☉ Galdakao
“Etxean erditzen duzunean unea zurea da, eta ez beste inorena”
Anak eta Iagok bi seme-alaba dituzte. Amets ospitalean jaio zen, baina Ur etxean etorri zen mundura. Zer dela eta? Zeintzuk dira etxean erditzearen onurak? Prozesua pausoz pauso azaldu digute
Anak eta Iagok bi seme-alaba dituzte. Amets ospitalean jaio zen, baina Ur etxean etorri zen mundura. Zer dela eta? Zeintzuk dira etxean erditzearen onurak? Prozesua pausoz pauso azaldu digute
Ospitalean izandako esperientzia kaskarraren ondoren, Ur semeari etxeko goxotasunean eman zioten ongietorria Anak (Madril, 1986) eta Iagok (Galdakao, 1984). Esker oneko hitzak baino ez dituzte ‘Etxean Sortu’ taldearentzat, eta euren alabak bere nebaren erditzea ikusi eta disfrutatu izana zoragarritzat jotzen dute. Duela ia urtebete ‘Bizi haziak’ proiektua jarri zuten martxan Galdakaon eta bertan haurdunaldiko eta haurtzaroko bizipenak, zalantzak eta abar familia ezberdinen artean partekatzeko tokia eskaintzen dute.
Zuen alaba ospitalean jaio zen baina semea, ordea, etxean.
Bai. Amets jaio zenean ez bezala, orain informazio gehiago daukagu haurdunal- diaren eta erditzearen gainean, eta inpor- tanteena dena: badakigu ospitale batean erditzea zer den, baita bertan dagoen hu- manizazioa edota horren gabezia ere. Os- pitalean zenbaki bat baino ez zara eta bi- zitako esperientziaren ondoren, Ur etxean jaioko zela erabaki genuen.
Zer gertatu zen ospitalean?
Egokitu zitzaigun lehenbiziko emaginarekin oso ondo moldatu ginen. Bere burua aurkeztu zigun eta gure eskaera eta nahi guztiak errespetatu zituen, hots, ez zigun trabarik jarri eta eroso sentitu ginen. Handik ordubetera txanda aldaketa egon zen eta sartu zenak, ostera, hankaz gora jarri zuen dena: argia piztu zuen, gauzak lekuz aldatu zituen, ez zigun bere izena aipatu ere egin… Ordura arte mimoz eraikitako giroa erabat apurtu zuen, eta horrek abian zegoen erditze naturala geldiarazi zuen eta gure erabakiak hartzeko gaitasuna txikiagotu. Gure eta ginekologoaren arteko tira-bira hasi zen orduan, bere helburu bakarra gure alaba ahalik eta azkarren jaiotzea zelako.
Objektiboki prozesu arrunta izan zen, baina gerora jakin genuen, karenaren erditzean adibidez, ez zutela begirune osoz jokatu. Edoskitzea, bestalde, amesgaizto bihurtu zen ospitalean, profesional bakoitzak bere iritzia ematen dizulako eta batak bestearena jartzen duelako zalantzan. Egun edoskitze aholkularia naiz eta nirekin egindakoa gogora ekartzen dudanean bizarrak zutik jartzen zaizkit oraindik ere.
Amarengandiko edoskitzea Carmen gure doulak (amatasunaren prozesu ezberdinetan amari babesa eta arreta eskaintzen dion emakumea) salbatu zuen, haren aholkuek eta baldintzarik gabeko laguntzak, hain zuzen.
Zeintzuk dira etxean erditzeko erabakia hartu ostean eman beharreko pausoak? Nola prestatzen da?
Erabakia laster hartu beharra dago. Zortzi asteko nengoela ‘Etxean Sortu’ taldearekin jarri ginen harremanetan eta eurek informazio guztia bidali ziguten. Hainbat baldintza bete behar dira, besteak beste, arazorik gabeko haurdunaldia izatea, fetua buruz-behera kokatuta egotea eta gertuen dagoen ospitalera, gehienez, 30 minututan heltzea. 20. astetik aurrera hasten dira zeintzuk artatuko dituzten eta zeintzuk ez baloratzen, eskaera guztiak jaso eta bakoitzaren ezaugarriak ondo aztertu behar dituztelako.
