Ugao sortu zeneko 640. urteurrena dela eta, Erdi Aroko azokaren edizio berria antolatu dute maiatzaren 30ean eta 31n. Hori dela eta, Ugaoko Historia Ezagutzeko Zentroak XII. Marrazki lehiaketa prestatu du, “Erdi Aroko azokak” gaia hizpide hartuz: “Hiribildu honetako umeei irudimenaren bidez orduko azoketara bidaia dezaten proposatzen diegu, azoka hauek funtsezkoak izaten baitziren garai hartako eguneroko bizitzan”, diote antolatzaileek.
Lanak aurkezteko epea hilaren 26ra arte egongo da zabalik, 17:00ak arte Jane Jauregian. Parte hartzaile bakoitzak lan bakarra aurkeztu ahal izango du din-A4 tamainako folio batean eta kartulina batera itsatsita. Lanaren atzeko aldean egilearen izen-abizenak, helbidea, jaiotze-data, telefonoa eta eskola-maila agertu behar dira. Marrazkia egiteko teknika edozein izan daiteke: zera, akuarela, ikatz-ziria… Esaldiak eta hitzak ere ager daitezke.
Lau maila bereiziko dira lehiaketan: haur hezkuntzako ikasleak, lehen hezkuntzako 1. eta 2. mailako ikasleak, 3. eta 4. mailako ikasleak, eta 5. eta 6. mailakoak. Irabazleen nortzuk diren eta lan guztien erakusketa martxoaren 4an izango da Jane Jauregian.
