Sareak

☉ Zeberio

Lisette Cintado: «Ahalegin guztiak egingo ditut, nahiz eta taekwondoa nire bigarren aukera izan»

Lisette Cintado zeberioztarrak sei urte zituenetik praktikatzen du taekwondoa. Iazko urrian, Letoniako gazteen txapelketan hartu zuen parte, eta hirugarren postua lortu zuen

|

Lisette Cintado Letonian izandako txapelketan brontzezko domina irabazi ondoren // Utzitakoa

[2022ko azaroaren 3an paperezko edizioan publikatutako elkarrizketa – Geuria 090] Kolpeak hankarekin edo eskuekin eman daitezke, zuzenean edo salto eta bira bat emanda. Koreografia sinkronizatua dirudi, nahiko ikusgarria, baina, halere, oraindik, jende gutxik ezagutzen du taekwondoa gure inguruan. Lisette Cintadok (Zeberio, 2005) sei urte zituenetik praktikatzen du kirola, eta nazioarteko hainbat txapelketatan lortu ditu podiumak; azkena, Letoniako European Youth Olympic Weight Categories Championships-en. Zeberioztarrak txikitatik egin duen esfortzuari buruz, ikasketak kirolarekin uztartzearen zailtasunez eta etorkizuneko planez hitz egin digu.

Zeintzuk izan ziren zure lehen pausoak taekwondoan?
Lau urte nituela hasi nintzen kirol hau praktikatzen, Basauriko The Masters klubean. Eta, egia esan, hasieran oso txarto ibili nintzen: ez nuen batere gustuko. Eskolaz kanpoko hainbat ekintza egiten nituen, Mugendo edo ingelesa kasu, eta hau beste bat gehiago baino ez zen. Gurasoek hori ikusi zuten, ez nenbilela pozik, eta atera egin ninduten. Baina 6 urte bete nituenean, nire neba [Jon Andoni Cintado] taekwondoko garaikurrak lortzen ikusten nuen, eta nik ere hori egin nahi nuela pentsatu nuen. Beraz, beste behin saiatu nintzen. Orduan hasi nintzen gerrikoak lortzen, txapelketak irabazten, eta, gutxi gorabehera, kirola ondo egiten.

Nazioarteko txapelketak, entrenamenduetara joan-etorriak… Familiaren laguntza duzu horretarako?
Bai. Babes osoa ematen didate. Aitona-amonak Basaurin bizi dira, eta egunero eramaten ninduten entrenamenduetara klub horretan nenbilenean. Orain Barakaldon entrenatzen dut, eta berdin jarraitzen du kontuak, Zeberiotik bertara autoz eramaten nautelako beti, joan eta bueltatu. Horrez gain, nire aitak ere esfortzu bereziki handia egin du: berak ez zuen inoiz taekwondorik praktikatu neba-arrebok hasi ginenera arte; baina, orduan, kirola egiten hasi zen gerriko beltza lortu eta gure coach [entrenatzaile] egin ahal izateko. Gure klubean, izan ere, entrenatzaileek ez zuten Euskal Herritik kanpoko txapelketetara joan nahi izaten, eta gu bioi aukera gehiago emateko sartu zen aita bertan. Horrela, leku guztietara mugitu ahal izan gara: Zaragozara, Alacantera, Herbeheretara… Baina nik gutxiago bizi izan dut hori nire nebak baino.

Zure neba da zure erreferentea kirol honetan?
Bai, bera eta inguruko jendea. Txikitatik ikusi izan ditut Olinpiadak eta bertan parte hartzen zuen jendea, baina benetan kontutan hartzen ditudanak nire neba eta Espainiako Taekwondo Federazioarekin ezagutu ditudan pertsonak dira, hurbilen ditudanak. Azkenean, sentitzen dut haiek direla nire esfortzua ondoen ulertzen eta baloratzen dutenak, dauden lekura nik egiten ditudan gauza berdinak eginda heldu direlako.

