Sareak

Kirola

Iritzia / Arrigorriagako arkakusoa

|

Leo Messik Bartzelonatik alde egin nahi du. Hurrengo egun eta asteetan mundu mailako albistea izango denak bere oihartzuna izan du Arrigorriagan ere, bitxikeria batek hauspotuta: 2015an Ernesto Valverdek, orduko Athleticeko entrenatzaileak, Messi Arrigorriagakoa izatea nahiko zuela esan zuen. Erdipurdiko coach-ek saltzen dutenaren kontrara, ordea, jakin badakigu nahi izatearekin ez dela nahikoa zure ametsak bere horretan bete daitezen, Instagramerako soilik balio duela horrek, baina ateraldiak aukera ematen digu izarren izenaz, izanaz eta ezinaz hausnartzeko, astronomiaz ezer gutxi jakin arren.

Izateko, izar guztiek izena behar dute. Arrigorriagatarra behar lukeen jokalariaren kasuan “arkakusoa” ezizenaz ezagutu izan dugu bere kirol ibilbide guztian zehar. Metafora ederra halako animalia txikia, ia ikusezina, itxuraz ezdeusa, urteen poderioz hainbeste gozarazi digun erraldoi bilakatu izana. Kalean hasi zuen bere kirol ibilbidea Messik. Madalenetako futbito txapelketan parte hartu zuen edo ez batek daki, baina Argala plaza betetzen zuen txapelketa harekin gertatu denak ondo baino hobeto islatzen du futbolak izan duen bilakaera: Kaleetatik eta plazetatik atera dugu, eta belar artifizialera eraman. Ez naiz azken aldian medioetan hain usu ematen diren kanpainen antzera prekarizazioa erromantizatzen hasiko, non, adibiderako, esango dizuten zaborretik jatea friganismoa dela, eta ez pobrezia gordina: Azken hamarkadetan hobekuntza erraldoia eman da futbol zelaietan, eta horrek onura nabariak ekarri ditu. Hala ere, egia da kaleko futbola oinetan baino, buru barruan hezurmamitzen dela, eta irudimena hauspotzen duela: Dena sortu behar da hutsetik hasita, joko zelaia bera, erabakiz atea bi jertserekin edo zuhaitz, zutabe edo dena delakoekin egingo den, eta antolaketa ere eskatzen du, taldeak egiteko, arauak finkatzeko etab. Jokoak berak eskaintzen ditu futbol zelai baten barruan baino arrisku eta abagune gehiago, ingurunea uneoro zeharo aldakorra den heinean, eta horrek jokalariei halako bizkortasun eta erabakimen berezia eskatzen die.

Dmitry Tomashek / Unsplash

Zenbateko garrantzia izan zuen kaleak Messirentzat? Handia. Baina bere kirol ibilbidea markatu zuena beste kontu bat izan zen, baliabideekin eta medikuntzarekin zerikusia duena. Ezagun da hazteko behar zuen tratamendua Bartzelonak ordaindu ziola, eta horrek, munduko harrobi onenetako batean egotearekin batera, (ez da komeni ahaztea), bidea zeharo erraztu ziola. Talentuak ongarri egokia behar du loratzeko, baita onenen kasuan ere, Montefuerte edo Santo Cristorako aldapa etzanagoa izan dadin. Ongarria baliabide materialetan, eta baita giza baliabideetan ere. Arlo honetan ere gauzek onera egiten dute, teorian eta praktikan, baina funtsean ez da azken hamarkadetan indarrean dirauen pentsamoldea aldatu, ez behintzat gure inguru hurbilean: Jokalarien kirol ibilbidean berebiziko garrantzia duten adinetan ez ditugu beti behar beste baliabide bideratzen. Entrenatzaile eta talde gehienok ere “gorantz” egitea izaten dugu helburu, tontorrean egonda hobeto ikusiko gaituztelakoan. Eta noski, handik goitik, kataloxa jarrita ere ez dugu jakiten arkakusoak non dauden, arkakuso bakoitzaren nortasuna zein den, eta dituen behar eta nahiak zeintzuk diren.

