Sareak

☉ Zaratamo

Presaganako txistulariak: «Txistuak kalea eta naturaltasuna galdu du; ez du antzinako presentzia»

Zaratamoko Presagana txistulari taldeak belaunaldi ezberdinetako lau kide dauzka gaur egun. Txistulariaren figuraren inguruan luz egin dugu berba kideekin. Txistularia txistua eta danbolina jotzeaz harago doan musikaria dela diote, “jendea kalean barrena elkartzeaz” arduratzen dena, besteak beste.

|

Presaganako txistularia taldea / Geuria

Kaleak txistuka animatzen dituzten musikariak ditugu Zaratamoko Presagana taldeko Jose Inazio Basterretxea (Galdakao, 1959), Iñaki Sautua (Orozko, 1955), Xabier Amezketa (Basauri, 1959) eta Xabier García (Zaratamo, 1998). Taldea 2014an sortu zuten eta Pello Joxepe, Albisturen Zortzikoa edo Mendizaleak Aurrera bezalako kantak jo dituzte Arkotxan, Elexalden edo Bilbon. Gaur egun hiru jubilatuk eta gazte batek osatzen dute Zaratamoko txistularien taldea eta musikari hurbil hauen etorkizunaz, oinordekotzaz eta ametsez aritu gara Elexalden duten entsegu lokalean, Taberna Zaharraren azpian. Lau kideen arabera, txistulari onak egon badaude, baina musikarien etorkizuna ziurgabetasunean murgilduta dagoela eta antzinako naturaltasuna galdu duela diote.

Zenbat urte daramatzazue Presaganan?
Jose Inazio: 2014an egin genuen lehen kontzertua, Arkotxan. Gogoan daukat. Egia da ere kontzertu hura baino lehen herriko kaleetan zehar kalejirak emandakoak ginela. Bizkaian ‘Euskal Kantak’ kantu txapelketa zegoen eta guk abesti batzuk jo genituen ekitaldiaren amaieran. Bertan Presaganako txistulariekin batera Arrigorriagako eta Basauriko lagun batzuk izan genituen.

Nolakoa da txistulariaren figura?
Iñaki Sautua: Beti egongo dira txistulariak herrian, sakabanatuta bada ere. Azken batean, txistulariak jendea kalean barrena elkartzeaz arduratzen garen musikariak gara.

Txistularia izatea herentzia kontua da?
I.S: Nire aititea atabalaria bazen ere, nire kabuz ikasi nuen txistua jotzen.
J.I: Nire aita txistularia zen. Bistan da kontu hauetan beti dagoela sektoreko inor bakoitzaren familian.

Eta gaur egun, nola dago txistularitza?
I.S: Badeko bizitza, ezta? -dio kideei begiratuz-.
Xabier García: Gazteon artean, gitarra elektrikoa edo bateria dira musika eskoletan gehien eskatzen direnak. Txistua aukera arraroa izan ohi da gaztetxoen artean. Txikitan txistulariak kalean ikusten nituenean gurasoei esaten omen nien nagusia izatean horixe egin nahi nuela. Urteak aurrera egin ahala, musika eskoletan txistulariak egon badirela jabetu naiz.
J.I: Txistuak kalea eta naturaltasuna galdu du. Orain dela urte batzuk, txistulariaren figurak presentzia handiagoa zeukan, adibidez, mendiko irteeretan: ibilbidean zehar animatzen zuen, autobusean ere bai! Erromerietan, jendeak bokata jaten zuen bitartean, bertan egoten zen txistularia, ekitaldia girotzen. Egoera hau ez da hainbeste ikusten gaur egun. Horrek ez du esan nahi txistularirik ez dagoenik; ziurrenik inoiz baino txistulari gehiago daude!

Presaganako txistulari taldea / Geuria

Eta non daude orduan?
J.I: Nik uste dut kontzertuetan presentzia handitu dela, baita antolatutako kalejiretan eta dantza ekitaldietan ere.

Oinordekorik al dute egungo txistulariek?
J.I: -Gainontzeko txistulariei begira, Xabier Garciari izan ezik- Jubilatuta, jubilatuta eta jubilatuta. Gu hirurok jubilatuta gaude. -Orain bai, Xabierri begira- Gaztea!

