Sareak

☉ Etxebarri

Gutuna / Euskaraldia aurrera!

|

Etxebarriko Euskaraldia batzordea 2018ko udaberrian eratu zen eta ordutik talde egonkorra izan dugu herrian, kide aldaketaren bat gora behera. Kideen artean denetarik daukagu, batzuk elkarte eta taldeetan parte hartzen dute, beste batzuk herritar gisa hurbildu dira. Lanerako jarrera eta umorea azpimarratuko genituzke, eta batez ere denboran zehar mantendu den konstantzia. Ez da erraza halako konpromisoa edizio batez eta beste batez mantentzea. Giro onean egoteak asko laguntzen du dudarik gabe.

2020ko jardunean aurrez egindakoa azpimarratuko genuke eta herriko entitateekin harremanetan jartzeko ahalegina. Aurrez aurreko bisitak egin ditugu eta banan-banan informazioa eskura eman dugu herriko denda eta komertzioetan. Era berean, telefono bidez eta email bidez harremanetan jarri gara merkatariekin.

Covid garaia ez da samurra izan, hala ere, hasieratik gure helburuei jarraitu behar geniela erabaki genuen eta helburu xumeak jarrita aurrera egin dugu. Udaberri partean konfinamendu garaian bilera telematikoetara ohitu ginen. Irailaren hasieran presentzialki elkartu ginen berriz, eta denok eskertu genuen, erabakiak ere errazago hartzen dira eta aurrera egitea errazten du. Argi dugu ezin izango dugula aurreko edizioekin alderatu, baina argi dugu abenduaren 3a heltzen denean egindako lanaz oso harro egon beharko dugula, emaitzak alde batera utzita.

Egun hauetan ekainean egindako bisitak eta bidalitako informazioa freskatzen ari gara eta datozen egunotan Ariguneen izen ematean hori nabarituko dela uste dugu. Arigune gisa izena eman eta emango duten entitateak gonbidatuko ditugu ekitaldi batera irailaren 23an kiroldegian 19:00etan. Bertan izango dugu Etxebarriko Euskaraldiako Entitateen aurkezpena eta familia argazkia aterako dugu.

☉ Etxebarri

JonFer boxeolari etxebarritarra munduko txapeldun ohiaren aurka lehiatuko da Bilbon

JonFerren eta Jezzrel Corralesen arteko borrokaz gain, Jessica Brunet etxebarritarra ere lehian ikusteko aukera egongo da Bizkaia frontoian martxoaren 9an

|

JonFer (eskuman) Jezzrel Corrales panamarraren (ezkerrean) aurka lehiatuko da martxoaren 9an // Bizkaia Frontoia

Jon Fernandez boxeolari etxebarritarra, JonFer goitizenarekin ezaguna, Bilboko Bizkaia frontoian lehiatzen ikusteko aukera izango dugu martxoaren 9an, larunbatez, Europako Silver Txapelketaren barruan.

Aurrez aurre izango du Jezzrel Corrales panamarra, superluma pisuan WBAko munduko txapeldun izandakoa. Berez, Mohamed Kani frantziarraren aurka zuen borroka JonFerrek, baina lesio bat du, eta Corralesek ordezkatuko du.

Irabazleak EBU erakundearen Europako Silver titulua irabaziko du.

Jonfer (28 urte) “oso pozik” agertu da arerio-aldaketarekin, eta goi-mailako borroka izango dela ziurtatu du. “Erronka handietarako prest nagoela erakusteko behar dudan borroka da. Badakit Corrales ere maila gorenera itzultzeko gogoz dagoela eta horrek borroka jendearentzat oso zirraragarria izatea eragingo du”, adierazi du etxebarritarrak.

Sarrerak salgai

Borroka ikusteko sarrerak salgai daude 30 eta 80 euro artean. Frontoiko ateak 18:00etan zabalduko dituzte eta hasiera 19:00etan izango da.

Martxoaren 9ko hitzordua PCI Promotions erakundeak antolatu du Bizkaiko Foru Aldundiaren lankidetzarekin.

JonFerren eta Corralesen arteko borrokaz gain, beste lehia batzuk ikusteko aukera izango da martxoaren 9an. Besteak beste, Jokin Garcia bilbotarraren eta David Soria madrildarraren arteko norgehiagoka, Bruno Macho kantabriarraren eta Diego Krasimirov mallorcarraren arteko lehia, eta Jessica Brunet etxebarritarraren eta Florencia Villarreal argentinarraren arteko borroka.

