Sareak

☉ Zeberio

Bideoa / Aitor Azkueta: “GPSagaz ardiengana goaz, zuzenean”

Ardien artean jaio eta hazi da Aitor Azkueta Buendía (Zeberio, 1991), Olarrekoa baserrian. Familiak ardi esnea ekoizten zuen 120 ardiz osatutako talde bategaz. Oinarrizko hezkuntzako ikasketak bukatu ostean, 2012an Arantzazuko Artzain Eskolan gazta egiteko ikastaroa bukatu zuen Azkuetak eta familiako negozioari buelta bat emango zion erabakia hartu zuen: ardi-esnea ekoizteari utzi, artaldea handitu eta Idiazabal motako gazta egiten hasi

|

Ardien artean jaio eta hazi da Aitor Azkueta Buendía (Zeberio, 1991), Olarrekoa baserrian. Familiak ardi esnea ekoizten zuen 120 ardiz osatutako talde bategaz. Oinarrizko hezkuntzako ikasketak bukatu ostean, 2012an Arantzazuko Artzain Eskolan gazta egiteko ikastaroa bukatu zuen Azkuetak eta familiako negozioari buelta bat emango zion erabakia hartu zuen: ardi-esnea ekoizteari utzi, artaldea handitu eta Idiazabal motako gazta egiten hasi. Aitaren laguntzagaz ardiak zaindu, eta ostean kilo bateko gaztak sortzen ditu Saldarianeko auzotarrak, baserrian bertan. Neguan arkumeak zaindu ostean eta belarra auzoko larretan bukatzen den garaian, teknologia berriakaz lagunduta, Gorbeiara eroaten dute 300 ardi latxez osatutako artaldea, uda igarotzera. Zeberioztarrak ez du ardirik gabeko bizitzarik irudikatzen eta bere bizimodua ez luke beste edozergatik aldatuko.

Noiz konturatu zinen bizitza artzaintzan eman nahi zenuela? Betidanik izan doguz ardiak etxean. Txikitan, Zeberioko eskolatik irten eta segidan aitari laguntzen nion baserriko lanak egiten. Egia da lehen ardi gutxiago geneuzkala bertan, baina Arrigorriagako institutuko ikasketak bukatutakoan Arantzazuko Artzain Eskolan gazta egiteko sei hilabeteko ikastaroa egin eta 2012an ni neu etxean ekoizten hasi nintzen. Artaldea handitu behar izan genuen horretarako.

Nolakoa da zure artaldea, Aitor? 300 ardi latx ditut nik. Ardi banda ona. Neguko egunak Saldarianen ematen doguz gaztaia egiten eta arkumeen jaiotzak artatzen. Ondoren, belarra bukatzen denean, uda aldean, Gorbeialdera eramaten doguz ardiak tipi tapa, sei orduko ibilbidean. Uda aldean goizero joan ohi gara Gorbeiara, zainketa lanak egiten.

Saldarianen beste lan dago mendian? Ez hainbeste, baina adi egon behar gara, mendira jende asko doalako eta askotan euren txakurrak aske uzten dituztelako, horrek ekar ditzakeen arazoetan pentsatu barik. Behin baino gehiagotan ardiak zauritu dizkigute txakurrek, eta kontu horietan ez dago arduradunik, antza. Horregatik mastinak eramaten doguz beti.

Nolakoa da zure lanbidea? Denbora asko eskatzen duen ogibidea da artzainarena. Hemen ez dago jairik ezta oporrik ere! Egunero egin behar da lan. Ardi gutxi genituenean eskuz batu ohi genituen aitak eta biok kaiola batzuekaz eta horiegaz esnea batzen genuen. Baina esnearen negozioak okerrera egin zuen, litroagatik ez zutelako euro bat ere ordaintzen. Horregatik gazta ekoiztera egin genuen salto eta hobeto bizi gara orain.

Artzaintza desagertzear dagoela diote askok. Urteek aurrera egin ahala gero eta traba eta kontrol gehiago jartzen doskuez. Nik Idiazabal gazta sortzen dut eta kontrol zorrotz ugari egiten doztie. Urteek aurrera egin ahala artaldea handituz joan gara, eta traba asko egon arren, momentuz aurrera goaz.

Teknologia berriek lekurik ba al dute artzaintzan? Antzina denbora asko galtzen genuen mendian ardien bila. Gaur, ostera. GPSa erabiltzen dogu, eta artez-artez goaz ardiak dauzen lekura, denbora galdu barik. Gaur egun hiru GPS erabiltzen dodaz ardiekin nabilenean: goizean etxetik urten bezain pronto ardiak non dauzen jakin dezaket.

Zure adineko artzain gehiago ezagutzen al dozuz? Eskualdean ez dago beste inor, nik dakidanik. Jende askok esaten dit norbaitek lanbide honen lekukoa hartu behar duela, bestela lanbidea galduko delako. Gaur egun lanbide honetan dihardugunok erreta gaude: gero eta traba eta arau murriztaile gehiago daude gure ofizioan. Berritasun modura, negozioko paper guztiak digitalizatzea eskatzen digute azken urte hauetan. Nik ez dekot denborarik, ez gogorik ezta ordenagailurik be. Ez dakit nola demontre erabiltzen den!