Xabier, 23 urte, taldeko gazteena.
X.G: Duela urte batzuk, musikari izateko hiru instrumentuko eskaintza zegoen. Gaur, ostera, eskaintza hori modu nabarmenean handitu da eta nazioarteko instrumentuak jotzeko aukera dugu. Aukera hain handia izanik, euskal folklorea desagertzeko edo lausotzeko arriskua bertan dago. Hala ere, txistulariaren figurak aurrera egingo duen sentsazioa daukat.

2014tik Arkotxan, Elexalden eta Bilboko Kafe Antzokian egon zarete txistuka. Esperientzia horien guztien artean ba al dago inoiz ahaztuko duzuen oroimenik?
J.I: Kafe Antzokikoa primeran egon zen. Udako Euskal Unibertsitateak Uztaro izeneko aldizkari bat dauka, gizarte zientzietakoa. 2017an urteurrena ospatu zuen eta aldizkariko zuzendaria, Jokin Apalategi, gure kontzertuetara etorritakoa zen, Maite Idirin emazteagaz. Ospakizunera joan eta bertan jotzeko gonbidapena luzatu zigun eta oso gustura ibili ginen bertan. Bilboko Orkestra Sinfoniko Gaztearekin ere kontzertu polita egin genuen Zaratamoko San Lorentzo elizan, koro eta guzti! Kuriosoa izan zen kontzertu hura (barreak).

Pandemia igarota, berriro martxan?
J.I: Ekainaren 4an berrekingo diogu martxari, Arkotxako jaietan eta kalejira egingo dugu auzoko kaleetan barrena, eguerdi aldera. Urtero kontzertu pare bat eskaintzen doguz herriko koruagaz eta gainontzekoak kalejirak izan ohi dira, San Lorentzotan edo Upo mendian, adibidez.
I.S: Urtean hamar aldiz jotzen dugu batez beste Zaratamon: Arkotxan behin, Elexalden hiru aldiz, Burbustun, Upon, ospakizun berezietako egunetan… Hala ere, kalejira horietan, Presaganako txistulariekin batera lagunak izaten ditugu.
J.I: Hori da. Gu, berez, lau gara Presganako txistulariak. Kontzertu eta kalejiretan gonbidatuekin aritzen gara. Inor ‘engainatzen’ saiatzen gara beti (barreak).

Presaganako txistulari taldea / Geuria

Musikan, oro har, tendentziak daude eta estiloak garatuz doaz. Txistularitzan, aldiz, aldaketa gutxi, baina harrera ona dute musikariek herrietan.
J.I: Folkloreagaz, historiagaz eta kulturagaz lotura daukalako, agian. Txistularia musikari herrikoia da, tabernan edo elizan egon daitekeena. Txistua instrumentu oso irisgarria da jendearentzat.
X.G: Eta euren musikeagaz dantza egin daiteke edo eserita entzun eta gozatu!
J.I: Oso polita da guretzat baserri batera heldu, San Lorentzotan kasu, jota pare bat jo eta ostean txakolina eta txorizo mutur bat jan, bertako jendeagaz. Zoragarria da auzotarrengandik irteten den ospakizun hori. Ohitura bat dago eta txistularia, derrigorrezko figura ez bada ere, bertan egon ohi da.

Zenbatero elkartzen zarete Elexaldeko lokalean?
J.I: Astean bitan dira entseguak. Gutako bik hitzordua errespetatzen dute beti. Beste biok, ostera, bestelako betekizunak ditugu eta batzuetan ezin gara bi egunetan etorri.
I.S: Ordu eta erdi eta bi orduko saioak izan ohi dira normalean.

Denbora dexente entsaiatzen dozue!
J.I: Torpeak gara eta.

Torpeak ez dakit, baina primeran joko dozue!
I.S: Ai ama! Hori beste kontu bat da! (barreak).