Federazioarekin parte hartu duzun azken txapelketa Letonian jokatutako European Youth Olympic Weight Categories Championships izan da. Nolakoa izan da zure esperientzia bertan?
Oso ona. Hasiera batean, frogatzeko baino ez nintzen joan, zeren, Letonian izanda, Europako txapelketa bat, hainbeste jenderekin, pisu desberdin batean eta lehenengo aldiz Federazioarekin. Aldaketa asko izan ziren. Baina gehiago izan zen gozatzeko eta ondo pasatzeko txapelketan pentsatzen ibiltzeko baino. Ni oso lasai joan nintzen, presiorik gabe, eta bertan ezagutu nuen jendearekin oso gustura ibili nintzen.

Baina, halere, hirugarren postua lortu zenuen.
Bai, eta horrekin ere oso pozik nago. Azkenean, prestaketa guztiak izugarrizko lana eskatzen du. Udan, adibidez, ezin duzu deskonektatu, badakizulako txapelketa bat hurbil daukazula. Gainera, beti egon behar zara janaria ondo zaintzen eta dietak egiten.

Dieta asko egiten dira taekwondon?
Bai. Kirol honetako norgehiagokak pisuan oinarritzen dira, kategoriak pisuaren araberakoak direlako. Zu sendoa bazara, ahalik eta pisu gutxien izatea lagungarria dela suposatzen da; izan ere, gero eta pisu gutxiago, horrela, txikiagoa den pertsona batekin lehiatuko zara. Beraz, oso dieta zorrotzak egin ohi dira kirol honetan. Nik, adibidez, 9 urte nituenetik egin izan ditut, baina pasa den urtean, nahikoa zela erabaki nuen, ez nuela gehiago egingo. Hemendik aurrera, pisu astunen kategorian lehiatuko naiz; azkeneko txapelketa horrela egin dut, eta dena bikain joan da.

Gogorra izango zen hain txikitatik hastea.
Bai, niretzat, eta baita familiarentzat ere. Imajinatu, bestela, zure 9 urteko haurrak arratsalde batean bokatarik ezin duela jan ikusten ibili behar izatea. Betidanik haiek prestatu didate janaria (amak, aitak, amonak…), dena nutrizionista baten aholkuekin, noski; izan ere, nire neba elikadurako profesional askorengana joan zen, eta guk aurretik bagenekien gauzak nola egin behar ziren. Baina egia da jende gehienak ez dakiela, eta gainera, ezin duela diru asko gastatu nutrizionista baten aholkuetan. Askorentzat, inbertsio bat da, azkenean, zeren, nork ziurta dezake txapelketa baterako pisua galdu eta gero lehiaketan zerbait irabaztea lortuko duzula? Agian pisuaren barruan zaude, baina hori da txapelketa osoan lortzen duzun bakarra.

Eta, gainera, garestia izango da txapelketan izena ematea.
Hemengoetan ez horrenbeste, baina nazioarteko inskripzioak, adibidez, 100 eurora hel daitezke, izen-ematean bakarrik. Eta ordaindu ostean, agian, txapelketarako entrenatzen ari zarela, ukondoan jo, lesioa egin eta ezin zara joan.

Gertatu zaizu inoiz?
Bai, baina joan naiz, eta ahal nuena egiten ahalegindu. Entrenamenduak bereziki kaltegarriak dira, normalean, zu jotzen zaituztelako, baina zuk aurkaria ez: sparring baten antzera, zuk entrenatu behar duzun moduan, beste pertsonak ere egin behar du.

Zer da, kirolari bezala, zure alde ona eta zer, findu behar duzuna?
Taekwondoak bi diziplina ditu: batetik, borroka, eta bestetik, teknika. Azken horretan gerrikoak lortzen dira, eta horretarako, poomsae izeneko mugimendu antzeko batzuk ezagutu behar dituzu. Nik 11 urte ingururekin lortu nuen gerriko beltza, baina teknika utzita daukat jada. Orduan, esango nuke nire alde ona borroka dela, eta erraztasun gehien dudan arloa, malgutasuna edo diziplinatua izatea eta esfortzua egiteko prest egotea. Findu behar dudana, berriz, “karakterra” izango da agian.

