→Zeberio

Zubialdeko frontoiaren erabilera “bere lehenera itzultzeko” eskaera egin dio herritar talde batek Zeberioko Udalari

Joan den martxoaren 4an bilera irekia egin zuten eskolako zenbait umeren gurasoek, gazteek, frontoiaren erabiltzaileek… Eskola zaharrean, pandemia hasieratik Zubialdeko frontoia giltzaz itxi zutelako: “Bileraren zergatia plazako frontoiaren egoeraren inguruan dugun kezkari buruz hitz egitea izan zen; izan ere, frontoiaren erabilera mugatu eta zaildu egin dela ikusten dugu”, azaldu dute taldekoek Karlos Idirin Zeberioko alkateari bidalitako gutun batean

Frontoiko sarrera, gaur egun // Geuria

Joan den martxoaren 4an eskola zaharrean bilera irekia egin zuten eskolako zenbait umeren gurasoek, gazteek eta frontoiaren erabiltzaileek, bestak beste, pandemia lehertu zenetik Udalak Zubialdeko frontoia giltzaz itxi zuelako: “Bileraren zergatia plazako frontoiaren egoeraren inguruan dugun kezkari buruz hitz egitea izan zen; izan ere, frontoiaren erabilera mugatu eta zaildu egin dela ikusten dugu“, azaldu dute taldekoek Karlos Idirin Zeberioko alkateari bidalitako gutun batean.

“Herri honetan frontoia beti egon da zabalik, herritarron zerbitzura. Pandemiak ekarritako salbuespen egoeraren ondorioz, frontoia itxi behar izan zen baina gauzak normaltasunera itzultzen ari diren honetan, eta beste zerbitzu batzuk berriz martxan dauden arren, frontoiaren erabilera ez da bere lehenera itzuli. Frontoiak itxita jarraitzen du eta hura erabili ahal izateko udaletxean erreserbatu eta ordaindu beharra dago. Iruditzen zaigu horrek haren erabilera oztopatzen duela eta esku pilotarako zaletasunari kalte egiten diola, batez ere, haurren artean. Bestalde, inguruko herrietan frontoiak zabalik daudela ikusita, ulergaitza iruditzen zaigu kudeaketa hori”, azaldu du taldeak eskutitzean.

Horrela, bilera egin zuen pertsona taldeak frontoia berriz zabaltzea eta “berau behar bezala erabiltzeko beharrezkoak diren baldintzak (argia, kasu) guztiontzat eta dohainik bermatzea” eskatu diote herriko alkateari.

Honen aurrean, Udaleko ordezkariek azaldu dute frontoia giltza bidez zarratzeko arrazoia “pandemia hasi zenean zenbait pertsonek barikuetan eta zapatuetan bertan botilioia egiten zutelako” izan dela, baina frontoiko ateak edonorentzat zabalik dagozela argitu nahi izan dute: “Frontoiko ateak mundu guztiarentzat zabalik dagoz, eta Mandoia Pelota Kirol Klubeko haurrek preferentzia dute berau erabili ahal izateko”, azaldu dio Karlos Idirin alkateak GEURIA komunikabideari. “Beti bezala, frontoia erabili izateko txanda eskatu behar da udaletxean, baina hau ez da gauza berria: beti egin dogu modu horretan”, argitu du. Gaur egun frontoia erabiltzeko topatu ahal den arazo bakarra pilotalekua pelota eskolak erabiltzen duen tarte berean erabili nahi denean gerta daiteke.

Pandemiaren egoerak, astiro-astiro onera egiten jarraitzen badu Udalak frontoiko atean jarritako morroiloa kenduko dutela aurreratu du: “Beste hilabete batez giltzapetuta egongo da frontoia, badaezpada”, azaldu du Zeberioko alkateak. “Koronabirusak eragindako pandemiaren zifrak ez dira oso altuak momentu honetan, baina tentuz ibili behar gara hala eta guztiz ere”.

Gora

Geuria Laguntzaileak Geuria Laguntzaileak