Euskaraldia udaberrian izango da aurten: maiatzaren 15etik 25era bitartean. Lau hilabete falta direla, Galdakaon Euskaraldia koordinatzeko taldea martxan jartzeko lehen bilera deitu dute Udalak eta euskalgintzako eragileek.

Urtarrilaren 22an, asteazkenez, izango da lehen bilera hori, 18:00etan udaletxeko bilkura aretoan. Bilera horretara Galdakaoko taldeak, eragileak eta norbanakoak daude gonbidatuta.

“Bertan, Euskaraldia koordinatzeko talde motorra martxan jarriko da eta bigarren erronka lortzeko oinarriak jarriko dira: maiatzeko ariketan lortutako aurrerapena egunerokoan mantentzea”, diote udal ordezkariek.

Ohikoa den elkarlanaz gain, herritarren inplikazioa “funtsezkoa” dela adierazi dute udal arduradunek eta herriko euskalgintzako eragileek.

Pirritx, Porrotx eta Marimotos pailazoek ‘Euskararen zuhaitza’ oparitu zieten iazko maiatzean Basozelaiko Beat taldekoei. Pago bat da eta Sagarrak talde ekologistaren laguntzarekin, abenduan landatu zuten auzoan.

Ekitaldira  bertaratu ziren. “Landatu dugun pago txiki honek, Euskararen zuhaitza, hazi egingo da eta horrekin batera euskararen erabilerak ere egingo du gora gure auzoan”, diote Beateko kideek.

Sagarrak taldeko ordezkariak kultura guztietan zuhaitzek balore sinboliko handia dutela nabarmendu zuen: “Euskal Herrian bi zuhaitz nagusi ditugu: haritza eta pagoa. Zuhaitzek eta basoek, hizkuntzak eta kulturak bezala, lurra behar dute sustraiak landatzeko. Zuhaitza hazi egingo da gu apenas konturatu gabe, eta espero dezagun ere euskal hiztunak ere haztea zuhaitzarekin batera”.

Hitz-erdiko Kontaketak lehiaketaren zortzigarren edizioa abiatuko du Zirt Zart Basaurik. Urtarrilaren 15etik martxoaren 15era bitartean jasoko dituzte euskarazko ipuin laburrak, gehienez 100 hitzekoak, zirtzart.basauri.eus webgunearen bitartez.

Aurten “Erabaki zuzena hartu ote nuen?” izango da ipuinek izan behar duten hasiera, antolatzaileek hala erabakita, eta esaldi horretatik abiatu beharko dituzte lanak.

Lehiaketa 12 eta 35 urte bitarteko gazteei dago zuzenduta eta asmoa da idazmenean interesa dutenen talentua aurkitzea.

Guztira bost sari banatuko dituzte: lehen sailkatuak 200 euroko bonua jasoko du, biharrenak 150 euroko bonua, hirugarrenak 100 euroko bonua, eta Elkar sariaren zein Basauri sariaren irabazleek bakoitzak 150 euroko bonuak jasoko dute.

Elkar sarian 12-17 urte bitartekoen proposamenak baino ez dituzte aintzat hartuko eta Basauri sarian herrian erroldatua egon beharko da parte hartzailea. Ipuin sarituak GEURIAn argitaratuko ditugu, bai paperezko alean zein webgunean.

Basauriko Udalaren Gazteria arloak antolatzen du lehiaketa eta Elkarren eta GEURIAren laguntza du. 2018an jarri zuten martxan lehiaketa eta urtetik urtera hazi egin da, ez bakarrik Basaurin, baizik eta Euskal Herri mailan ere.

Datuak datu, eta lehiaketak izan dituen formatu desberdinak tarteko, lehenengo edizioan 89 kontakizun jaso zituzten, bigarrenean 83, hirugarrenean 54, laugarrenean 204, bosgarrenean 288, seigarrenean 149 eta zazpigarrenean 155.

Iaz honako hauek izan ziren sarituak: Rebeca Fernandez Rueda (Barakaldo), Irene Izaguirre Chaparro (Villabona), Olatz Noberan Gartzia (Ondarroa), Andere Ramirez Garcia (Laudio) eta Izaskun Herce Quintana (Basauri).

Basozelaiko Ipuin Lehiaketaren zazpigarren edizioak banatu ditu dagoeneko sariak. Euskarazko kategorieran, Markel Meazak irabazi du gazte mailan ‘Ipuina’ izeneko lanarekin, eta Ander Ezeizak helduen mailan, ‘Etorkizuneko oihartzuna’ lanarekin.

Pablo Reyes (‘Aurpegiaren misterioa’) eta Asier Castro (‘Bere lehen erromeria’) gazte mailan eta Raul de la Cruz (‘Gaur ez dut ezer berririk ikasi’) eta Tolaretxe (‘Zortziko plazan, erromerian’) helduen mailan ere saritu dituzte.

Gaztelerazko kategorian, Leire Alvarez (‘Misterio en la plaza’) eta Iraide Martinez (‘Mi ultimo cumple’), eta Esther Puertas (‘Memoria’), Alain Campos (‘La resistencia de Zortziko’) eta Roberto Miguel (‘Desde mi balcon’) izan dira sarituak.

Sari banaketa abenduaren 18an izan zen Basozelai Gizarte Etxean. Irati Bediaga idazle galdakoztarrak banatu zituen sariak.

Sari banaketa abenduaren 18an izan zen Basozelai Gizarte Etxean // Beat Taldea

Beat Taldeak eta Gazteluko Guraso Elkarteak antolatzen dute Basozelaiko Ipuin Lehiaketa, Elkarren eta Basauriko Udalaren laguntzarekin.

Maiatzaren 25ean Ibilaldia hartuko du Galdakaok, Eguzkibegi Ikastolak antolatuta. Talde eragilea martxan dabil egitaraua prestatzen, baina ekitaldiak ez dituzte maiatzaren 25era soilik mugatuko: Ibilaldia izan bitartean hamaika ekintza antolatuko dituzte.

Urteko lehena urtarrilaren 19an, igandez, izango da: Herri kirolen desafio parte-hartzailea egingo dute Kurtzeko plazan 11:00etatik aurrera.

Bi kategoriatan izango da erronka: alde batetik, 10 eta 15 urte bitarteko gazteak (lehenengo kategoria); eta bestetik, 16 urtetik gorakoak (bigarren kategoria).

Sei pertsonako talde mixtoak eratu beharko dituzte partaideek eta talde bezala izena eman.

Izena ematea esteka honen bitartez izango da, eta azken eguna urtarrilaren 7a izango da.

“Giro euskaldunean, elkarteekin, familian, lagun artean, giro paregabearekin, galdakoztar guztiak daude gonbidatuta!”, diote Ibilaldiko Kultura Batzordetik.

Sariak ere egongo dira: lehenengo kategoriako irabazleek Ibilaldiko material sorta jasoko dute eta bigarren kategoriako txapeldunek sei lagunentzako afaria.

Herri kirolen desafio parte-hartzailea Eguzkibegi Ikastolak antolatu du, Galdakaoko Udalaren babesarekin.