Sareak

Zutabeak

Denon herria, hemen eta orain

Hauteskunde hauek ez dira hauteskunde arruntak izango. Hego Uribeko hautetsiok ilusio handia dugu hauteskunde hauetan eta etorkizunean jarrita.

|

Ate joka ditugun hauteskunde hauek ez dira hauteskunde arruntak izango. Alde batetik, gure herriaren eta herritarron eskubide nazional zein sozialak bermatuko dituen esparru politiko baten eraikuntzarena izan behar du legegintzaldi honek. Bestaldetik, EH Bilduk bere lehendakarigaia izateko hautatu duen pertsona desgaituta dago erabaki politiko bat dela medio eta berriz ere, Arabako, Bizkaiko eta Gipuzkoako herritarrok ezin izango dugu askatasunez aukeratu gure lehendakaria izango dena.

Beldur itzela diote Arnaldo Otegiri, ”Otegi Lehendakari” adierazpena entzundakoan, dardarka hasten da Estatua. Etxean zein kanpoan maitatua eta mirestua da Arnaldo Otegi, jendearen maitasuna jasotzen du kalean egunero eta nazioarteko proiekziorik handiena duen euskal politikaria da. Baina, Arnaldo Otegiren ekarpen politikoa ezin da desgaitu, eta ohorea da EH Bildurentzat berarekin eguneroko lana, ilusioa eta gogoa partekatu ahal izatea.

Era berean, Arnaldo Otegi eta Gipuzkoa, Araba eta Bizkaiko zerrendaburuak diren Maddalen Iriarte, Miren Larrion eta Jasone Agirrerekin batera, pertsona independenteak, gizarte mugimenduen ordezkariak, profesional eta aktibista ugari agertzen dira gure hautagaien zerrendetan. Benetan azpimarratzekoa da zerrenda hauetako profil aniztasuna, prestakuntza, profesionaltasuna eta konpromisoa.

Izan ere, horrelako lantaldea ezinbestekoa da jendartearen beharrizanei erantzuna eman diezaiekeen programa aurrera eramateko eta guztion artean denon herria eraikitzeko. Denon herria hemen posiblea delako Euskal Herriak erabakitzeko tresnak baldin baditu, Madrilen ez bezala, dagoeneko ikusi dugun moduan eta Parisen ez bezala. Herri honek amesten duen denon herri hori, orain eratu behar dugu, urte gehiegi eman ditugulako honezkero aurrerapausorik eman gabe eta ezin ditugu beste 4 urte galdu, orain da gure unea eta zenbakiek ematen dute.

Hemen eta orain denon herria sortzeko eta gure gizartea eraldatzeko herri-akordio bat proposatu du EH Bildu-k, hain zuzen ere, akordioz zerbait dakigulako eta horrela frogatu dugu gure parte hartzearekin lege garrantzitsuenak lantzeko prozesuetan, etxebizitza-legea, udal-legea, fracking legea edo turismo-legea, esaterako, bai eta Gasteizko udalaren kasuan ere.

Baina EH Bilduren altxorrik kuttunena, herritarrak gara, herritarrik gabe ez gara, herritarrentzat egiten dugu lan eta herritarrekin lan egin nahi dugu. Herri bizia gara, aurrera egiteko gogoa duen jendartea, eta beraz, pertsonengan begirada jarriko duen herria eraiki behar dugu, herritar guztien ongizatea bermatuko duten zerbitzu publikoak eta jendarte osasuntsua eta jakintsua sortzen ahalbidetuko duena. Berrikuntzan puntakoa den herria, formakuntzan, gizarte babesean eta gure gazte zein helduen zaintzan erreferentea dena. Hezkuntza eta kultura eskuragarri dituen jendartea hazkuntza pertsonal eta kolektiboaren oinarri dugu.

Baina ongizate onargarri bat lortzetik urrun gaude oraindik. Enplegu duina sortu behar dugu. Gazte askok kanpora lan egitera joan behar dute, beste asko langabezian daude eta lanean ari direnek lan-eskasiarekin topo egin dute aurrez aurre. Pentsioak ere ez dira duinak eta hainbat zerbitzu publiko murrizten eta pribatizatzen joan dira.
Gozategiaren abestiak dioen bezala:

“eusko jaurlaritzak dio
dirurik ez dagoela
baina zer kasualitate
gurea falta zaiela!”

Dirua badago, baina gurea falta zaie, Supersur edo AHT bezalako proiektuek sekulako zuloa ekarri digute eta ezin ahaztu buruan duten Urdaibaiko Guggenheim proiektua.

Gure hizkuntza eta kulturari dagokionez, euskararen normalizazioan eta euskaldunon eskubideak bermatzeko prozesuan lan dezente egin behar dugu oraindik, horren adibide garbia ikusi ahal izan dugu, tamalez, kanpaina honetan idar politikoren batek kaleratu duen bideoan.