Kirolari moduan, Bartzelonako 10ak, baditu herrikidea izateaz harro sentiaraziko zizkiguten hainbat balio, sobera ezagunak direnak, baina goi mailako futbola kirola izateaz aparte, edo horren gainetik, zehazkiago esatearren, kapitalaren logika ankerrari men egiten dion negozioa ere bada. Eta horretan ere argentinarra eredua da, kasu honetan txarrerako. Ogasunarekin izandako arazoak ikustea besterik ez dago, eta horrek bere izarraren distira zein gutxi apaldu duen zale zein gizarteari begira. Gure herrikidea balitz, kenduko genizkioke bere omenez jarritako kale, kiroldegi edo dena delako guztiak egindako iruzurragatik? Kasurako, ze erantzun jaso zuen jarraitzaile zuri gorrien aldetik jakiteak San Mames berriaren obren zati bat esklabutza baldintzetan lan eginda burutu zela? Kepak alde egiteak baino gehiago edo gutxiago sumindu gintuen? Ba hori. Halakoak gertatzen direnean bainaka hasten gara, eta amamak esaten zuen moduan: “Bainak… ortuan”.

Messi arrigorriagatarra litzatekeen errealitate paralelo horretan agian ez ginateke pandemia baten erdian egongo, eta gaitz erdi, baina bai bata zein bestea ezinezkoa diren lez, hobe elkar zaindu eta medikuntzan, irakaskuntzan edo kale garbiketan ditugun arkakuso horietaz harro egon eta baliabidez hornitzen baditugu.

☉ Arrigorriaga

32. Ume Mendi Ibilaldia antolatu du Arrigorriagako Padura Mendi Taldeak

Maiatzaren 26an antolatu dute 32. edizioa eta urtero lez, proba laburra eta luzea izango ditu

|

Pastorekorta // Geuria

Maiatzaren 26an 32. Ume Mendi Ibilaldia antolatu du Arrigorriagako Padura Mendi Taldeak. Urtero lez, kirol proba honek kategoria bi izango ditu, eta biak Arrigorriagatik abiatuko dira: Laburra (7,81km eta 214 metroko desnibelekoa) eta Abrisketako Done Peritik, Benta Handia eta Mendikosolotik igaroko da. Luzea, ordea, (11,64km eta 535 metroko desnibelekoa), Otxandioko Atxatik, Pastorekortako tontorretik eta Txus iturritik igaroko da.

“Luzeak, anoa-gune bat izango du ibilbidean. Laburrak, ordea, ez”, azaldu dute Euskal Mendi Federaziotik. “Baina, amaieran, ibilbide bietako parte-hartzaileek indarrak berreskuratzeko jakiak izango dituzte helmugan, baita opari-poltsa bat ere”.

Izen emateak eta ibilbideen trackak Euskal Mendi Federazioaren webgunearen bidez ikus daitezke.

Osorik irakurri

☉ Arrigorriaga

Arrigorriagako Abusu Casting Klubak Arrantza Opena egingo du taldearen 25. urteurrenean

Hitzordua ekainaren 23an izango da eta 450 euro eta kirol materiala banatuko dituzte sarietan

|

Abusu Castingeko Mikel Jimenez kidea // Abusu Casting Klub

Abusu Casting Klubak mende laurdena bete du aurten eta ospakizun modura Arrantza Open 25 jarduera prestatu dute Arrigorriagako auzoan. Hitzordua ekainaren 23an izango da eta 450 euro eta kirol materiala banatuko dituzte sarietan.

“25. urteurrenean egun berezia antolatu dugu Abusun”, azaldu dute elkarteko ordezkariek. “Hori horrela, herritarrak gonbidatu nahi ditugu Korrokoiak arrantzatzera”. Jardueran parte hartzeko arrantza klubarekin harremanetan jartzea eskatu dute 678 51 84 64 telefono zenbakira deituz.

Lehen saria 200 euro, txapela eta trofeoa izango da; bigarrena 150 euro eta trofeoa; hirugarrena 100 euro eta trofeoa. Laugarren postutik hamargarreneraino kirol materiala banatuko dituzte parte-hartzaileen artean. “Parte-hartzaile guztiek saria jasoko dute hala ere”, gehitu dute arrantza taldetik.

Osorik irakurri

☉ Zaratamo

Urrutikoetxea eta Elezkano II pilotari zaratamarrek Bizkaia Torneoan hartuko dute parte

Danel Elezkano zaratamarra Gorbeia taldean arituko da lau t’erdiko espezialitatean. Urrutikoetxea, ostera, Kolitzan lehiatuko da Albisurekin batera eskuz binakakoan

|

Gaur goizean ekainaren 1ean Urdulizen hasiko den Bizkaia Torneoaren 11. edizioaren aurkezpen ofiziala egin dute Bilbon. Bertan Leixuri Arrizabalaga Euskara eta Kultura diputatua, Aspe eta Baiko Pilota enpresetako ordezkariekin bildu da. Guztira 24 pilotarik hartuko dute parte aurtengo edizioan eta horien artean Mikel Urrutikoetxea eta Danel Elezkano zaratamarrak daude.