Nolakoak dira zure gaztak eta nolako harrera dute? Idiazabal motakoak ekoizten ditut: 1.000 gramokoa, 1.200 gramokoa, 1.300 gramokoa… Egunean 40 gazta inguru ekoitzi ditzaket eta bezeroak Saldarianen bertan zein eskualdeko merkatuetan dekodaz. Hala ere, salmentak oso ezberdinak izan daitezke merkatuetan, egun onak eta txarrak daude.

Nolakoa da Saldarian, bertan bizitzeko? Behar asko badago ere oso pozik bizi naz bertan eta ez nuke ezergatik aldatuko nire bizitza auzo honetan: pisu batean ezingo nintzateke sekula bizi! (barreak). Ugaora edo Zeberiora bost minututan hel zaitezke, autoz.

☉ Zeberio

Egun osoko egitaraua prestatu dute Zeberion Euskararen Nazioarteko Egunaren harira

Hainbat elkartek, udalarekin elkarlanean, egitarau oparoa prestatu dute, goizean goizetik hasita eta arratsaldeko azken ordurarte

|

Egun osoko egitaraua prestatu dute / Geuria

Zeberioztarrentzat egun garrantzitsua da Abenduaren 3a, Euskararen Nazioarteko Eguna. Hainbat elkartek, udalarekin elkarlanean, egitarau oparoa prestatu dute, goizean goizetik hasita eta arratsaldeko azken ordurarte.

Eguneko lehen hitzordua 11:30ean izango da, eta etxeko txikienek izango dute zer ikasi eta zer gozatu: taloak egiteko txokoa, kamisetak eta txapak margotzeko txokoa eta karaoke txokoa prestatu dituzte eurentzat.

Ondoren, eta eguerdi partea girotzeko, 12:30ak aldera, Jon eta Maiderren kale animazioaz gozatu ahal izango dute txiki eta ez hain txikiek. Dantzan eta kantuan aritzeko aukeraz gain, gaztaina goxo-goxo batzuk jateko parada izango dute.

Ordubete geroago, 13:30ean, ekitaldia egingo da.

Eguna ezin hobeto bukatzeko, arratsaldeko  19:00etan Irati film magikoarekin itxiko dute egun berezi hau.

 

Osorik irakurri

☉ Zeberio

Azaro feministari hasiera emango diote gaur Zeberion

Gaurtik hasita, eta datorren larunbata bitartean hainbat ekitaldi antolatu dituzte: dokumentala, dantza ikuskizuna eta elkarretaratzea, hurrenez hurren

|

Iazko azaro feministako ekitaldi bat

Azaroaren 25aren bueltan programazio oparoa prestatu dute Zeberion. Gaurtik hasita, eta datorren larunbata bitartean hainbat ekitaldi antolatu dituzte aurtengo azaro feministan: dokumentala, dantza ikuskizuna eta elkarretaratzea, hurrenez hurren.

Gaur bertan, arratsaldeko 18:30ean “Volar” dokumentala eskeiniko dute udaletxeko bigarren solairuan, eta ondoren solasaldia egingo dute filmeko protagonistekin.

Lan honek erakusten duen moduan, genero-indarkeriak ez du mugarik ez gizarte-klaserik ezagutzen. Film honek bederatzi euskal emakume biltzen ditu, bederatzi profil desberdinetakoak. Guztiek gizonen indarkeria jasan dute, oso urte zailak igaro dituzte, baina azkenean gainditzea lortu eta gaur egun arazo global hori agerian uzteko borrokatzen ari dira. Dokumentalean, bederatzi emakumeek asteburu bat igarotzen dute landa eremuan, eta han hitz egiten, gogoratzen, hausnartzen eta argitzen dute indarkeria horrek dakarren guztiaren inguruan.

Etzi, azaroak 24, “Etzanderak” dantza ikuskizuna eskainiko dute frontoian, arratsaldeko 19:30ean. Musika, dantza, historia eta feminismoa uztartzen dituen ikuskizun berezia da, zer pentsatua ematen duena, hunkigarria eta iradokitzailea.

Bukatzeko, azaroaren 25ean, eta Emakumeen Kontrako indarkeria ezabatzeko Nazioarteko Eguna dela eta, elkarretaratzea egingo dute, 13:00etan udaletxe aurrean.