Zein zentzutan “karakterra”?
Taekwondoa egitean, zu borrokan ari zara, eta zure izaera borrokarakoa bada, hobeto joango dira gauzak. Batzuk teknikoki oso onak dira, baina, agian, ez dute izaera hori, lasaiagoak dira.

Borrokak egiteaz gain, zu ikaslea ere bazara. Zaila egiten zaizu ikasketak eta kirola batera egitea?
Txapelketa batetik zatozenean, adibidez, ostegunetik astelehenera kanpoan egon ondoren, loguraz zatoz, klaseko hiru egun galdu dituzu, eta azterketak ere bai. Datak aldatu behar dituzu, eta gainera, ikasi. Baina, noiz? Letoniara bazoaz, bertan ezin duzu ezer egin. Orduan, askotan zaila da biak ondo eramatea.

Ez duzu uste taekwondoa zure ogibidea izan daitekeenik?
Ez, nik uste ezetz. Dedikazio osoa behar duzu horretarako, eta ematen dituzten diru laguntzak (lortzen badituzu, oso jende gutxik jasotzen baititu) eskasak dira. Gainera, kirol karrera amaitzen duzunean, 28 urterekin edo, horretan bakarrik ibili bazara, ez duzu inoiz lanik egin izan, eta ez dizute laguntzarik emango hori konpentsatzeko. Txikitatik ari zara taekwondoan dirua eta denbora inbertitzen, eta asko eman beharko lizukete guzti hori bueltatzeko. Nik argi daukat: ahalegin guztiak egingo ditut, nahiz eta taekwondoa nire bigarren aukera izan, eta ondo irteten bada, ederto; bestela, zer egingo diogu…

☉ Zeberio

Zeberioko ikasleek bertoko bazterrak erakutsiko dizkiete Siziliako umeei

“Gure ikasleek Euskal Herriko naturguneak landu dituzte eta Siziliako umeak bertara datozenean leku horiek ezagutzeko bisita antolatu dute”

|

Zubialde eskolako ikasleak, Sizilian// Zubialde Eskola

Zubialde eskolako 6. mailako 15 ikasle apirilaren 19an itzuliko dira Siziliako Kataniako Guglielmo Marconi zentroan (Lentini, Katania, Sizilia) egiten ari diren egonalditik. Bertako ikasleekin zazpi egunez elkartrukea egiten ari dira egun hauetan. Nuria Korta Zubialde eskolako zuzendariak GEURIAri azaldu moduan, Siziliakoak hilaren 28an etorriko dira Zeberiora bueltan eta harrera egiteko eskola komunitate osoa egongo da herrian: “Gainera, herri afaria antolatu diegu Siziliakoei apirilaren 30ean, igandea”.

“Eskolako hirugarren zikloko ikasleak, seigarren mailakoak bereziki izan ohi dira elkartruke hauetan parte hartzen duten umeak”. Joan den apirilaren 13an abiatu ziren Zubialdeko umeak Siziliara. Bestalde, Kortak ingelesa ikastearen balioa azpimarratu du eta haurrak urtero atzerrira doazenean horixe lantzen dutela gehitu du: “Bidaia prestatzerakoan, harremanetan ipintzen gara atzerriko zentroarekin eta proiektu bat diseinatzen da. Bertako egoera esanguratsu horretan lantzen dute ingelesa”.

Zubialde eskolako ikasleak, Loiuko aireportuan // Zubialde Eskola

Aurtengo gaia naturagaz lotura duen bisita programa bat sortzea izan da: “Gure ikasleek Euskal Herriko naturguneak landu dituzte eta Siziliako umeak bertara datozenean leku horiek ezagutzeko bisita antolatu dute eta zeberioztar gazteak izango dira bisita horien gidariak”. Kortak adibide bat ipini du: “Zumaiako Flyscha bisitatzeko lanketa bat egin dute inglesez, eta egun hauetan gauza bera egiten ari dira Italiako ikasleak, bertako naturguneekin”.

