→Zeberio

Zeberioko baso-sutea Saldarian auzorantz ari da hedatzen, baina egoera “kontrolpean” dagoela diote

Arbildu 12 baserritik gertu izan dira sugarrak // Argazkia: Zeberioko Udala

Baso-sute bat piztu da Zeberion, Elorrebieta, Arbildu, Uriondo eta Saldarian artean. Sutea 15:00ak aldera piztu da eta berehala heldu dira suhiltzaileak. Oraindik bertan daude sutea amatatzeko lanetan, baina egoera “kontrolpean” dagoela dio Karlos Idirin Zeberioko alkateak: “Uriondo auzoan beldurra egon da beste behin, beste baso-sute batengatik. Hala ere, inguru horretan kontrolpean dago sutea eta suhiltzaileak bertan lanean ari dira”.

Sutea Saldarian auzorantz ari dela hedatzen dio Zeberioko alkateak, baina momentu honetan “arriskurik” ez dagoela adierazi du Idirinek: “Baloratzen ari gara auzotarrak euren etxeetatik irtenarazi behar ditugun edo ez”, dio Idirinek. GEURIAk jakin ahal izan duenez, suhiltzaileek Euskalmeten informazioa eskatu dute, datozen orduetan haizeak zein norabide hartuko duen jakiteko.

Argazkia: Zeberioko Udala

Suhiltzaileen hamasei ibilgailu mota desberdin bertaratu da sutea itzaltzera, hala nola, hainbat ur-ponpa astun. Gurutze Gorria ere ezbeharraren lekura joan da, eta iturri ofizialek GEURIAri adierazi diotenez, suhiltzaile bat artatu behar izan dute, “bero-kolpe batengatik”. Era berean, Arbildu auzoan baserri bati kalte egiteko arrisku handia dela-eta, suhiltzaileen kamioi bat jarri dute baserriaren eta sutearen artean. “Hasieran etxetik irtenarazi dituzte bizilagunak, baina dena ondo bidean euren etxean egingo dute lo”, dio Idirinek. Baso-suteak linea elektrikoei eragin die eta Iberdrolari abisua eman diote.

Azken hilabeteetan hiru sute izan dira Uriondo auzoaren inguruan, azken biak aste honetan: astelehenean (irailak 5) eta gaur, igandean (irailak 11). Ertzaintza eta Udala suteen jatorria ikertzen ari dira.

Argazkia: Zeberioko Udala

Gora

Geuria Laguntzaileak Geuria Laguntzaileak