Nolako ezaugarriak izan behar ditu txistulari batek txistulari ona izateko?
X.G: Hasteko, solfeo oinarri ona izan. Baina ‘ona’ izatearena galdera zabala da gero!
J.I: Auzotarra dugu Sabin Bikandi. Parametroa bera badugu, munduan txistulari on bi daude: bera eta Mendizabal. Estilo askotako txistulari on asko daude munduan. Garai batean Boni Fernández izan genuen Bilboko txistulari erreferentea, esaterako. Ni, galdakaoztarra izanik, Zamalloa anaiak ditut erreferente, adibidez. Bikandi eta Mendizabal erreferente modernoen artean koka ditzakegu, eta hori eztabaidaezina da. Adibide horiek oso ezberdinak dira euren artean, bizitzea tokatu zaien momentuaren araberakoa.

Gaur egun txistulari on asko dauzkagu gure artean, orduan.
I.S: Xabier Amezketa Bilbao Musikan ikasitakoa dugu eta bertan txistulari gazte asko daude. Hala ere, badago saioa bete eta instrumentua berehala gordetzen duten musikaririk. Gu plazako txistulariak gara. Egiten dugun hau benetan gozatzen dugu.

Nolako oihartzuna dauka txistularitzak gure eskualdean?
J.I: Talde asko eta onak ditugu gero! Galdakaoko Andra Mari dantza taldea, Arrigorriagako Arizberri, Basauriko Danbolin… Erreferente benetan aipagarriak ditugu.
I.S: Eta baita eskualdetik haratago ere: Areetan, Laudion, Amurrion, Urduñan… Herri guztietan ditugu txistulariak!
X.G: Ezkerraldean dantzataldeak egon badaude, baina txistulari gutxi, esaterako.
J.I: Portugaleten Elai Alai kultur elkartea dago, oso potente portzierto!

Zuen kontzertu gehienak Zaratamon egin dituzue. Edonon jotzeko aukera izango bazenute, nora joango zinatekete?
X.G: Ni betidanik jo nahi izan dut aldaketa kultural batean, gure kultura beste herrialde batekin elkarbanatuz, esaterako.
I.S: Atlantiar ozeanoa zeharkatu eta Idahoko Boise Jaialdira joan, lau urterik behin antolatzen diren euskal topaketetan parte hartzera!
J.I: Bai hala? Ez nuen espero! (barreak). Niri asko gustatuko litzaidake gazte gehiago erakartzea Presaganara. Poz handia emango ziguten!

☉ Zaratamo

Eduardo Jiménez: “Vulcanizados Zuloagako zuzendaritzaren jazarpenak denori eragingo digu”

Lan Arloko Epaitegiak langile grebalari baten kaleratzea baliogabetu du “enpresaren zigorra” izateagatik eta EAEko Auzitegi Nagusiak berretsi du 2023ko apirilean planteatutako aldi baterako lan erregulazioko espedientearen baliogabetzea

|

Ugaotik Zeberiora egindako martxa, 2021ean // Geuria

Iazko irailean, Zaratamoko Vulcanizados Zuloaga enpresak ELA sindikatuan afiliatutako eta greban parte hartutako zortzi langile kaleratu zituen: “ELAk beste epaiketa bat irabazia du ildo berean beste lankide baten kaleratzeagatik. Beraz, hau da bigarrena, eta epaiak berriro behartzen du enpresa kaleratuak berriro hartzera, eta kaleratze egunetik aurrera ordaintzera soldata”, azaldu dute sindikatutik.

GEURIAk enpresa eta langileen arteko gatazkaren jarraipena egin du arazoa azaleratu zen lehen momentutik eta Eduardo Jiménez langilearekin harremanetan izan da: “Erabaki honek bizitzen ari garen egoera azalerazi du berriro”, izan dira langilearen berbak.

“Langileon aurkako eraso indiskriminatua da honako hau: lehenik eta behin bake eta greba amaieraren hitzarmena sinatu genituen. Gero Aldi baterako lan erregulazioko espedientea ezarri ziguten eta EAEko Auzitegi Nagusiak baliogabetu zuen eta gero greban parte hartutako eta ELAn afiliatutako zortzi langile kaleratu zituzten modu automatikoan”.

Lehen langile kaleratuaren epaiketaren emaitza kaleratze nulo bezala kalifikatu zuen epaileak, eta enpresari 20.000 euroko kalte ordainak eskatu zizkion. Orain beste lankide baten epaiketa izan da, baina ez da azkena izango: “Maiatzean beste epaiketa bi ditugu eta ekainean beste bi”, esan du Jimenezek. “Azken bolada epaitegietan ematen ari gara”.

