☉ Ugao
Pruden Peña: “Ugaoko jaietan ez da inor kanpokoa sentitzen”
Pruden Peña (Valdeande -Burgos- 1943) izango da aurtengo jaietako pregoilaria, Ugaoko herritarrek eta Jai Batzordeak hala erabakita.
Pruden Peña (Valdeande -Burgos- 1943) izango da aurtengo jaietako pregoilaria, Ugaoko herritarrek eta Jai Batzordeak hala erabakita.
Herrian aski ezaguna da Pruden. 12 urterekin iritsi zen Euskal Herrira eta ordutik mila saltsatan egon da sartuta. 35 urte daramatza Ugaon, Zaratamon eta Zeberion txirrindularitza lasterketetan speaker bezala, podiumean sariak banatzen. Herriko Odol Emaileen Elkarteko kidea da ere eta 2010etik “Ecos de Ugao” aldizkariaren zuzendaria da. Ilusio handiz jaso du jaietako pregoilaria izateko ardura.
Pruden Peña, aurtengo jaietako pregoilaria zara. Espero al zenuen?
Jendeak komentatzen zuen aurreko urteetan ere hautagai egokia nintzatekeela jaietako pregoilaria edo bora biralaria izateko, baina horretan geratzen zen beti, iradokizunetan. Sorpresa handia izan da, beraz, eta ilusio handiarekin hartu dut albistea. Ohorea da niretzat eta nire esku dagoen guztia egingo dut Ugaoko herritarrek urteko monotoniarekin apurtu dezaten, ahal de heinean behintzat.
Bozka bitartez aukeratu zaituzte.
Bai, eta horrek gehiago poztu nau oraindik. Hala ere, argi dut ni bezala pertsona asko izan zitezkeela pregoilariak Ugaon. Herri honetan jende piloa dago urte osoan zehar buru belarri ari dena ekintza kulturalak eta solidarioak antolatzen. Aurten nire txanda izango da baina guztiok berdin merezi dugu .
Urduri al zaude?
Ohituta nago jende aurrean hitz egitera, urteak eman ditut bizikleta lasterketetan speaker bezala. Aurten agur esango diot lan horri, baina oraindik ez dut ohitura galdu. Gainera, pregoilaria izan naiz nire jaioterriko jaietan ere, Valdeanden. Oraingo pregoia, baina, oso berezia eta hunkigarria izango da niretzat. Aspalditik lagun izan ditudanei eta aurrerantzean ere ondoan izango ditudanei eskainitako pregoia izango da. Esker hitzak baino ez ditut Ugaoko herriarentzat.
Pruden Peña, Espainiako txirrindulari txapelketan, speaker bezala // Pruden Peña
Zer esango duzun pentsatu duzu?
Oraindik ez dut ezer idatzi, baina badakit nondik nora joango den, gutxi gora behera. Izan ere, pregoiaren esanahia asko aldatu da niretzat. Burgoseko herrixka batean jaio nintzen ni, eta han oraingoarekin zerikusi gutxi duten bi pregoi mota ezagutu nituen. Lehena, aguazilaren pregoia zen. Gobernadore zibilak ematen zituen aginduak herriari helarazten zizkion aguazilak: jaiegunetan ezin zuela inork lanik egin edota zergak ordaintzeko garaia zela. Nire osaba aritzen zen horretan, eta noizean behin nik laguntzen nion pregoia irakurtzen. Bigarrena, umeen pregoia zen: saltzaileak eskolara etorri eta irakasleari baimena eskatzen zioten ume bat hartu eta saldu behar zituen produktuak ozen oihukatzeko. Erreal baten truke egiten genuen hori, baina gu pozik. Geroago jaietako pregoia etorri zen. Pregoilariak berria den zerbait ekarri behar du herrira, eta horretan arituko naiz ni ere, datorren irailaren 7an Ugaora poztazuna ekarriz, . Aipatu ditudan bi pregoilariak ekarriko ditut gogora, baina batez ere umeena. Kasu honetan, ordea, ezer saldu gabe: poztasuna, laguntasuna eta dibertsioa oparituko ditut.
Hala izatea espero dugu, sexu erasorik gabeko jaiak, alegia.