EH Bildun bakegintzan eta elkarbizitzan aurrera egiteko ekarpen handia egin dugu eta
aurrera begira bide horretan jarraituko dugu. Alabaina, espainiar estatuak bere jarrera inmobilistan jarraitzen du eta euskal presoen zein beren senideen eskubideak urratzen ditu etengabe.

Honengatik guztiagatik eta artikulu honetan sartzen ez diren beste zio askorengatik, hasieran esan dugun bezala, hauteskunde hauek ez dira hauteskunde arruntak izango, asko dugu jokoan eta testu hau sinatzen dugun Hego Uribeko hautetsiok ilusio handia dugu hauteskunde hauetan eta etorkizunean jarrita. Ilusio hori herritarrengan ere igarri dugu eta ilusio horretaz kutsatzen jarraitu nahi dugu gure herria, EH Bildu ezinbesteko tresna izango delako denon herria hemen eta orain eratzeko.

Hego Uribeko EH Bilduko hautetsiok.

Zutabeak

Iritzia | Bizitzaren zirkuluak

|

Pertsona bakoitzak bere bizitzan zirkulu desberdinak betetzen dituela uste dut. Gure bizitzari esanahia ematen dioten zirkuluak dira eta helburu baten bilaketa etengabean gaude zirkuluak betetzen. Zirkulu ikusezinak dira. Nik, adibidez, lagunak, aisialdia, lana, familia eta nire buruari eskaintzen diodan denbora zirkulutan banatzen ditut. Zirkulu horiek bakoitzaren esperientzien, hazkundearen eta eraldaketaren ziklo jarraitua dira. Zirkulu batzuk irekita daude eta irekita mantentzen dira luzaroan. Ez dute borobil itxi baten formarik. Borobilaren zirkunferentzia irekita dago eta denbora luzez egon daiteke itxi barik. Bakoitzak bere erronkak betetzean dituen heinean ixten dira.

GEURIAk datorren urtean 10 urte beteko ditu, eta hortaz, nik 10 urte beteko ditut GEURIAn lanean. Kazetaritza ikasketak amaitu eta berehala hasi nintzen bertan beharrean. Kazetaritza benetan zer den ikasi nuen duela 10 urte, eta oraindik ere ogibidea ikasten ari naiz.

Laneko zirkulu hori oraindik ez daukat itxita. Ikasketa prozesua amaigabea da eta erronkak beti azaltzen dira nire aurrean. Azken urtean zuzendari lanak eta kazetari lanak uztartzen aritu naiz GEURIAn eta irakurleek eta ikusleek ikusten ez duten lana zelan egiten den ikasi dut. Orain badakit beste gauza asko egiten komunikabidearen barruan. Eta azken urteko ikasketei esker, lanari dagokion nire zirkulua are gehiago handitu dut, baina oraindik zirkunferentzia guztiz itxi barik.

GEURIAren 100. alea da esku artean duzuna. Zenbaki borobila eta itxia, baina nire laneko borobila oraindik zabalik dago, erronka berrien bila.

Osorik irakurri

Iritziak

Iritzia / Hego Uribeko Laneko Atodefentsa Sarea eratu da

|

Argazkia: Kontseilu Sozialista

Krisi garaia ofentsiba garaia da bereziki; burgesiak gure aurka bideratutako ofentsiba. Eta otzan egon ordez, desjabetuok autodefentsarako mekanismoak sortu behar ditugu. Esparru guztietan, baita laboralean ere. Horretarako sortu genuen Hego Uribeko Kontseilu Sozialistatik laneko baldintzak borrokatu eta hobetzeko tresna, Laneko Autodefentsa Sarea (LAS).

Arlo laboralean ematen ari den egituraketa dela eta, erreminta berriak behar dira proletargo atomizatua antolatzeko. Errepresentazioan eta burokrazian oinarritutako eredu sindikal baten ordez, langileon borroka propioa sustatuko dituen antolakuntza formak behar ditugu. Klase elkartasuna indargune duen antolakuntza oinarri, langileon onurarako diren borrokak abiarazi behar dira.

Hala ere, hobekuntza partzialak ez dira nahikoa; agerikoa baita kapitalismoak okerrerako joera duela, eta garaipen oro desagertu egiten dela urte edo hilabete gutxitara. Beraz, erreformara mugatu beharrean, zinez errealista den politikak ezin du esplotazio tasa “normal” bat legitimatu, esplotazio harremana gailendu behar du.

