Ikasturte berriaren hasierarekin proiektu berri bat ipiniko du martxan Zeberioko eskolak Udaleko Berdintasun sailarekin. Gaia zaintza izango da eta protagonistak Lehen Hezkuntzako hirugarren, laugarren, bosgarren eta seigarren mailako ikasleak izango dira.

“Berezitasun modura, ikasleen gurasoek tailer honetan parte hartzera gonbidatuko ditugu”, azaldu du Nerea García Rebollo proiektuko bultzatzaileak. “Helburua zaintzaren inguruko sentsibilizazioa lantzea da”. Azken hiruhilekoan, ikasturtean zehar ateratako informazioa eta ondorioekin proiektuaren aurkezpena egingo dute ikasleek. Proiektua guztiz finkatuta ez badago ere, horiek dira eskolako zuzendaritzak Udalarekin elkarlanean sortutako ildo nagusiak.

Tailer parte-hartzaile hauek sortzearen ideia joan den ekainean sortu zen, proiektu hau sortzeko beharra sumatu zutenean: “Asmoa zaintzaren inguruko tailerra sortzea zen. Azken batean, gure ustez zaintza berdintasunaren oinarria da eta garrantzitsua iruditzen zaigu berdintasuna lantzeko; ez bakarrik martxoaren 8an edo azaroaren 25ean mobilizazioak antolatuz. Egunero landu behar den zerbait da”.

Hurrengo asteetan proiektuaren nondik norakoak eta datak zehaztuko dituzte, eskolako eta Udaleko ordezkariak elkartu ostean.

Zeberioko Udalak lekuz aldatu ditu momentura arte herriko zenbait tabernatan kokatuta zeuden desfibriladoreak. Zubialde auzokoa Herriko taberna barruan kokatuta zegoen, eta Ermitabarri auzoari dagokionez, Taberna Zaharran.

“Mundu guztiarentzat eskuragarri egoteko atera dugu kanpora”, azaldu du Ekain Goti Zeberioko alkateak. Kontuan izan behar da momentura arte taberna barruan kokatuta zeuden gailuak lokalak zabalik zeuden bitartean erabili zitezkeela soilik.

Gaur egun farmaziako sarreran bertan topa daiteke Zubialdeko gailua, udaletxeko arkupean. Ermitabarrikoa taberna parean ipini dute. Hirugarren desfibriladore berri bat ipini dute Arkulanda auzoan ere.

Zeberion HeartStart FRx desfibriladoreak eskuragarri daude. Gailu hauek bizi-orientazioko ezaugarri aurreratuak dituzte, bat-bateko bihotz-gelditzearen tratamendua gidatzen laguntzeko. Konfigurazio errazarekin, ahots-adierazpen argiekin, HeartStart FRx in situ erantzuna emateko diseinatuta dago.

Zeberioko Austarri Mendi Taldeko mendizaleak Aizkorri mendilerrora abiatuko dira irailaren 15ean. Egun osoko irteera honetan Petroleros (940 mt), Aizkorri (1.523 mt), Aketegi (1.551 mt) eta Arantzazutik igaroko dira (731 mt), 13 kilometroko ibilbidea eginez.

Aukeran egongo da Petroleros – Urbia eta Arantzazu ibilbidea. Inguru hori guztia Gipuzkoak eta Arabak partekatzen duten Aizkorri-Aratz izeneko parke natural handian dago (Aizkorri-Aratz).

Hitzordua irailarren 15a izango da, 07:30ean, Zeberioko udaletxeko plazan bertan. Interesdunek irailaren 12ra arte eman dezakete izena Hogarrean (barikuetan 20:00etatik 21:00ak arte), austarrimenditaldea@gmail.com helbide elektronikora idatziz edo 665 735 054 zein 656 415 597 telefono zenbakietara deituz.

Aizkorri, elurtuta // Turismo Vasco

Garaiera handiko irteera

“Aizkorri mendilerroan daude Gipuzkoako mendirik altuenak. Harresi handi bat balitz bezala, Aizkorri mendilerroa Zegama herriaren gainera erortzen dela dirudi, Goierriko eskualdean. Beste aldean, oasi berde gisa, Urbiako zelaiak zabaltzen dira, artzainen eta animalien etxolek zedarrituta, hala nola ardiak, behiak…” Horrelaxe azaldu dituzte Austarri Mendi Taldeko ordezkariek txangoaren nondik norakoak.

Zelai horietatik inguruko hainbat tontor igotzeko aukera izango dute mendizaleek: Aizkorri, Aketegi (Gipuzkoako mendirik garaiena, 1.551 mt), Aitxuri… “Zelai horien amaieran, Donejakue Bidea igarotzen den San Adriango Tunela dago. Urbiako erdialdean, ermita bat bisitatu eta Urbiako Fonda ezagunean indarrak berritzeko aukera izango dugu”.

Aizkorri-Aratz inguruan erliebe malkartsua dago, kareharriz osatua nagusiki. Fenomeno karstikoak paisaiako ezaugarri garrantzitsuenetakoak dira, eta lurpeko ur-jariatze sare zabala ere badu; honek lurpeko barrunbe ugari sortu ditu.

Aizkorri-Aratz Natura Parkearen eremuaren % 60 inguru Herri Mendiak dira eta hainbat udalerri parkean bertan kokatuta daude

Aizkorri-Aratz Natura Parkearen eremuaren % 60 inguru Herri Mendiak dira eta hainbat udalerri parkean bertan kokatuta daude: Gipuzkoako Aretxabaleta, Eskoriatza Legazpi, Leintz-Gatzaga, Oñati, Zegama, Zerain; Arabako Asparrena, Barrundia, Donemiliaga eta Zalduondo; eta Gipuzkoa eta Arabako Partzuergo Orokorra eta Apota-Ubarrundiako Partzuergoa.

Inguru honetan, jatorrizko basoek eremu handiak hartzen dituzte. Pagadi kaltzikola eta azidofiloak batez ere gipuzkoar isurialdean topa ditzakegu; horietan ageri-agerikoa da joandako garaietan zertutako ikazkintza jarduera.

Zubialde auzoan, udaletxea atzean kokatutako haurren parkeko zoladura ordezkatu eta bertako elementuetan konponketa lanak egin ditu uztaila amaieran Zeberioko Udalak. Mantentze lan hauetarako 7.500 euro bideratu ditu (BEZa kanpo) Udalak.

“Aurreko zoladura zaharkitua zegoen eta haurren segurtasunerako aldatu behar zen”, azaldu dio GEURIAri Ekain Goti Zeberioko alkateak. “Lur bigungarria aldatzeaz gainera umeen parkeko gainontzeko elementuak ikuskatu eta konponketa txikiak egin dizkiegu”.

Zeberio Zooberio da gaur. Mozorro Eguna ospatzen dute gaur jaien azken egunean, eta bertako flora eta faunaren artean murgildu gara!

Indaba eta makarroi-janaren atarian, galdera batzuk egin dizkiegu zeberioztarrei (eta Euskal Herriko jaietako saltsa diren Etxebarria Aita Seme Trikitilariei): “Zergatik deitzen dira Sandoniak Zeberioko jaiak?”, “Parrandan atera zara?”…