Vulcanizados Zuloaga enpresako sarrera, Zaratamon // Geuria

“Enpresaren jokabidea ez da batere ona. Egia esateko ez dakit zein helburu ezkutatzen duen baina epaileek arrazoia langileei ematen ari dira behin eta berriro. Grebarekin bat egin izanagatik eskubideak urratu direla ikusten ari gara. Atzo lan-arloko epaitegian izan ginen lehen kaleratuaren kautelazko epaia eskatzen, langilea urtarriletik kobratu gabe zegoelako”, kexatu da Jiménez.

Eduardo Jimenez: “Enpresak ez du langilea ikusi nahi; nahiago du etxean geratzea soldata jasotzen duen bitartean”

Sententziaren arabera, langilea lanean hasi eta soldata jasotzen hasi behar zen: “Epaileak enpresa zuzendaritzako abokatuari atentzioa eman zion, langilea oraindik ez duelako dirurik ikusi, baina hori ez da dena: enpresak ez du langilea ikusi nahi; nahiago du langilea etxean geratzea soldata jasotzen duen bitartean”.

Vulcanizados Zuloagako langileak, grebaren 200. egunean, Zaratamoko lantegian // Geuria

Gainontzeko langileen inguruan galdetzean, Eduardok dio egoerak pertsona guztiei “laster edo berandu” eragingo diela: “Nire ustez Vulcanizados Zuloagako zuzendaritzaren jazarpenak denori eragingo digu, greban parte hartzeagatik. Enpresako ordezkarien arabera langileak dira egoera honen errudunak, baina horrek ez du bat egiten epailearen erabakiarekin”. Eduardok langileen negoziatzeko borondatea gogorarazi du gatazkari irtenbidea emateko eta kaleratutako langileak berriro kontratatzeko: “Enpresaburuak ez ditu langile horiek berriro ikusi nahi. Horrela gaude”.

GEURIAn aipatu lez, Euskal Autonomia Erkidegoko Auzitegi Nagusiak berretsi egin du 2023ko apirilean Vulcanizados Zuloaga planteatutako aldi baterako lan erregulazioko espedientearen baliogabetzea, epaiaren arabera “ez baitu ekoizpen kausa autonomorik ikusi, baizik eta plantillak urte eta erdian egindako grebarekin lotura duela”. Ondorio modura, Lan arloko epaitegiak 25.000 euroko kalte ordaina ezarri dio Zaratamoko enpresari

Osorik irakurri

☉ Zaratamo

EAEko Auzitegi Nagusiak Vulcanizados Zuloagako langile grebalari baten kaleratzea baliogabetu du

Langile horren eta beste zazpi beharginen aurkako neurria enpresaren zigorra izan zela salatu zuen ELA sindikatuak, eta Lan Arloko Epaitegiak hori berretsi du

|

Hurrengo hilabeteetan antzeko beste epaiketa batzuk izango direla aurreratu dute ELA sindikatutik / Geuria

ELA sindikatuak Vulcanizados Zuloaga enpresako langileei eragiten dien bi sententzien berri eman du, biak ala biak Lan Arloko Epaitegiari dagozkionak: alde batetik aldi baterako lan erregulazioa bertan behera utzi du epaitegiak, eta bestetik langile grebalari baten kaleratzea baliogabetu du.

Lan erregulazioari dagokionez, sindikatuak berak argitu ditu sententziaren nondik norakoak: “Euskal Autonomia Erkidegoko Auzitegi Nagusiak berretsi egin du 2023ko apirilean planteatutako aldi baterako lan erregulazioko espedientearen baliogabetzea, ez baitu ekoizpen kausa autonomorik ikusi, baizik eta plantillak urte eta erdian egindako grebarekin lotura duela dio epaiak. Beraz, Lan Arloko Epaitegiak jada ezarritako 25.000 euroko kalte ordaina ordaindu beharko dio enpresak ELAri kalte moralengatik”.

