Sareak

☉ Ugao

[UDIARRAGA JAIAK] Gontzal Mendibil, Vendetta eta mozorro eguna Ugaoko jaietan

|

ugao udiarraga jaiak kartela txikian 2015

Irailaren 6an, igandez, hasiko dira Ugaoko jaiak eta hilaren 14ra arte luzatuko dira. Musika kontzertuez gain, mota guztietako txapelketak, jolasak, kalejirak eta kale-animazioak antolatu dituzte.

UGAOKO JAIAK 2015 – EGITARAUA

IRAILAK 6, IGANDEA

12:15 Kuadrilen jaitsiera

13:00 Pregoia eta txupinazoa

16:00 XXXIII. Txiriindulari lasterketa

16:30 Motorren erakusketa Gernika plazan

18:00 Ugao Mendi Taldearen argazki erakusketa Kultur Etxean

19:00 Coro Gaudeamus eta Sarea Txikia abesbatzak ermitan

19:30 Buruhandiak

20:00 / 22:00 Dantzaldia: Luhartz

IRAILAK 7, ASTELEHENA

17:00 Mus txapelketa Jubilatuen Etxean

IRAILAK 8, ASTEARTEA

11:00 Diana

12:00 Meza Nagusia

13:00 La Ribera Canta, Herriaren enparantzan

18:00 Pirritx eta Porrotx, Gernika enparantzan

19:00 Ku-Klux fanfarrea eta buruhandiak

19:30 Hitzaldia Luis Mari Zalduaren eskutik Jane Jauregiko teilatupean. Gaia: “Saroiak edo kortabasoak, zirkulu zentrokide bat Udiarragan”

21:00 Kontzertua: Gontzal Mendibil

IRAILAK 9, ASTEAZKENA

19:30 Biolin kontzertua: Eder Bengoetxea. Ermitan

IRAILAK 10, OSTEGUNA

19:30 Hitzaldia Mª Jose Sagarduy eta Beatriz Herrerasen eskutik Jane Jauregiko teilatupean. Gaia: “Udiarraga, arkeologia eta historia”

IRAILAK 11, OSTIRALA

13:00 Nagusiei omenaldia

14:30 Jubilatuen bazkaria

18:00 Ugao Mendi Taldearen argazki erakusketa Kultur Etxean

19:00 Guretzat fanfarrea eta buruhandiak

19:30 Kick-boxing, ermitaren zabaldegian. Euria eginez gero, “El Jaro” kiroldegian

20:00 Ugao Futbol Taldearen aurkezpena. Herriko Sarea Abesbatzak Futbol Taldeari konposatu dion ereserkia aurkeztuko da

21:30 Dantzaldia: Trikizio. Herriaren enparantzan

23:00 Kontzertuak: Zain + Vendetta. Gernika enparantzan

IRAILAK 12, LARUNBATA

09:00 Marmitako eta tortila txapelketak

10:00 Aldibereko xake partidak itsu-itsuan

11:00 Diana

11:30 Haurrentzako arrantza ikastaroa

15:30 Plater-tiroketa Dinamitan

16:30 Jolasak

17:00 Emakumezkoen futbol txapelketa triangularra

18:00 Mus txapelketaren finala Jubilatuen etxean

18:00 Ugao Mendi Taldearen mendiko argazkien erakusketa Kultur-etxean

18:30 Dantza-agerraldia Lugoko “Asociación Cultural Peleriños de Sarria” taldearekin eta Etorki Dantza Taldearekin Ermitaren enparantzan. Euria eginez gero “El Jaro” kiroldegian izango da

19:30 Buruhandiak

20:00 Kontzertu koralak ermitan

24:30 Kontzertua: I Love 80’s + DJ

IRAILAK 13, IGANDEA

08:00 Mendi martxa: Untzuetapiko

09:00 I. Arrantza-masterra

09:30 Montain Bike martxa

10:00 Mendi martxa txikia

11:00 Urdai-jana Udiarraga auzoan

11:00 Diana

11:00 Gorbeialdeako ekoizleen nekazaritza azoka

11:00 Haur parkea: puzgarriak, ludoteka, golf-zirkuitua, hondartza, makillaje tailerra eta ile-apainketa fantastikoa