 

Osorik irakurri

☉ Zeberio

Haurren sexu-abusua eta tratu txarrak prebenitzeko eta ikusarazteko hitzaldia egingo dute Zeberion larunbatean

“Haurren sexu-abusua eta tratu txarrak prebenitzeko eta ikusarazteko” hitzaldia Maitane Urizar Elorza EHU-ko irakasleak gidatuko du

|

Pepe Godoyk "Shame European stories" erakusketan parte hartu zuen // Justice Initiative

Haurtzaroko eta nerabezaroko sexu-abusuen arazoa gaurkotasun handiko gaia da mundu osoan. Lau neskatotik batek eta 7 mutikotatik batek sexu-indarkeria pairatu du, pairatzen ari da edo jasango du, kasu gehienetan 13 urte bete baino lehen, eta eraso horien erantzulea bere familiako edo gertuko pertsona bat izango da ehuneko handi batean (% 65-85). Haurren eta nerabeen aurkako sexu-abusuek epe laburrean eta luzean ondorio larriak ekar ditzaketen arren, gaur egun horren inguruan dauden ikerketak, informazioa eta prestakuntza eskasak dira. 

Maitane Urizar Elorza EHU-ko irakaslearen “Rompiendo el secreto de los abusos sexuales contra la infancia y la adolescencia” liburuan jasotzen diren datu kezkagarriak dira hauek. Urizar gai horretan aditua da, eta datorren azaroaren 18an, larunbata, “Haurren sexu-abusua eta tratu txarrak prebenitzeko eta ikusarazteko” hitzaldia eskainiko du Zeberioko udaletxean, 11:00etatik 13:00etara. Antolatzaileen hitzetan, ” haurrak etorkizuna dira, eta gure erantzunkizuna da haiek babestea”.  Hitzaldi honetan formazio teoriko eta praktikoa eskainiko zaie bertara hurbiltzen diren herritarrei.

Lau neskatotik batek eta 7 mutikotatik batek sexu-indarkeria pairatu du, pairatzen ari da edo jasango du, kasu gehienetan 13 urte bete baino lehen, eta eraso horien erantzulea bere familiako edo gertuko pertsona bat izango da ehuneko handi batean (% 65-85)

Modu berean, Pepe Godoy basauriarrak parte hartu duen  ‘Shame-European stories’ erakusketaren argazkietako batzuk eramango dituzte udaletxe sarrerara. Godoyk sexu abusuak pairatu zituen bere futbol entrenatzailearen aldetik, eta ekimen honen barruan  biktimek beren testigantzak eta erretratuak partekatu zituzten.

Osorik irakurri

☉ Zeberio

Bizkargi mendilerrora irteera antolatu du Austarri Mendi Taldeak

Zeberioko Austarri Mendi Taldeak bere urteko programazio aberatsarekin aurrera jarraitzen du, eta oraingoan azaroaren 25erako prestatu duten irteeraren berri eman dute: Bizkargi mendilerroa. 

|

Santa Kurtz baseliza // argazkia: mendikat

Zeberioko Austarri Mendi Taldeak bere urteko programazio aberatsarekin aurrera jarraitzen du, eta oraingoan azaroaren 25erako prestatu duten irteeraren berri eman dute: Bizkargi mendilerroa.

Larrabetzu, Muxika, Morga eta Zornotza arteko mugan kokatzen den Bizkargik natura eta historia uztartzen ditu bere 555 metroetan. Gailurrean Santa Kurtz baseliza kokatzen da, eta Espainiako Gerra Zibilean bere garrantzia izan zuen mendilerro honek, borrokaldi odoltsuak eman baitziren bertan. Hori dela eta, urtero-urtero maiatzeko lehen igandean gudariei omenaldia egiten zaie bertan.

Ibilaldiaren nekeak arintzeko, gainera, Morgako Talleri Barria upategian egingo dute indaba jana.

Izena emateko azken eguna azaroaren 25a da.

 

Osorik irakurri

☉ Zeberio

Neguko Azokak Azkuetaren gazta, Barazkiloko barazkiak eta Artesako ogia ekarriko ditu Zeberiora

Azokak 10:00etatik 15:00ak arteko ordutegia izango du eta Zeberioko Udaletik iragarri dute txosna bat ipiniko dutela Zubialden

|

Aitor Azkueta // Geuria

Azaroaren 26an Neguko azoka antolatu du Gorbeialde elkarteak Zeberion eta aurten 11 saltoki ipiniko dituzte Zubialdeko plazan. Horien artean Zeberioko hiru ekoizle izango ditugu: Saldarian auzoko Aitor Azkueta, Barazkiloko Nadia López eta Artesako Txufer Garay eta Javier Martinez izango dira euren produktuak saltzen. Azokak 10:00etatik 15:00ak arteko ordutegia izango du.

Hiru ekoizleak eta euren lana gertutik ezagutu izan dugu GEURIAn. Horregatik, bertako gazta, barazkiak eta ogia erosteko aukera paregabea izango dute Zubialdera hurbilduko diren herritarrek. Joan den urriaren 19an Ekain Goti Zeberioko alkateak GEURIAri aurreratu bezala, asmoa 20 saltoki inguru ipintzea zen, eta bertan, azokaz gainera txosna bat ipiniko zutela gehitu zuen.

Osorik irakurri