Behin baiezkoa ematen dizutenean, 20. eta 37. asteen artean badago eurekin bilera bat izateko parada, batez ere, erditzea gertatuko den etxea ezagutu dezaten eta egon daitezkeen zalantzak argitu ditzaten. 37. astean nahitaezkoa da hitzordua eta etxean beharrezkoa izango duten guztia uzten dute. Ez bakarrik erditzearen unean erabiliko dituzten gauzak, baita euren gauza pertsonalak ere, jantzi-erantziak eta hortzetako eskuila, esaterako. Unea fetuak erabakitzen du eta dena prest izan behar dute. ‘Etxean Sortu’ taldea Sonia, Esti eta David emaginek osatzen dute eta erditze bakoitza horietako bik artatzen dute.
Zenbat pertsona bildu ziren zuen etxean?
Gure kasuan sei pertsona egon ginen. Ni, ‘Etxean Sortu’ko Esti eta Sonia, Iago, Amets eta doula bat. Doula baten presentzia garrantzitsutzat jo genuen, batik bat, gure alabagatik. Helburua inor bakarrik ez geratzea zen, hau da, Iagok nire beharrak eta nahiak asetzen zituen bitartean Ametsen aldamenean gertuko laguna eta mundu honekin zerikusia zuen pertsona bat egotea. Horregatik, doula izateko bidean zegoen laguna gonbidatu genuen.
Hasieratik izan zenuten argi?
Aurreneko hartu-emanaren ondoren, are gehiago. Nik oso argi neukan, baina Iagorentzat inportantea zen eurekin mintzatzea eta euren eginkizuna ondo ezagutzea. 20. astean bilera bat izan genuen eta erabat konbentzituta atera ginen. Argi eta garbi, etxean erditzea zen gure buruetan zegoen aukera bakarra.
Zeintzuk dira abantailak eta onurak?
Makina bat: zure habian zaude, artatuko zaituzten pertsonak aurretik ezagutzen dituzu, izenak badakizkizu, aurpegia jartzen diezu eta zugan duten konfiantza erabatekoa denez, lasaitasun osoz egiten diozu aurre erditzeari. Etxera sartu zirenean Ur ate joka zegoen, eta ez zuten ukimen baginalik egiteko beharrik izan prozesuaren nondik norakoak baloratzeko. Nire ahotsarekin eta soinuekin nahikoa izan zuten zenbateraino aurreratuta zegoen jakiteko. Hori liluragarria izan zen.
Ez al dira, azken momentuan, beldurrak eta kezkak azaleratzen?
Gure alaba esnatzear zegoen eta hura izan zen unerik kritikoena, dilatazio prozesua martxan zegoelako eta Amets bere amaren besoetan nagiak ateratzera ohituta dagoelako, baina doula atetik sartu zenean egonezin denak desagertu ziren. Ama eta alabaren arteko elkarrizketa labur bat egon zen, eskolara joateko ala etxean geratzeko aukera eman genion eta bigarrena aukeratu zuen. Gure txikitxoak lasai eta formal egon behar zuela ulertu zuen.
Konta iezaguzue aitaren eta arrebaren eginkizuna zein izan zen.
Nire ustez ingurua zaintzea eta emakumea eroso sentiaraztea da aita batek halako egoera batean izan beharko lukeen papera, baina nire kasuan Ametsekin batera Urren jaiotzaz disfrutatzea izan zen. Ikusle gisa bizi izan genuen eta ikaragarria izan zen. Oso gertutik ikusi genuen dena eta esperientzia ederra eta ahaztezina izan zen biontzat. Guztia guk ezarritako erritmora egin zen eta momentu magiko hura gurea zela, eta ez beste inorena, sentitu genuen.
Ana: Ur jaio eta hurrengo egunean Ametsen bila joan zinen eskolara.
Bai, ohi baino nekatuago nengoen baina ez nuen punturik behar izan eta hori gakoetako bat izan zen. Ur jaio eta astebetera dena bera lekuan omen zegoen. Etxean futbol talde bat erdituko nuke (barreak), ospitalean, oraingoz, gehiagorik ez.
Zer da azkenaldian askoren ahotan dagoen hazkuntza naturalaren kontzeptua?
