Sareak

Portada

Hego Uriben Podemos garaile hauteskunde orokorretan

Arrigorriagan, Basaurin eta Etxebarrin irabazi ditu hauteskunde orokorrak Podemos alderdiak, eta Galdakaon, Ugaon eta Zaratamon bigarren indarra izan da.

|

Arrigorriagan, Basaurin eta Etxebarrin irabazi ditu hauteskunde orokorrak Podemos alderdiak, eta Galdakaon, Ugaon eta Zaratamon bigarren indarra izan da.

Azken hiru herri horietan EAJk irabazi du, eta Arrigorriagan, Basaurin eta Etxebarrin bigarren izan dira. Guztira, 16.893 bozka jaso ditu Podemosek Hego Uribe eskualdean eta 15.034 EAJk.

Hirugarren alderdi bozkatuena sozialista izan da 8.706 boturekin, laugarrena EH Bildu 6.587rekin eta bosgarrena alderdi popularra (5.254). Jarraian Ciudadanos (1.970), Unidad Popular-Izquierda Unida (1.690) eta Pacma (438).

 

[visualizer id=”5516″]

☉ Basauri

Sofia Otero: “Berlinaleko sariak hauspotuta, aktore lanetan jarraitu nahiko nuke”

|

Sofia Otero Zilarrezko Hartzarekin // Argazkia: Alexander Janetzko / Berlinale 2023

Sofia Otero basauriarrak antzezpen onenaren Zilarrezko Hartza irabazi du Berlinalen ‘20.000 erle espezie’ filmean egindako lanagatik. Gaztetxoak (9 urte baino ez ditu) historia egin du: euskal aktore bati inoiz emandako sari garrantzitsuena irabazi du, eta gainera, historiako munduko aktorerik gazteena da zinemaren sari handi bat jasotzen.

“Oso eskertuta nago eta oso oso pozik”, adierazi zuen Zilarrezko Hartza jaso eta ondorengoko prentsaurrekoan: “Nire paperak balio handiagoa ematen dio sariari”. Filmazioan “oso ondo” pasatu zuela adierazi du irribarretsu basauriarrak, eta aitortu du “beste familia bat” topatu duela bidean: “Azken finean egunero grabatzen egon ginen eta horrek asko batu gaitu. Familia bat gara orain”, dio Oterok.

Francine Maislerrek eman zion saria Kristen Stewart aktorearekin batera. Maisler epaimahaiko kideetako bat izan zen eta munduko casting zuzendaririk ospetsuenetakoa eta eskarmentu handikoa da: “Bere espezialitatea da aktore berriak aurkitzea eta denok jakin nahi dugu aktore gisa lan gehago egiten jarraitu nahi duzun”, adierazi zuen irabazleen prentsaurrekoa gidatu zuen Berlinaleko ordezkariak. “Bai, noski. Aktore bezala lan egiten jarraitu nahiko nuke”, dio Oterok.

Estibaliz Urresola Solaguren zinemagileak egin du ‘20.000 erle espezie’ filma. Laudion jaiotakoa Ugaorekin harreman estua du Urresolak: gurasoak ugaotarrak dira. Filmak guztira hiru sari jaso ditu: Best Leading Perfomance Silver Bear, hau da, antzezpen onenaren saria; Guild Film Prize eta The Berliner Morgenpost Readers Jury Award. Lehena Berlinaleko epaimahai ofizialak ematen du; bigarrena, Alemaniako hiru zinema aretoetako arduradunek; eta hirugarrena, The Berliner Morgepost egunkariko hamabi irakurlek osatzen duten taldea ematen dute.