Bestetik, Lan Arloko Epaitegiak ELAko afiliatu baten kaleratzea bertan behera utzi du,  “Vulcanizados Zuloagak langile horren eta beste zazpi langileren aurka greba egiteagatik hartutako neurria dela iritzita”.

2023ko irailean enpresak zortzi langile kaleratu zituen, “guztiak ELAko afiliatuak eta greba egindakoak”. Sindikatutik gogoratu dutenaren arabera, “ELAk beste epaiketa bat irabazia du ildo berean beste lankide baten kaleratzeagatik. Beraz, hau da bigarrena, eta epaiak berriro behartzen du enpresa kaleratuak berriro hartzera, eta kaleratze egunetik aurrera ordaintzera soldata”. Kaleratutako langileei 20.000 euroko kalte ordaina ordaintzeko betebeharra ezarri dio enpresari.

Azkenik, sindikatuak gainerako kaleratuak  “berehala berriz hartzeko exijitu du, eta enpresari askatasun sindikalaren aurkako erasoak eteteko”.

Osorik irakurri

☉ Zaratamo

Zaratamoko Arkotxa auzoko kontsultorio berriaren lanak irailean bukatuko dituzte

Guztira 148.000 euro bideratu dituzte Arkotxako kontsultorioaren bigarren eta azken fase honetarako

|

Arkotxako kontsultorioaren kanpoaldea, gaur egun // Geuria

Zaratamoko Arkotxa auzoko kontsultorioak eraberritzeko lanak azken fasean murgilduko dira eta Udalak, barruko antolaketari ekiteaz gainera aerotermia energia-sistema ipiniko du bertan.

Bigarren faseko lan hauetarako 137.000 euro bideratuko ditu Udalak eraikinaren barru antolamenduko lanak burutzeko. Obrak aste bi barru hasiko dituztela iragarri dute, “ondo bidean” eta lanen iraupena bost hilabetekoa izango dela aurreratu diote GEURIAri.

“Azken fase honetan ikusi beharko dugu nola moldatu garen herritarrei zerbitzua behar bezala emateko”, izan dira Alberto Ugarriza Zaratamoko alkatearen berbak.”Irailerako lanak bukatuta egon beharko dira”.

Alberto Ugarriza: “Azken fase honetan ikusi beharko dugu nola moldatu garen herritarrei zerbitzua behar bezala emateko”

Bigarren fasean honetan inguratzaile termikoa hobetzea, fatxadaren inguratzaile termikoa hobetzea, forjaketa sanitarioaren isolamendua, estalitako inguratzaile termikoa hobetzea, kanpoko arotzeria ordeztea eta instalazioen eraginkortasuna hobetuko ditute.

Aerotermia sistema ezartzeko EBEK Kudeaketaren 11.000 euroko diru-laguntza jaso du Zaratamoko Udalak: “Horrela, eraikina energia berriztagarrien iturrien bidez hornituta geratzea ahalbidetuko da. Proposatutako sistemek energia aurrezteaz gain, emisioak eta ingurumen-inpaktua murrizteko aukera emango dute”, jasotzen du proiektuaren memoriak.

Kontsultorioa, 2021ean // Geuria

Bizi berri bat

Lanen helburua Arkotxako eskola zaharren eraikina kontsultategi mediko gisa eraberritzeko obrak gauzatzea da, eraginkortasun energetikoko eta energia berriztagarrien inplementazioko irizpideak jarraituz.

Jakina denez, Arkotxako kontsultategia auzoko eskola zenaren eraikinean dago. Eraberritzeko memorian azaldu bezala, kokalekuan “auzoaren erdigune neuralgikoa” bilatzen zen, irisgarritasuna errazteko eta goiko posizioan, fatxada guztiak libre zeudelarik.

Fatxada nagusia hegoalderantz orientatzen zen, klima- eta argiztapen-baldintza hobeak zituelako, eta eraikina iparraldeko orientaziotik babesten zen. Aireztapena modu naturalean aurreikusten zen atari batera irekitzen zuen sarrerako atetik, bat-bateko tenperatura-aldaketak saihesteko.