Modan dagoen terminoa da, baina ez dator bat guk daukagun ikuspuntu eta filosofiarekin. Hazkuntza naturala animalien munduan gertatzen dela uste dugu, baina ez gizakienean. Hankamotz geratzen den kontzeptua da, naturak ez baititu berak bakarrik gure seme-alabak haziko. Hazkuntza prozesu horretan jarreraren bat agertu beharra dago, eta gu errespetuzko hazkuntzaren alde gaude. Baina ez bakarrik gure seme-alabekiko, baita hazkuntzaren parte diren pertsona guztiekiko ere. Gurasoak alboan behar ditu haurrak bere gaitasunak garatzeko bidean, eta errespetuan datza prozesu horren arrakasta.
Nola sortu zen ‘Bizi Haziak’ proiektua?
Heziketaren mundutik gatoz, baina gure bizitzak 180 graduko buelta eman zuen ikasitakoa praktikan jartzen hasi ginenean. Ametsekin batera hazi zen Bizi Haziak proiektua. Gure alabarekin ahalik eta denbora gehien egotea zen gure xedeetako bat eta lana bigarren maila batean uzten genuen bitartean egoera horri konponbidea aurkitzeko aukera posibleak aztertzen hasi ginen. Galdakaon ez zegoen Bizi Haziak-ek eskaintzen duenaren antzekorik eta ideiarekin aurrera jarraitu genuen. Guretzat ezinbestekoa den kontziliazio familiarra gauzatzeko abagunea ematen digu eta baita gure bizimodua, filosofia eta ikuspuntuak gurera etorri nahi duten familiekin partekatzeko ere.
Bizi Haziak denda. Haurtzarora arte laguntza integrala eskaintzen dute produktuetan eta baita formakuntzan eta tailerretan ere // Bizi Haziak
Zer eskaintzen du ‘Bizi Haziak’ek?
Haurdun zaudela jakiten duzun momentutik eta lehen haurtzarora arte laguntza integrala eskaintzen dugu produktuetan eta baita formakuntzan eta tailerretan ere. Haurdunaldiko eta haurtzaroko bizipenak, zalantzak, pozak, beldurrak, konponbideak eta abar familia ezberdinen artean partekatzeko tokia eskaintzen dugu eta heltzen zaizkigun iradokizun eta proposamenak atsegin handiz jasotzen ditugu. Edoskitzearen eta ume-eramatearen inguruan sor daitezkeen arazoak eta zalantzak ere pozarren argitzen ditugu. Ateak zabalik daude! Bestalde, Galdakaoko leku fisikotik at, genero tailerrak ematen ditugu.
☉ Galdakao
Galdakaorako bizikleta-pista eraikitzeko hitzarmena sinatuko dute Udalak eta Aldundiak
Bengoetxe-Erletxeta bidegorria eraikitzeko proiektua eta Bengoetxe-Urbi zatiaren plangintza idaztea jasotzen ditu hitzarmenak
Galdakaorako bizikleta-pista eraikitzeko hitzarmena sinatuko dute Udalak eta Aldundiak. Akordioa gaur goizean egindako Gobernu Kontseiluan berretsi da.
Hain zuzen ere, Bengoetxe-Erletxeta bidegorria trazatu eta eraikitzeko proiektuak eta Bengoetxe-Urbi bidegorriaren plangintza idaztea jasoko ditu hitzarmenak.
“Etorkizuneko Ibaizabalgo bizikleta-pista titulartasun desberdinetako bideguneetatik garatuko da; hau da, foru eta toki mailako ibilbideak tartekatuko dira”, adierazi dute foru arduradunek.
Aldundia arduratuko da jarduketak egiteaz eta Galdakaoko Udalak dagokion zatia ordainduko du, hau da, 185.130 euro. Zehazki, Guturribaitik Bekeara arteko zatia ordainduko du Udalak, Urgoiti-El Gallo eta Bengoetxe-Urbi inguruetara.
Epeei dagokienez, Bengoetxe-Erletxeta bidegorriaren plangintza idatzita dago dagoeneko, eta bidegorriaren trazadura- eta eraikuntza-proiektuak 2026ko maiatzerako idaztea aurreikusten da.
Bengoetxe-Urbi tartearen plangintzari dagokionez, datorren urteko ekainerako prest egongo dela aurreikusi dute foru ordezkariek.