Bizkaia Torneoa taldeka eta hiru espezialitateak jokatzen dituen esku pilota lehiaketa bakarra da. Talde bakoitzak Bizkaiko mendi baten izena dauka: Ganekogorta, Oiz, Gorbeia, Sollube, Anboto eta Kolitza. Talde bakoitzean lau pilotari ageri dira: bi binakako modalitatean, bat lau t’erdian eta beste bat banakakoan.

Danel Elezkano zaratamarra Gorbeia taldean arituko da lau t’erdiko espezialitatean. Bere taldean Elordi eta Zabaleta binakakoan izango dira eta Salaberria banakakoan. “Pozik nago Gorbeia taldean jokatzea tokatu izanagatik”, aitortu dio Elezkanok GEURIAri bere taldekideen berri izan duenean.

Danel Elezkano // Geuria

Mikel Urrutikoetxea Kolitza taldean egongo da Albisurekin batera eskuz binakako modalitatean. Jaka lau t’erdian neurtuko da eta Zubizarreta III.a banakakoan.

Mikel Urrutikoetxea // Geuria

Lehiaketa sistema

Final-laurdenetako, finalerdietako eta finaleko kanporaketa sistemaren arabera jokatuko dute pilotariek eta kanporaketa bakoitzean gutxienez bi garaipen lortu dituen taldea sailkatuko da. Antolakuntzatik azaldu dute partidak 22 tantora jokatuko dituztela eskuz binakako modalitatekoek eta 18ra banakako kanporaketetan.

Txapelketa Urdulizen, Zeanurin, Mallabian eta Bilbon jokatuko da eta kanporaketak ekainaren 14, 15 eta 16an jokatuko dituzte. Finala abuztuaren 20an antolatu dute Bilboko Bizkaia Frontoian. Sarrerak webgune honetan eskuratu daitezke.

Osorik irakurri

☉ Basauri

Emakumeen Champions Leagueko kopa Basauriko Artunduaga kiroldegian dago gaur eta bihar

|

Maiatzaren 14an eta 15ean ikus daiteke gertutik UEFA Women's Champions Leagueko kopa Artunduagako kiroldegian // Argazkiak: Basauriko Udala

UEFA Women’s Champions League txapelketako finala jokatuko dute maiatzaren 25ean Bilboko San Mamesen Bartzelonak eta Olymplique Lyonek.

Finaleko kopa Bizkaiko hainbat udalerritan izango da ikusgai, “herritarrek garaikurraren argazki bat egin ahal izan dezaten, baita emakumezkoen kirolari babesa adierazteko ere, kasu honetan, futbola protagonista dela”, diote.

Hego Uribe eskualdean, Basaurin soilik ikus daiteke UEFA Women’s Champions Leagueko kopa: gaur (maiatzak 14) eta bihar (maiatzak 15) Artunduaga kiroldegiko futbol zelaiaren gradetan jarri dute. Kopa ikusteko ordutegia da 09:00etatik 21:00etara.

Osorik irakurri

☉ Basauri

Emakumeen hirugarren Korrikaldia antolatu dute maiatzaren 19an Basaurin

|

Emakumeon III. Korrikaldiak Marienean izango du irteera, eta helmuga San Isidro plazan // Marienea

Emakumeon Herri Korrikaldiaren hirugarren edizioa antolatu du Marieneako Korrikalariak taldeak maiatzaren 19an, igandez, Bentako jaien markoan.

Ibilbidea 5 kilometrokoa da eta Marienean bertan izan da irteera 10:30ean. San Migelen itzuli bat egin ostean, Marienea aurretik igaroko dira eta Nagusia kaletik behera egingo dute. Helmuga San Isidro plazan izango da, 12:30ean.

Parte hartzaileek korrika edo oinez egiteko aukera izango dute ibilbidea. Interesdunek izena eman behar dute aurretiaz  946 124 100 telefono zenbakira deituta edo marienea@basauri.eus helbide elektronikora idatzita.

Izena ematea doakoa da, kamiseta oroigarririk gabe, eta kamisetarekin 10 euro ordaindu behar dute parte hartzaileek.

Ordutegia / III. Emakumeon Herri Korrikaldia

Maiatzak 19, igandea
10:00 Dortsalen banaketa Marienean
10:15 Berotze-ariketak
10:30 Irteera

Osorik irakurri