11:00 Gazte parkea Arandia inguruan: surf taulak, hockey-pista, kart-zirkuitua eta kirol jokoak

12:00 Igel txapelketa, Herriaren enparantzan

17:00 Haur parkea

17:00 Gazte parkea

17:30 Herri kirolak, Herriaren enparantzan

18:00 Ugao Mendi Taldearen mendiko argazkien erakusketa Kultur-etxean

18:00 Irristaketa artistikoa, Gernika plazan. Euria eginez gero, “El Jaro” kiroldegian

19:00 Guretzat fanfarrea eta buruhandiak

22:00 Antzerkia: “Aldamiopean”, Gernika plazan

IRAILAK 14, ASTELEHENA

Mozorro eguna: Monsters VS Zombies

11:00 Diana

12:00 Hildakoen omenezko meza

12:30 Kalejira Betijai fanfarrearekin

14:30 Indaba-jana

18:30 Kale-animazioa: Zo-Zongó: “Rock-kalean”

20:00 Galtzontzilo, kulero eta tanga lasterketa

20:30 Pako DJ eta Mitxel animatzailea, Herriaren enparantzan

20:30 Kale-animazioa: Zo-Zongó: “Psiko-klown”

24:00 Bola jiraraziko da

24:15 Azken traka

☉ Ugao

Ugaotarrek lau eguneko “merezitako omenaldia” egingo diote Maite Idirini martxoan

Ekitaldi nagusia, Ugaoko herriak Maite Idirin Solatxiri Agurra, hilaren 17an egingo dute 13:00etan, Herriaren enparantzan

|

Maite Idirin, Esther Idirinekin, Ugaon // Utzitako

Martxoaren 11n, 12an, 13an eta 17an egingo diote omenaldia Maite Idirin Solatxi musikariari. Ekitaldi nagusia, Ugaoko herriak Maite Idirin Solatxiri Agurra, hilaren 17an egingo dute 13:00etan, Herriaren enparantzan. ‘Ahizpatasuna’ hitza erabiltzen aitzindari izan zen musikari ugaotarrari egingo dioten omenaldiaren lehen eguna hilaren 11n izango da.

Egun horretan, ‘Maite Idirin, herrigintzan kantuz’ liburuaren aurkezpena egingo dute Jokin Apalategik, Paulo Iztuetak eta Gidor Bilbaok Jane jauregian, 19:00etan. Hurrengo egunean Goio Ramos ugaotarrak ‘Kantuz bidea eginez’ izeneko hitzaldia eskainiko du Janen ere eta bertan Idirinen kantu ibilbidea eta garai hartako egoeraren inguruko testuingurua azalduko du.

“Ugaok Maite Idirin Solatxiri merezi duen agurra emateko herri ekimena da honako hau eta prestatu dugun egitarauan parte hartzera gonbidatzen ditugu herritar guztiak”

Martxoaren 13an Feminismoa Maiteren Azaletik izeneko hitzaldia eskainiko dute Ugaon jaio berri den Emahots talde Feministako kideek, Jane jauregian, 19:00etan. “Ugaok Maite Idirin Solatxiri merezi duen agurra emateko herri ekimena da honako hau eta prestatu dugun egitarauan parte hartzera gonbidatzen ditugu herritar guztiak”, azaldu dute antolaketa taldetik.

Maite Idirin // Lur Apalategi

 

Gitarrarekin aldarrikatuz

Bere gitarraz lagunduta, 1968. urtean hasi zen herriz herri kantari. Batez ere, protesta kantuekin sartu zen musikaren munduan. Horren harira, 26 urterekin erbestera joan beharrean aurkitu zen. Ondoren, Francoren diktaduraren amaieran, 1973an, Euskal Herrira itzuli eta Iparraldeko euskal kultur mugimenduan integratu zen. Diktadorea hil zenean, Hego Euskal Herrira kantaldiak egitera igaro zen eta bost urtez hainbat kantalditan parte hartu zuen. 2016an “Ugaoko Dama Angelun” izenburua daraman elkarrizketa mamitsua eskaini zion GEURIAri.