Urresolak azaldu du beti izan zutela buruan paper protagonistarako neska bat hautatzea: “Guretzat garrantzistua zen castinga neska bati egitea. Ez genuen inoiz buruan izan mutil batekin aritzea, niretzako askoz errazagoa zelako neska bati honakoa esatea: ‘Imajinatu ezazu gainontzeko jende guztiak uste duela zu ez zarela neska bat’. Sofiarentzat askoz errazagoa zen sentimendu horrekin konektatzea”, adierazi zuen Urresolak prentsaurrekoan: “Zoritxarrez, beti ezagutzen ditugu euren klase sozialagatik edota itxura fisikoagatik erasotuak diren pertsonen kasuak, eta uste dut Sofia ez dela mundutik aparte bizi. Guztiok ulertzen dugu gizakion sufrimendua, eta Sofiak jakin izan du barneko eta kanpoko munduak konektatzen. Horrek lana asko erraztu zuen, Sofia oso neska azkarra delako”.

Preskaketa prozesua “luzea” izan zela onartu du Urresolak: “Hilabeteak egon ginen entsaiatzen. Gogoratzen dut ez niola gidoia zuzenean Sofiari eman nahi, buruz ikasi ez zezan. Istorioaren geruza desberdinak kontatzen nizkion eta berak marraztu egiten zituen. Marrazki horiekin puzzle erraldoi bat sortu genuen koloretako postitekin”, zioen Urresolak. Modu horretan mapa bat sortu zuten: “Mapa horren bidez Sofiak ikusi zezakeen zein zen pertsonaiak egiten zuen bidea. Horrela, egun bakoitzean grabatzen genuela azalduta, Sofia gai zen grabaketa hori mapa horretan kokatzeko”.

Era berean, zuzendariaren arabera oso garrantzitsuak izan ziren gainontzeko aktoreekin egin zuten lana: “Zoragarria izan zen beste aktoreekin egin genuen lana: nebak, ahizpak, amama, ama… Harreman guztiak gurutzatzeari ekin genion, lotura eta hurbiltasun hori sortzeko, familia barruko konfiantzak sortzen duen ‘egia’ azaleratu zedin”, dio Urresolak.

Osorik irakurri

☉ Galdakao

Bideoa / Transfusio eta Giza Ehunen Euskal Zentroko langileek “soldatak parekatzea” eskatu diote Osakidetzari

Langileek kontzentrazioa egin dute gaur Galdakao-Usansoloko Ospitalean, soldatak % 4 igotzea eskatzeko

|

Transfusioen eta Giza Ehunen Euskal Zentroko mobilizazioa // Geuria

Transfusio eta Giza Ehunen Euskal Zentroko langileek kontzentrazioa egin dute gaur (urtarrilak 19) Galdakao-Usansoloko Ospitalean. Langileen soldatak Osakidetzako gainontzeko langileenak baino % 4 baxuagoak direz, parekatzea eskatzeko deitu dituzte mobilizazioak ordezkaritza duten sindikatuek (CCOO, ELA, LAB, SATSE, UGT eta UTESE).

Gaurkoan, ELAko kideak batu dira kontzentraziora, eta sindikatuko ordezkari Koldo Villarrek GEURIAri kontatu dionez, datorren egunetan ere mobilizazioekin jarraituko dute. “Osakidetzak ez du negoziatu nahi, momentuz: Gotzone Sagardui Jaurlaritzako Osasun sailburuarekin hitz egin dugu, baina oraindik ez daukagu berririk”, azaldu digu Vilarrek. “Manifestazioak egiten ari gara, baina hurrengo pausoak datozen egunetan erabakiko ditugu, eta laster zabalduko ditugu erabakiak”.

130 langile

Azkenekoz, abenduaren 17an egin zuten mobilizazioa Galdakao-Usansoloko Ospitalean, eta orduan, lau eguneko greba deitu zuten hilaren 20tik 23ra bitartean. Izan ere, Transfusio eta Giza Ehunen Euskal Zentroak 120-130 langile dauzka, eta Gasteizko Santiago Ospitalean 10 enplegatu inguru dauden arren, gainontzeko guztiek egiten dute lan Usansoloko zentroan.

