Korrika
Korrikan parte hartuko duzun horri
Hizkuntzen berezko joera da eboluzioa, hizkuntza ezberdinen arteko elkar-eraginaren ondorio, batik bat. Elkar-eragin hori ohikoa da elebitasun egoera guztietan: hizkuntzak elkarrekin nahastu egiten dira, nolabait, eta bakoitzak bestearen ezaugarriak hartu eta berezko egiten ditu. Normalean ez dira egitura edo oinarrizko arauak ordezkatzen, hizkuntzak oso desberdinak baldin badira -batzuetan bai, jakina-, baina terminologiaren alorrean oso fenomeno ohikoa da hizkuntza guztietan. Gurean, gaur egungo diglosi egoera bera izan liteke antinaturalena, Euskara eta gaztelania ez baitagoz maila berean, baina hori ere ez da berria. Euskarak bizi izan du, lehenago ere, elebitasun eta diglosi egoerarik. Euskarak aurre egin behar izan die, lehenago ere, mehatxu egoerei; horren adibide dira historian zehar beste hizkuntzetatik jasotako mailegu eta kalko anitzak.
Euskarak iraun izana bera ere, ezin da ulertu elkartruke eta askatasun egoera horri erreparatu gabe. Zenbait hizkuntzalariren ustez, Euskarak biziraun badu, hain zuzen ere, beste hizkuntzetara moldatzeko ikaragarrizko erraztasuna daukalako izan da. Gaitasun paregabea omen du, beste hizkuntza batzuen aldean, ondoko hizkuntzen ezaugarriak kopiatu, eta berezko egiteko, berezko oinarrizkoari uko egin gabe. Eta arautu barik egon izanak ere lagundu izan dio fenomeno horri momentu batzuetan.
Ez dut kolokan jarriko Euskara arautu izanak izan duen -eta hemendik aurrera izango duen- garrantzia, izan ere ezinbestekoa da euskal hiztunen artean elkar ulertzeko baliagarria izango den eredu bat sortzea; ezinbestekoa da, era berean, hizkuntzaren maila guztietan erabilera bermatuko duen tresna -maila ez-formaletatik hasi eta gai zientifikoetaraino-; ezinbestekoa da, azkenik, hezkuntzarako araututako eredu estandarra lortzea. Zentzu horretan azpimarratuko nuke, gainera, izugarri pozgarria dela Euskarak gaur egun gai tekniko eta zientifikoei buruz hitz egiteko lortu duen maila, uste baitut horrek dakarkion sona oso positiboa dela maila guztietan.
Baina ez dezagun iparra gal. Ez, behintzat, eguneroko erabilera ez-formalean. Ez dezagun gure hizkuntza berez flexible hori, zurrun bihurtu. Arauak hiztunen ondorio dira -eta ondoren-, eta ez alderantziz. Ez dezagun Euskara apurtzearen beldur gabonetan ere atzeratzen ez dugun portzelanazko baxera garesti horietako bat bihurtu. Arauak ez dira erabilera bermatuko dutenak, eta hizkuntzak erabiltzeko dira. Erabiltzeko.
ARAUAK EZ DIRA ERABILERA BERMATUKO DUTENAK, ETA HIZKUNTZAK ERABILTZEKO DIRA. ERABILTZEKO.
Atrebentzia handia ez bada, gustatuko litzaidake 19. Korrika hau aprobetxatu, eta idazki honen bidez euskal hiztunei omenaldi xumea egitea. Baina ez hiztun guztiei, baizik eta bereziki, zergatik ez, hirurogeitaka urtetik gorakoei; "Ayuntamientura" joaten diren horiei; ETB1 katean piperrik ere ulertzen ez duten horiei; euskaraz jendaurrean hitz egin beharko balute, agian barregarri geldituko liratekeen horiei. Horiei esker bizi da, eta, gaur egun, Euskara, ez dezagun egundo ahaztu. Gehienak, gainera, ez dira hemen izango urte gutxi batzuk barru. Gu geldituko gara euren ordez. Eutsiko ahal diogu, eurek bezain tinko, jasotako Ondareari!
"AYUNTAMIENTURA" JOATEN DIREN HORIEI; ETB1 KATEAN PIPERRIK ERE ULERTZEN EZ DUTENEI.
Aurten Korrikan parte hartzen baduzu, bidean errepara iezaiezu, arretaz, Bizkaiko parajeei. Izan ere, erreka ondotik igarotzean patoak ikusiko dituzu ahateekin batera igerian. Eta soloetan ere, zuhur bazabiltza, konejuren bat edo beste.
☉ Hego Uribe
23. Korrika 2024ko martxoaren 14an hasiko dela iragarri du AEKk