☉ Galdakao
Ane Legarreta galdakoztarrak +Musicas saria irabazi du grabaketa klasikorik onenari ESAS sarearekin
‘Dance of chance’ lanarekin irabazi dute saria. Sari banaketa urriaren 6an izan zen Madrilen. Legarretarekin berba egin dugu GEURIAn
ESAS Emakume Sortzaile eta Artisten Sareak +Musicas saria irabazi du grabaketa klasikorik onenari, ‘Dance of chance’ lanarekin. Musikan emakumeen talentua sustatzen dute +Musicas sariek.
Sari banaketa urriaren 6an izan zen Madrilen, Sofia Erregina Museoan, eta bertan izan zen Ane Legarreta musika zuzendari galdakoztarra eta ESAS sarearen parte ere diren Natalia Sanchez flautista eta Haizea Huegun konpositorea.
“Oso pozik gaude saria jaso izanaz. Hitzaldian adierazi genuen ESAS sarean elkarlanean sinesten dugula eta disziplina artistiko desberdinak eta musika estilo desberdinak elkarlanean jartzea dela gure helburuetariko bat, emakume artistak bateratze horrek urrunago eramango gaituelako”, esan dio GEURIAri Legarretak.
Legarreta, Sanchez eta Huegun, hirurak, igo ziren eskerrak ematera eszenatokira, baina galdakoztarrak hartu zuen hitza jendaurrean: “Saritua izan den grabaketak musika klasikoa eta musika elektronikoa uztartzen ditu, elkarrekin egindako lanean sendo sinesten dugulako, ez bakarrik musika diziplina ezberdinen artean, baita arte diziplina ezberdinen artean ere”, esan zuen Legarretak.
“ESAS 2021ean sortu genuen, musika klasikoaren esparruan noizean behin bakarrik sentitu garelako bai eszenatokian bai eszenatokiaren atzean”, gaineratu zuen galdakoztarrak.
Grabaketa klasikorik onenaren saria irabazteko beste hautagaiak ziren Laura Andres pianista eta Maria Parra Trio hirukotea. Eta saria Isabel Dobarro piano-jotzaileak eta Juan Antonio Simarro konpositoreak eman zieten.
MasMusicas entitate independente bat da 2018tik musika estilo desberdinetako emakume artistak saritzen dituena. “Guretzat sorpresa izan zen musika klasikoa kategoria ere egotea sarietan, normalean industria musikaleko beste sektore bat delako. Orduan Bad Gyal edo Mala Rodriguez bezalako artistak egon ziren gala berdinean egotea eta parte hartzea oso hunkigarria izan zen!”, esan digu Legarretak.
“Zuzeneko musika egon zen, Rita Payes ere saritu zuten eta berarekin egoteko tartetxoa ere izan genuen”, kontatu dio Legarretak GEURIAri.
☉ Galdakao
Dinamita fabrikarekin lotutako eraikinak eta Andra Mari eliza barrutik ezagutzeko bisita gidatuak antolatu dituzte Galdakaon
Ondarearen Europako Jardunaldien baitan Galdakaoko bi espazio berezi horiek bisitatzeko aukera izango dute herritarrek urriko larunbat eta igandetan
Bizkaiko ondare arkitektonikoa ezagutzeko Europako Jardunaldiak antolatu ditu Bizkaiko Foru Aldundiak urrian zehar. Galdakaon, Dinamita fabrikarekin lotutako eraikin multzoa eta Andra Mari eliza barrutik ezagutzeko aukera izango dute herritarrek.
Jesus Muñiz historialari galdakoztarrak adierazi duenez, “Andra Mari eliza bitxi arkitektoniko bat da, XIII. eta XVI. mendeko estiloak batzen dituena, Euskal Herrian oso ohikoa ez dena”
Bestetik, Dinamita fabrikarekin lotutako etxebizitza eta ekipamendu multzoa nabarmendu du Muñizek, “ezohikoa delako eraikin gehienak mantendu izana; hori ez da sarritan gertatzen”. Kasu honetan, publikoarentzat normalean itxita egoten diren instalazioak bisitatu ahal izango dituzte herritarrek, hala nola, fabrikako sarrera edo bulegoak.
Edurne Espilla Kultura arloko zinegotziaren arabera, jardunaldien helburua da “eguneroko bizitzaren parte diren, baina sarritan beren historia ezagutzen ez dugun espazio horiek fokuan jartzea”. Horregatik, “ondarea ezagutu, babestu eta transmititzearen garrantzia” azpimarratu du Espillak, “iraganaren memoria gordetzeko ez ezik, gure ingurunearekiko lotura sendotzeko tresna gisa ere bai”.
