Denontzako patioa ekimenaren barruan (DePat ezina jarri diote), lorategi tailerra izan dute gaur goizean Basauriko Uribarri Institutuko ikasleek eta gurasoek.

Tailerra Mentxu Amunategik eman du: hosto-aldaxkak eta adar-aldaxkak zelan moztu eta landatu behar diren irakatsi die ikasleei eta gurasoei, eta ondoren, jolastokian dauden jardineretan landatu dituzte.

Proiektuaren inguruan berba egin dugu Izaro eta Leire ikasleekin. Institutuko Femix talde feministako kidea eta Agenda 2030 egitasmoko eko-ordezkaria dira, hurrenez hurren, eta goizeko saioan parte hartu dute.

Ekimena Uribarri Institutuko zuzendaritzak, irakaslegoak eta guraso elkarteak jarri dute martxan, eta Sagarrak talde ekologistaren eta Basauriko Udalaren laguntza izan dute.

Arrigorriagako eskolako kanpo espazioa eraldatzeko proiektu berria ipini dute martxan, “hezkuntza komunitate osoarekin batera jolastoki hezitzailea, denona eta inklusiboa eraikitzeko”. Proiektu hau gauzatu ahal izateko prozesua parte-hartzailea izango da, eta horretarako eskola komunitate osoaren behar eta nahiei erreparatuko zaie, betiere baloreetan oinarritutako heziketa ardatz izanik.

“Proiektua martxan da”, azaldu dute eskolatik. “Jada lehenengo bilera egin dugu, eta horri jarraipena emateko Talde Eragilea sortu dute Udalak, eskolak, guraso elkarteak, familia ordezkariak eta talde teknikoak osatuta”. Eragile horiez gain, ikasleek ere zeresan handia izango dute, eta euren ahotsa lanketa tailerren bidez ikusaraziko da. Eskolatik aurreikusi dute proiektuaren prozesuaren diagnostikoa eta proposamena garatzeko lanek ikasturte oso bateko lana emango dietela: “Gerora, hartutako erabakiak gauzatzeko lanak, esku-hartzeak, egokitzapenak egin beharko lirateke”. Prozesu honek Zaratamon lantzen ari diren Ametsetako Jolastokiaren antz handia du. Bertan, eskolako eragileak eta auzolana dira osagarriak.

Arrigorriagako gazteen ongizate emozionala zaintzea helburu duen proiektua aurkeztu du gaur Arrigorriagako Udalak Gazteguneko, eskolako eta institutuko ordezkariekin batera: “Elkarrekin egindako analisiaren arabera, Arrigorriagan, beste tokietan bezala, egoera orokorrak horrela eraginda, badaude hainbat kezka nerabeen artean”, azaldu du Maite Ibarra Arrigorriagako alkateak. “Horien artean presioak, erritmo altuak, exijentziak, nahasmen emozionalak… daude eta hauek gazteen osasun mentalean eragin nabarmena dute”.

Gorka Etxebarria Arrigorriagako Udaleko Euskara, Hezkuntza eta Gazteria zinegotziak argitu du ez dutela datu bilketa ohikorik egin, baizik eta ahozko analisi partekatua: “Hezkuntza zentroekin, familia elkarteekin eta gazteria zerbitzuekin hasierako harreman hauek egin ditugunean konturatu gara agente hezitzaile guzti horiek atzeman dutela gazteen arteko behar hori”, zehaztu du Etxebarriak.

Prebentzioan kokatu beharrekoa da gazteen ongizate emozionala lantzen duen hau, arrisku faktoreak arazo larri bihurtu aurretik identifikatu eta jorratzeko asmoa baitu, eta, Ibarrak azaldu bezala, uda aurretik martxan jarritako gazteentzako zerbitzu psikologo berriarekin batera proiektu bat osatzen du. Proiektu honek hainbat saio biltzen ditu eta horietan eskolako, institutuko eta Gazteguneko gazteekin honako gaiak landuko dituzte: emozioak lantzea eta estresa kudeatzea, eta irakasleekin, profesionalekin eta familiekin tratu onak harreman motak, identitatea eta sexualitatea eta generoa teknologiaren garaian, irudi pertsonala sare sozialetan eta osasun mentalean eta pornografia eta osasun mentala.

“Gazteen ongizate emozionala gure gobernu planaren ildo nagusietako bat da”, gehitu du Maitek. “Hauen behar sozio-emozionalak erdigunean ipini ditugu eta bide berri bat irekitzen ari gara Arrigorriagan”.

Arrigorriagako Udaleko, Gazteguneko, eskolako eta institutuko ordezkariak, Gaztegunearen ondoan // Geuria

Elkarlana, giltza

Rakel Solaun Arrigorriagako eskolako zuzendariaren arabera, proiektua “oso modu onean” jaso zuten lehen momentutik eta pandemia ostetik ikasleak ongizate emozionalean “nahiko eskas” daudela atzeman dutela aitortu du: “Harremanetan, beren arteko kudeaketa horietan.. laguntza behar dute, eta beraz, oso onuragarria da programa hau”. Bestalde, irakasleekin lan egiteak balio erantsia duela gehitu du: “Horrela, elkarrekin artean bideratu dezakegu denon helburua den ikasleen ongizate emozionala”.

Rakel Solaun: “Pandemia ostetik ikasleak ongizate emozionalean “nahiko eskas” daudela ikusi dugu”

“Guraso bezala oso garrantzitsuak dira era honetako formazioak eta ezagutzak, momentu jakin batzuetan galduta ikusten dugulako geure burua”, izan dira Roberto González Arrigorriagako institutuko guraso elkarteko kideak, Maiteren adierazpenak berretsiz eta Udalari eskerrak emanez.