Tamalez, halako erasoak edozein tokitan gertatzen dira, ez jaietan bakarrik. Ugaon ere tentuz ibili behar gara. Sexu erasoak ez dira inoiz ongietorriak izango Ugaon ezta beste inon ere. Nik uste ahalegin handiagoa egin beharko litzatekeela ikastoletan, institutuetan eta gainontzeko hezkuntza zentroetan gaitz honekin bukatu nahi baldin badugu. Erasotzaileak ez dira egun batetik bestera agertzen, formakuntza garaian sortzen doazen jarrerak dira erasotzailearenak.
Nola deskribatuko zenituzke Ugaoko jaiak?
Ugaoko jaiak oso herrikoiak dira, inor ez da kanpokoa sentitzen. Kaleak beteta egoten dira beti, izan ere, ugaotarroi asko gustatzen zaigu orduak kalean pasatzea jendearekin poteoan eta hizketan. Herriko jaiak aukera paregabea dira aspalditik ikusi gabe dituzun horiekin elkartzeko, baita lagun berriak egiteko ere.
Asko aldatu dira jaiak bertan bizi zarenetik?
Aurrekontu aldetik batez ere. 60. Eta 70. hamarkadetan ez zegoen diru askorik eta ahal genuena egiten genuen, irudimenari tira eta tira. Ikuskizunak kontratatu beharrean herri lehiaketak antolatzen genituen, ia sosik gastatu gabe. Gogoan dut 70. hamarkadan, Jai Batzordeko kidea nitzela, 200.000 pesetako aurrekontua izan genuela aste bateko jaiak antolatzeko, 1.200 euro inguru. Bada, aurrera atera genituen jaiak, eta zer nolako jaiak! Gogoan dut garai hartako Pelle eta bere banda, “kartoizko banda” izenez ere ezagutzen zena. Kartoizko instrumentuekin izugarrizko parrandak sortzen zituzten herriko plazan. Asko aldatu dira jaiak bai, baina kalean giro onak iraun du beti.
Zein da jaietarako proposatzen duzun planik onena?
Marmitako lehiaketa eta indaba eguna ezin dira inondik inora ere galdu. Ni ez naiz sukaldaria eta ez dut marmitako lehiaketan parte hartzen, baina sozietatearekin bazkaltzera joaten naiz beti. Aukera ederra da elkarteko kide guztiak batu ahal izateko eta irabazi edo ez, giro ederra egoten da kuadrilla guztien artean. Bestetik, indaba eguna egunik bereziena da niretzat. Izugarri gogoko dut mozorro festa, eta bazkalostea izugarria izaten da beti. Gainera, asko gustatzen zait argazkiak ateratzea eta jaietan egunero ateratzen naiz argazki kamerarekin. Bostehun argazkitik gora ateratzen eta horietako asko Ecos de Ugao aldizkarian erabiltzen ditut gero. Gazteagoa nintzenean dantzan ibiltzen nintzen ere eta orain, nahi bai, baina ezin. Hala ere jendea dantzan ikusteak asko pozten nau.
☉ Ugao
Ugaoko kultur ondarea ezagutzeko otsailaren 11n ibilbide gidatua egingo dute
Jarduera parte-hartzailea izango da eta helburua herriaren memoria eta nortasuna gertutik ezagutzea izango da
Ugaoko Udalak, AEKrekin elkarlanean eta Bizkaiko Foru Aldundiaren babesarekin, hiribilduaren kultur ondarea ezagutzeko ibilbide gidatua antolatu du beste urte batez ‘Praktikatu eta bizi’ programaren barruan. “Herriko kultur ondarea ezagutzeko aukera izango dugu aditu baten eskutik”, iragarri dute.
“Ibilbide gidatuan, Ugaoko hainbat leku esanguratsu bisitatuko ditugu, haien historia, erabilera eta garrantzia ezagutzeko”. Jarduera parte-hartzailea izango da eta helburua herriaren memoria eta nortasuna gertutik ezagutzea izango dela azaldu dute antolaketa taldetik.
☉ Ugao
Ugaoko kiroldegiak igerilekua, spa eta erlaxazio gunea berritu ditu
“Kiroldegi honek ez du soilik kirol-jarduera sustatzen; ongizaterako, osasunerako eta komunitate-kohesiorako gune ere bihurtu da”, azaldu du Foru diputatuak
Ugaoko El Jaro kiroldegiak Leixuri Arrizabalaga Euskara, Kultura eta Kirol foru diputatuaren bisita izan du gaur goizean, Udalak amaitu berri dituen igerilekuko lanak direla eta. Bisita berezira hedabideak gonbidatu dituzte, azken hilabetetako lanak ezagutzeko, espazio berriak joan den urtarrilaren 19tik herritarrentzat zabalik egon arren.