Osorik irakurri

☉ Zaratamo

Bigarren aukera, animalia askoren ezinezko ametsa

Hego Uribe eskualdean, iazko azaroan GEURIAn iragarri bezala, 11.968 txakur daude erroldatuta, baina ezer gutxi esaten da zerrenda horietan agertzen ez diren txakurrez

|

Txakurrei bigarren aukera eman diete "La casa del Perro"-n

Martin Zaratamon topatutako tamaina ertaineko txakurra da. “Jatorra eta maitakorra” bezala definitu dute udaletxeko langileek. “Ez dakigu zer dela eta inork ez du txakurra momentura arte adoptatu”. Martin 2020an agertu zen Zaratamon, pandemia garaian. Urte hartan, Udalak Zaunk txakurtegiarekin egiten zuen lan eta bertara eraman zuten. Gaur egun, txakurtegia itxi zutenetik La Casa del Perrok kudeatzen du.

Egun hartatik hainbat txakur igaro dira txakurtegitik eta Martin ez da leku horretatik irten, eta egia esateko, zail du bigarren aukera bat erdiesteko: zazpi urte ditu, ertaina da eta 23 kilo pisatzen ditu. Txakur bat adoptatuko duten pertsona askorentzat ez dira ezaugarri positiboak: jendeak txakur gazteak eta txikiak nahi ditu orokorrean. Espektro horretatik aldentzen diren hautagaiek aukera oso gutxi dituzte aukeratuak izateko. Errealitate tristea da, txakurrari geratzen zaion bizitza ziurrenik zentro horretan emango duelako.

Hego Uribe eskualdean, iazko azaroan GEURIAn iragarri bezala, 11.968 txakur daude erroldatuta, baina ezer gutxi esaten da zerrenda horietan agertzen ez diren txakurrez. Are gehiago, gero eta normalizatuago eta barneratuago daukagu Martin bezalako animalia askok pairatzen dituzten tratu txarrak eta abandonuak. Sare sozialek ia egunero kalean, inolako identifikaziorik gabe topatutako txakurren berri ematen dute eta erabiltzaileok gero eta erraztasun handiagoa dugu, hoztasunez, beste alde batera begiratzeko.

“Txakurarren adina eta tamaina faktore erabakigarriak dira adopzio prozesua martxan jartzean”

Hego Uriben, kopurua oso handia ez bada ere, animalien abandonu kasuak egon badaude, eta horretarako animalien harrera zentroetako zenbakietara begiratzea besterik ez dago. Udalerriek txakurtegi baten zerbitzuak kontratatu ohi ditu galdutako edo abandonatutako animaliak jaso eta kudeatzeko. Hego Uribeko eskualdean Quincocan, La Casa del Perro eta Kantarriketas enpresen zerbitzuak kontratatu dituzte: Arrigorriagak, Etxebarrik eta Ugaok Quincocan, Basaurik, Zaratamok eta Galdakaok La Casa del Perro eta Zeberiok Kantarriketas. Gaur egun Quincocanek eskualdean topatutako zazpi txakur ditu, bost Etxebarrin eta bi Arrigorriagan. Egun hauetan ez dago Ugaon aurkitutako txakurrik. La Casa del Perrok 100 animalia baino gehiago ditu Sopelako txakurtegian eta horietako 29 Basaurin aurkitutakoak dira, 15 Galdakaon eta bat Zaratamon (Martin). Eskatu bazitzaien ere, Kantarriketasekoek ez diote bere txakurtegiko kopururik eman GEURIA komunikabideari.

Protokoloa, gertutik

Edozein herritarrek topa dezake galdutako edo abandonatutako animalia bat udalerrian. Kasu horretan, Zaratamo bezalako Udalek gomendio garrantzitsu bat luzatu diete herritarrei: animalia topatu bezain pronto udaltzainei deitu animalia jaso eta jabea lokalizatzeko prozesua ahalik eta lasterren abiarazteko.