 

Osorik irakurri

☉ Arrigorriaga

Jesús Ayesta, bakarlaria: “Arrigorriagako jendea identifikatuta sentitzeko ereserki modukoa egin nahi nuen”

Musikariak ‘Arrigorriaga, lagun artean’ izeneko kanta (‘Nada es igual’ bertsioa, gazteleraz) konposatu du. Herritarren laguntzarekin egindako bideoklipa sareetan dago ikusgai

|

 

Jesús Ayesta musikariak Arrigorriagan, lagun artean izeneko kanta konposatu eta kaleratu du abenduaren amaieran. Artista arrigorriagarrak herriari buruz jarduten du bertan, eta bideoan biltzen ditu Arrigorriagako plazan, parkeetan, frontoian eta kaleetan bizi izan dituen oroitzapenak.

“Arrigorriagako jendea identifikatuta sentitzeko ereserki modukoa egin nahi nuen”, azaldu digu Ayestak. Artistak gazteleraz konposatzen ditu amodiozko kantuak (hiru diska dauzka publikatuta), eta oraingoan ere ildo beretik egin du tira kantu hau sortzeko: “Bakarlaria naizenez, beti egoten naiz konposatzen, eta orain, maitasunari buruzko lana egin dut, baina herriari lotutakoa”.

Izan ere, Ayestarentzako esanahi berezia dauka Arrigorriagak. Zeberion jaioa (aita bertakoa baita), bakarlariak bi urte egin zituen herrian, eta Galdakaon bost urtez bizi ondoren, Arrigorriagan, amaren herrian, bota zituen sustraiak. “Nire aitak beti kontatzen digu Zeberioko jendea Arrigorriagako erromeriara etortzen zela, eta horrela ezagutu zutela elkar nire gurasoek”. Beraz, herriarentzako sortu duen kanta istorio horretan dago oinarrituta.

Baina maila pertsonalean “oso polita” iruditzen zaion esperientziaz gain, Ayestak onartu du pasadizoak ondo erakusten duela herriaren izaera, jendea “esku zabalik” hartzen duen lekua baita Arrigorriaga. Eta, horregatik, hain zuzen, izateko modu horri erreferentzia egiteko eta, aldi berean, adiskidetasunaren esentzia hedatzeko lan gisa baliatu du kanta musikariak.

Jesús Ayesta Lonbon eskainitako kontzertuan // Utzitakoa

Lehen ideia

Udaleko Kultur Sailari horrela proposatu zion Arrigorriari buruzko abestia idatzi eta bideoklipa egiteko ideia, “herritarrak lan komun batean batzeko” ekimen bezala. Eta instituzioak babesa eman zion. Ayestak duela bi urte egin zuen bere lehen kontzertua Arrigorriagan (kaleratutako azken diskako abestiak aurkezteko bira), eta aurten, beste behin, Lonbon jotzeko aukera aztertzen zegoela, bat-batean, piztu zitzaion Udalari luzatutako ideia.

Azkenean, abenduaren 28an herrian egindako kontzertuan egin zuen herritarren aurrean aurkezpena, eta badirudi, Arrigorriagarrek ere gogoko izan zutela: “Gauza polita da jendeak maitasun sentimenduarekin bat nola egiten duen ikustea”, kontatu digu Ayestak. Era berean, sareetan ere, Udalak igotako euskarazko bertsioaren eta gaztelerazkoaren (Nada es igual izenekoa) bi bideoklipek arrakasta izan dute, hiru aste eskasean 600dik gora bisita lortu baitituzte.

Hainbat lagun

“Erdarazko kantaren hitzak nik sortu nituen, baina euskarazko letra nire anaiak, Karmelo Aiestak, egin du”, azaldu digu autoreak. Doinuaren konposizioa bakarlariak ehundu du, eta gitarra akustikoa, harmoniak eta pianoa ere berak jo ditu. Dena den, baxuan eta gitarra elektrikoan musikari gehiagoren laguntza izan du: Eduardo Basterrak eta Aitor Ayestak (anaia) hartu dituzte, hurrenez hurren, instrumentuak.

