Sareak

☉ Zaratamo

Nagore Barrena: «Inteligentzia artifizialaren diseinuan eta erabileran aldagai etikoa kontutan hartu behar da»

Bere jardunean informatika eta zientzia uztartzen ditu irakasle eta ikertzaile zaratamarrak, eta inteligentzia artifizialean ere aditua da

|

19 urterekin Zaratamo utzi eta Donostiara ikastera joan zen Nagore Barrena (1983). Ordutik hona, bere ibilbidea EHUko Informatika Fakultatearekin lotuta dago, bertan irakasle eta ikerlari moduan ari baita, Ingeniaritza Informatikoa zein Adimen Artifizialeko graduetan, eta baita “Hizkuntza Azterketa zein Prozesamendua” masterrean ere. Zaratamon hezi eta hazi izana “pribilegio” moduan definitzen du, herri txiki bat izanik “askatasun erabatekoan” bizi zirelako, baina Nagore helduaren tokia Donostian dagoela argi dauka, gustatzen zaiona jorratzeko aukera eman diolako, “bai profesionalki, bai pertsonalki eta bai sozialki ere”.

Azken aldian bolo-bolo dabil inteligentzia artifizialari buruzko eztabaida.
Edozein aurrerapen, berrikuntza edo asmakizun bezala, dagoeneko existitzen da, hortaz, geratzeko heldu da. Gakoa erabilpenean eta honen kudeaketa egokian dago.Adimen artifiziala dagoeneko gure artean bizi izan da aspalditik; produktuen gomendioa, itzultzaile automatikoak, objektuen errekonozimendua, eta abar. Baina azkenaldian bolo-bolo dabilen gaia da, batik bat ChatGPT-ek hartu duen ospeagatik.

Oso era azkarrean eta, hala espero dut, dibulgatiboan azaltzeko asmoz: ikasketa automatikoko tekniken artean neurona-sareak daude. Hauek gizakiaren garuneko sareen funtzionatzeko eran inspiratzen dira. Sare hauek ikasteko garaian lortzen duten eraginkortasuna datuen multzoaren menpe dago hein handi batean. Gero eta datu gehiago, orduan eta entrenamendu (ikasteko) prozesu hobeak lortzeko gaitasuna.

Adimen artifizialak izan dezakeen garapenari dagokionez, egia esan, zaila da esatea edo aurreikustea. Egia da azkar eboluzionatzen ari den eremua dela. Ez dakit noraino heltzeko gai izango den. Historikoki eragiketa edo akzioa fisikoekin lotu izan dugu makinen automatizazioa: torlojua jarri eta kendu, fabriketako makinetatik gauzak garraiatu, eta abar.

Eta orain, ikusi izan duguna da, “intelektoarekin” lotu izan ditugun gauzak egiteko/ikasteko gaitasuna hartzen ari dela: elkarrizketa bat jarraitu, poema bat idatzi, irudi bat sortu, musika, marrazki bat, eta abar. Horrek harritu egin gaitu, eta beldurtum aldi berean. Eta beldurra sentsazionalismoaren elikagai nagusia da.

Adimen artifizialeko sistema bat, ikaragarri eraginkorra eta zehatza izan daiteke ataza konkretu bat egitean, gizakia baino hobea gainera. Baina ataza hori egiteko gai da, besterik ez. Guk, gizakiok ordea, marrazki bat egin, altxatu eta kafe bat prestatzen dugu, lagunekin solasaldi bat izaten dugu, idatzi egiten dugu geroago, eta abar.

Hortaz, aprobetxatu dezagun benetan gure onurarentzat, gauza on asko ekarri ditzake eta. Adibide aplikatu batzuk aipatzearren: melanomak zehaztasunez detektatzen dituzten sistemak, proteinen tolestea iragartzen duten sistemak (funtsezkoa da biologoentzat toleste honen informazioa izatea eta laborategi batean egunak beharko lirateke teknika hauen bitartez minututan lortzen denean).