Osorik irakurri

☉ Zeberio

Umeen herri kirolak antolatu ditu Zeberioko Txubelasu elkarteak Zubialden

Txapelketa 10:00etan izango da eta herritarrak deitu dituzte umeak animatzeko

|

Haur bat, Etxebarriko Euskal Jaian, 2028an // Geuria

Datorren apirilaren 14an umeentzako herri kirolak antolatu ditu Txubelasu Guraso Elkarteak Zubialdeko frontoian. Txapelketa 10:00etan izango da eta herritarrak deitu dituzte umeak animatzeko.

Kirol probak amaituta, indaba jana prestatu dute frontoiaren alboko aterpean, 14:30ak eta 15:00ak aldera eta indaba platerrak ura, postrea eta kafea izango du ere.

Helduek 13 euro ordaindu beharko dituzte eta sei urtetik gorako umeek, 10 euro. Txartelak Herriko Tabernan, Amañen, Maribiren dendan eta Taberna Zaharrean lortu ahal direla iragarri dute Txubelasu Guraso Elkartetik.

Osorik irakurri

☉ Zeberio

Arantza Perez Etxebarria: «Denok gara bat Mandoia Pelota Klubean; presidenterik ez dago»

Zeberioko pilota eskolak gaur egungoen eta datozen umeen etorkizunean izango duen aztarnaz hitz egin digu, aurten Zubialde auzoan konpondu behar duten pilotalekuan bertan

|

Arantza eta Esku Pilota eskolako kirolari bat / Geuria

Arantza Perez Etxebarria (Zeberio, 1979) Zeberioko Mandoia Pelota Klubeko presidentea da “paperetan”. Zaila egiten zaio bere burua “zuzendari” moduan definitzea eta are gehiago kamera baten aurrean ipintzea. Zeberioztarrak klubaren atzean lan egiten duten herritarren ahalegina azpimarratu du, tartean Beñat García zaratamarraren lan bikaina goraipatu du.

Zeberioko pilota eskolak gaur egungoen eta datozen umeen etorkizunean izango duen aztarnaz hitz egin digu, aurten Zubialde auzoan konpondu behar duten pilotalekuan bertan. Izan ere, neguko hezetasunak eta euriteek umeen entrenamenduak baldintzatu dituzte eta frontoian egin beharreko obra horien garrantzia azpimarratu du.

Klubeko paperetan zuzendari lez agertzen zara, Arantza. Badakigu, hala ere, zuzendari moduan aurkeztea ez duzula gogoko.
‘Presidente’ hitza ez zait batere gustatzen baina egia da esparru administratiboan klubeko zuzendari lez agertzen naizela. Hala da.

Eta nolako erronka da zuretzat, eta klubaren atzean dagoen lantaldearentzat, noski, Zeberioko pilota eskola kudeatzea?
Nik ez nuke erronka lez definituko; zirkunstantziek egoera honetara ekarri ninduten eta presidente lanak egitea proposatu zidaten. Hala ere, klub honen atzean ez dago arduradun bakarra; denok gara bat Zeberioko Mandoia Pelota Klubean. Gauza da klub bezala sortu ahal izateko izenak behar zirela, taldearen egitura modu legalean sortzeko, beste hitz batzuetan azalduta.

2023an hartu zenuen kargu honen ardura zure lantaldearekin. Nolako esperientzia izaten ari da erantzukizun hain handia duen klub honen norabidea zehaztearena?
Pozik nago, egia esateko. Azken batean, esperientzia honen bidez erakusten ari gara emakumeok ere era honetako beharrak egiteko gai garela.

