☉ Zaratamo
Los Visitadores motozale zaratamarrek ELAren ikerketaren aldeko jai solidarioa antolatu dute urrian
Hitzordua datorren urriaren 21ean antolatu dute Zaratamoko Los Visitadores elkarteko motozaleek Arkotxako Jai batzordearen eta herriko eragile batzuen laguntzarekin
ELA gaixotasunaren ikerketa helburu eta Arkotxako jaietako txosnaren laguntzarekin motozaleen topaketa antolatu dute Los Visitadores moto elkarteko kideek urriaren 21ean. Hitzordu hau berez urtero antolatzen dute Arkotxako motozaleek oktoberfest jaiarekin uztartuz, baina aurtengo edizioa oso berezia da elkarteko kideentzat: "Urte hasieran ELA atzeman zioten Eduardo Chaparro Los Visitadores elkarteko lehendakari ordeari", izan dira Jorge Prieto Los Visitadores elkarteko presidentearen berbak. "Gaixotasuna identifikatu ziotenetik gastu ugari etorri zaizkio gainera eta berari laguntzea da gure xedea", dio Prietok.
Hori dela eta, egin duten lehenengo gauza elkarteko logotipoa berde kolorera aldatzea da "Rendirse no es una opción" lemarekin ("Amore ematea ez da aukera bat", erdaraz). Berdea da ELA edo Alboko Esklerosi Amiotrofikoaren kolorea: "Gure koloreak aldatu genituen ELAren aurka borrokatzeko", zehaztu du Los Visitadoreseko lehendakariak. "Gaixotasunaren ikerketan laguntzeko, kolore horretako elastikoak egin ditugu eta bildutako dirua gaixotasun horren aurkako borrokara bideratuko dugu; izan ere, ELAk gizarte-sistemak gaur egun eskaintzen ez dizkien premia soziosanitario espezifikoak planteatzen ditu. Erakundeek ELAko gaixoak sistematik kanporatu eta, erremediorik gabe, beren bizilekuetan sartzen dituzte".
Dagoeneko, "kamiseta ugari" saldu dituztela nabarmendu du Prietok eta urriaren 21erako beste eskari bat egin behar dute: "Jendeak jarrera eredugarria erakutsi du Eduren alde eta benetan eskertzekoa da".
"ELAren ikerketan laguntzeko, elastiko bereziak egin ditugu urriaren 21ean saltzeko eta bildutako dirua gaixotasun horren aurkako borrokara bideratuko dugu"
Los Visitadoreseko kideak, logo berridun kamisetarekin // Los Visitadores
Jorge Prieto arkotxarra Gasteizen bizi da gaur egun eta aurtengo urriaren 21a benetan berezia izatea espero du: "Egun horretan klub ezberdinetako motozaleekin batera ibilaldia egingo dugu Arkotxara Gasteiztik, eta ez hori bakarrik: inguruetako moto elkarteei hurbiltzeko deialdia egin diegu Zaratamora hurbiltzeko". Egun horretan haurrentzako tailerrak, moto-jokoak, bazkaria eta 'Akais', 'Etxando Pestes' eta 'Akerbeltz' taldeen kontzertuak antolatu dituzte Arkotxan. Gainera, txosna bat ipiniko dute auzoan eta edariez gainera kamisetak erosi ahal izango dira bertan 10 euroan: "Egun osoan zehar txosnako kontsumizioekin eta saldutako kamisetekin lortutako irabazi guztiak ELA gaixotasunaren ikerketara bideratuko ditugu, baita Edu laguntzeko ere", zehaztu du Prietok.