Baina, noski, berriz ere, honek, beste denak bezalaxe, kalteak ekar ditzake, eta kalte horiek gutxienekoak izan daitezen kudeaketa egokia egin beharra dugu gizarte mailan. Adibidez, desberdintasun sozialak areagotu ditzake teknologian trebakuntza egokia dutenen eta ez dutenen artean.

Sistema hauek behar izaten dituzten datuen bilketak eta analisiak pribatutasunari buruzko kezkak sor ditzake. Sistema hauen diseinuan eta erabileran etika falta izateak ohar etiko edo moralak kontuan hartzen ez dituzten erabaki automatizatuak ekar ditzake.

Teknologia eta etika, gai konplexua.
Bai. Behin, Itziar Lakari entzun nion askotan erabili dudan esaldia: Suaren aurkikuntza gizakiarentzat ezinbestekoa izan da, baina sua, berez, kalte larriak sortzen dituen elementua ere bada.

Egin hausnarketa edo ariketa zintzoa eta pentsatu zer nolakoa izango zen mundua informatikaren inongo aurrerakuntzarik gabe. Demagun medikuntza gaur egun, eta irudikatu zure burua ospitale batean: hasi pentsatzen zenbat makina eta teknologia dagoen hor zure mesederako, TAC-a, erradiografiak, ekografiak, ordenagailuak noski, telefonoa bera eta abar luze bat.

Eta horietako zenbatek ematen duten dagoeneko informazio automatizatua eta oso baliotsua: 3D irudia bera lortzea, tumoreen tamaina antzematea, ekografien kasuan umearen irudiaren berregitea bera, bere tamaina, irudi mikroskopikoen aztertzea, baita akzio sinpleagoak ere; mezuak eta dokumentuak partekatzea medikuen artean, ospitalearen eta erabiltzailearen arteko komunikazioa, beste ospitale batzuetako ikerketa-lanetarako sarbidea, beste kasu batzuen ikasketa, eta abar luze bat.

Oso arlo maskulinizatua izan da informatika eta zientziarena. Nabaritu izan duzu matxismo edo diskriminaziorik?
Tristea bada ere, seguru nago emakumeok, denok, bizi izan dugula hein handi batean horrelako egoeraren bat. Badaude guztiz nabarmenak diren egoerak, eta beste batzuk ez hain agerikoak.

Nabarmenetakoen artean, tamalez oso ohikoa den batekin gogoratzen naiz: laneko elkarrizketa baten umerik banuen edo ez galdetu zidaten egunean. Oso era lasaian eta “rollo” onean galdetu zidan, elkarrizketaren parte izan ez balitz bezala, modu enpatiko batean nire bizitzari buruz interesa erakusten ari balitz bezala.

Kafe bat hartzen eta elkar ezagutzen ari diren bi pertsonen arteko solasaldia balitz bezala, alegia. Momentuan, ezustean harrapatzen zaitu, baina segituan hasten zara pentsatzen: zergatik galdetu dit hau? Eta okerragoa dena: nolatan utzi diot galdera hori egiten? Jakin-mina sortuko lioke datu horrek gizonezkoa banintz? Hain nabarmenak ez diren horien artean, baina gure egunerokotasunaren parte direnak ere badaude.

Gure lanbidean (eta seguru asko gehienetan) oso presente dago, adibidez, iruzurgilearen sindromea deritzona. Oso lotuta dago, norberaren lorpenen onarpenarekin. Aipatutako sindromea lau emakumetatik hiruk pairatzen dute beren karrera profesionaleko uneren batean. Antza, emakumeotan lorpenen “handitasuna” barneratzea kostatu egiten da, askotan gutxietsi egiten ditugularik. Lorpen handiak ez daude emakumeoi lotuta, gizonezkoei baizik. Hori ikusten dugu era ez zuzen batean (edo guztiz zuzenean) txikitatik.

Matxismoaren eragin ez hain nabarmen horietako baten emaitza da ere gure fakultatean ikusten duguna: Ingeniaritza Informatikoa ez da itxuraz erakargarria emakumezkoentzat. Matrikula datuek diote gizonezkoak urtero gailentzen direla nabarmen. Aldiz, eta zorionez, Adimen Artifizialeko graduan gauzak parekatuagoak daude. “Ingeniaritza” hitz horrek emakumezkoak urrundu egiten ditu.