2024ko martxoaren 14a. Egun horretan emango diote hasiera berriro euskararen aldeko Korrikari. Hala iragarri berri du AEKk gaur bertan: "Urtebete falta da 23. KORRIKArako!", adierazi dute sare sozialetan. Martxoaren 24an bukatuko da.
"Nondik nora izango da oraingoan? Zein herritatik igaroko da? Zein pertsona edo talde omenduko du? Nolakoa izango da abestia? Gero eta gutxiago dago hau guztia jakiteko!", diote. Azaroan zehaztasun gehiago emango ditu AEKk.
☉ Ugao
Argazkiak | Korrika Dublinera iritsi da Ane Ayerdi ugaotarraren eskutik
Iazko abuztuan iritsi zen Ane Ayerdi Coira Dublinera, Luttrell House Creche and Montessori ikastetxean irakasle bezala lan egitera

Iazko abuztuan iritsi zen Ane Ayerdi Coira Dublinera, Luttrell House Creche and Montessori ikastetxean irakasle bezala lan egitera. Beste irakasle bategaz 1 eta 2 urteko 10 umez osatutako taldean egiten du lan Ayerdik.
Dublinen lur hartu zuenetik argi izan zuen Korrika bere taldeko programazioan txertatu nahi zuela, eta aurten Ugaoko Korrikan egon ezin izan bada ere Dublineko haurrei irakatsi die: "Lehen urtea da Korrikan parte hartzen ez dudala, eta oso berezia izan da betidanik niretzat. Gauzak horrela, Korrika eskolan egitea bururatu zitzaidan eta bertako haurren gurasoen elkartasuna eta babesa izan dut lehen momentutik".
Ugaotarraren hitzetan gurasoak "oso motibatuta" egon dira lehen unetik eta euren kulturakoa ez den proiektu "oso interesgarri hau" beren umeekin lantzeagatik eskerrak eman dizkiote irakasleari. Eskuz egindako petoak eta kartoizko pankarta prestatuta eskolako patiora irten ziren irakasleak txikitxoekin 'Hitzekin' abestiagaz 'korrika' egitera.
☉ Zaratamo
Argazkiak | Zaratamoko eskolako haurrak Korrika Txikian izan dira auzoan zehar
Joan den apirilaren 8an Korrika Txikia egin zuten Zaratamoko eskolako ikasleek. Lekukoa txandaka eramanez, haurrak eskolatik irten eta Iragorri auzoraino joan ziren

Joan den apirilaren 8an Korrika Txikia egin zuten Zaratamoko eskolako ikasleek. Lekukoa txandaka eramanez, haurrak eskolatik irten eta Iragorri auzoraino joan ziren. Eskolatik abiatu eta plazako iturrira heldu ziren. Bertatik Iragorrira, eskola ondoko txaletera eta bertatik eskolara bueltan.
Honako argazkiak helarazi dizkigute zentrotik:
☉ Arrigorriaga
Bi arrigorriagar eta lau basauriar Gorlizko ospitalean, Korrikaren alde
22. Korrikak azken txanpa du. Martxoaren 31n irten zen lekukoa Amurriotik eta dagoeneko hainbat herritatik pasa da, baita Hego Uribe eskualdetik ere -martxoaren 31tik apirilaren 1era bitarteko gauean eta apirilaren 6an-. Gure eskualdean hainbat izan dira euskararen alde korrika egin duten herritarrak, eta eskualdeko herritar askok ere gure udalerrietatik kanpo egin dute korrika.
Adibidez, Gorlizko Ospitalean Arrigorriagako bi lagunek eta Basuariko lauk egin dute bat Korrikarekin. "Atzo Korrika Gorliztik pasatu zela aprobetxatuta, lagun arteko kontu ederra egin dugu ospitaleko lorategian, ilusioz beteta, maitasunez beteta eta indarrez beteta", diote. Hauek bidali dizkiguten argazkiak Gorlizko Ospitaletik:
☉ Basauri
Argazkiak | Sofia Taramonako ikasleek Korrika Txikia egin dute San Migeletik
Gogotsu eta giro onean irten dira San Migeleko Sofia Taramona eskolako ikasleak kaleetatik zehar Korrika Txikia egitera

Gogotsu eta giro onean irten dira San Migeleko Sofia Taramona eskolako ikasleak kaleetatik zehar Korrika Txikia egitera. San Migeletik itzulia egin ostean irribarretsu iritsi dira eskolara.