Aitor Arenas: “Zortzi urteko umeek pornografia ikusten dute gaur egun eta benetan larria da hori, mugikorrak gero eta goizago eskatzen dituzte, horrek dakarren adikzio arazoarekin…”

Aitor Arenas, eskolako Gure Magalean guraso elkartetik, “oso egoki” bezala definitu du proiektu berri hau eta pandemiatik harago doan egoera dela azaldu du: “Guk ikusi dugu ez dela pandemia osteko kontua bakarrik; pandemia aurretik datorren arazoa da, gure datuen arabera, 8 urteko umeek pronografia ikusten dute gaur egun eta benetan larria da hori, mugikorrak gero eta goizago eskatzen dituzte, horrek dakarren adikzio arazoarekin… Horregatik eta bertako sarea herriko elkarte askok osatzen dutela ikusita, osasun mentala era guztietan lantzen duen proiektua izatea benetan egokia ikusi genuen. Elkarren arteko lana izanda, gainera, oso aberasgarria da, eragile bakoitzak esperientzia propioa elkarbanatzen duelako”.

“Gure partetik proiektua ez da ekimen puntuala izango”, laburbildu du Gorka Etxebarriak. “Asmoa da etorkizunean ere gai hau mahai gainean mantentzea eta hurrengo urteari begira datu gehiago jaso ahal izatea”.

Tokiko merkataritzan eskola materiala erosteko diru laguntzak emateko oinarriak onartu ditu aho batez Galdakaoko udalbatzak. Haur Hezkuntzako, Lehen Hezkuntzako, Derrigorrezko Bigarren Hezkuntzako, Batxilergoko, Lanbide Heziketako eta hezkuntza behar bereziak dituzten ikasleentzako materiala erosteko izango da laguntza. Gehienez, 100 eurokoa.

Laguntza jasotzeko betebeharrak dira: Galdakon erroldatuta egotea, EAEko Hezkuntza Sailak baimendutako edozein ikastetxetan matrikulatuta egotea eta egindako erosketen fakturak aurkeztea. “Diruz lagundu daitezkeen gastuak izan daitezke: eskolarako jardunerako beharrezkoak diren arropak, teknologia, musika eta heziketa plastikoetako elementuak, arkatzak, boligrafoak, klipak, erregelak, estutxeak, kalkulagailuak, konpasak… eta ez dira diruz lagunduko betaurrekoak, lentillak, ikas-liburuak, gailu informatikoak”, dio Asier Korta Hezkuntza arloko zinegotziak.

“EAJren ekarpenak eskertu nahi ditugu, diru laguntzen arautegi hau borobiltzen lagundu dutelako”, dio Kortak: “Udal gobernuaren proposamenari alderdi jeltzaleak aurrekontuari egindako emendakin baten zuzenketa sartu dugu. Izan dugun elkarlana da bidea denon artean galdakoztarren bizimodua hobetzeko”. Hain zuzen ere, elkarlan horren ondorioz diru laguntza Batxilergora eta Lanbide Heziketara ere luzatu du Udalak.

Basauriko Urbi Institutuak mugak zabaldu ditu. Hasi berri den ikasturte honetan beste urrats bat eman du europar proiektuetan eta La Reunión uharteko (Frantzia) Lycée Jean Hinglo ikastetxeko ikasleekin eta irakasleekin elkarlana sustatu du.

Hain zuzen ere, urriaren 18tik 25era Basaurin izan dira La Reunióneko ikasleak eta irakasleak, eta emigrazioari buruzko eTwinning Exodos proiektuan lan egin dute Urbiko ikasleekin eta irakasleekin. “Reuniondarrek, proiektu komunean lan egiteaz gain, Euskadiko ohiturak, geografia, kultura, hizkuntza, monumentu enblematikoak eta altxorrak ezagutu ahal izan dituzte. Bi ikastetxeen arteko harremana indartu egin da, esperientzia guztiz positiboa eta aberasgarria izan baita”, diote Urbi Institutuko arduradunek.

La Reunión uharteko Lycée Jean Hinglo ikastetxeko ikasleak Urbi Institutuan // Urbi Institutua

“Urruntasunak —9.000 kilometro baino gehiago— ez du eragotzi bi ikastetxeak elkarlanean aritzea emigrazioari buruzko eTwinning Exodos proiektuan. Proiektu horretan beste bost ikastetxek hartzen dute parte. Horiek dira: Lycée Jean Pujo (Baigorri, Nafarroa Beherea); IES Sánchez Lastra (Mieres, Asturias); Gymnázium Lud´ka Pika (Pilsen, Txekiar Errepublika); Liceo Gargallo (Siracusa, Italia); eta Geniko Lykeio Akrotiriou Chania (Kreta, Grezia)”, diote.

Erasmus+ proiektuari esker, 2024ko martxoan Urbiko ikasleak eta irakasleak La Reunión uhartera joango dira bisitan. La Reunión irla Madagaskar uhartetik 700 kilometro ekialdera eta Maurizio uhartetik 200 kilometro hego-mendebaldera dago, Indiako ozeanoan. “Mugikortasun berri hori, zalantzarik gabe, ahaztezina izango da”, diote Urbiko arduradunek.

10 urte

Duela 10 urte baino gehiago hasi zen Urbi Institutua europar proiektuetan parte hartzen eta “elkarlan garrantzitsu bat” garatzen Frantziako, Alemaniako, Italiako, Greziako, Belgikako, Lituaniako, Portugalgo, Danimarkako eta Txekiar Errepublikako ikastetxeekin.

“Mugikortasun horiek Erasmus+ programari eta eTwinning plataformari esker lortu dira, eta bide horretan jarraituko dugu”, diote.