Fenomeno hau ez da Informatikan bakarrik ematen, beste gradu batzuetan ere bai. Ohituraz gizonezkoekin lotu izan ditugun arloak dira. Baina zergatik egin izan dugu lotura hori? Berriz ere, hain nabarmena ez den baina presente dagoen matxismo horrek, txikitatik gizonezkoak lider, arrakastatsu eta eredu izaten erakusten dizkigutelako arlo horietan. Emakumezkoen erreferentziarik gabe.

Hain justu ere, hori ekidin nahian, eta ohitura/tendentzia hori puskatu nahian, besteak beste, Emakumeak Zientzian egitasmoa sortu zen: gure gaur egungo neskatilak (baita mutilak ere) zientzia nesken kontua ere badela ohar daitezen, eta zientzian dihardugun emakumeon lana islatzeko aukera izan dezagun. Informatika Fakultateko emakumeok ere egitasmo horren parte gara.

Umeek eta nerabeek mugikorrarekin duten harremana ere zeresana ematen ari da.
Mugikorraren erabilpenak onurak ekarri dizkigu, noski, baina neurrian erabili behar da. Eta horri aurre egiteko, heldutasun bat behar duzu, 12 urterekin ez duzuna. Heldutasun eta hausnarketa hori gabe, erraz erortzen zara jokabide desegokietan, eta horrek zure lagunen artean eta gizartean komunikatzeko eta jokatzeko duzun bidea marraztu dezake. Hala eta guztiz ere, helduok eredu izan beharko genuke, eta gu mugikorrari kateatuta bizi gara, beraz, zer eskatzen diegu nerabeei?

☉ Zaratamo

Eduardo Jiménez: “Vulcanizados Zuloagako zuzendaritzaren jazarpenak denori eragingo digu”

Lan Arloko Epaitegiak langile grebalari baten kaleratzea baliogabetu du “enpresaren zigorra” izateagatik eta EAEko Auzitegi Nagusiak berretsi du 2023ko apirilean planteatutako aldi baterako lan erregulazioko espedientearen baliogabetzea

|

Ugaotik Zeberiora egindako martxa, 2021ean // Geuria

Iazko irailean, Zaratamoko Vulcanizados Zuloaga enpresak ELA sindikatuan afiliatutako eta greban parte hartutako zortzi langile kaleratu zituen: “ELAk beste epaiketa bat irabazia du ildo berean beste lankide baten kaleratzeagatik. Beraz, hau da bigarrena, eta epaiak berriro behartzen du enpresa kaleratuak berriro hartzera, eta kaleratze egunetik aurrera ordaintzera soldata”, azaldu dute sindikatutik.

GEURIAk enpresa eta langileen arteko gatazkaren jarraipena egin du arazoa azaleratu zen lehen momentutik eta Eduardo Jiménez langilearekin harremanetan izan da: “Erabaki honek bizitzen ari garen egoera azalerazi du berriro”, izan dira langilearen berbak.

“Langileon aurkako eraso indiskriminatua da honako hau: lehenik eta behin bake eta greba amaieraren hitzarmena sinatu genituen. Gero Aldi baterako lan erregulazioko espedientea ezarri ziguten eta EAEko Auzitegi Nagusiak baliogabetu zuen eta gero greban parte hartutako eta ELAn afiliatutako zortzi langile kaleratu zituzten modu automatikoan”.

Lehen langile kaleratuaren epaiketaren emaitza kaleratze nulo bezala kalifikatu zuen epaileak, eta enpresari 20.000 euroko kalte ordainak eskatu zizkion. Orain beste lankide baten epaiketa izan da, baina ez da azkena izango: “Maiatzean beste epaiketa bi ditugu eta ekainean beste bi”, esan du Jimenezek. “Azken bolada epaitegietan ematen ari gara”.