“Zuhatzun, Arkotxan, Plazakoetxen eta Tximelarren fabrikako langileentzat eraiki ziren etxebizitzak, eskola, ekonomatoa, kapera eta eraikin desberdinak: jende asko aitite eta amamak bisitatzera joaten da Viktor Anaia kaleko erresidentzietara, baina eraikin horien atzean dagoen historia jakin gabe”, esan du Espillak.
Bisita gidatuetan parte hartu nahi duenak izena eman behar du 944 010 598 telefono zenbakian, astelehenetik ostiralera, 09:00etatik 14:00etara, edo mgarrido@galdakao.eus helbidera idatzita.
Egitaraua | Ondarearen Europako Jardunaldiak 2025
Urriak 4, larunbata
12:00-13:00 Andra Marira bisita gidatua. Euskaraz
Urriak 12, igandea
17:30-18:30 Andra Marira bisita gidatua. Euskaraz
Urriak 16, osteguna
18:30-20:00 Dinamitara bisita gidatua. Euskaraz
Urriak 18, larunbata
12:00-13:00 Andra Marira bisita gidatua. Euskaraz
Urriak 26, igandea
17:30etik 18:30era Andra Marira bisita gidatua. Euskaraz
☉ Galdakao
Galdakaoko EAJk uste du “larria eta kezkagarria” dela EH Bilduk segurtasun indarrei buruzko mozioa atzera bota izana
Iraileko osoko bilkuran Galdakaoko EAJk “elkarbizitzaren alde eta Ertzaintza eta Udaltzaingoen defentsan” mozioa aurkeztu zuen, baina udalbatzak atzera bota zuen
Ikasturte berriko lehen osoko bilkuran Galdakaoko EAJk mozioa aurkeztu zuen, “elkarbizitzaren alde eta Ertzaintza eta Udaltzaingoen defentsan”.
Udalbatzak atzera bota zuen mozioa, EAJren eta PSEren aldeko zortzi botoekin, EH Bilduren kontrako bederatzi botoekin eta UHren eta Auzoaken lau abstentzioekin.
Horren aurrean, Galdakaoko EAJk uste du “oso larria eta kezkagarria” dela EH Bilduk mozioaren aurka bozkatu izana: “Mozio honek erasoak gaitzestea, euskal polizien lana aitortzea eta bizikidetza demokratikoa berrestea baino ez zuen planteatzen”, adierazi dute jeltzaleek prentsa-ohar bidez.
“EAJ Galdakaok salatu nahi du EH Bildu berriro ere erretratatu egin dela, indar demokratiko guztien ahobatezko babesa jaso behar zuen adierazpen baten aurka agertuz. UH eta Auzoak taldeen abstentzioen konplizitatearekin, EH Bilduk bertan behera utzi du segurtasuna, errespetua eta bizikidetza bezalako oinarrizko balioak defendatzen zituen ekimena”, salatu dute jeltzaleek.
EH Bilduren arabera, “uda hasieran izan ziren gertakari batzuei etekin politikoa atera nahian aurkeztu du mozioa hainbat herritan EAJk, Galdakaon ez baita halako gertakaririk izan, ez udan zehar ezta Santa Kurtz jaietan ere”, adierazi zuten ezker koaliziotik osoko bilkura izan aurretik.
Eta Galdakaoko EH Bildutik adierazi zuten, “uda honetan gertatutako gertaera guztiak adierazpen askatasunaren eta espazio publikoaren errespetuaren muga onargarriak gainditu” dituztela: “Ez gatoz bat jarduteko modu horiekin, eta uste dugu modu egokian baztertu behar direla, bai axolagabekeria eta bai gehiegizko jardun interesatua saihestuz”, esan zuten.
Era berean, gertakari horien “instrumentalizazio politikoa” gaitzetsi zuen Galdakaoko EH Bilduk: “Logika bat inposatu nahi da, non indar polizialekiko edo horiek zuzentzen dituztenekiko ezinegon edo zalantza adierazpen oro eraso onartezintzat interpretatzen den automatikoki, eta hori printzipio demokratikoen aurkakoa da”.