"Egun osoan zehar txosnako kontsumizioekin eta saldutako kamisetekin lortutako irabazi guztiak ELA gaixotasunaren ikerketara bideratuko ditugu"
Urriaren 21eko hitzordua antolatzeko herriko hainbat eragilek eskaini dute beren burua: Zaratamoko Udalak musika ekipamendua lagako dio moto elkarteari, Jai batzordeak kamisetak salduko ditu txosnan bertan eta gainera Gaztek-Abi elkarteak eta herritar askok hartuko dute parte ekimenean, Los Visitadoreseko lehendakariak azaldu bezala: "Herriko eragileen laguntzaz gainera kanpotik ere feedbacka jasoko dugu, motozaleen komunitatetik, hain zuzen: irailaren 1 eta 2an motozaleen topaketa egingo dute Arratian eta egun osoan zehar txosnan bildutako dirua Eduri emango diote, gaixotasunak eragiten dion kalteei eta ohe mekanikoa edo fisiologoaren gastuei aurre egiteko, besteak beste".
Elkartearen hurrengo hitzordua irailaren 6an da. Egun horretan bilera egingo dute kideek eta programako ordutegiak zehaztuko dituzte, besteak beste.
ELA, gizartean
'Lou Gehrigen gaixotasuna' bezala ezaguna, Alboko Esklerosi Amiotrofikoa (ELA), garuneko eta bizkarrezur-muineko nerbio-zelulei eragiten dien gaixotasun neurodegeneratibo progresiboa da. Mundu osoan dagoen nahasmendua da eta 100.000 pertsonatik 2 eta 5 artean pairatzen dute, arraza, sexu edo adin bereizketarik egin gabe.
Mundu osoan dagoen gaixotasuna da ELA eta 100.000 lagunetik 2 eta 5 artean pairatzen dute, arraza, sexu edo adin bereizketarik egin gabe
Neurona motorrak garunetik bizkarrezur-muinera doaz, eta bizkarrezur-muinetik gorputz osoko muskuluetara. Denborarekin, ELAk sortutako neurona motorren endekapen progresiboak horien heriotza eragiten du.
Neurona motorrak hiltzen direnean, garunak giharren mugimendua hasteko eta kontrolatzeko gaitasuna galtzen du. Borondatezko muskuluen ekintzan gero eta eragin handiagoa duenez, gaixotasunaren azken etapetan dauden pazienteak erabat geldi daitezke.
☉ Zaratamo
Zaratamoko Berdintasun Batzordeak urte amaierara arteko ekintzak iragarri ditu Arkotxa eta Elexalden
Aurtengo jarduerei begira urrian Zaratamoko Emakumeen dokumentala proiektatuko dute Elexalden, eta azaroan zehar zinema feministako hainbat saio, autodefentsa feministako saio bat eta zoru pelbikoa indartzeko ikastaroa
Zaratamoko Berdintasun Batzordea 2018an sortu zuten lan-prozesua bultzatzeko. Lau urte geroago, Bigarren Berdintasun Planaren sorrerarekin indarra hartu zuen batzordeak eta berdintasunaren inguruan prestakuntza jaso du.
Gaur egun osaera mistoa dauka Zaratamoko berdintasun taldeak: Ainhoa Muerza berdintasun saileko zinegotzia da, Rosa María Compés gizarte langilea, Debora Nogales Eskolako Familien Elkarteko kidea, Sara Varona García erizaina, Ilu Sagarduy Zaratamoko emakumezko eta gizonezko hiritarrak taldeko arduraduna eta Janire Martínez herriko beste elkarte batzuen arduraduna (Wayra, Altzoan…). Datorren urriaren 18an, batzordearen hurrengo bilera antolatu dute Elexalden, 17:30ean eta herritar guztiak gonbidatuta dituzte bertara.
Batzordekideak, Zaratamoko udaletxe atzekaldeko parkean // Geuria
Berdintasun Batzordeak lau helburu nagusi ditu: lehena, Berdintasun Planaren egite, ezartze eta jarraipen prozesuan laguntzea; bigarrena, Aukera berdintasuna lortzeko ekimen eta ekintzak bultzatzen laguntzea, hirugarrena, Zaratamoko Udaleko berdintasun politikak bideratzeko ideiak eta hausnarketak egiteko eremua izatea; eta laugarrena, Herrian emakume eta gizonen arteko benetako berdintasuna lortzeko proposamen eta ekintzen lantzean laguntzea. Horretarako, emakumeak eta gizonak esparru guztietan, Hezkuntzan, enpleguan, aisialdian, osasunean, kulturan, kirolean, eta abarrean nola bizi diren aztertzen du eta egoera horiek hobetzeko ekintzak bultzatzen ditu "berdintasuna balio gisatik hasiz eta hiritarren partaidetza bultzatuz", azaldu dute taldetik.
2022an Berdintasun Agenda martxan jarri zuten eta bertan ekintza ezberdinak egin ziren: zine forumak, auto-zaintza emozionala ikastaroa, autodefentsa feminista, emakume migratuentzako topaketak… Aurtengo jarduerei begira urrian Zaratamoko Emakumeen dokumentala proiektatuko dute Elexalden, eta azaroan zehar zinema feministako hainbat saio, autodefentsa feministako saio bat eta zoru pelbikoa indartzeko ikastaroa.
Elexalde Kultur Etxea // Geuria
Berdintasun Batzordearen ekintzak 2023
Urriak 4, asteazkena
18:00 Zinema feminista: 'Un felíz acontecimiento', Arkotxako Txokoa
Urriak 27, ostirala
18:00 Zaratamoko Emakumeen dokumentalaren aurkezpena, Elexalde Kultur Etxea
Azaroak 22, asteazkena
18:00 Zinema Feminista: Norma Rae, Arkotxako Txokoa
Azaroak 24, ostirala
18:00 Zinema Feminista: 'Gett, el divorcio de Viviane Amsalen', Elexaldeko kultur Etxea
Azaroak 25, larunbata
10:00 – 14:00 Autodefentsa Feminista: Norma Rae, Arkotxako Txokoa
Abenduak 1 eta 5
18:00 – 20:00 Zoru pelbikoa indartzeko ikastaroa, Elexaldeko Kultur Etxea
Abenduak 15, ostirala
18:00 Zinema Feminista: 'Todos queremos los mejor para ella', Elexaldeko Kultur Etxea
☉ Zaratamo
Zaratamok emakume migratuen inguruko bost saio antolatu ditu Arkotxan
Saio hauek adin guztietako publikoarentzat prestatu dituzte iraila amaieran eta urrian zehar
Zaratamoko Udalak, Emakunde eta Foru Aldundiaren babesarekin eta Wayra elkartearekin elkarlanean, 'Emakume migratuen boterea' izeneko bost saio antolatu ditu Arkotxako txokoan.
Lehen saioa joan den irailaren 23an antolatu zuten, eta bertan emakumeek elkar ezagutzeko aukera izan zuten. Hurrengo saioetan, irailaren 30ean eta urriaren 7an, 21ean eta 28an, emakume hauen jatorriaz, euren jaioterritik gaurdaino egin duten ibilbideaz, helmugaz eta ekintza kolektiboen garrantziaz arituko dira.
Saio hauek adin guztietako publikoarentzat prestatu dituzte, eta bertan parte hartzeko 663 342 056 telefono zenbakia jarri dute herritarrentzat.
☉ Zaratamo
Vulcanizados Zuloaga enpresako zortzi langile kaleratu dituztela salatu du ELA sindikatuak
Epaitegiak aldi baterako lan erregulazioko espedientea baliogabetu "eta ordu gutxira" Vulcanizados Zuloagako zuzendaritzak zortzi kaleratze gutun bidali dituela salatu du ELA sindikatuak
Zaratamoko Vulcanizados Zuloaga enpresak apirilean aurkeztutako aldi baterako lan erregulazioko espedientea Bilboko Lan Arloko epaitegiak baliogabetu ondoren, orain zortzi langile kaleratu dituztela salatu du ELA sindikatuak: "Epaia eman eta ordu gutxira, Vulcanizados Zuloagak zortzi kaleratze gutun bidali ditu, arrazoi 'objektiboak' argudiatuz, itxuraz".
Kaleratu dituzten langile guztiak ELAko afiliatuak direla adierazi dute sindikatutik, "eta urte eta erdiz greban egondakoak", diote, eta gaineratu dute: "Sindikatuaren aurkako beste jarrera baten aurrean gaude".