Vulcanizados Zuloaga enpresako sarrera, Zaratamon // Geuria

“Enpresaren jokabidea ez da batere ona. Egia esateko ez dakit zein helburu ezkutatzen duen baina epaileek arrazoia langileei ematen ari dira behin eta berriro. Grebarekin bat egin izanagatik eskubideak urratu direla ikusten ari gara. Atzo lan-arloko epaitegian izan ginen lehen kaleratuaren kautelazko epaia eskatzen, langilea urtarriletik kobratu gabe zegoelako”, kexatu da Jiménez.

Eduardo Jimenez: “Enpresak ez du langilea ikusi nahi; nahiago du etxean geratzea soldata jasotzen duen bitartean”

Sententziaren arabera, langilea lanean hasi eta soldata jasotzen hasi behar zen: “Epaileak enpresa zuzendaritzako abokatuari atentzioa eman zion, langilea oraindik ez duelako dirurik ikusi, baina hori ez da dena: enpresak ez du langilea ikusi nahi; nahiago du langilea etxean geratzea soldata jasotzen duen bitartean”.

Vulcanizados Zuloagako langileak, grebaren 200. egunean, Zaratamoko lantegian // Geuria

Gainontzeko langileen inguruan galdetzean, Eduardok dio egoerak pertsona guztiei “laster edo berandu” eragingo diela: “Nire ustez Vulcanizados Zuloagako zuzendaritzaren jazarpenak denori eragingo digu, greban parte hartzeagatik. Enpresako ordezkarien arabera langileak dira egoera honen errudunak, baina horrek ez du bat egiten epailearen erabakiarekin”. Eduardok langileen negoziatzeko borondatea gogorarazi du gatazkari irtenbidea emateko eta kaleratutako langileak berriro kontratatzeko: “Enpresaburuak ez ditu langile horiek berriro ikusi nahi. Horrela gaude”.

GEURIAn aipatu lez, Euskal Autonomia Erkidegoko Auzitegi Nagusiak berretsi egin du 2023ko apirilean Vulcanizados Zuloaga planteatutako aldi baterako lan erregulazioko espedientearen baliogabetzea, epaiaren arabera “ez baitu ekoizpen kausa autonomorik ikusi, baizik eta plantillak urte eta erdian egindako grebarekin lotura duela”. Ondorio modura, Lan arloko epaitegiak 25.000 euroko kalte ordaina ezarri dio Zaratamoko enpresari

Osorik irakurri

☉ Zaratamo

EAEko Auzitegi Nagusiak Vulcanizados Zuloagako langile grebalari baten kaleratzea baliogabetu du

Langile horren eta beste zazpi beharginen aurkako neurria enpresaren zigorra izan zela salatu zuen ELA sindikatuak, eta Lan Arloko Epaitegiak hori berretsi du

|

Hurrengo hilabeteetan antzeko beste epaiketa batzuk izango direla aurreratu dute ELA sindikatutik / Geuria

ELA sindikatuak Vulcanizados Zuloaga enpresako langileei eragiten dien bi sententzien berri eman du, biak ala biak Lan Arloko Epaitegiari dagozkionak: alde batetik aldi baterako lan erregulazioa bertan behera utzi du epaitegiak, eta bestetik langile grebalari baten kaleratzea baliogabetu du.

Lan erregulazioari dagokionez, sindikatuak berak argitu ditu sententziaren nondik norakoak: “Euskal Autonomia Erkidegoko Auzitegi Nagusiak berretsi egin du 2023ko apirilean planteatutako aldi baterako lan erregulazioko espedientearen baliogabetzea, ez baitu ekoizpen kausa autonomorik ikusi, baizik eta plantillak urte eta erdian egindako grebarekin lotura duela dio epaiak. Beraz, Lan Arloko Epaitegiak jada ezarritako 25.000 euroko kalte ordaina ordaindu beharko dio enpresak ELAri kalte moralengatik”.

Bestetik, Lan Arloko Epaitegiak ELAko afiliatu baten kaleratzea bertan behera utzi du,  “Vulcanizados Zuloagak langile horren eta beste zazpi langileren aurka greba egiteagatik hartutako neurria dela iritzita”.