Bere ibilbidean zehar hainbat sari lortu eta beste hainbeste omenaldi egin dizkiote. Besteak beste, Euskal Kantu Txapelketako bakarlarien lehen saria Behe-Nafarroako Larzabalen 1969an, Lehen Elepeari Gasteizko Iradier Elkarteak Topet Etxahun saria 1976ean, Ugaoko Udalak 40 urtez abesten jarduna eskertzeko omenaldia, Eusko Ikaskuntza saria 2010ean eta Euskaltzaindiak Ohorezko Euskaltzain izendatzea 2014an.

Horietan berezienetakoa, zalantzarik gabe, 2018an eskaini zioten bere sorterrian, Ugaon: Ondarearen Europako Jardunaldien barruan, euskal emakume konpositoreen eta bereziki Maite Idirinen omenezko kontzertua eskaini zuen Sarea Abesbatzak. Momentu hunkigarriak bizi izan ziren Udiarragako ermitan, Maite Idirinen “Ahizpatazuna” abestia kantatu zutenean batez ere. Jendez lepo bete da ermita.

Orain dela hilabete batzuk, ekaina aldera, Jokin Apalategi bere senarrak ‘Maite Idirin, herrigintzan kantuz’ liburua argitaratu zuen. “Maite gaixorik jarri zenean, neure buruari galdetu nion ea ezingo nuen zerbait egin bere historiari buruz, oraino bizirik dagoela”, azaldu zuen Apalategik. 1970etatik kantuan ibili ondoren, osasun arazoek musikaren mundutik aldendu zuten Idirin, eta ordura arte egindako ibilbide oparoa idatzita bildu nahi izan zuen familiak. Horrela, Paulo Iztueta lagunarekin batera, liburua publikatu zuen Apalategik: “Maite emakume borrokalaria izan da, eta horregatik, liburua emakume borrokalariei eskaini diegu, eurekiko esker onez beterik”.

Osorik irakurri

☉ Ugao

‘Musika Barra-Barra’ zikloak Ugaoko tabernetara eramango ditu Sarearen kontzertuak

Kairos, Boogie Riders, Gailu, Striknina, Ane Lindane eta Mississippi Queen izango ditugu Ugaoko tabernetan

|

Gailu // Utzitakoa

Martxorik abendura arte Musika Barra-Barra zikloa martxan ipini du Sarea Sound System Ugaoko musikari elkarteak Udalaren babesarekin. “Oraingo honetan ez gara zure zain egongo, oraingo honetan zeugana joko dogu, bai, tabernetan” lelopean, lau kontzertu eta bakarrizketa bat Ugaoko tabernetara zabalduko dituzte.

Horien artean eskualdeko Kairos, izango dira eta horiekin batera Boogie Riders, Gailu eta Mississipi Queen bezalako taldeek girotuko dituzte Ugaoko Dorretxea Herriko taberna, Zelai, Felipe taberna, Lainoa eta Jubilatuen etxea. “Musika Barra-Barraren helburu nagusia orain arte Jane jauregian egiten ziren kontzertuak herriko tabernetara zabaltzea izan da, ahalik eta publiko zabalenera heltzeko“, azaldu dute antolaketa taldetik.

Gari, Sarea Sound Systemek antolatutako ‘Udazken Musikatua’ zikloan // Goio Ramos

“Jane jauregian egin ditugun kontzertuak ondo egon baziren ere, hainbat limitazio ekartzen zizkien bertara hurbiltzen ziren lagunei eta esaterako, ezinezkoa zen garagardo bat edatea kontzertua ikusten zuten bitartean”, azaldu dute Sareatik.

