Euskararen Nazioarteko Eguna da gaur. Galdakaon Mintzodromoa egin dute Iturrondo plazako karpan eta guztira 120 lagun batu dira: Bengoetxe eta Eguzkibegi ikastetxeetako eta euskaltegietako ikasleak eta irakasleak, herriko eragileetako ordezkariak eta norbanakoak elkartu dira eta euskara ahoan izan dute ordu t’erdiz. Hiru gai izan dituzte hizpide: ‘Urak har ditzakeen eremuetan eraikitzea’, ‘Zeregin gehiegi, baina denbora gutxi’ eta ‘Ikasgai berria proposatzea’.

Emakumeen Kontrako Indarkeria Desagerrarazteko Nazioarteko Egunean, manifestazioa egin dute 200 lagunek Galdakaon, Momoak Talde Feministak deituta.

“Indarkeria matxistaren aurkako eguna dugun honetan, kaleak hartu ditugu indarkeria matxistarik gabeko herria behar dugulako”, adierazi dute manifestazioaren amaieran egin duten irakurketan.

“Kontatzen digute beldur izan behar dugula. Kontuz ibiltzeko. Ekiditeko leku eta pertsona ezezagunak, saihesteko desorduak. Badaezpada ere, etxeratze kolektiboetan  egiteko bueltako bidea. Hartzeko ardura eraso ez diezaguten”, salatu dute, eta gaineratu dute: “Izua erabiltzen dute gure bizitzak kontrolatu eta menderatzeko. Arriskua, diziplinatzeko. Erruduntasuna, erantzukizuna bandoz aldatzeko. Subjektu pasibo eta beldurti nahi gaituzte, biolentzia eta autodefentsarako gaitasunik gabe”.

Eta irakurketa horrela amaitu dute: “Errelato patriarkal eta arrazistei, salaketa feminista. Izuaren eta menderakuntzaren saiakerari, botere kolektiboa. Autodefentsa feminista banderatzat hartuz, sistema irauliko dugu! Gora borroka feminista!”.

Indarkeria Matxistaren Aurkako Nazioarteko Eguna da gaur, azaroak 25. Basaurin elkarretaratze instituzionala egin dute 13:00etan udaletxeko arkupeetan.

Elkarretaratzera batu dira Basauriko udal ordezkariak, udal langileak, ikasleak eta norbanakoak.

Euskal Herrian erail dituzten 5 emakumeak eta espainiar Estatuan eraildako 39 emakumeak gogora ekarri dituzte Basaurin, indarkeriaren kultura salatzeko egin duten ekitaldian, azaroaren 23an, larunbatez.

“Mobilizatzeko arrazoi ugari ditugu oraindik, indarkeria matxistak gure egunerokoan oso bizirik jarraitzen baitu. Sexu-erasoen gorakada kezkagarria, indarkeria ekonomikoa, mugak eta irregularizazio egoerak, gorroto diskurtsoen gorakada, estigma soziala, indarkeria matxista kasuen trataera bortitza komunikabideetan, zaintzen banaketa desorekatua, sare sozialetako misoginia eta jazarpen anonimoa… Ez dira kasu isolatuak eta emakumeen osasun fisiko eta psikologikoan ondorio larriak dituen indarkeria sistemiko baten parte dira”, salatu dute.

Indarkeriaren kulturan jarri dute fokua: “Arazoa zarete eraso bat salatzen dugunean gure hitza zalantzan jartzen duzuenak. Arazoa zarete lagunartean txiste bat eta komentarioak mozten ez dituzuenean. Arazoa zarete erasoren bat jasan dugunean justifikatzen edo errua guregan jartzen duzuenean. Arazoa zarete erasotzailea seinalatu bai, baina zuen jokaerak errebisatzen ez dituzuenean. Arazoa zarete feministok urteetan zehar salatzen gabiltzan indarkeriaren aurrean erantzunkizunik hartzen ez duzuenean”.

“Indarkeria ugari dira, baina erroa bakarra. Ez gatoz ezer berria esatera. Urteak daramatzagu gauza berdinak aldarrikatzen eta zoritxarrez aldaketak oso motel datoz. Ardurak hartzeko unea da, guztiontzat”, dierazi dute.

Ildo horretan, erakundeek “legea bete eta baliabide nahikoa” jar ditzatela eskatu dute: “Prebentzio programak behar ditugu, hezkuntzan inbertsioa, esparru anitzetako profesionalentzako formakuntza, erasotuak direnentzako baliabide erreal eta efektiboak”. Era berean, justizia “benetako apustua” egin behar dela aldarrikatu dute, “programa integralak bermatuko dituena, erreparaziorako bitartekoak jarriko dituena”.

Kaleko ihes gela jokoa antolatu du hirugarren urtez Basauri Merkatari Elkarteak. Azaroaren 16an, larunbatez, izan zen eta herriko 66 saltokik hartu zuten parte.

Parte hartzeari dagokionez, 45 taldek hartu zuten parte jokoan: “Guztira 136 lagun!”, adierazi dute Basauri Merkatari Elkartetik.

Sariei dagokienez, ‘Terrazaren Lorategia’ taldeak irabazi zuen lehen saria (300 euroko bonua) eta ‘Galaktikak’ taldeak bigarren saria (200 euroko bonua).

Sari horiez gain, zozketa egin zuten partaide guztien artean eta saridunak hauek izan ziren: ‘La granja de Zenón’ eta ‘Amorcitos de otro planeta’. Bi kuadrillek 100 euroko bonu bana jaso zuten. Bonu guztiak Basauriko saltokietan gastatzekoak dira.

Sari banaketan izan ziren José Andrés Cebrecos Basauri Merkatari Elkarteko kidea, Isabel Cadaval Basauriko Udaleko Merkataritza arloko zinegotzia, eta José Feijoó Basauri Merkatari Elkarteko presidentea.

“Jokoaren helburu nagusia da Basauri eta bere tokiko saltokiak ezagutzea da. Era berean, gazteak tokiko merkataritzara hurbiltzea bilatzen dugu”, diote elkarteko ordezkariek.

Hauek Basauri Merkatari Elkartetik bidali dizkiguten argazkiak, saridunenak: