirada bat bota besterik ez dago horretaz jabetzeko: erizaintzan emakumeak dira ikasle portzentaia handiena eta ingeniaritzan, ostera, gizonezkoak. Gure partetik gizartea aldatzen saiatzen gara etengabe, baina denok ditugu aurreiritziak barnean eta hori gure barnetik egun batetik bestera ezabatzea ezinezkoa dela uste dut.
Martxoaren 8a gertu dago. Nolako garrantzia dauka egun horrek zuentzat?
M.U: Azken urteotan martxoaren 8arekiko ikuspuntua aldatu egin zait. Garrantzitsua iruditzen zait egun horretan emakumeon eskubideak eta figura aldarrikatzea, baina pertsonalki azken bolada honetan nahiago izan dut nire egunerokotasunean feminismoa nola aplikatzen dudan aztertu eta zuzentzea. Martxoaren 8an parte hartu arren, feminismoa egunero landu behar da, ez da egun bakarra existitzen emakumeak ospatu eta aldarrikatzeko.
“Adineko emakumeek feminismoaz zer pentsatzen duten ez dakigu. Harremana ez da hain estua”
Martxoaren 8aren markoan, jardueretan parte hartzeko asmorik baduzue?
Izaro Iturriondobeitia: Azken urteetan Zaratamon ez da ekintzarik egin Martxoaren 8an. Hortaz, inguruko herrietan zein Bilbon izan gara bertan egin izan diren manifestazio handietan parte hartuz. Herri txikiagoei begira, Arrigorriagan prestatu ohi dituzten jarduera eta elkarretaratzeetan ere parte hartu izan dugu ahal izan dugun heinean, bertan ere ezagunak egon ohi direlako.
Nolako garrantzia daukate Zaratamoko neska gazteek herriko feminismoaren etorkizunari begira?
I.I: Herriko feminismoaren etorkizunari begira uste dut neska gazteek garrantzia izango dugula, baina biztanleriari dagokionez oso talde txikia gara eta ez gara bakarrak; esan bezala, Zaratamo herri txikia da eta azkenean denon lana da feminismoak aurrera egitea. Ikusi da interesa adin ezberdinetako emakumeetatik etorri dela eta horixe da, hain zuzen ere, gakoa: ahalegin kolektiboa eta belaunaldien artekoa egin behar da herriko feminismoak aurrera egiteko.
☉ Zaratamo
‘Kortxoaren Dilema’ ikuskizuna eta lodifobiari aurre egiteko tailerra ekarriko dute Zaratamora
Maiatzak interes orokorreko jarduerak ekarriko ditu euskara hutsean eta doan Zaratamoko Arkotxa eta Elexalde auzoetara. Elexalden 14 bakarrizketa eskainiko dituzte eta Arkotxako txokoan Laura Galar aktibista izango da lodifobiaren aurkako tailer bat eskaintzen
Zaratamoko Berdintasun Batzordeak maiatzeko ekintzen egitaraua argitaratu berri du eta euskara hutsean antolatutako jarduera bi antolatu ditu. Hilaren 10ean Kortxoaren Dilema emanaldia eskainiko dute 19:30ean, Elexaldeko Kultur Etxean. 14 bakarrizketa eskainiko dituzte oholtzan ipiniko duten txizatoki batean.
Maiatzaren 10 eta 17an, ‘Lodifobiari aurre eginez’ izeneko saio biko tailerra eskainiko du Laura Galar haur hezitzailea eta aktibista lodiak Arkotxako txokoan, 18:00etatik 20:30ak arte. Edertasun-kanonek emakumeen gorputzen gainean egiten duten presioa hain da handia, ezen askotan osasun fisiko eta mentalaren kontra egiten du. Gero eta gehiago gertatzen dira elikadura-jokabidearen nahasmenduak, EJN izenez ere ezagunak; arazo hori ikusezina da neurri batean, eta aurreiritzi asko ditu. Maiatzaren 31n Lisipe bildumaren Aingeruak eta neskameak: Haurdunaldi subrogatuei buruzko analisi feministak liburuaren aurkezpena egingo du June Fernández kazetariak.
Ekainari begira, Berdintasun Batzordeak Boterea, ahizpatasuna, Twerk izeneko tailerra antolatu du Elexaldeko gimnasioan hilaren 8an eta 15ean. Saioak 10:00etatik 13:00ak arte antolatu dituzte.