“Orain arte Jane jauregian egin ditugun kontzertuak ondo egon baziren ere,  ezinezkoa zen garagardo bat edatea kontzertuak ikusten ziren bitartean”

Hori dela eta, kontzertuak rock ‘n roll giroagaz erlazionatuko dute musika ziklo honen bidez: “Jaia, taberna giroa eta parranda uztartu nahi ditugu, publikoarekin konplizitatea bilatuz eta herritarrak zikloan inplikatuz”, azaldu diote GEURIAri Sareatik.

Estrategia aldaketa honek tabernetan bilatu nahi ditu kontzertuetako target-ak eta Sareak kontzertu sorta interesgarria antolatu du udaberri eta udazkeneko datetan. Lehena martxoaren 1an izango da (bariku honetan): Hego Uribeko Kairos taldeak lehen kontzertua eskainiko du Ugaoko Dorretxea Herriko tabernan, 21:30ean. Sanngre, Fetitxe, BOTH eta Radio Aktiva taldetik etorritako musikariek osatzen dute Basauri, Arrigorriaga eta Ugaoko musikarien banda.

Hego Uribeko Kairos taldea // Utzitakoa

Egitaraua | Musika Barra-Barra 2024

Martxoak 1, barikua
21:30 Kairos, Ugaoko Dorretxea Herriko Taberna

Apirilak 14, domeka
13:00 Boogie Riders, Beti Alai

Maiatzak 3, barikua
20:00 Gailu, Zelai

Urriak 4, barikua
20:00 Striknina, Felipe taberna

Azaroak 1, barikua
20:30 Ane Lindane (bakarrizketa), Lainoa

Abenduak 1, domeka
20:00 Mississippi Queen, Jabilatuen etxea

Osorik irakurri

☉ Ugao

Endika Ibañez: “Etsituta eta harrituta gaude Envases Universalesen erabakiarekin”

Bihar asanblada antolatu dute lantaldeko langileekin eta enpresa batzordeko presidenteak azaldu du “oso gogorra” izango dela

|

Envases Universales enpresako eraikina, Ugaon // Geuria

Envases Universales multinazionalak Ugaoko 50 langile kaleratzeko asmoa iragarri zien atzo enpresa batzordeko kideei, Bilboko egoitzan izandako bileran “irmoan” eta horren aurrerapena eman zuen GEURIAk duela egun batzuk. “Etsituta eta harrituta gaude Envases Universalesen erabakiarekin”, azaldu dio komunikabide honi Endika Ibañez enpresa batzordeko presidenteak. “Egia da joan den urteko abuztuan, multinazionalak Domiberia irentsi zuenetik eskaeren kopuruak behera egin zuela baina kasu puntuala zela uste genuen”.

Kaleratze kolektibo honek Ugaoko lan taldearen % 50aren desagerpena ekarriko luke teorian. Gaur egun 108 pertsonak egiten dute lan Ugaoko lantegian “baina botako ez dituzten artean jubilatu aurrekoak eta nagusiak daude, besteak beste”, azpimarratu du batzordeko presidenteak: “Orotara 90 langilek osatzen dute beraz Ugaoko lantaldea”.

Bihar asanblada antolatu dute lan taldeko langileekin eta Ibañezek azaldu du “oso gogorra” izango dela: “Biharko bileran langileok jarraitu beharreko urratsak azalduko dira eta orduan hilabeteko tartea izango du batzordeak enpresako zuzendaritzarekin negoziazioak egiteko”.

Leon, ilusio bat

Envases Universales enpresak bi lan lerro ditu gaur egun: industria-merkatuarena eta elikagai-merkatuarena. “Elikagai-merkatuaren lerroari dagokionez, multinazionalak planta berri bat zabaldu zuen Leonen, 2017an eta makina ugari zituen lantegi baten aldeko apustua egin zuen eta 25 langile daude bertan”, azaldu du Ibañezek. “Horiez gainera aldi baterako laneko enpresako beste 25 pertsona daude egun hauetan Leongo lantegian eta gure negoziazioak amaitzean Ugaoko lantegi erdia desegin eta bertara joateko eskaintza egingo digute ziurrenik. Ugaoko lantegi erdia ixten badute lantalde erdia soberan dago. Nor demontre joango da orduan Leonera?”.