“Etxean, Arrigorriagan, musika estudio txiki bat daukat, eta bertan grabatu genituen soinu guztiak”. Gero, bideoklipa egiteko, herriko kaleetatik mugitu zirela dio musikariak, helburu argiarekin: “Jendeak ezagutzen dituen lekuak erakustea eta horiek iradokitzen dituzten oroimenak eta sentimenduak ekartzea”. Horretarako, herriko betiko lagunen eta taldeen  (Eki Eder abesbatza eta Artizarra musika eskola kasu) laguntza izan du Ayestak, bideoklipean “amaren herrian” bizitako “etxeko giroari” omenaldia egiteko.

600 baino gehiago

Herriaren harrera ona izan denez, etorkizunean, Ayestak ez du alde batera utzi nahi horrelako proiektu gehiago egitea. “Momentuz, webgune pertsonalera eta nire YouTubeko kanalera igoko ditut bideoak” —kontatu digu— “Etorkizunean antzeko aukera bat balego, gustura ekingo nioke”.

Osorik irakurri

☉ Ugao

Fever diskotekan auto batek harrapatutako ugaotarraren ezbeharra “lehenbailehen argitzeko” eskatu du Udalak

Ezbeharra uztailaren 25ean gertatu zen, 08:00ak inguruan, Bolueta auzoko Fever diskotekaren parean. 40 urteko gizon batek gidatutako autoak bapatean azaleratu eta Angela (23 urteko gaztea) zapaldu zuen.

|

Uztailaren 25eko ezbeharra Fever diskotekan // Youtube

Ugaoko Udalak “gertutasun eta laguntza osoa” eskaini nahi izan dio biktimaren familiari, eta zabaldu berri duen komunikatuan gogoratu du udal baliabide guztiak haien eskura jarriko dituztela laguntzeko. Gertatutakoaren inguruan hainbat hipotesi zabaldu badira ere, azken egunotan eraso transfoboa izan litekeela ere zabaldu da. Erantzukizunak argitu bitartean, Udalak beste behin gogoratu herrian lekuz kanpo daudela LGTBIQ+ kolektiboaren kontrako mezuak eta jarrerak, eta horiek “ez onartzeko eta salatzeko” deia egin dute.

Ezbeharra uztailaren 25ean gertatu zen, 08:00ak inguruan, Bolueta auzoko Fever diskotekaren parean. 40 urteko gizon batek gidatutako autoak bapatean azaleratu eta Angela (23 urteko gaztea) zapaldu zuen, pabeloiko ate baten aurka harrapatuz. Ordudanik, neska ospitalean dago, egoera larrian; gizonari, berriz, bide-segurtasunaren aurkako delitua egotzi diote, baina libre utzi dute.

Hainbat hipotesi

Akusatuak positibo eman zuen drogen proban, eta ukatu egin zuen neska nahita harrapatu izana: agintaritzari kontatu zionez, autoaren barruan zegoela, norbait leihora hurbildu zitzaion eta lapurtzen saiatu zen. Horregatik azeleratu behar izan zuen bapatean. Diskotekaren sarreran zeuden hainbat lekukok, ordea, kontrakoa diote: gizonak nahita jo zuela autoa neskaren kontra.

Angelaren nebak ere horrela iritzi zion. Transexuala izateagatik harrapatu zuela uste du berak. Hori edo, bestela, diskotekan Angelak gizonari ezetz esan ziolako eta honek ez zuelako ezezkoa onartu. Lekuko batzuek ere esan dute akusatua dantzalekuan ikusi zutela Angelari besarkada eman nahian, baina neskak uko egin ziola.

Osorik irakurri

☉ Basauri

Argazkiak / ‘Matxismoa da gure pandemia’ lemapean manifestazioa egin dute ehunka herritarrek Basaurin

Arizgoiti plazan hasita, Solobarrian bukatu da mobilizazioa. Amaieran, ‘Zutik emakumeak’ kanta abestu dute bertaratutakoek.

|

‘Matxismoa da gure pandemia’ lemapean manifestazioa egin dute gaur, martxoak 8, ehunka herritarrek Basaurin. Arizgoiti plazan hasita, Solobarrian bukatu da mobilizazioa. Amaieran, ‘Zutik emakumeak’ kanta abestu dute bertaratutakoek.

Osorik irakurri