ELAk kaleratu guztiak "berehala" lanpostura itzultzea eskatu du, "eta horretarako bitarteko egokienak jarriko ditugu martxan", diote.
☉ Zaratamo
Justiziak Zaratamoko Vulcanizados Zuloaga enpresaren Aldi Baterako Espedientea baliogabetu du
ELA sindikatuaren arabera, ABEEaren neurria baliogabea da arrazoi birengatik: alde batetik, kausak ez daude akreditatuta eta bestetik espedientea greba egitearen erantzun modura ipini dute
Bilboko Lan Arloko Epaitegiak Zaratamoko Vulcanizados Zuloaga enpresak joan den apirilean bertako langileei proposatutako Aldi Baterako Espediente Erregulatzailea (ABEEa, ERTE, gaztelaniaz) baliogabetu du: "Vulcanizados Zuloagak askatasun sindikalaren eskubidea urratu du, grebarako eta negoziazio kolektiborako eskubidea urratuz", azaldu dute Justizia Epaitegitik.
Joan den martxoan akordioa erdietsi zuen Vulcanizados Zuloaga enpresak greban zeuden ekoizpeneko langile guztiekin, urte eta erdiko (617 egun) grebari amaiera emateko helburuarekin , lan baldintzen hobekuntzekin. Grebari amaiera eman zitzaion eta langileek disfrutatzeke zituzten egunak hartu zituzten. "Langileak, lan egin barik, lehen egunean Aldi Baterako Espediente Erregulatzaile batekin egin zuten topo", azaldu dio Mikel Etxebarria ELA sindikatuko kideak GEURIAri. "Enpresak lan-karga jaitsi zela argudiatu zuen baina guk argi eta garbi ikusi genuen ABEE hori diskriminatzailea zela grebalarien aurka eta greba bera egiteagatik zigor modura ezarri dutela".
Grebalari bat, pegatina bat ipintzen martxa batean // Geuria
"Langileak, lan egin barik, lehen egunean Aldi Baterako Espediente Erregulatzaile batekin egin zuten topo"
Etxebarriaren arabera, ondorio modura, grebalariak maiatzetik egon dira ABEErekin eta erantzun modura, ELAk errekurtsoa ipini zuen eta atzo bertan jaso zuten Bilboko Lan Arloko Epaitegiaren erantzuna: "Epaileak sententzian adierazi duenez, ABEEaren neurria baliogabea da arrazoi birengatik: alde batetik, kausak ez daude akreditatuta eta bestetik espedientea greba egitearen erantzun modura ipini dute", izan dira ELAko kidearen berbak. Sententziaren arabera, greba egitearen eskubidea eta askatasun sindikala bortxatu du Zaratamoko enpresak
"Horiek horrela, enpresak etendako lan kontratu guztiei berehala ekin behar die berriro, eta eraginpeko langileek jaso ez dituzten soldatak ordaintzera kondenatuko du Zuloaga", azaldu dute sindikatutik. Ondorio modura eta sindikatuak azaldu bezala, epaiak ELA sindikatuari 25.000 euro ordaintzera kondenatzen du enpresa, kalte moralagatiko kalte ordain gisa.
"Buruarekin" jokatuz
Sententzia errekurrigarria bada ere, "justizia egiten duela" azaldu du Etxebarriak: "Erabaki honek egoera txarrean utzi du enpresa"eta enpresak "burua jarri" behar duela azaldu du Mikelek: "Enpresak ulertu behar du bere langileak errespetatu behar dituela, inolako diskriminaziorik egin gabe. Langileek beren lan-egoera hobetu dituzte eta horixe bera errespetatu behar du Zuloagak. Ez dago besterik".
"Enpresak burua erabili behar du, langileek lan baldintza onekin lan egiteko prest daudelako"
ELAko kidearen arabera, enpresak, "burua erabili baino tripak erabili ditu" momentura arte, haserrearekin eta modu desegokian jokatuz: "Enpresak burua erabili behar du, langileek lan baldintza onekin lan egiteko prest daudelako".