Endika Ibañez: “Gure negoziazioak amaitzean Ugaoko lantegi erdia desegin eta bertara joateko eskaintza egingo digute ziurrenik”

Eman beharreko hurrengo urratsa bileran esandako guztiak langileei komunikatzea da biharko asanbladan.

Osorik irakurri

☉ Ugao

Envases Universales enpresak 50 langile kaleratu nahi ditu Ugaoko lantegian

Enpresako zuzendaritzak 68 kaleratze proposatu dizkio guztira batzordeari: 50 Ugaoko lantegian eta 18 Montmelon (Katalunia)

|

Envases Universales lantegiko sarrera, Ugaon // Geuria

Ugaon finkatutako Envases Universales enpresak (antzinako Domiberia), Aldi Baterako Enplegu Erregulazio-Espedientea (ABEE) zabaldu die langilei eta gaur bertan espedientearen nondik norakoak azaltzen ari dira enpresak Bilbon duen egoitzan. Berri hau joan den otsailaren 19an iragarri zion Envases Universaleseko zuzendaritzak enpresa batzordeari.

Endika Ibañez enpresa batzordeko presidenteak joan den otsailaren 21ean GEURIAri azaldu moduan Envases Universalesek ABEEa zabaltzeko prozesua abiarazi nahi zuen gaur, otsailak 26, eta hala izan da. Esan bezala, zuzendaritza buruak enpresa batzordeko kideekin bildu dira Bilboko egoitzan espedientearen nondik norakoak zehazteko.

Endika Ibañez: “Enpresak 68 kaleratze proposatu ditu guztira: 50 Ugaoko lantegian eta 18 Montmelon (Katalunia)”

“Enpresak 68 kaleratze proposatu ditu guztira: 50 Ugaoko lantegian eta 18 Montmelon (Katalunia)”, izan dira enpresa batzordeko presidenteak. “Asteazken honetan asanblada egingo dugu”. Kaleratze honek Ugaoko lan taldearen ia erdia izango litzateke: “Espedienteak gradu ezberdinak izan ditzake: txarra, oso txarra… hiru kaleratze, 50, edo planta guztia ixtera hel daiteke, batek daki”, aurreratu zuen Ibañezek joan den otsailaren 21ean.

Gaur egun 108 langilek osatzen dute Envases Universaleseko Ugaoko lantaldea, jubilatu aurrekoak barne. Iazko abuztuan, Envases Universales multinazionalak Domiberia erosi eta izenez aldatu zion.

Osorik irakurri

☉ Ugao

Ugaoko kiroldegiko langileek grebari berrekingo diote asteazken eta ostegunean

Greba egunak otsailaren 28an, 29an eta martxoaren 4an, 5ean eta 9an izango dira eta horrek kiroldegiko zerbitzuak kaltetu ditzakela azaldu dute UTE Ugao Kirolak-etik

|

El Jaro kiroldegia // Geuria

Ugaoko El Jaro kiroldegiko langileek grebari ekingo diote berriro ere lan-hitzarmena berritzea aldarrikatzeko. ELA sindikatutik adierazi lez, 2022an iraungi zitzaien hitzarmena eta iazko urtarriletik hitzarmen berria negoziatu nahian izan dira ELA, LAB, CCOO eta UGT sindikatuak, akordiorik erdietsi gabe: “Patronalak planteatzen duen eskaintza langileen aldarrikapenetatik urrun dago”, diote.

Lan uzteekin hasi zuten langileek euren protesta eta joan den otsailaren 6an lehen greba eguna egin zuten. Hurrengo egunak aste honetan izango dira: “Lokal, zelai eta kirolen hitzarmen berria sinatzeko presio neurri gisa, sindikatuek hurrengo greba egunak proposatu dituzte: otsailaren 28 eta 29an eta martxoaren 4, 5 eta 9an”, azaldu dute UTE Ugao Kirolak-etik. “Egun horietan kiroldegiko zerbitzuak kaltetu daitezke”.

Osorik irakurri