☉ Zaratamo
Elexalde eta Iragorri auzo zaratamarrak lotzen dituen foru errepidea konpontzen hasi dira
Zaratamoko auzo biak lotzen dituen errepide zatia berriro asfaltatu, zabaldu eta margotuko dute. Lanak martxan daude
Zaratamoko Elexalde eta Iragorri auzoak konektatzen dituen BI-3702 foru errepidea konpontzeko lanak hasi ditu Bizkaiko Foru Aldundiko Errepide sailak. Iaz Iragorri Goikoa eta 2 kilometro puntuen arteko (PK 13:350 eta PK 13:780 zatian) lanak egin zituen Foru Aldundiak eta oraingo honetan Iragorritik herriko plazarainoko errepide zatiko neurketa-lanei ekin diete (PK14:920 eta PK 15:490).
Udal ordezkariek azaldu dute asfaltatze lanak eta galtzada bera zabalduko dutela. Gainera, errepidea margotuko dute.
Iazko irailean konpondutako errepide zatia, Iragorri auzoan // Geuria
Autoak eta oinezkoak
BI-3702 foru errepidea 1955. urtekoa da eta historian zehar hainbat berriztapen izan dituela azaldu dute Zaratamoko Udaletik. Foru errepidetik autoak eta oinezkoak igaro dira egunero eta Elexalde eta Iragorri auzoak konektatzen dituen errepidea “lotune garrantzisua” da Zaratamoko Udalarentzat.
Iazko irailean, lehen zatiaren lanak hasi zituztenean, udal ordezkariek eskaera bidali zuten Foru Aldundira, “Iragorri eta Elexaldeko plaza lotzen duen berriztatze proiektuan oinezkoentzako irisgarritasuna eta segurtasuna kontuan izateko”.
Erantzun modura, Foru Aldundiak BI-3702 errepidea “errepide moduan” konponduko zuela izan zen, udal ordezkariek GEURIAri azaldu lez. “Oinezkoak kontuan hartzeko modu bakarra errepidea udal jabetzakoa izatea litzateke eta proiektua Irisgarritasun Plan batean jaso beharko litzateke”, izan dira Alberto Ugarriza Zaratamoko alkatearen hitzak.
Azken zatiaren lanak hasi dituzte beraz, eta Foru Aldundiaren asmoa auzo biak lotzen dituen errepide zatia berriro asfaltatu, zabaldu eta margotzea da.
Konpondu beharreko errepide zati bat // Geuria
☉ Zaratamo
Zaratamoko Arkotxako jaiak astebete aurreratu dituzte Europako hauteskundeak direla eta
Maiatzaren 31tik ekainaren 2ra izango dira aurtengo dira aurtengo jaiak eta Arkotxako Jai Batzordetik azaldu dute programa berdin-berdin mantenduko dutela
Aurtengo Aurkotxako jaiak maiatzaren 31tik ekainaren 2ra ospatuko dituzte, salbuespen modura, Europar Parlamenturako Hauteskundeak direla eta.
“Aukera guztiak aztertu genituen baina ez genuen gure jaiak Europar Hauteskundeekin kointziditzea”, izan dira Xabi Garcia Arkotxako Jai Batzordeko kidearen berbak.
Garciak azaldu du astebeteko aurrerapena egin duten arren jaietako programa mantenduko dutela eta momentu hauetan jaietako kontzertuak eskainiko dituzten taldeen baieztapenen zain daudela. Momentura arteko programa helarazi dio Jai Batzordeak GEURIAri, behin betiko ordutegiak faltan.
Zaratamoko Ealain taldea // Geuria
Programa | Arkotxako jaiak 2024
Maiatzak 31, barikua
Talo txiki
Etxebarria Aita ta Seme Trikitilariak
Rumbas Akais
Muxutruk Erromeria
Dj Dreyky
Ekainak 1, zapatua
Txori kantarien erakustaldia
Presagana txistu taldearen kalejira + Txistorrada Txoko Tabernan
Xaibor diskofesta
Paella txapelketa
Frontenis txapelketa herrikoia
Txitxarrilloa eta luncha nagusientzat
Kontzertuak: Ealain + Akerbeltz Erromeria + Dj Oihan Vega
Ekainak 2, domeka
Umeentzako tailerrak eta jolasak Gaztek Abiren eskutik
Tortilla eta sukalki txapelketa
Fanfarrea
Bazkari popularra
Herri Kirolak, Jasoka Herri Kirol taldearen eskutik
Sari banaketa eta jaien amaiera
Tortilla lehiaketa // Geuria
Joan den otsailaren amaieran GEURIAn aurreratu moduan, Akais taldeak flamenkoa ekarriko du Zaratamoko auzoko jaietara eta Euskal Herriko erromerien esparruan Etxebarria Aita-Seme Trikitilariak izango dira. Musika modernoari dagokionez Oihan Vega DJaren saioak dantzarako tartea eskainiko die auzotarrei, eta herriko Ealain taldeak bere folk-metal proposamen indartsu taularatuko du. Goizaldea Akerbeltz Erromeriak girotuko du.