2023ko irailean enpresak zortzi langile kaleratu zituen, “guztiak ELAko afiliatuak eta greba egindakoak”. Sindikatutik gogoratu dutenaren arabera, “ELAk beste epaiketa bat irabazia du ildo berean beste lankide baten kaleratzeagatik. Beraz, hau da bigarrena, eta epaiak berriro behartzen du enpresa kaleratuak berriro hartzera, eta kaleratze egunetik aurrera ordaintzera soldata”. Kaleratutako langileei 20.000 euroko kalte ordaina ordaintzeko betebeharra ezarri dio enpresari.

Azkenik, sindikatuak gainerako kaleratuak  “berehala berriz hartzeko exijitu du, eta enpresari askatasun sindikalaren aurkako erasoak eteteko”.

Osorik irakurri

☉ Zaratamo

Zaratamoko Arkotxa auzoko kontsultorio berriaren lanak irailean bukatuko dituzte

Guztira 148.000 euro bideratu dituzte Arkotxako kontsultorioaren bigarren eta azken fase honetarako

|

Arkotxako kontsultorioaren kanpoaldea, gaur egun // Geuria

Zaratamoko Arkotxa auzoko kontsultorioak eraberritzeko lanak azken fasean murgilduko dira eta Udalak, barruko antolaketari ekiteaz gainera aerotermia energia-sistema ipiniko du bertan.

Bigarren faseko lan hauetarako 137.000 euro bideratuko ditu Udalak eraikinaren barru antolamenduko lanak burutzeko. Obrak aste bi barru hasiko dituztela iragarri dute, “ondo bidean” eta lanen iraupena bost hilabetekoa izango dela aurreratu diote GEURIAri.

“Azken fase honetan ikusi beharko dugu nola moldatu garen herritarrei zerbitzua behar bezala emateko”, izan dira Alberto Ugarriza Zaratamoko alkatearen berbak.”Irailerako lanak bukatuta egon beharko dira”.

Alberto Ugarriza: “Azken fase honetan ikusi beharko dugu nola moldatu garen herritarrei zerbitzua behar bezala emateko”

Bigarren fasean honetan inguratzaile termikoa hobetzea, fatxadaren inguratzaile termikoa hobetzea, forjaketa sanitarioaren isolamendua, estalitako inguratzaile termikoa hobetzea, kanpoko arotzeria ordeztea eta instalazioen eraginkortasuna hobetuko ditute.

Aerotermia sistema ezartzeko EBEK Kudeaketaren 11.000 euroko diru-laguntza jaso du Zaratamoko Udalak: “Horrela, eraikina energia berriztagarrien iturrien bidez hornituta geratzea ahalbidetuko da. Proposatutako sistemek energia aurrezteaz gain, emisioak eta ingurumen-inpaktua murrizteko aukera emango dute”, jasotzen du proiektuaren memoriak.

Kontsultorioa, 2021ean // Geuria

Bizi berri bat

Lanen helburua Arkotxako eskola zaharren eraikina kontsultategi mediko gisa eraberritzeko obrak gauzatzea da, eraginkortasun energetikoko eta energia berriztagarrien inplementazioko irizpideak jarraituz.

Jakina denez, Arkotxako kontsultategia auzoko eskola zenaren eraikinean dago. Eraberritzeko memorian azaldu bezala, kokalekuan “auzoaren erdigune neuralgikoa” bilatzen zen, irisgarritasuna errazteko eta goiko posizioan, fatxada guztiak libre zeudelarik.

Fatxada nagusia hegoalderantz orientatzen zen, klima- eta argiztapen-baldintza hobeak zituelako, eta eraikina iparraldeko orientaziotik babesten zen. Aireztapena modu naturalean aurreikusten zen atari batera irekitzen zuen sarrerako atetik, bat-bateko tenperatura-aldaketak saihesteko.