Osorik irakurri

☉ Etxebarri

Emakume zientzialarien lana balioan jarri dute Etxebarrin, institutuko ikasleen aurrean

|

Etxebarriko ArcelorMittaleko lau emakume langilek eskaini zuten hitzaldia otsailaren 9an // Etxebarriko Udala

Emakume eta Neska Zientzialarien Nazioarteko Eguna izan zen atzo, otsailak 11. Horren harira, zientziaren eremuan genero-estereotipoak desagerrarazteko hitzaldia antolatu zuten otsailaren 9an Etxebarrin, institutuko ikasleei zuzenduta.

Etxebarriko ArcelorMettaleko lau emakume langileek beren kasuak azaldu zituzten, eta ikasleei azaldu zieten zein den sektore zientifikoan lan egiten duten esperientzia, eta zer urrats egin dituzten orain dauden lekura iristeko.

Gainera, zientzia etorkizuneko aukera posible gisa ikustera animatu zituzten neska gazteak, “oraindik ere dagoen aldea azpimarratuz, zenbakiei dagokienez, gizonek eta emakumeek zientzian betetzen dituzten postuez ari bagara”.

“Halako jardueren bidez, zientziaren eta teknologiaren eremuko genero-estereotipoak desagerrarazi nahi dira, baita neskatoengan eta neska nerabeengan bokazio zientifikoa bultzatu ere. Funtsezkoa da emakume zientzialariek eta emakume teknologoek egiten duten lana gazteen artean ikusaraztea eta, egungo eta etorkizuneko belaunaldiei begira, esparru zientifikoan genero-berdintasuna erraztuko duten praktikak sustatzea”, diote udal ordezkariek.

Hitzaldia Etxebarriko Udalak eta ArcelorMittalek antolatu zuten, Berrikuntza Plan Estrategikoaaren esparruan.

Osorik irakurri

☉ Etxebarri

Ugaoko kiroldegia ere itxita dago gaur langileen grebagatik

|

Ugaoko kiroldegiko langileek grebarekin bat egin dute eta instalazioak itxita daude gaur // Geuria

Bizkaiko kiroldegietako langileak greban daude gaur. Hego Uribe eskualdean Etxebarriko kiroldegia itxita dago, baita Ugaokoa ere ELA sindikatutik adierazi digutenez.

Basaurin hamar langiletik zortzik egin dute greba goizean, eta arratsaldean daturik ez dutela esan diote GEURIAri ELAko ordezkariek.

Grebaren arrazoia da hitzarmena berritu nahi dutela. ELA sindikatutik adierazi dutenez, 2022an iraungi zitzaien hitzarmena eta iazko urtarriletik hitzarmen berria negoziatu nahian izan dira ELA, LAB, CCOO eta UGT sindikatuak, akordiorik erdietsi gabe: “Patronalak planteatzen duen eskaintza langileen aldarrikapenetatik urrun dago”, diote.

Bizkaiko kiroldegietan kudeaketa eta administrazio modu desberdinak egon arren, hitzarmena bera da lurraldeko kiroldegi guztietan. Ugaoko kiroldegiaren kasuan Guedan enpresa pribatuak kudeatzen ditu kirol instalazioak eta langileak, Galdakaon bezala.

Osorik irakurri

☉ Etxebarri

Etxebarriko kiroldegia itxita dago gaur langileen greba dela eta

|

Etxebarriko kiroldegiko langileek grebarekin bat egin dute eta instalazioak itxita daude gaur // Etxebarri Kiroldegia

Bizkaiko kiroldegietako langileak greban daude gaur. Eta ildo horretan, Etxebarriko kiroldegia itxita dagoela jakinarazi du Udalak.

Grebaren arrazoia da hitzarmena berritu nahi dutela. ELA sindikatutik adierazi dutenez, 2022an iraungi zitzaien hitzarmena eta iazko urtarriletik hitzarmen berria negoziatu nahian izan dira ELA, LAB, CCOO eta UGT sindikatuak, akordiorik erdietsi gabe: “Patronalak planteatzen duen eskaintza langileen aldarrikapenetatik urrun dago”, diote.

Bizkaiko kiroldegietan kudeaketa eta administrazio modu desberdinak egon arren, hitzarmena bera da lurraldeko kiroldegi guztietan. Etxebarriko kiroldegiaren kasuan Emtesport enpresa pribatuak kudeatzen ditu kirol instalazioak eta langileak.

Osorik irakurri

☉ Etxebarri

Mundakan hilda aurkitu dute Etxebarrin kokatu zuten desagertutako gaztea

|

Bilbon 21 urteko emakume bat desagertu zen joan de urtarrilaren 31n. Vost Euskadik Etxebarrin egon zitekeela zabaldu zuen.

Orain gutxi jakinarazi dute gaztea hilda aurkitu dutela Mundakan, eta bere desagerpenaren albistea sare sozial guztietatik kentzeko eskaria luzatu dute.

Osorik irakurri