Zentzu honetan, borroka bakoitzari perspektiba politiko jakitun bat ematea funtsezkoa da, borroka bera orokortzeko. Horregatik, autodefentsa sozialistak osotasun politikoari egiten dio ekarpena langileon zuzeneko interesak defendatzearekin batera; hots, kalitatezko lan baldintza berdinen aldeko borroka, Estatu Sozialistaren norabidean kokatu behar dugu.

Horrela, langileon arteko klase elkartasuna medio, interbentzio politikorako hainbat baliabide eta aukera eskaintzen ditu Hego Uribeko LAS-ek:

  • Lan gatazken gaineko aholkularitza juridikoa.
  • Borroka prozesuak aurrera eramateko laguntza eta babesa.
  • Formakuntzarako baliabideak: kontratu eta nominen irakurketak, erreforma politikoen inguruko azalpenak, eskubide laboralen gidak etab.
  • Auzi laboralen gaineko mobilizazioa eta salaketa politikoa.

Hau guztia hurbilarazteko, aurkezpenak burutuko ditugu kolektibo ezberdinetan Galdakaon eta Basaurin bereziki. Zalantza edo beharrizanik edukiz gero, kontaktatu 613 910 019 telefono zenbakian edo lanekoAS.hegouribe@gmail.com heblbide elektronikoaren bitartez.

Osorik irakurri

Zutabeak

Iritzia / Ohiko estrukturak aldatuz

|

M28ko udal eta foru hauteskundeek egunetako ajea utzi dute herritar askorengan. Politikariengan, ziur, baita kazetariongan ere. Hauteskunde gauean gautxoriak bilakatzen gara: eguneko joan-etorriak, emaitzen gora-beherak, grafikoak han eta hemen, lehen analisiak, kalera irten eta alkategaien lehen adierazpenak jaso… Ordu txikietan, lan eta lan.

Aurten, ostera, GEURIAn hauteskundeak beste era batera kubritzea erabaki genuen: hauteskundeak, hautagaiak eta herritarrak batu eta gurera gerturatzea, ahal dela, era jostagarri batean eta ohiko estrukturetatik kanpo. Hego Uriben 2019ko udal hauteskundeetan ordezkaritza lortu duten alderdietako alkategai guztiekin jarri ginen harremanetan otsailean. 26 alkategaietatik 23k gure proposamena begi onez ikusi eta parte hartzea onartu zuten. Apirilean zehar grabaketei ekin genien: alkategaiak, herriak, egunak eta orduak lotu. Kanpora begira ikusten ez zen lana, baina ziur geunden bere fruituak emango zituela. Batetik, herritarrek alkategaiak 60 segundutan ezagutzeko aukera izan dute. Bestetik, Geuria Txallenge jolasean parte hartu dute ordezkari politikoek: eskualdeko zazpi herriak are gehiago ezagutzeko erronkak eta, bide batez, politikariak beste rol batean ikusteko aukera.

Herritarren parte zabal batentzat politikak oro har duen interes ezak bultzatuta, herritarrak eurak hauteskundeekin lotu nahi izan ditugu. Politikariek egindako txallengeak herritarrei ere zabaldu genituen. Emaitza ezin hobea jaso dugu: 478 parte-hartzaile! Egiari zor, eskualdean ekoiztutako produktuak zozketatu ditugu, Maskiluren eta Barazkiloren eskutik. Ederra pagotxa! Bide batez, zorionak irabazleei, Aritz eta XXXX!

Maiatzeko hauteskundeak oraindik ez dira bukatu, ordea. Ekainaren 17an inbestidura saioak egingo dituzte. Eta bertan izango da GEURIA ere. Ondoren hartuko dugu arnasa apur bat, uztailaren 23ra arte akaso? Horiek lasaiago hartuko ditugu, ziur nago.

Osorik irakurri

☉ Galdakao

Iritzia / 86 urte igaro dira jada

|

Gaur, duela 86 urte Faxistek Galdakao bonbardeatu zuten, Plazakoetxeko babeslekua jo eta laguntzera joan zirenak metrallatu zituzten. Orotara, 24 galdakoztar erail zituzten faxistek eta hilabete batzuk geroago burdin hesia gainditu eta Francoren armadaren menpe gelditu zen herria.

Lehenik eta behin, ezinbestekoa da eraildako herritarrak omendu, emandako gertakariak gogoratu eta bertatik irakaspen politikoak ateratzea. Izan ere, urte asko igaro diren arren, gaur egun adierazpen faxisten gorakada eta estatuaren autoritarizaziorako joerak indar handia hartzen ari diren fenomenoak dira. Funtsean, egungo krisia testuinguruan ematen ari den gizartearen eta estatuaren faxistizazio prozesuaren adierazle zuzenak dira.