Zeberioko Mandoia Pelota Klubak eskola ugari eta partida dezente antolatu izan ditu. Herritarrek ba al dakite nolako lana dagoen Mandoia bezalako pilota klub baten atzean? Lantaldeak bloke baten modura egiten du lan: Whatsapp talde bat dugu gure artean lana antolatu ahal izateko. Lan gogorrena ikasturte hasieran izan ohi da guretzat. Abuztuko eta iraileko aste horietan Bizkaiko Pilota Federazioarekin harremanetan ipintzen gara haurren izen-emateak, kategorien sailkapena, fitxak eta behar bestekoak burutzeko. Ikasturtea antolatzeko, alegia. Arlo ekonomikotik, gure aurrekontua antolatu eta klubeko dirua zertara bideratuko dugun ere erabaki behar da, eta horrek ere lan handia eta buruhausteak ematen ditu.

Eskualdeko esku-pilotaz berba egiten denean Zaratamo izan ohi da erreferentziazko herria, askotan. Nolako pisua dauka pilotak Zeberion?
Zaratamoren ospea bertatik irten diren pilotari famatuengatik izango da ziurrenik, baina Zeberion ere betidanik izan dugu frontoia eta herritarrek betidanik jokatu dute kirol honetan. Arraroa bada ere eta esku-pilotarekiko pasio handia egon bada ere, esku-pilota taldea izan da faltan izan dugun gauza bakarra.

Arraroa da, gero! Eta zer egiten zuen pilota gustuko zuen Zeberioko jendeak, orduan?
Duela urte asko Zeberiok pilota eskola bazuen, baina desagertu egin zen, eta duela hiruzpalau urte esku-pilota taldea sortu zuten herrian. Ordura arte inguruko herrietara joaten zen jendea esku-pilotan jokatzen ikastera eta praktikatzera: Zaratamora, Igorreko esku-pilota taldera… Orain, aldiz, Zeberion daukagu esku-pilotan jokatzeko aukera.

Arraroa bada ere eta esku-pilotarekiko pasio handia egon bada ere, esku-pilota taldea izan da faltan izan dugun gauza bakarra.

 

Zenbat umek osatzen dute Mandoia Pelota Kluba?
30 inguruk. Egia da badirela noizean behin fitxarik gabe jokatzera datozen umeak, baina kasu puntualak izan ohi dira, normalean kirolarekin lehen kontaktua egitera datozelako, proba modura. 

30 neska-mutil, beraz. Horietatik zenbat neska eta zenbat mutil?
Mutilak dira nagusi Zeberion. Gure eskolan lau neska baino ez ditugu. 

Momentuz kopurua oso urria da, baina historian atzera begiratuta eta feminismoaren ikuspuntutik ikusita betiere, garapenik izan dela esango zenuke nesken partaidetzaren esparruari dagokionez?
Lehen pentsaezina zen emakumeak pilotan jokatzen ikustea. Baina esan beharrekoa da futbola bezalako kirol nagusiek ere emakume asko eraman dituztela, bai Zeberion, baita Euskal Herrian ere. Honekin esan nahi dudana da Zeberion esku-pilotan aritzen ez ziren emakumeak futbolean aritzen zirela, herrian emakumezkoen futbol taldea egon bazegoelako. Esku-pilotak ez zuen zorte hori izan, tamalez, eta ez dakit zein izan zitekeen horren arrazoia, egia esateko. 

Eta pilotan emakume gehiago izateko formula zein izan liteke? Denbora kontua, agian?
Gero eta emakume gehiago dago esku-pilotan: bai entrenatzen, bai modu profesionalean jokatzen. Hori horrela da. Egoerak hobera egingo du, ziur, baina apurka-apurka. Ez da egun batetik bestera gertatuko den egoera izango.

Zu berez zeberioztarra zara, emakumea eta Mandoia Pelota Klubeko zuzendaria. Esku-pilota praktikatu ahal izan duzu inoiz?
Praktikatu berez ez, baina betidanik gustuko izan dut. Herretako eta profesionalen partidak ikustera joan izan naiz beti, baita herriko jaietan ere. Bi seme ditut eta esku-pilotan jo eta su dihardute biek. Azken batean horixe da asmoa, gazteek eta atzetik datozen umeek klub bat izatea maite duten kirol hau praktikatu ahal izateko.