Greba hasi zutenetik, grebalariek mobilizazio ugari antolatu dituzte Hego Uribe eskualde osoan zehar: Zaratamon (enpresaren egoitzan bertan zein udaletxean), Arrigorriagan, Ugaon, Galdakaon eta baita Zeberion ere.
☉ Zaratamo
Zaratamok txakurren Espainiako Obedientzia Txapelketa hartuko du lehen aldiz urrian
Ordutegiak erabakita ez badaude ere, jarduera egun osokoa izango dela aurretu du Marie Deitieux hezitzaileak eta edozein motako txakurrek parte hartu ahalko dutela azaldu digu
Datorren urriaren 14an txakurren Espainiako Obedientzia Txapelketa (ODU bezala ezaguna) hartuko du Zaratamok Gurutzaldeko futbol zelai ohian. Ekitaldia Zaratamoko 100% Orekan klubak antolatu du: "Urtean zehar ligarako puntuak jasotzen ibili dira parte-hartzaileak Espainian zehar antolatutako txapelketa ezberdinetan", azaldu dio GEURIAri Marie Deitieux 100% Orekan klubeko arduradunak.
"Klubeko kideok Toledon izan ginen joan den apirilean, Nafarroan ekainean eta Gipuzkoan uztailean, ligarako puntuak eskuratzen"
Ordutegiak erabakita ez badaude ere, jarduera egun osokoa izango dela aurretu du hezitzaileak: "Edozein arrazako txakurrek parte hartu ahal izango dute txapelketan eta izen emateak txapelketaren eguna baino aste bi lehenago zabalduko ditugu".
Txakurrek jarraipen probei, janariarekin antolatutako ariketei, euste eta bilaketa ariketei egin beharko diete aurre besteak beste, eta lau maila bereiziko dira guztira. "Klubeko kideok Toledon izan ginen joan den apirilean, Nafarroan ekainean eta Gipuzkoan uztailean, ligarako puntuak eskuratzen", azaldu du Deitieuxek. Zaratamoko klubak entrenamendu saioak egiten ditu astelehenero, 17:30ean.
100% Orekan klubeko kideak, Zaratamoko Gurutzalde zelaian // 100% Orekan
Frantziatik Zaratamora
Marie Deitieux Frantziatik Bilbora etorri zen txakur hezitzaile ikasketak egiteko, 2022ko irailean GEURIAn jaso genuen bezalaxe, ikasketa horien inguruko eskola gutxi zeuden Frantzian, gertukoena Parisen. "Ez nuen hain urrutira joan nahi. Horregatik etorri nintzen Bilbora. Bertan formazioa egiteko aukera topatu nuen".
Zaratamora heldu zenean 100% Orekan eskola sortu zuen, txakurrei oinarrizko obedientzia edo ODU ezagutzak irakasteko. Hasiera batean bere etxean bertan lan egin zuen txakurrekin, baina hilabete batzuk geroago, Zaratamoko Udalak Gurutzaldeko futbol zelai ohiko zati bat laga zion bere jarduera burutu ahal izateko. Gaur egun 17 kide ditu 100% Orekanek.
Espainiako Txapelketa Zaratamon lehen aldiz antolatzea "erronka garrantzitsua" da Deitieuxentzat eta Estatu mailatik herrira hurbilduko den jende kopurua kalkulatzea "zaila" dela dio hezitzaileak: "Txapelketa hau finala baino hilabete bat lehenago antolatu dugu eta puntuak lortzeko aproposa da. Horrela izanik jende asko hurbildu beharko litzateke Zaratamora, baina batek daki!".
Garriko Taekwondo Talde arrigorriagarrak bost domina ekarri ditu Logroñoko La Vendimia openetik
Zeberioko Eusebio Aldekoa egoitza zuzendari bila dabil uztailetik
Depedro, Tremenda Jauria, Merina Gris, Silitia eta La Perra Blanco taldeek joko dute MAZ Basaurin
Argazkiak | Barreak eta algarak, San Migeleko jaietako Playback lehiaketan
Argazkiak | Galdakaoko jaien osteko kuadrillen bazkariak 200 lagun bildu ditu