Osorik irakurri

☉ Zaratamo

Bigarren aukera, animalia askoren ezinezko ametsa

Hego Uribe eskualdean, iazko azaroan GEURIAn iragarri bezala, 11.968 txakur daude erroldatuta, baina ezer gutxi esaten da zerrenda horietan agertzen ez diren txakurrez

|

Txakurrei bigarren aukera eman diete "La casa del Perro"-n

Martin Zaratamon topatutako tamaina ertaineko txakurra da. “Jatorra eta maitakorra” bezala definitu dute udaletxeko langileek. “Ez dakigu zer dela eta inork ez du txakurra momentura arte adoptatu”. Martin 2020an agertu zen Zaratamon, pandemia garaian. Urte hartan, Udalak Zaunk txakurtegiarekin egiten zuen lan eta bertara eraman zuten. Gaur egun, txakurtegia itxi zutenetik La Casa del Perrok kudeatzen du.

Egun hartatik hainbat txakur igaro dira txakurtegitik eta Martin ez da leku horretatik irten, eta egia esateko, zail du bigarren aukera bat erdiesteko: zazpi urte ditu, ertaina da eta 23 kilo pisatzen ditu. Txakur bat adoptatuko duten pertsona askorentzat ez dira ezaugarri positiboak: jendeak txakur gazteak eta txikiak nahi ditu orokorrean. Espektro horretatik aldentzen diren hautagaiek aukera oso gutxi dituzte aukeratuak izateko. Errealitate tristea da, txakurrari geratzen zaion bizitza ziurrenik zentro horretan emango duelako.

Hego Uribe eskualdean, iazko azaroan GEURIAn iragarri bezala, 11.968 txakur daude erroldatuta, baina ezer gutxi esaten da zerrenda horietan agertzen ez diren txakurrez. Are gehiago, gero eta normalizatuago eta barneratuago daukagu Martin bezalako animalia askok pairatzen dituzten tratu txarrak eta abandonuak. Sare sozialek ia egunero kalean, inolako identifikaziorik gabe topatutako txakurren berri ematen dute eta erabiltzaileok gero eta erraztasun handiagoa dugu, hoztasunez, beste alde batera begiratzeko.

“Txakurarren adina eta tamaina faktore erabakigarriak dira adopzio prozesua martxan jartzean”

Hego Uriben, kopurua oso handia ez bada ere, animalien abandonu kasuak egon badaude, eta horretarako animalien harrera zentroetako zenbakietara begiratzea besterik ez dago. Udalerriek txakurtegi baten zerbitzuak kontratatu ohi ditu galdutako edo abandonatutako animaliak jaso eta kudeatzeko. Hego Uribeko eskualdean Quincocan, La Casa del Perro eta Kantarriketas enpresen zerbitzuak kontratatu dituzte: Arrigorriagak, Etxebarrik eta Ugaok Quincocan, Basaurik, Zaratamok eta Galdakaok La Casa del Perro eta Zeberiok Kantarriketas. Gaur egun Quincocanek eskualdean topatutako zazpi txakur ditu, bost Etxebarrin eta bi Arrigorriagan. Egun hauetan ez dago Ugaon aurkitutako txakurrik. La Casa del Perrok 100 animalia baino gehiago ditu Sopelako txakurtegian eta horietako 29 Basaurin aurkitutakoak dira, 15 Galdakaon eta bat Zaratamon (Martin). Eskatu bazitzaien ere, Kantarriketasekoek ez diote bere txakurtegiko kopururik eman GEURIA komunikabideari.

Protokoloa, gertutik

Edozein herritarrek topa dezake galdutako edo abandonatutako animalia bat udalerrian. Kasu horretan, Zaratamo bezalako Udalek gomendio garrantzitsu bat luzatu diete herritarrei: animalia topatu bezain pronto udaltzainei deitu animalia jaso eta jabea lokalizatzeko prozesua ahalik eta lasterren abiarazteko.