Burgesiak, egun bizitzen ari garen krisi testuinguruan sortu daitekeen ezegonkortasuna apaltzea du helburu, independentzia politikoan oinarritzen diren adierazpenak erasotu (eskubide politikoen urraketen bitartez) eta etorkizuneko langileria disziplinamendu mekanismo geroz eta zorrotzagoetan hezteko asmoz (plataforma digitalak, segurtasun kamerak, presentzia polizial itogarria…). Horregaitik, esan daiteke, gobernu faxista ekoizpen eredu kapitalistan gizartea antolatzeko modu konkretu bat dela, krisiaren erreakzio bezala gaurkotu dena, alegia.

Izan ere, faxismoak bizitzen ari garen garai ilun honetan bere programa baztertzailea langileriaren baitan zabaltzea du helburu, proletalgo babesgabearen kontra eginez. Hala nola, komunitate nazionalaren modernizazio bat planteatzen dute. Orden soziala eta ongizatea berreskuratzeko identitate nazionalaren defentsa sutsua egiten dute, klase ertain nazionalaren baldintza ekonomiko eta sozialen okertzearen errudun proletalgo migratzailea aurkeztuz. Honela, subiranotasun nazionala mantentzea ezinbesteko premisa bezala aurkezten dute, estatu aparatuen defentsa sutsu bat proposatuz; finean, biraje autoritarioaren atxikipena lortzeko, Estatua elite ekonomikoek sortutako krisiaren aterabide bezala aurkezten dute.

Gauzak honela, krisiaren aurrean berriro ere metaketa fase bat abiarazteko beharrezkoak zaizkion neurriak aplikatzen ari da burgesia. Ezegonkortasunaren aurrean posizioak indartu eta proletalgoaren dominazioan sakontzen jarraitzeko, krisi testuinguruak bultzatuta (hein handi batean), gizartearen faxistizazioa ematen ari da. Horren aurrean, faxismoa gobernutik bota baino, bere oinarriak suntsituko dituen proiektua, sozialismoaren eraikuntza ekonomikoa, gorpuztea beharrezkoa zaigu. Langileriaren klase batasuna eraiki behar dugu, proletalgoaren interes historikoen arabera antolatu eta botere komunista bat gorpuztea ezinbestekoa zaigu, gizabanakoen askatasun erreala, zapalkuntzarik eta diskriminaziorik gabeko gizartea eraiki ahal izateko.

Osorik irakurri

Zutabeak

Iritzia / Aske bizi

|

Argazkia: Karollyne Hubert,Unsplash

Aniztasuna da gaur egun gizartearen ezaugarri nagusienetako bat. Ez bakarrik kultura aldetik, ale honetan irakurgai duzun Xabier Aierdi soziologo zeberioztarrak GEURIAn eskaini duen elkarrizketan adierazi duen bezala, baizik eta persona aldetik. Azken urteetan eta berezi azken hilabeteetan asko hitz egin da genero-identitateaz. Eta ez moda bat delako —askok gaizki uste duten bezala—, errealitate bat delako baizik. Askorentzat ezezaguna den errealitatea.

Lara Arroyo basauriarra aurrez aurre ezagutzeko aukera izan dut ale honetan. Transexualitateaz egin dugu berba, non eta Marienean, genero-identitate guztiak errespetatzen den gunean. Errespetua. Hori da beti garrantzitsuena: besteekiko errespetua izatea. Sexualitatearen adierazpen desberdinekiko errespetua sustatu behar dugu, aurreiritziak hautsiz eta lesbiana, gay, transexual, bisexual, intersexual edo beste edozein orientazio sexual edo genero-identitaterekiko diskriminazioarekin amaituz.

Emakume indartsua iruditu zait Lara. Bere trantsizioa bakardadean bizi du, baina beti argi izan duena lortu du eta orain zoriontsua da. Oso garrantzitsua da trantsizio-prozesuan dauden pertsonei laguntza eta baliabideak eskaintzea, batez ere beren ingurukoen babesik ez dutenei. Larak 20 urterekin hasi zuen trantsizioa, baina adingabeen transexualitatea ere existitzen da. Trans gisa identifikatzen diren haur eta gazteei entzun eta babesa eman behar diegu. Gizarte gisa, trans komunitatea babestu behar dugu, eta, horretarako, oso garrantzitsua da hezkuntza eta inklusioa, trans pertsonentzat giro ulerkorragoa eta errespetuzkoagoa sortzen laguntzeko. Oso garrantzitsua da nork bere burua onartzea eta nola izan daitekeen zaila geure nortasuna onartzea eta ulertzea, bereziki generoari eta sexualitateari buruzko ideia zurrunak dituen gizarte batean. Horregatik hezkuntza oso garrantzitsua da, errespetua giltza izan dadin pertsona guztiak aske bizi gaitezen.

Osorik irakurri