“Polizia-kidegoen jarduera kritikatzea, haien funtzionamendu-eredua zalantzan jartzea edo abusu-gertakariak salatzea ez da bizikidetzaren aurkako erasoa. Bizikidetzaren aurka egiten duena kritikarako aukera ezabatzea da, erakundeak kritikaren aurrean blindatzea eta erakundeen gaitzespenaren balioa hutsaltzea”, adierazi zuten Galdakaoko EH Bildutik.
Halaber, polizia-eredua “sakon berrikusteko” hausnarketa eta herri prozesua abiatzeko eskatuko dio Galdakaoko EH Bilduk Eusko Jaurlaritzari, “gardentasuna, kontrol demokratikoa, proportzionaltasuna eta zerbitzu publikoa bermatzeko”.
Eta, erakundeekiko errespetuaren edo adierazpen-askatasunaren bidezko erabileraren mugak gainditzen dituen jarduera oro gaitzesten dituztela; izaera horretako gertaera puntualak “kritika politiko eta sozial legitimoa eta herritarren protesta kriminalizatzeko” erabiltzea erabat baztertzen dutela; eta, kritikarako eskubidea, “baita polizia-indarrekiko ere” berresten dutela adierazi zuten irailaren 25eko osoko bilkuran.
☉ Galdakao
Galdabusak neguko ordutegia martxan jarri du maiatzera bitartean
Aldaketa batez ere asteburuei begira izango da: zerbitzua larunbat eguerdian amaituko da eta igandetan eta jaiegunetan ez da zerbitzurik egongo
Urriaren sarrerarekin batera, Galdabusak neguko ordutegia jarri du martxan, maiatzaren 31ra bitartean. Egokitzapenak batez ere asteburuetan izango du eragina. Izan ere, aldaketen artean, zerbitzua herriko denda txikiak zabalik dauden ordutegira egokituko dute eta larunbat eguerdian amaituko da; udako ordutegian larunbat arratsaldeetan eta igandetan ere martxan izan da Galdabusa.
Lehenengo lineari dagokionez, Aperribaitik 14:20an abiatuko da azken zerbitzua larunbatetan, eta 14:40an udaletxetik. Eta, bigarren linean, 14:00etan abiatuko da larunbatetako azken autobusa udaletxetik eta 14:20an Elexaldetik.
Larunbat goizetan, aldiz, lehenago hasiko da zerbitzua eta bidaia bat gehiago egingo du autobusak: Zuhatzutik lehen autobusa 08:40an abiatuko da larunbatetan, eta Elexaldetik 09:00etan.
Igandetan eta jaiegunetan ez da zerbitzurik egongo, salbuespenak salbuespen. “Azaroaren 1ean, adibidez, Elexalderako zerbitzua egongo da, hilerrirako joan-etorriak erraztu eta autoaren erabilera gutxitzeko helburuz”, diote udal ordezkariek.
Astean zehar zerbitzuak izango duen aldaketa bakarra honakoa izango da: 08:10ean Zuhatzutik Elexaldera abiatzen den autobusa ez da Bekea eta Olabarritik pasako: “Goizeko ordu horietan trafiko handia izaten da N-634 errepidean eta asko zailtzen du ibilbidea garaiz egitea. Edozein kasutan, aurreko zerbitzua eta ondorengoa (eta gainontzeko guztiak) izango dituzte Bekea eta Olabarriko auzokideek”, diote.
Javi Conde klubeko hiru atletak Australiako Munduko Virtus Atletismo Txapelketan parte hartuko dute
Galdakaorako bizikleta-pista eraikitzeko hitzarmena sinatuko dute Udalak eta Aldundiak
Ollargan, Santa Isabel eta Olatxu auzoak omendu dituen horma irudia egin du Aztarnak-ek Arrigorriagan
Argazkiak | Galdeketa Usansolon: zein tren-konexio nahi duten bozkatzen ari dira herritarrak
Argazkiak | Kuadrillen arteko XIX. Olinpiadak San Migeleko jaietan: tranpak, algarak eta… larrugorritan!
Argazkiak | Playback lehiaketak giro aparta sortu du San Migeleko jaietan
Bideoa | Uxue Oleagordia: «Herriko erromeriak aukera aparta dira ikasitakoa praktikan jartzeko»
Usansolo erdigunerako geltoki propioa aldarrikatu dute galdeketan parte hartu duten herritarren % 94,7ak