“Galdutako animalia bat topatzean egin beharreko lehen gauza udaltzainei abisatzea da, jabea topatzeko”

Udaltzainek txakurra jaso bezain pronto animaliaren identifikazio lanak martxan ipintzen dituzte eta irakurle baten bidez txakurrak txipa duen ikusten dute. Txipa izatekotan, bertan jabearen informazioa ageriko da eta pertsona horrekin harremanetan jarriko dira udal langileak eta bestela udalerriari dagokion txakurtegiarekin. “Momentu horretan jabeak 15 egun izango ditu txakurra txakurtegitik jasotzeko”, azaldu du Marta del Moral La Casa del Perroko langileak. Epe hori igarota eta jabea agertu barik jarraitzen badu, txakurtegia Udalarekin harremanetan jarriko da eta 10 eguneko epea izango dute udal langileek jabea lokalizatzeko. “Bigarren epe hori igarota jabearen seinalerik ez badago txakurrari txipa kenduko zaio eta Udalaren izenean dagoen txip berria jarriko diote”, gehitu du La Casa del Perroko langileak. “Baina horrek ez du esan nahi txakurra berreskuratzeko aukerak amaitu zaizkiola. Txakurrak, Udaleko txipa ipinita izanik ere, jabeak eskatutako dokumentazioa aurkezten badu txakurra berreskuratuko luke, baina adopzio prozesu baten bidez”. Kasu hori idealena litzateke txakurrarentzat, ziurrenik galduta egon zitekeelako eta etxera itzultzeko aukera izango lukeelako, gehienetan. 

Animaliak txipik ez badu bilaketa lanak zailduko lirateke langileentzat eta hipotesi gehiago sartuko lirateke jokoan: tratu txarrak, abandonua… Talde honen barruan dago Martin, inork egunen batean bere etxean hartu eta bere bizitzari bigarren aukera emango dion itxaropena galdu barik.

Osorik irakurri

☉ Zaratamo

Urrutikoetxea eta Elezkano II pilotari zaratamarrek Bizkaia Torneoan hartuko dute parte

Danel Elezkano zaratamarra Gorbeia taldean arituko da lau t’erdiko espezialitatean. Urrutikoetxea, ostera, Kolitzan lehiatuko da Albisurekin batera eskuz binakakoan

|

Gaur goizean ekainaren 1ean Urdulizen hasiko den Bizkaia Torneoaren 11. edizioaren aurkezpen ofiziala egin dute Bilbon. Bertan Leixuri Arrizabalaga Euskara eta Kultura diputatua, Aspe eta Baiko Pilota enpresetako ordezkariekin bildu da. Guztira 24 pilotarik hartuko dute parte aurtengo edizioan eta horien artean Mikel Urrutikoetxea eta Danel Elezkano zaratamarrak daude.

Bizkaia Torneoa taldeka eta hiru espezialitateak jokatzen dituen esku pilota lehiaketa bakarra da. Talde bakoitzak Bizkaiko mendi baten izena dauka: Ganekogorta, Oiz, Gorbeia, Sollube, Anboto eta Kolitza. Talde bakoitzean lau pilotari ageri dira: bi binakako modalitatean, bat lau t’erdian eta beste bat banakakoan.

Danel Elezkano zaratamarra Gorbeia taldean arituko da lau t’erdiko espezialitatean. Bere taldean Elordi eta Zabaleta binakakoan izango dira eta Salaberria banakakoan. “Pozik nago Gorbeia taldean jokatzea tokatu izanagatik”, aitortu dio Elezkanok GEURIAri bere taldekideen berri izan duenean.

Danel Elezkano // Geuria

Mikel Urrutikoetxea Kolitza taldean egongo da Albisurekin batera eskuz binakako modalitatean. Jaka lau t’erdian neurtuko da eta Zubizarreta III.a banakakoan.

Mikel Urrutikoetxea // Geuria

Lehiaketa sistema

Final-laurdenetako, finalerdietako eta finaleko kanporaketa sistemaren arabera jokatuko dute pilotariek eta kanporaketa bakoitzean gutxienez bi garaipen lortu dituen taldea sailkatuko da. Antolakuntzatik azaldu dute partidak 22 tantora jokatuko dituztela eskuz binakako modalitatekoek eta 18ra banakako kanporaketetan.

Txapelketa Urdulizen, Zeanurin, Mallabian eta Bilbon jokatuko da eta kanporaketak ekainaren 14, 15 eta 16an jokatuko dituzte. Finala abuztuaren 20an antolatu dute Bilboko Bizkaia Frontoian. Sarrerak webgune honetan eskuratu daitezke.

Osorik irakurri