“Galdutako animalia bat topatzean egin beharreko lehen gauza udaltzainei abisatzea da, jabea topatzeko”

Udaltzainek txakurra jaso bezain pronto animaliaren identifikazio lanak martxan ipintzen dituzte eta irakurle baten bidez txakurrak txipa duen ikusten dute. Txipa izatekotan, bertan jabearen informazioa ageriko da eta pertsona horrekin harremanetan jarriko dira udal langileak eta bestela udalerriari dagokion txakurtegiarekin. “Momentu horretan jabeak 15 egun izango ditu txakurra txakurtegitik jasotzeko”, azaldu du Marta del Moral La Casa del Perroko langileak. Epe hori igarota eta jabea agertu barik jarraitzen badu, txakurtegia Udalarekin harremanetan jarriko da eta 10 eguneko epea izango dute udal langileek jabea lokalizatzeko. “Bigarren epe hori igarota jabearen seinalerik ez badago txakurrari txipa kenduko zaio eta Udalaren izenean dagoen txip berria jarriko diote”, gehitu du La Casa del Perroko langileak. “Baina horrek ez du esan nahi txakurra berreskuratzeko aukerak amaitu zaizkiola. Txakurrak, Udaleko txipa ipinita izanik ere, jabeak eskatutako dokumentazioa aurkezten badu txakurra berreskuratuko luke, baina adopzio prozesu baten bidez”. Kasu hori idealena litzateke txakurrarentzat, ziurrenik galduta egon zitekeelako eta etxera itzultzeko aukera izango lukeelako, gehienetan. 

Animaliak txipik ez badu bilaketa lanak zailduko lirateke langileentzat eta hipotesi gehiago sartuko lirateke jokoan: tratu txarrak, abandonua… Talde honen barruan dago Martin, inork egunen batean bere etxean hartu eta bere bizitzari bigarren aukera emango dion itxaropena galdu barik.

Osorik irakurri

☉ Zaratamo

Urrutikoetxea eta Elezkano II pilotari zaratamarrek Bizkaia Torneoan hartuko dute parte

Danel Elezkano zaratamarra Gorbeia taldean arituko da lau t’erdiko espezialitatean. Urrutikoetxea, ostera, Kolitzan lehiatuko da Albisurekin batera eskuz binakakoan

|

Gaur goizean ekainaren 1ean Urdulizen hasiko den Bizkaia Torneoaren 11. edizioaren aurkezpen ofiziala egin dute Bilbon. Bertan Leixuri Arrizabalaga Euskara eta Kultura diputatua, Aspe eta Baiko Pilota enpresetako ordezkariekin bildu da. Guztira 24 pilotarik hartuko dute parte aurtengo edizioan eta horien artean Mikel Urrutikoetxea eta Danel Elezkano zaratamarrak daude.

Bizkaia Torneoa taldeka eta hiru espezialitateak jokatzen dituen esku pilota lehiaketa bakarra da. Talde bakoitzak Bizkaiko mendi baten izena dauka: Ganekogorta, Oiz, Gorbeia, Sollube, Anboto eta Kolitza. Talde bakoitzean lau pilotari ageri dira: bi binakako modalitatean, bat lau t’erdian eta beste bat banakakoan.

Danel Elezkano zaratamarra Gorbeia taldean arituko da lau t’erdiko espezialitatean. Bere taldean Elordi eta Zabaleta binakakoan izango dira eta Salaberria banakakoan. “Pozik nago Gorbeia taldean jokatzea tokatu izanagatik”, aitortu dio Elezkanok GEURIAri bere taldekideen berri izan duenean.

Danel Elezkano // Geuria

Mikel Urrutikoetxea Kolitza taldean egongo da Albisurekin batera eskuz binakako modalitatean. Jaka lau t’erdian neurtuko da eta Zubizarreta III.a banakakoan.

Mikel Urrutikoetxea // Geuria

Lehiaketa sistema

Final-laurdenetako, finalerdietako eta finaleko kanporaketa sistemaren arabera jokatuko dute pilotariek eta kanporaketa bakoitzean gutxienez bi garaipen lortu dituen taldea sailkatuko da. Antolakuntzatik azaldu dute partidak 22 tantora jokatuko dituztela eskuz binakako modalitatekoek eta 18ra banakako kanporaketetan.

Txapelketa Urdulizen, Zeanurin, Mallabian eta Bilbon jokatuko da eta kanporaketak ekainaren 14, 15 eta 16an jokatuko dituzte. Finala abuztuaren 20an antolatu dute Bilboko Bizkaia Frontoian. Sarrerak webgune honetan eskuratu daitezke.

Osorik irakurri