Mandoia Pelota Klubak hiruzpalau urte besterik ez ditu. Nola ikusten duzu hemendik urte batzuetara? Herriko umeek maila profesionalean jokatzera iristeko erreminta modura erabili ahal izango dute?
Hori umeen esku dago. Nabarmendu nahi nuke entrenatzailerik onena dugula Zeberion: Beñat Garcia. Haurrak primeran entrenatzeaz gainera, psikologo modura lan izugarria egiten du haiekin eta umeak zein herritarrak benetan pozik daude berarekin.

Zer esan dezakezu Zubialdeko frontoiaz?
Leku oso onean kokatuta dago eta polita bezain handia da Zeberiokoa. Aukera asko ematen ditu jarduera ezberdinak antolatu ahal izateko: partidak jokatzeko, entrenamendu saioetarako… Frontoi asko laburtxoak dira eta jarduera ezberdinak antolatzeko arazoak izan ohi dituzte.

Hala ere Zeberioko frontoi honek konponketa garrantzitsu batzuk baditu faltan.
Itxura batean ondo dago, baina negu aldera, euria eta hotza datozenean, arazoak izaten hasi gara hezetasunarekin, entrenamendu saio asko bertan behera utzi behar izateraino. Astean zehar euri asko egiten duenean, asteburuko federazioko partidetan eragina du horrek guztiak eta ezin izan dira jokatu; “partxeak” ipini baditugu ere, zorua urez betetzen da. 

Zer dio Udalak honen inguruan?
Udala laguntzeko prest agertu da lehen momentutik eta egoeraren jakitun da. Etengabeko harremanetan gaude udal ordezkariekin eta aurtengo obra nagusia frontoian egingo dutela esan digute. Berez, obrari argi berdea eman diote. Hala ere, era honetako jarduketek denbora behar izaten dute eta guk ez dakigu noiz hasiko diren, ezta zer nolako jarduketa egingo duten ere.

Osorik irakurri

☉ Zeberio

Zeberiora ekarriko dituzte Bizkaia Cupeko finaleko esku pilota partidak asteburuan

Partidak apirilaren 13an jokatuko dituzte, 10:00etatik aurrera, Zubialdeko frontoian

|

Asier Ruiz de Infante eta Zuhaitz Etxebarria // Mandoia Pelota Kluba

Bizkaia Cupeko esku pilotako partidak Lemoan antolatu behar zituzten asteburu honetan, baina bertako kiroldegiko langileen grebaren ondorioz Zeberioko Zubialde auzoko pilotalekuan jokatuko dituzte datorren apirilaren 13an, 10:00etan.

Gazteak C mailan Mandoiatik Zuhaitz Etxebarria eta Asier Ruiz de Infante Olaburu 6ren aurka lehiatuko dira. Bizkaiko banakako txapelketa Mandoiako Zuhaitz Etxebarriak irabazi zuen Adiskideko Aritz Ojedaren aurkako norgehiagokan, joan den urtarrilaren 12an, Zeanuriko frontoian.

Bizkaia Cup | Zeberioko partidak

Apirilak 13, zapatua

10:00
Eskuz binaka emakumezkoak
Lagun Artea EM – Durango

Eskuz binaka Kadeteak C
Lemoa – Durango

Eskuz binaka Gazteak C
Mandoia – Olaburu 6

Eskuz binaka Kadeteak A
Lemoa – Markina 1

Osorik irakurri

☉ Zeberio

Argazkiak / Zeberioko Ermitabarrin bukatu da Korrikako 23. edizioa Hego Uribe eskualdean

Eskualdeko azken argazkiak egin ditugu Zeberioko Ermitabarri auzoan. Bertatik herritar ugari igaro dira, Arratiara bidean, eguzkipean

|

Eskualdeko azken argazkiak egin ditugu Zeberioko Ermitabarri auzoan. Bertatik herritar ausart ugari igaro dira aldapan gora, Arratiara bidean, eguzkipean.

Osorik irakurri