Nagusientzako lekua ere egongo da eta txitxarrilloa ekarriko dutela iragarri dute batzordetik: “Hala ere kontuan izan beharrekoa da horiek ez direla kontzertu guztiak izango; gehiago baieztatuko ditugu laster”. Aurreko urteetan Bongo Botrako, La Raíz, Vendetta eta Zoo bezalako taldeak igo dira Arkotxako oholtzara, besteak beste.
Musika eskaintzaz gainera, bestelako jarduera gehiago aipatu dituzte antolakuntza taldetik eta haurrentzako jolasak, herri-kirolak, barrakak, ikuskizunak eta gastronomia-lehiaketak egongo direla azpimarratu dute.
Diru gutxiago
Jai Batzordearen arabera, Arkotxako jaietako aurrekontua “dexente” jaitsi da: “Bizitzaren igoera kontua izanda muntaketa-lanak, karparen instalazioa, kontzertuen kudeaketa, ekitaldiak… den-dena igo da eta aurrekontua txikiagoa da aurreko urtekoekin alderatuz, eta dena moldatzea erronka handia izaten ari da guretzat”, eta aurreko urteetako eredua “mantendu” nahi dutela gehitu dute tadetik.
“Zaratamon dauden gainontzeko elkarteak gonbidatzen ditugu gure jaietan parte hartzera”, azaldu dute Jai Batzordetik. Laster bigarren bilera egingo dute eta programa osotuago baten berri emango dutela azaldu dute.
☉ Zaratamo
Zaratamok luiziek hondatutako errepide zatiak konpondu ditu Madariaga eta Arkotxan
31.725 euro bideratu ditu iazko euriteek Madariaga eta Arkotxako Santa Barbara auzoetan sortutako kalteak konpontzeko
Zaratamoko Udalak 31.725 euro bideratu ditu iazko euriteek Madariaga eta Arkotxako Santa Barbara auzoetan sortutako kalteak konpontzeko. Izan ere, 2023an gertatu ziren euriteen ondorioz luiziak egon ziren. Mendiko lurra, urak bultzatuta, errepide gainera erori zen, eta kalte materialik sortu ez bazuten ere, kontentzio-lanak egin behar izan ditu Udalak arazoa errepika ez dadin.
31.725 euro horietatik 22.094 euro Bizkaiko Foru Aldundiko aurreikusi gabeko diru-laguntzetakoak dira eta aurrekontu horrekin porlanezko hormak eraiki dituzte lurra eta errepideak babesteko bai Madariaga, bai Arkotxako Santa Barbara auzoetan. Lanak berez bukatuta daude.
Porlanezko hormak, Madariagan // Geuria
☉ Zaratamo
#A21 / Emaitzak / Zaratamo / EH Bildurekiko alde estuagoarekin irabazi ditu EAJk hauteskundeak
#A21 / Zaratamo / Eusko Legebiltzarrerako hauteskundeak 2024 / Emaitzak
Kareagako Mendi Martxa apirilaren 28an izango da, Zaporeak elkartearen alde
La Gilda del Norte enpresako jabe basauriarrarentzat sei urte arteko kartzela zigorra eskatu dute
Arrigorriagako Clown eta Pailazoen jaialdiak Euskal Herriko sei konpainia ekarriko ditu aurten
Hego Uribeko dozenaka pentsiodun Gasteizen batu dira 1080 euroko gutxieneko pentsioa aldarrikatzeko
⚪️🔴 GABARRA | Argazkiak | Aupa Aitor Paredes! Talde zuri gorria Kopako txapelketa ospatzen!
Argazkiak / Hego Uribe zurigorriz jantzi da Kopako finalaren atarian
Bideoa / Lau greba egun deitu dituzte Basauriko Grafo enpresan, “hitzarmen duin baten alde”
“Gure Zirkua” Hego Uribera etorriko da lehen aldiz, Arrigorriagan zortzi saio eskainiz