Azken hilabeteetan GEURIAn iragarri lez, Ugaoko kiroldegiak hobekuntzak egin ditu El Jaro kiroldegian, 1997tik egin diren esku-hartzerik garrantzitsuena. Izan ere 1.226.826 euroko inbertsioa egin dute, eta horietako 500.000 Foru Aldundiak finantziatutakoak dira.
Berrikuntza aipagarrienak sortu dituzten bi igerileku-baso berriak dira. Lehenengoa, 1,20 metroko sakonerakoa, jarduera espezifikoetarako izango da, hala nola haur, heldu eta nagusientzako ikastaroak eta zuzendutako jarduera berriak, aquagym kasu.
Bestea, sakonera berekoa, entretenimendurako erabiliko dela iragarri du Udalak, spa eta erlaxazio gune batekin: “Espazio hori erabilera anitzeko areto zaharra igerileku nagusiaren esparruarekin (klimatizatua) lotuz egokitu da. Azken honek bere sei kaleak eta ohiko erabilera mantentzen ditu, bai igeriketa librerako bai irakaskuntzarako”, zehaztu dute udal ordezkariek.
Bisitako momentu bat, igerilekuetan // Geuria
Ondorioz, sauna eta bainu turkiarra lekualdatu dute eta berritutako eremuaren zati handi bat irisgarritasun eta segurtasun-irizpideak kontuan hartuta diseinatu da, bereziki dibertsitate funtzionala edo mugikortasun murriztua duten pertsonak aintzat hartuz. Horrela, kiroldegia hezkuntzara eta osasuna zaintzera bideratutako gune gisa sendotu da.
Lexuri Arrizabalaga, Foru diputatua: “Kiroldegi honek ez du soilik kirol-jarduera sustatzen; ongizaterako, osasunerako eta komunitate-kohesiorako gune ere bihurtu da”
“Erakundeen arteko lankidetzari esker, herritarren bizi-kalitaterako funtsezkoak diren instalazioak nabarmen hobetu ahal izan dira”, azaldu du Arrizabalagak. “Kiroldegi honek ez du soilik kirol-jarduera sustatzen; ongizaterako, osasunerako eta komunitate-kohesiorako gune ere bihurtu da”.
Ekaitz Mentxaka Ugaoko alkateak nabarmendu du jarduketa hau herritarrek aspalditik eskatutakoa dela eta esku-hartze honi esker kiroldegiak eraldaketa handia izan duela: “Erabiltzaileek adierazitako beharrei erantzun diegu, eta ziur gaude datozen urteetako erronkei aurre egiteko prest dauden instalazio moderno eta moldakorrez gozatuko dutela”.
☉ Ugao
Adimen emozionala lantzeko ikastaroa antolatu dute Ugaon, otsailean
Helburua parte-hartzaileek euren emozioak hobeto ezagutu eta kudeatzeko tresnak eskuratzea da, ongizate pertsonala eta harreman osasuntsuak sustatzeko
Otsailaren 12an hasita, Adimen emozionala lantzeko 20 orduko ikastaroa antolatu dute Ugaoko Gaztelekuan 18:30etik 20:30era.
Ikastaroa hamabostean behin egingo dute: “Helburua da parte-hartzaileek euren emozioak hobeto ezagutu eta kudeatzeko tresnak eskuratzea, ongizate pertsonala eta harreman osasuntsuak sustatzeko”, azaldu dute udal ordezkariek.
Izena emateko epea otsailaren 5era bitartean zabaldu dute. Interesdunek Jane jauregian eman beharko dute inprimakia. Tramitea online egiteko aukera dago ere inprimaki hau betez.
☉ Ugao
Ugaoko inauterietako mozorro lehiaketan parte hartzeko epea zabaldu dute
Mozorro festa otsailaren 14an antolatu dute (larunbata), 18:00etan. Egun horretan desfilea egingo dute San Bartolome kaletik abiatuta
Urtarrilaren 30era bitartean zabaldu dute Ugaoko mozorro lehiaketan parte hartzeko epea.
Aurtengo inauteriak otsailaren 12tik 17ra izango dira Ugaon, eta Jai Batzordeak, udalerriko Merkatarien Elkartearen laguntzarekin, mozorro-lehiaketaren edizio berri bat antolatu du.
Mozorro festa otsailaren 14an antolatu dute (larunbata), 18:00etan. Egun horretan desfilea egingo dute San Bartolome kaletik abiatuta: “Lehiaketan nahi duten pertsona guztiek parte hartu ahal izango dute, banakako edo taldekako modalitatean”, azaldu dute udal ordezkariek.
1.000 euro banatuko dituzte saritan guztira eta Ugaoko Merkatari Elkarteko establezimenduetan trukatu ahalko dira den-denak. Hiru kategoria bereiziko dira irabazleen artean:
– Banakako haur eta helduena: 50 euro, kategoria bakoitzeko
– Gehienez sei lagunez osatutako taldeak: Lehen saria 200 euro; bigarren saria 100 euro
– Sei lagunetik gorako taldeak: Lehen saria 300 euro; bigarren saria 200 euro
Parte hartzearekin batera, parte-hartzaile bakoitzak eszenatokian emanaldi edo dantza txiki bat eskaini beharko du eta erabiliko den musika izen-ematearekin batera entregatu beharko dute.
Giroa, 2024ko inauterietan // Geuria
Egitaraua | Ugaoko inauteriak 2026
Mozorro festaz gainera, bestelako jarduerak antolatu dituzte Ugaoko jaietan, otsailaren 12tik 17ra bitartean: zanpantzar desfilea, tostada lehiaketa, haurrentzako jarduerak, urteroko Kiskailuaren erretzea…
Otsailak 13, ostirala
Eskolako kalejira, buruhandiak eta haurrentzako ikuskizuna
10:45 Eskolako kalejira: Euskal Inauteriak
18:00 Buruhandiak, Herriaren enparantza eta kale zaharra
19:00 ‘Mugi Boogie’ haurrentzako ikuskizuna, Herriaren enparantza
Otsailak 14, larunbata
Zanpantzar desfilea, tostada lehiaketa, mozorro-desfile eta lehiaketa, musika eta animazioa…
12:00 Zanpantzar kalejira, herriko kaleetan zehar
13:00 Tostada lehiaketa
18:00 Mozorro desfilea Kiskailua eta Sama Siku fanfarrearekin, San Bartolome
19:00 Mozorro Lehiaketa kideen emanaldia + sari banaketa
20:00 Musika giroa, Herriaren enparantza
Otsailak 16, astelehena
Buruhandiak eta puzgarriak
17:00 Buruhandiak, Herriaren enparantza eta kale zaharra
18:00 Puzgarriak, Herriaren enparantza
Otsailak 17, asteartea
Kiskailuaren erretzea, haurrentzako jolasak eta txokolatada
17:30 Umeentzako jolasak
19:00 Kiskailua erre
19:30 Txokolatada, Herriaren enparantza
☉ Ugao
Gazteentzako euskarazko zeramika ikastaroa eskainiko dute Ugaon, otsailetik apirilera
Izena emateko azken eguna urtarrilaren 29a izango da
Otsailaren 2tik apirilaren 22ra bitartean haurrei zuzendutako zeramika monografikoa antolatu du Ugaoko Udalak Hiru Hodietako kultur etxean, 19:00etatik 20:30ak arte.
Guztira 30 orduko ikastaroa izango da eta sei eta 18 urte bitarteko gazteei zuzenduta dago. Izena emateko azken eguna urtarrilaren 29a izango da eta modu bitan egin daiteke: aurrez aurre Jane jauregia edo inprimaki hau betez.
Katixa Agirre Galdakaon izango da otsailaren 9an Leidu Irakurketa Taldearen hitzorduan
Matxitxako kaleko zubia eraisteari ekin diote, Basaurin
Zaratamoko Gutiolo eta Urdinbide auzoak urez hornituko dituen proiektu berriaren hitzarmena onartu dute
Argazkiak | Galdakao eta Altsasu senidetu egin dira inauterien transmisioari jarraipena emateko
Argazkiak | Lokatz artean lehiatu dira Ausartak Mendi Lasterketako korrikalariak Arrigorriagan
Argazkiak | Errege Magoek ilusioa eta gozokiak banatu dituzte Galdakaoko kabalgatan
Bideoa | “Altsasuko Ihauterien garrantzia bermatu nahi dugu Galdakaoko eta Altsasuko udalek”
Bideoa | Chami eta Jon aurkezle finek Korrika aurkeztu dute Galdakao
